गुरुस्तोत्रम् २ Gurustotram

समाश्रयेद्गुरुं भक्त्या महाविश्वासपूर्वकम् ।निक्षिपेत् सर्वभारांश्च गुरोः श्रीपादपङ्कजे ॥ १॥

samāśrayedguruṃ bhaktyā mahāviśvāsapūrvakam |nikṣipet sarvabhārāṃśca guroḥ śrīpādapaṅkaje || 1||

गुरुरेव परो धर्मो गुरुरेव परा गतिः ।गुरुरेव परो बन्धुर्गुरुरेव परः स्मृतः ॥ २॥

gurureva paro dharmo gurureva parā gatiḥ |gurureva paro bandhurgurureva paraḥ smṛtaḥ || 2||

गुरुरेव महापापं क्षपयत्यात्मभावतः ।श्रीगुरुभ्यो नम इति गुरुमन्त्रं जपेत यः ॥ ३॥

gurureva mahāpāpaṃ kṣapayatyātmabhāvataḥ |śrīgurubhyo nama iti gurumantraṃ japeta yaḥ || 3||

गुरुभक्त्या विनाशः स्याद्दोषस्यापि गरीयसः ।भविष्यति नवेत्येवं सन्दिग्धो(ग्धे) निरयं व्रजेत् ॥ ४॥

gurubhaktyā vināśaḥ syāddoṣasyāpi garīyasaḥ |bhaviṣyati navetyevaṃ sandigdho(gdhe) nirayaṃ vrajet || 4||

गुरुपादाम्बुजं ध्यायेद्गुरोर्नाम सदा जपेत् ।गुरोर्वार्तां तु कथयेद्गुरोरन्यं न भावयेत् ॥ ५॥

gurupādāmbujaṃ dhyāyedgurornāma sadā japet |gurorvārtāṃ tu kathayedguroranyaṃ na bhāvayet || 5||

गुरुपादौ च शिरसा मनसा वचसा तथा ।यः स्मरेत्सततं भक्त्या सन्तुष्टस्तस्य केशवः ॥ ६॥

gurupādau ca śirasā manasā vacasā tathā |yaḥ smaretsatataṃ bhaktyā santuṣṭastasya keśavaḥ || 6||

हरौ रुष्टे गुरुस्त्राता गुरौ रुष्टे न कश्चन ।गुरुप्रसादात् सर्वेष्टसिद्धिर्भवति नान्यथा ॥ ७॥

harau ruṣṭe gurustrātā gurau ruṣṭe na kaścana |guruprasādāt sarveṣṭasiddhirbhavati nānyathā || 7||

गुरुसंस्मरणं कार्यं सर्वदैव मुमुक्षुभिः ।उत्थाने भोजने स्नाने ग्रन्थारम्भे विशेषतः ॥ ८॥

gurusaṃsmaraṇaṃ kāryaṃ sarvadaiva mumukṣubhiḥ |utthāne bhojane snāne granthārambhe viśeṣataḥ || 8||

गुरुप्रसादो बलवान् न तस्माद्बलवत्तरम् ।यद्गुरुः सुप्रसन्नः सन् दद्यात् तन्नान्यथा भवेत् ॥ ९॥

guruprasādo balavān na tasmādbalavattaram |yadguruḥ suprasannaḥ san dadyāt tannānyathā bhavet || 9||

शुभान् ध्यायन्ति ये कामान् गुरुदेवप्रसादजान् ।इतरानात्मपापोत्थान् तेषां विद्या फलिष्यति ॥ १०॥

śubhān dhyāyanti ye kāmān gurudevaprasādajān |itarānātmapāpotthān teṣāṃ vidyā phaliṣyati || 10||

स्मृत्वा गुरुं पूर्वगुरुमादिमूलगुरूंस्तथा ।देवतां वासुदेवं च विद्याभ्यासी तु सिद्धिभाक् ॥ ११॥

smṛtvā guruṃ pūrvagurumādimūlagurūṃstathā |devatāṃ vāsudevaṃ ca vidyābhyāsī tu siddhibhāk || 11||

ज्ञानादृते नैव मुक्तिर्ज्ञानं नैव गुरोविना ।तस्माद्गुरुं प्रपद्येत जिज्ञासुः श्रेय उत्तमम् ॥ १२॥

jñānādṛte naiva muktirjñānaṃ naiva gurovinā |tasmādguruṃ prapadyeta jijñāsuḥ śreya uttamam || 12||

तत्र भागवतान् धर्मान् शिक्षेद्गुर्वात्मदैवतः ।अमाययानुवृत्या च तुष्येदात्मात्मदो हरिः ॥ १३॥

tatra bhāgavatān dharmān śikṣedgurvātmadaivataḥ |amāyayānuvṛtyā ca tuṣyedātmātmado hariḥ || 13||

अहोभाग्यमहोभाग्यं गुरुपादानुवर्तिनाम् ।ऐहिकामुष्मिकं सौख्यं वर्धते तदनुग्रहात् ॥ १४॥

ahobhāgyamahobhāgyaṃ gurupādānuvartinām |aihikāmuṣmikaṃ saukhyaṃ vardhate tadanugrahāt || 14||

अहो दौर्भाग्यमतुलं विमुखानां हरौ गुरौ ।ऐहिकं ह्रसते सौख्यं दुःखं नारकमेधते ॥ १५॥

aho daurbhāgyamatulaṃ vimukhānāṃ harau gurau |aihikaṃ hrasate saukhyaṃ duḥkhaṃ nārakamedhate || 15||

