कावेरीस्तुतिः Kaveri Stuti

कावेरी निम्नगा वारिलहरीपापहारिणी ।तारिणी पापिनामेनां भजेऽहं पापहारिणीम् ॥ १॥

kāverī nimnagā vārilaharīpāpahāriṇī |tāriṇī pāpināmenāṃ bhaje'haṃ pāpahāriṇīm || 1||

स्वसा कृष्णानद्यास्त्रिजगदनवद्यामितगुणा ।स्वसाराद्यावद्यामखिलमलपद्यामतिघृणा ॥नृणां गोप्त्र्याच्छाद्य दरमसृतपद्यां हितकरीम् ।व्यधात्सा कावेरी सरिदवतु नः पुण्यलहरू ॥ २॥

svasā kṛṣṇānadyāstrijagadanavadyāmitaguṇā |svasārādyāvadyāmakhilamalapadyāmatighṛṇā ||nṛṇāṃ goptryācchādya daramasṛtapadyāṃ hitakarīm |vyadhātsā kāverī saridavatu naḥ puṇyalaharū || 2||

उदीचीस्था गङ्गा पृथुतरतरङ्गातिकपटा ।भटान्याम्यानुच्चैर्दरकरगिरा या जयति हि ॥इयं कावेरी तु प्रसभमपि तानन्तिकगतान्निवत्र्य स्वर्लोकं नयति निजलोकं श्रुतिमता ॥ ३॥

udīcīsthā gaṅgā pṛthutarataraṅgātikapaṭā |bhaṭānyāmyānuccairdarakaragirā yā jayati hi ||iyaṃ kāverī tu prasabhamapi tānantikagatānnivatrya svarlokaṃ nayati nijalokaṃ śrutimatā || 3||

अतो जल्पं जल्पं सरिदमृतकल्पं तव यश।स्तटे भ्रामं भ्रामं तव खलु निकामं शुचि यशः ॥मुदा मज्जं मज्जं तव पयसि जन्माद्यकहरम् ।सदा स्मारं स्मारं तव भवहमाहात्म्यमवरम् ॥ ४॥

ato jalpaṃ jalpaṃ saridamṛtakalpaṃ tava yaśa|staṭe bhrāmaṃ bhrāmaṃ tava khalu nikāmaṃ śuci yaśaḥ ||mudā majjaṃ majjaṃ tava payasi janmādyakaharam |sadā smāraṃ smāraṃ tava bhavahamāhātmyamavaram || 4||

अये कावेरि त्वत्तटसमटनादेवमनिशम् ।नयेत्कालं मेलं तव किल जलं पुण्यधुनि शम् ।तटे श्वोतारण्यप्रभृतिवरकाशीसदृशषण्।महाक्षेत्राण्यन्यान्यपि तव जयन्त्याधिविलये ॥ ५॥

aye kāveri tvattaṭasamaṭanādevamaniśam |nayetkālaṃ melaṃ tava kila jalaṃ puṇyadhuni śam |taṭe śvotāraṇyaprabhṛtivarakāśīsadṛśaṣaṇ|mahākṣetrāṇyanyānyapi tava jayantyādhivilaye || 5||

कावेरि सिन्धो ननु दीनबन्धोकारुण्यसिन्धो भवघोरसिन्धोः ।मां तारय त्वं पतितोऽग्रतस्तेतत्राप्यपेक्षार्हति साध्विनस्ते ॥ ६॥

kāveri sindho nanu dīnabandhokāruṇyasindho bhavaghorasindhoḥ |māṃ tāraya tvaṃ patito'gratastetatrāpyapekṣārhati sādhvinaste || 6||

पतितोद्धरणाय साध्वि चेदवतारस्तव भूतले न चेत् ।पतितं हि समुद्धरिष्यसिस्वजनुस्त्वं विफलं करिष्यसि ॥ ७॥

patitoddharaṇāya sādhvi cedavatārastava bhūtale na cet |patitaṃ hi samuddhariṣyasisvajanustvaṃ viphalaṃ kariṣyasi || 7||

कृच्छ्रादिकव्रतमिहाचरणीयमग्रेनेप्येथ सद्गतिमितीच्छसि चेत्त्वदग्रे ।वच्मि प्रसह्य खलु सह्यसुते पुनासित्वं सह्य इत्यृषिवचो विमतं करोषि ॥ ८॥

kṛcchrādikavratamihācaraṇīyamagrenepyetha sadgatimitīcchasi cettvadagre |vacmi prasahya khalu sahyasute punāsitvaṃ sahya ityṛṣivaco vimataṃ karoṣi || 8||

दीक्षा गृहीताजगरी गरीयसीयद्रोधसि श्रीगुरुणारुणाभसा ।कायाधवायापि मुदर्पितास्तुवत्कावेरिकां तां खलु वासुदेवः ॥ ९॥

dīkṣā gṛhītājagarī garīyasīyadrodhasi śrīguruṇāruṇābhasā |kāyādhavāyāpi mudarpitāstuvatkāverikāṃ tāṃ khalu vāsudevaḥ || 9||

इति श्रीवासुदेवानन्दसरस्वतीविरचिता कावेरीस्तुतिः समाप्ता ।

iti śrīvāsudevānandasarasvatīviracitā kāverīstutiḥ samāptā |