सर्वदेवतामन्त्रस्तोत्रम् Purushottamaproktam Sarvadevatamantra Stotram

श्रीनारायणीश्रीरुवाच ।कस्य मन्त्रस्य तस्यास्तु जपो विधिश्च कीदृशः ।वद मे भगवन्नेतत् सर्वलोकाभिकाङ्क्षितम् ॥ ६५॥

śrīnārāyaṇīśrīruvāca |kasya mantrasya tasyāstu japo vidhiśca kīdṛśaḥ |vada me bhagavannetat sarvalokābhikāṅkṣitam || 65||

श्रीपुरुषोत्तम उवाच ।शृणु नारायणीश्रि! त्वं पदार्थाः शब्दबोधिताः ।नित्यशब्दात्मको वेदो मन्त्रास्तत्रोत्तमा मताः ॥ ६६॥

śrīpuruṣottama uvāca |śṛṇu nārāyaṇīśri! tvaṃ padārthāḥ śabdabodhitāḥ |nityaśabdātmako vedo mantrāstatrottamā matāḥ || 66||

श्रेष्ठास्तत्र हरेर्मन्त्राः लक्ष्मीमन्त्रा सदोत्तमाः ।दुर्गायाश्च गणेशस्य रवेः शम्भोर्विभावसोः ॥ ६७॥

śreṣṭhāstatra harermantrāḥ lakṣmīmantrā sadottamāḥ |durgāyāśca gaṇeśasya raveḥ śambhorvibhāvasoḥ || 67||

मन्त्राणां चोत्तमा मन्त्राः महालक्ष्म्या भवन्ति हि ।श्यामायाः कम्भराया वै वदामि ते निबोध माम् ॥ ६८॥

mantrāṇāṃ cottamā mantrāḥ mahālakṣmyā bhavanti hi |śyāmāyāḥ kambharāyā vai vadāmi te nibodha mām || 68||

प्रातरुत्थाय मां नत्वा स्नात्वा शुभासनस्थिता ।स्मर स्वमस्तके लक्ष्मि दिव्यं कमलमुज्ज्वलम् ॥ ६९॥

prātarutthāya māṃ natvā snātvā śubhāsanasthitā |smara svamastake lakṣmi divyaṃ kamalamujjvalam || 69||

सहस्रपत्रशोभाड्यं सकेसरसकर्णिकम् ।तत्र श्रीसद्गरुं ध्यात्वा प्रसन्नं करुणामयम् ॥ ७०॥

sahasrapatraśobhāḍyaṃ sakesarasakarṇikam |tatra śrīsadgaruṃ dhyātvā prasannaṃ karuṇāmayam || 70||

श्रीमद्गोपालकृष्णाख्यं पितरं सद्गुरुं परम् ।आचम्य चोर्ध्वपुण्ड्रं सचन्द्रं कृत्वा ततः परम् ॥ ७१॥

śrīmadgopālakṛṣṇākhyaṃ pitaraṃ sadguruṃ param |ācamya cordhvapuṇḍraṃ sacandraṃ kṛtvā tataḥ param || 71||

स्कन्धे कृत्वा पट्टके च हृदि धृत्वा परेश्वरीम् ।अन्तःशुद्धिमती भूत्वा सन्ध्यावन्दनमाचर ॥ ७२॥

skandhe kṛtvā paṭṭake ca hṛdi dhṛtvā pareśvarīm |antaḥśuddhimatī bhūtvā sandhyāvandanamācara || 72||

अश्वत्थपत्राकारेण पात्रेण सकुशाक्षतम् ।सपुष्पचन्दनं चार्घ्यं महालक्ष्म्यै प्रदेहि तत् ॥ ७३॥

aśvatthapatrākāreṇa pātreṇa sakuśākṣatam |sapuṣpacandanaṃ cārghyaṃ mahālakṣmyai pradehi tat || 73||

त्रिरर्घ्यं सम्प्रदायाऽथ तर्पयित्वा जलेन च ।होमभूमिं प्रगत्वैव सर्वशृङ्गारशोभिता ॥ ७४॥

trirarghyaṃ sampradāyā'tha tarpayitvā jalena ca |homabhūmiṃ pragatvaiva sarvaśṛṅgāraśobhitā || 74||

सर्वपूजादिसामग्रीसहिता चासनस्थिता ।अङ्गन्यासान् कुरु लक्ष्मि तान्निबोध मयोदितान् ॥ ७५॥

sarvapūjādisāmagrīsahitā cāsanasthitā |aṅganyāsān kuru lakṣmi tānnibodha mayoditān || 75||