यद्यत् सत्कृत्यजं पुण्यं तत्सर्वं गुरवेऽर्पयेत् ।तेन तत् सफलं प्रोक्तमन्यथा निष्फलं भवेत् ॥ १६॥

yadyat satkṛtyajaṃ puṇyaṃ tatsarvaṃ gurave'rpayet |tena tat saphalaṃ proktamanyathā niṣphalaṃ bhavet || 16||

गुरुर्गुरुर्गुरुरिति जपतो नास्ति पातकम् ।तस्माद्गुरुप्रसादार्थं यतेत मतिमान्नरः ॥ १७॥

gururgururgururiti japato nāsti pātakam |tasmādguruprasādārthaṃ yateta matimānnaraḥ || 17||

गुरोः सेवा गुरोः स्तोत्रं शिष्यकृत्यं परं स्मृतम् ।दोषदृष्टिरनर्थायेत्युमामाह सदाशिवः ॥ १८॥

guroḥ sevā guroḥ stotraṃ śiṣyakṛtyaṃ paraṃ smṛtam |doṣadṛṣṭiranarthāyetyumāmāha sadāśivaḥ || 18||

अहोभाग्यमहोभाग्यं मध्वमार्गानुयायिनाम् ।दैवं रमापतिर्येषां यद्गुरुर्भारतीपतिः ॥ १९॥

ahobhāgyamahobhāgyaṃ madhvamārgānuyāyinām |daivaṃ ramāpatiryeṣāṃ yadgururbhāratīpatiḥ || 19||

सर्वधर्मान् परित्यज्य गुरुधर्मान् समाचर ।न गुरोरधिकं किञ्चित् पुरुषार्थचतुष्टये ॥ २०॥

sarvadharmān parityajya gurudharmān samācara |na guroradhikaṃ kiñcit puruṣārthacatuṣṭaye || 20||

साधनं विद्यते देवि गुरोराज्ञां न लङ्घयेत् ।देहदात्पितुरेवायं ह्यधिको ज्ञानदानतः ॥ २१॥

sādhanaṃ vidyate devi gurorājñāṃ na laṅghayet |dehadātpiturevāyaṃ hyadhiko jñānadānataḥ || 21||

पिता माता तथा भ्राता सर्वे संसारहेतवः ।गुरुरेकः सदा सेव्यः संसारोद्धरणक्षमः ॥ २२॥

pitā mātā tathā bhrātā sarve saṃsārahetavaḥ |gururekaḥ sadā sevyaḥ saṃsāroddharaṇakṣamaḥ || 22||

गुरुभक्तः सदा सेव्यो गुरुभक्तस्य दर्शने ।मनो मे गाहते देवी कदा द्रक्ष्ये गुरुप्रियम् ॥ २३॥

gurubhaktaḥ sadā sevyo gurubhaktasya darśane |mano me gāhate devī kadā drakṣye gurupriyam || 23||

सर्वे धर्माः कृतास्तेन सर्वतीर्थानि तेन च ।यस्य स्याद्गुरुवाक्येषु भक्तिः सर्वोत्तमोत्तमा ॥ २४॥

sarve dharmāḥ kṛtāstena sarvatīrthāni tena ca |yasya syādguruvākyeṣu bhaktiḥ sarvottamottamā || 24||

शरीरं वसु विज्ञानं वासः कर्म गुणान् असून् ।गुर्वर्थं धारयेद्यस्तु स शिष्यो नेतरः स्मृतः ॥ २५॥

śarīraṃ vasu vijñānaṃ vāsaḥ karma guṇān asūn |gurvarthaṃ dhārayedyastu sa śiṣyo netaraḥ smṛtaḥ || 25||

आचार्यस्य प्रियं कुर्याद्प्राणैरपि धनैरपि ।कर्मणा मनसा वाचा स याति परमां गतिम् ॥ २६॥

ācāryasya priyaṃ kuryādprāṇairapi dhanairapi |karmaṇā manasā vācā sa yāti paramāṃ gatim || 26||

न स्नानसन्ध्ये न च पादसेवनंहरेर्न चार्चा विधिना मया कृता ।निष्कारणं मे गतमायुरल्पकंतस्माद्गुरो मां कृपया समुद्धर ॥ २७॥

na snānasandhye na ca pādasevanaṃharerna cārcā vidhinā mayā kṛtā |niṣkāraṇaṃ me gatamāyuralpakaṃtasmādguro māṃ kṛpayā samuddhara || 27||

कर्मणा मनसा वाचा या चेष्टा मम नित्यशः ।केशवाराधने सा स्याज्जन्मजन्मान्तरेष्वपि ॥ २८॥

karmaṇā manasā vācā yā ceṣṭā mama nityaśaḥ |keśavārādhane sā syājjanmajanmāntareṣvapi || 28||

मादृशो न परः पापी त्वादृशो न दयापरः ।इति मत्वा जगन्नाथ रक्ष मां शरणागतम् ॥ २९॥

mādṛśo na paraḥ pāpī tvādṛśo na dayāparaḥ |iti matvā jagannātha rakṣa māṃ śaraṇāgatam || 29||

कायेन वाचा मनसेन्द्रियैर्वा बुध्यात्मना वानुसृतः स्वभावम् ।करोति यद्यत्सकलम्परस्मै नारायणायेति समर्पयेत्तत् ॥ ३०॥

kāyena vācā manasendriyairvā budhyātmanā vānusṛtaḥ svabhāvam |karoti yadyatsakalamparasmai nārāyaṇāyeti samarpayettat || 30||

इति श्रीगुरुस्तोत्रं सम्पूर्णम् ।

iti śrīgurustotraṃ sampūrṇam |