शङ्कराचार्यगीतम् Shri Shankaracharya Gitam

(तुने अस् इन् शम्भो महादेव)॥ श्रीशङ्कराचार्यवर्यम्, चन्द्रचूडावतारं भजे ज्ञानमूर्तिम्,श्रीशङ्कराचार्यवर्यम् ॥अद्वैतसिद्धान्तमूलम्, द्वैतवादाख्यमत्तेभपञ्चास्यलीलम्,भस्मत्रिपुण्ड्राङ्कफालम्, सूत्रभाष्यादिनिर्णीतवेदान्तभावम्,श्रीशङ्कराचार्यवर्यम् ॥१॥

(tune as in śambho mahādeva)|| śrīśaṅkarācāryavaryam, candracūḍāvatāraṃ bhaje jñānamūrtim,śrīśaṅkarācāryavaryam ||advaitasiddhāntamūlam, dvaitavādākhyamattebhapañcāsyalīlam,bhasmatripuṇḍrāṅkaphālam, sūtrabhāṣyādinirṇītavedāntabhāvam,śrīśaṅkarācāryavaryam ||1||

नानाविधस्तोत्रगीतैः, सर्वलोकोपकारक्रियायां प्रवृत्तम्,दुर्वादिवादाभ्रवातम्, दूरदूरास्तकामादिदुर्वैरिवृन्दम्,श्रीशङ्कराचार्यवर्यम् ॥२॥

nānāvidhastotragītaiḥ, sarvalokopakārakriyāyāṃ pravṛttam,durvādivādābhravātam, dūradūrāstakāmādidurvairivṛndam,śrīśaṅkarācāryavaryam ||2||

काषायसंवीतगात्रं, यौवनश्रीसमाश्लिष्टसर्वाङ्गमीड्यम्,कारुण्यसम्पूर्णनेत्रम्, मन्दहासोल्लसद्वक्त्रमानन्दपात्रम्,श्रीशङ्कराचार्यवर्यम् ॥ ३॥

kāṣāyasaṃvītagātraṃ, yauvanaśrīsamāśliṣṭasarvāṅgamīḍyam,kāruṇyasampūrṇanetram, mandahāsollasadvaktramānandapātram,śrīśaṅkarācāryavaryam || 3||

शिष्यैश्चतुर्भिस्समेतम्, वामहस्तस्थवेदान्तसिद्धान्तकोशम्,वीरासने सन्निषण्णम्, दक्षहस्ताग्रभागे लसज्ज्ञानमुद्रम्,श्रीशङ्कराचार्यवर्यम् ॥ ४॥

śiṣyaiścaturbhissametam, vāmahastasthavedāntasiddhāntakośam,vīrāsane sanniṣaṇṇam, dakṣahastāgrabhāge lasajjñānamudram,śrīśaṅkarācāryavaryam || 4||

संसारदावाग्नितप्तं ज्ञानवृष्टिप्रदानेन लोकं समस्तंदुःखत्रयान्मोचयन्तम्, नेत्रनिर्वाणसन्दायिरूपं यतीन्द्रम्,श्रीशङ्कराचार्यवर्यम् ॥ ५॥

saṃsāradāvāgnitaptaṃ jñānavṛṣṭipradānena lokaṃ samastaṃduḥkhatrayānmocayantam, netranirvāṇasandāyirūpaṃ yatīndram,śrīśaṅkarācāryavaryam || 5||

गोविन्दयोगीन्द्रशिष्यम्, शारदापीठनिक्षिप्तवागीशदारम्,साक्षात्कृतब्रह्मतत्वम्, षण्मतस्थापकाचार्यकीर्त्या लसन्तम्,श्रीशङ्कराचार्यवर्यम् ॥६॥

govindayogīndraśiṣyam, śāradāpīṭhanikṣiptavāgīśadāram,sākṣātkṛtabrahmatatvam, ṣaṇmatasthāpakācāryakīrtyā lasantam,śrīśaṅkarācāryavaryam ||6||

तत्तन्मठेषु स्वशिष्यान्, स्थापयित्वा स्वयं कामकोट्याख्यपीठे,काञ्चीपुरस्थेऽधिरुह्य, सर्वलोकोपदेशक्रियायां प्रवृत्तम्,श्रीशङ्कराचार्यवर्यम् ॥ ७॥

tattanmaṭheṣu svaśiṣyān, sthāpayitvā svayaṃ kāmakoṭyākhyapīṭhe,kāñcīpurasthe'dhiruhya, sarvalokopadeśakriyāyāṃ pravṛttam,śrīśaṅkarācāryavaryam || 7||

इत्थं गणेशेन गीतं स्तोत्रमेतत् पठेद्यः स्मरन् शङ्करार्यम्,नश्यन्ति पापानि तस्य, ज्ञानलाभश्शुभानां भवेच्चाभिवृद्धिः,श्रीशङ्कराचार्यवर्यम् ॥ ८ ॥

itthaṃ gaṇeśena gītaṃ stotrametat paṭhedyaḥ smaran śaṅkarāryam,naśyanti pāpāni tasya, jñānalābhaśśubhānāṃ bhaveccābhivṛddhiḥ,śrīśaṅkarācāryavaryam || 8 ||

ॐ तत्सत् ।

oṃ tatsat |