ओमनादिपरब्रह्मेश्वर्यै शिरसि मे नमः ।ओमनादिकृष्णनारायण्यै भाले च मे नमः ॥ ७६॥

omanādiparabrahmeśvaryai śirasi me namaḥ |omanādikṛṣṇanārāyaṇyai bhāle ca me namaḥ || 76||

ओमनादिवासुदेवीलक्ष्म्यै मे नेत्रयोर्नमः ।ओमनादिब्रह्मलक्ष्म्यै मुखे मे ते नमो नमः ॥ ७७॥

omanādivāsudevīlakṣmyai me netrayornamaḥ |omanādibrahmalakṣmyai mukhe me te namo namaḥ || 77||

ओमनादिकम्भरालक्ष्म्यै च कण्ठेऽस्तु मे नमः ।ओमनादिमहालक्ष्म्यै हृदये मे च ते नमः ॥ ७८॥

omanādikambharālakṣmyai ca kaṇṭhe'stu me namaḥ |omanādimahālakṣmyai hṛdaye me ca te namaḥ || 78||

ओमनादिश्रीनरायण्यै नमस्ते ममोदरे ।ओमनादिवैष्णव्यै ते नाभौ मम नमो नमः ॥ ७९॥

omanādiśrīnarāyaṇyai namaste mamodare |omanādivaiṣṇavyai te nābhau mama namo namaḥ || 79||

ओमनादिललितायै जघने ते च मे नमः ।ओमनादिश्रियै चाऽस्तु नमः सक्थ्नोश्च मे सदा ॥ ८०॥

omanādilalitāyai jaghane te ca me namaḥ |omanādiśriyai cā'stu namaḥ sakthnośca me sadā || 80||

ओमनादिकमलायै नमो जान्वोश्च मेऽस्तु ते ।ओमनादिरमायै ते नमोऽस्तु पादयोर्मम ॥ ८१॥

omanādikamalāyai namo jānvośca me'stu te |omanādiramāyai te namo'stu pādayormama || 81||

ओमनादिहरिण्यै ते करयोर्मे नमोऽस्तु ते ।ओमनादिमहामात्रे सर्वतस्ते नमो नमः ॥ ८२॥

omanādihariṇyai te karayorme namo'stu te |omanādimahāmātre sarvataste namo namaḥ || 82||

ओमनादिपद्मायै द्विहस्ततलयोस्ते नमः ।ओमनादिरक्षित्र्यै ते पृष्ठदेशे नमो नमः ॥ ८३॥

omanādipadmāyai dvihastatalayoste namaḥ |omanādirakṣitryai te pṛṣṭhadeśe namo namaḥ || 83||

ओमनादिहिरण्यायै रम्याङ्गेषु च ते नमः ।ओमनादिसुवर्णायै भाग्यरेखासु ते नमः ॥ ८४॥

omanādihiraṇyāyai ramyāṅgeṣu ca te namaḥ |omanādisuvarṇāyai bhāgyarekhāsu te namaḥ || 84||

ओमनादिकुमार्यै ते शीलधर्मे नमो नमः ।ओमनादिजनन्यै ते सर्वाङ्गेषु नमो नमः ॥ ८५॥

omanādikumāryai te śīladharme namo namaḥ |omanādijananyai te sarvāṅgeṣu namo namaḥ || 85||

एवं न्यासान् विनिर्वर्त्य ध्यायस्व श्रीपुराधिपाम् ।ध्यायस्व श्रीपुरं चापि श्रीपुरेशीश्वरं च माम् ॥ ८६॥

evaṃ nyāsān vinirvartya dhyāyasva śrīpurādhipām |dhyāyasva śrīpuraṃ cāpi śrīpureśīśvaraṃ ca mām || 86||

सुवर्णनिर्मितां मूर्तिमावाहय ततः परम् ।आसनं सम्प्रदेहि त्वं पाद्यमर्घ्यं ततः परम् ॥ ८७॥

suvarṇanirmitāṃ mūrtimāvāhaya tataḥ param |āsanaṃ sampradehi tvaṃ pādyamarghyaṃ tataḥ param || 87||

आचमनं जलं पञ्चामृतस्नानं प्रकारय ।सुगन्धितैलसाराद्यैः प्रमर्दय परेश्वरीम् ॥ ८८॥

ācamanaṃ jalaṃ pañcāmṛtasnānaṃ prakāraya |sugandhitailasārādyaiḥ pramardaya pareśvarīm || 88||

आभिषेकं कारयित्वा वस्त्रभूषार्पणं कुरु ।सर्वं शृङ्गारं सौभाग्योत्तमं धूपं प्रदीपकम् ॥ ८९॥

ābhiṣekaṃ kārayitvā vastrabhūṣārpaṇaṃ kuru |sarvaṃ śṛṅgāraṃ saubhāgyottamaṃ dhūpaṃ pradīpakam || 89||

