दुर्गास्तवः २ Shri Durgastavah (2)

सन्नद्धसिंहस्कन्धस्थां स्वर्णवर्णां मनोरमाम् ।पूर्णेन्दुवदनां दुर्गां वर्णयामि गुणार्णवाम् ॥ १॥

sannaddhasiṃhaskandhasthāṃ svarṇavarṇāṃ manoramām |pūrṇenduvadanāṃ durgāṃ varṇayāmi guṇārṇavām || 1||

किरीटहारग्रैवेयनूपुराङ्गदकङ्कणैः ।रत्नकाञ्च्या रत्नचित्रकुचकञ्चुकतेजसा ॥ २॥

kirīṭahāragraiveyanūpurāṅgadakaṅkaṇaiḥ |ratnakāñcyā ratnacitrakucakañcukatejasā || 2||

विराजमाना रुचिराम्बरा किङ्किणिमण्डिता ।रत्नमेखलया रत्नवासोपरि विभूषिता ॥ ३॥

virājamānā rucirāmbarā kiṅkiṇimaṇḍitā |ratnamekhalayā ratnavāsopari vibhūṣitā || 3||

वीरशृङ्खलया शोभिचारुपादसरोरुहा ।रत्नचित्राङ्गुलीमुद्रा रत्नकुण्डलमण्डिता ॥ ४॥

vīraśṛṅkhalayā śobhicārupādasaroruhā |ratnacitrāṅgulīmudrā ratnakuṇḍalamaṇḍitā || 4||

विचित्रचूडामणिना रत्नोद्यत्तिलकेन च ।अनर्घ्यनासामणिना शोभिताऽऽस्यसरोरुहा ॥ ५॥

vicitracūḍāmaṇinā ratnodyattilakena ca |anarghyanāsāmaṇinā śobhitā''syasaroruhā || 5||

भुजकीर्त्या रत्नचित्रकण्ठसूत्रेण चाङ्किता ।पद्माक्षिणी सुबिम्बोष्ठी पद्मगर्भादिभिः स्तुता ॥ ६॥

bhujakīrtyā ratnacitrakaṇṭhasūtreṇa cāṅkitā |padmākṣiṇī subimboṣṭhī padmagarbhādibhiḥ stutā || 6||

कबरीभारविन्यस्तपुष्पस्तबकविस्तरा ।कर्णनीलोत्पलरुचा लसद् भ्रूमण्डलत्विषा ॥ ७॥

kabarībhāravinyastapuṣpastabakavistarā |karṇanīlotpalarucā lasad bhrūmaṇḍalatviṣā || 7||

कुन्तलानां च सन्तत्या शोभमाना शुभप्रदा ।तनुमध्या विशालोरःस्थला पृथुनितम्बिनी ॥ ८॥

kuntalānāṃ ca santatyā śobhamānā śubhapradā |tanumadhyā viśāloraḥsthalā pṛthunitambinī || 8||

चारुदीर्घभुजा कम्बुग्रीवा जङ्घायुगप्रभा ।असिचर्मगदाशूलधनुर्बाणाङ्कुशादिना ॥ ९॥

cārudīrghabhujā kambugrīvā jaṅghāyugaprabhā |asicarmagadāśūladhanurbāṇāṅkuśādinā || 9||

वराभयाभ्यां चक्रेण शङ्खेन च लसत्करा ।दंष्ट्राग्रभीषणास्योत्थ हुङ्कारार्दितदानवा ॥ १०॥

varābhayābhyāṃ cakreṇa śaṅkhena ca lasatkarā |daṃṣṭrāgrabhīṣaṇāsyottha huṅkārārditadānavā || 10||

भयङ्करी सुरारीणां सुराणामभयङ्करी ।मुकुन्दकिङ्करी विष्णुभक्तानां मौक्तशङ्करी ॥ ११॥

bhayaṅkarī surārīṇāṃ surāṇāmabhayaṅkarī |mukundakiṅkarī viṣṇubhaktānāṃ mauktaśaṅkarī || 11||

सुरस्त्रीकिङ्करीभिश्च वृता क्षेमङ्करी च नः ।आदौ मुखोद्गीर्णनानाऽऽम्नाया सर्गकरी पुनः ॥ १२॥

surastrīkiṅkarībhiśca vṛtā kṣemaṅkarī ca naḥ |ādau mukhodgīrṇanānā''mnāyā sargakarī punaḥ || 12||

निसर्गमुक्ता भक्तानां त्रिवर्गफलदायिनी ।निशुम्भशुम्भसंहर्त्री महिषासुरमर्दिनी ॥ १३॥

nisargamuktā bhaktānāṃ trivargaphaladāyinī |niśumbhaśumbhasaṃhartrī mahiṣāsuramardinī || 13||

तामसानां तमःप्राप्त्यै मिथ्याज्ञानप्रवर्तिका ।तमोभिमानिनी पायाद्दुर्गा स्वर्गापवर्गदा ॥ १४॥

tāmasānāṃ tamaḥprāptyai mithyājñānapravartikā |tamobhimāninī pāyāddurgā svargāpavargadā || 14||

इमं दुर्गास्तवं पुण्यं वादिराजयतीरितम् ।पठन्विजयते शत्रून्मृत्युं दुर्गाणि चोत्तरेत् ॥ १५॥

imaṃ durgāstavaṃ puṇyaṃ vādirājayatīritam |paṭhanvijayate śatrūnmṛtyuṃ durgāṇi cottaret || 15||

॥ इति श्रीवादिराजयतिकृतः श्रीदुर्गास्तवः सम्पूर्णः ॥

|| iti śrīvādirājayatikṛtaḥ śrīdurgāstavaḥ sampūrṇaḥ ||