गुरुवर्गवन्दना Shri Guruvargavandana

कावेरीतटसञ्जातं कावेरीव सुनिर्मलम् ।शङ्करज्येष्ठशिष्यं तं गुणज्येष्ठं नमाम्यहम् ॥ १॥

kāverītaṭasañjātaṃ kāverīva sunirmalam |śaṅkarajyeṣṭhaśiṣyaṃ taṃ guṇajyeṣṭhaṃ namāmyaham || 1||

नृसिंहसाधकं वन्दे सनन्दनयतीश्वरम् ।गुरुस्नेहाभिषिक्तो यः पद्मपादाभिधां गतः ॥ २॥

nṛsiṃhasādhakaṃ vande sanandanayatīśvaram |gurusnehābhiṣikto yaḥ padmapādābhidhāṃ gataḥ || 2||

योगैश्वर्यवलाद् यो हि मृते वत्से प्रविश्य च ।अजीवयन् मृतं बालं तस्मै नित्यं नमोनमः ॥ ३॥

yogaiśvaryavalād yo hi mṛte vatse praviśya ca |ajīvayan mṛtaṃ bālaṃ tasmai nityaṃ namonamaḥ || 3||

हस्तामलकवद् यस्य ब्रह्मज्ञानमबाधितम् ।तं हस्तामलकाचार्यं भूयो भूयो नतोऽस्म्यहम् ॥ ४॥

hastāmalakavad yasya brahmajñānamabādhitam |taṃ hastāmalakācāryaṃ bhūyo bhūyo nato'smyaham || 4||

श्रीगुरोः सेवनेनैव दिव्यज्ञानसमन्वितः ।ललिताक्षरपद्येन गुरोः स्तोत्रमथाकरोत् ॥ ५॥

śrīguroḥ sevanenaiva divyajñānasamanvitaḥ |lalitākṣarapadyena guroḥ stotramathākarot || 5||

तोटकच्छन्दसा स्तोत्रं कृत्वा गुरुप्रसादकः ।तोटकाख्यां गतो यो वै तस्मै नित्यं नमोनमः ॥ ६॥

toṭakacchandasā stotraṃ kṛtvā guruprasādakaḥ |toṭakākhyāṃ gato yo vai tasmai nityaṃ namonamaḥ || 6||

वादयुद्धच्छलेनैव श्रीगुरोगौरवं व्यधात् ।शास्त्रतत्त्वरहस्यज्ञं तं नमामि सुरेश्वरम् ॥ ७॥

vādayuddhacchalenaiva śrīgurogauravaṃ vyadhāt |śāstratattvarahasyajñaṃ taṃ namāmi sureśvaram || 7||

भाष्यवार्तिककारो यो वेदवेदान्तपारगः ।तमहं सततं वन्दे सुरेश्वरयतीश्वरम् ॥ ८॥

bhāṣyavārtikakāro yo vedavedāntapāragaḥ |tamahaṃ satataṃ vande sureśvarayatīśvaram || 8||

शङ्कराचार्य्यसच्छिष्याः पद्मपादादिसंज्ञकाः ।प्रीयन्तां गुरवो नित्यं हृषीकेशाख्यभिक्षुके ॥ ९॥

śaṅkarācāryyasacchiṣyāḥ padmapādādisaṃjñakāḥ |prīyantāṃ guravo nityaṃ hṛṣīkeśākhyabhikṣuke || 9||

तेषां कृपाकणाभिक्षुः ज्ञानामृतबुभुक्षुकः ।श्रीगुरून् सततं नौति हृषीकेशाख्यभिक्षुकः ॥ १०॥

teṣāṃ kṛpākaṇābhikṣuḥ jñānāmṛtabubhukṣukaḥ |śrīgurūn satataṃ nauti hṛṣīkeśākhyabhikṣukaḥ || 10||

इति श्रीजगन्नाथाश्रमपूज्यपादशिष्यश्रीहृषीकेशाश्रमविरचिताश्रीगुरुवर्गवन्दना समाप्ता ।

iti śrījagannāthāśramapūjyapādaśiṣyaśrīhṛṣīkeśāśramaviracitāśrīguruvargavandanā samāptā |