सुरभिस्तोत्रम् (इन्द्रकृतं देवीभागवतपुराणान्तर्गतं ब्रह्मवैवर्तपुराणान्तर्गतं च) Surabhistotram

पुरन्दर उवाच ।नमो देव्यै महादेव्यै सुरभ्यै च नमो नमः ।गवां बीजस्वरूपायै नमस्ते जगदम्बिके ॥ १॥

purandara uvāca |namo devyai mahādevyai surabhyai ca namo namaḥ |gavāṃ bījasvarūpāyai namaste jagadambike || 1||

नमो राधाप्रियायै च पद्मांशायै नमो नमः ।नमः कृष्णप्रियायै च गवां मात्रे नमो नमः ॥ २॥

namo rādhāpriyāyai ca padmāṃśāyai namo namaḥ |namaḥ kṛṣṇapriyāyai ca gavāṃ mātre namo namaḥ || 2||

कल्पवृक्षस्वरूपायै सर्वेषां सततं परम् ।श्रीदायै धनदायै च बुद्धिदायै नमो नमः ॥ ३॥

kalpavṛkṣasvarūpāyai sarveṣāṃ satataṃ param |śrīdāyai dhanadāyai ca buddhidāyai namo namaḥ || 3||

शुभदायै प्रसन्नायै गोप्रदायै नमो नमः ।यशोदायै सौख्यदायै धर्मदायै नमो नमः ॥ ४॥

śubhadāyai prasannāyai gopradāyai namo namaḥ |yaśodāyai saukhyadāyai dharmadāyai namo namaḥ || 4||

स्तोत्रस्मरणमात्रेण तुष्टा हृष्टा जगत्प्रसूः ।आविर्बभूव तत्रैव ब्रह्मलोके सनातनी ॥ ५॥

stotrasmaraṇamātreṇa tuṣṭā hṛṣṭā jagatprasūḥ |āvirbabhūva tatraiva brahmaloke sanātanī || 5||

महेन्द्राय वरं दत्त्वा वाञ्छितं सर्वदुर्लभम् ।जगाम सा च गोलोकं ययुर्देवादयो गृहम् ॥ ६॥

mahendrāya varaṃ dattvā vāñchitaṃ sarvadurlabham |jagāma sā ca golokaṃ yayurdevādayo gṛham || 6||

बभूव विश्वं सहसा दुग्धपूर्णं च नारद ।दुग्धाद्घृतं ततो यज्ञस्ततः प्रीतिः सुरस्य च ॥ ७॥

babhūva viśvaṃ sahasā dugdhapūrṇaṃ ca nārada |dugdhādghṛtaṃ tato yajñastataḥ prītiḥ surasya ca || 7||

इदं स्तोत्रं महापुण्यं भक्तियुक्तश्च यः पठेत् ।स गोमान् धनवांश्चैव कीर्तिवान् पुण्यवान् भवेत ॥ ८॥

idaṃ stotraṃ mahāpuṇyaṃ bhaktiyuktaśca yaḥ paṭhet |sa gomān dhanavāṃścaiva kīrtivān puṇyavān bhaveta || 8||

सुस्नातः सर्वतीर्थेषु सर्वयज्ञेषु दीक्षितः ।इह लोके सुखं भुक्त्वा यात्यन्ते कृष्णमन्दिरम् ॥ ९॥

susnātaḥ sarvatīrtheṣu sarvayajñeṣu dīkṣitaḥ |iha loke sukhaṃ bhuktvā yātyante kṛṣṇamandiram || 9||

सुचिरं निवसेत्तत्र कुरुते कृष्णसेवनम् ।न पुनर्भवनं तस्य ब्रह्मपुत्रो भवे भवेत् ॥ १०॥

suciraṃ nivasettatra kurute kṛṣṇasevanam |na punarbhavanaṃ tasya brahmaputro bhave bhavet || 10||

इति श्रीब्रह्मवैवर्तपुराणे प्रकृतिखण्डेइन्द्रकृतं सुरभिस्तोत्रं समाप्तम् ॥देवीभागवतपुराणे नवमस्कन्धे अध्याय ४९

iti śrībrahmavaivartapurāṇe prakṛtikhaṇḍeindrakṛtaṃ surabhistotraṃ samāptam ||devībhāgavatapurāṇe navamaskandhe adhyāya 49