नमस्कारं दण्डवच्चाऽरार्त्रिकं च प्रदक्षिणम् ।नैवेद्यं विविधं भोज्यं भक्ष्यं चोष्यं च लेह्यकम् ॥ ९०॥

namaskāraṃ daṇḍavaccā'rārtrikaṃ ca pradakṣiṇam |naivedyaṃ vividhaṃ bhojyaṃ bhakṣyaṃ coṣyaṃ ca lehyakam || 90||

जलं शाकादि वै पेयं दुग्धसारं च पायसम् ।जलपानं नागवल्लीदलताम्बूलकं फलम् ॥ ९१॥

jalaṃ śākādi vai peyaṃ dugdhasāraṃ ca pāyasam |jalapānaṃ nāgavallīdalatāmbūlakaṃ phalam || 91||

प्रदेहि श्रीमहालक्ष्म्यै क्षमापराधनं वृणु ।पुष्पाञ्जलिं परिहारं कृत्वा स्वोद्यममाचर ॥ ९२॥

pradehi śrīmahālakṣmyai kṣamāparādhanaṃ vṛṇu |puṣpāñjaliṃ parihāraṃ kṛtvā svodyamamācara || 92||

ततश्च तुलसीमालां धृत्वा मन्त्रं जप प्रिये ।महालक्ष्म्या महामन्त्रं जप लक्ष्मि मम प्रियम् ॥ ९३॥

tataśca tulasīmālāṃ dhṛtvā mantraṃ japa priye |mahālakṣmyā mahāmantraṃ japa lakṣmi mama priyam || 93||

सर्वार्थसाधकं सर्वानर्थानां नाशकं प्रभुम् ।उदङ्मुखा प्राङ्मुखा वा जप श्रीसन्निधौ सदा ॥ ९४॥

sarvārthasādhakaṃ sarvānarthānāṃ nāśakaṃ prabhum |udaṅmukhā prāṅmukhā vā japa śrīsannidhau sadā || 94||

ॐ महालक्ष्म्यै विद्महै महाविष्णुपत्न्यै धीमहि ।तन्नो महालक्ष्मीः प्रचोदयात् ।ॐ श्रीं महालक्ष्म्यै नमः ॐ ह्रीं क्लीं श्रीं फट् स्वाहा ॥ ९५॥

oṃ mahālakṣmyai vidmahai mahāviṣṇupatnyai dhīmahi |tanno mahālakṣmīḥ pracodayāt |oṃ śrīṃ mahālakṣmyai namaḥ oṃ hrīṃ klīṃ śrīṃ phaṭ svāhā || 95||

षट्त्रिंशल्लक्षसङ्ख्यास्तु जपन् सिद्धिर्भविष्यति ।तद्दशांशस्तु होमः स्यात् तद्दशांशं तु तर्पणम् ॥ ९६॥

ṣaṭtriṃśallakṣasaṅkhyāstu japan siddhirbhaviṣyati |taddaśāṃśastu homaḥ syāt taddaśāṃśaṃ tu tarpaṇam || 96||

तद्दशांशं तु भक्तानां भोजनं समुपाचर ।एवं मन्त्रो भवेत् सिद्धः काम्यजपाँस्ततः कुरु ॥ ९७॥

taddaśāṃśaṃ tu bhaktānāṃ bhojanaṃ samupācara |evaṃ mantro bhavet siddhaḥ kāmyajapām̐stataḥ kuru || 97||

लक्षमात्रं जपित्वा तु मनुष्यान् वशमानयेत् ।नारीर्द्विलक्षजाप्येन त्रिलक्षैस्तु नृपाँस्तथा ॥ ९८॥

lakṣamātraṃ japitvā tu manuṣyān vaśamānayet |nārīrdvilakṣajāpyena trilakṣaistu nṛpām̐stathā || 98||

चतुर्लक्षैर्नागकन्याः पातालस्त्रीस्तु पञ्चभिः ।षड्लक्षैर्भूसुन्दरीश्च सुराणीः सप्तलक्षकैः ॥ ९९॥

caturlakṣairnāgakanyāḥ pātālastrīstu pañcabhiḥ |ṣaḍlakṣairbhūsundarīśca surāṇīḥ saptalakṣakaiḥ || 99||

अष्टलक्षैर्देवताश्च गीर्वाणान्नवलक्षकैः ।दशलक्षैश्च वै पितॄन्नेकादशैः सुरेश्वरान् ॥ १००॥

aṣṭalakṣairdevatāśca gīrvāṇānnavalakṣakaiḥ |daśalakṣaiśca vai pitṝnnekādaśaiḥ sureśvarān || 100||

द्वादशलक्षजापैश्च सिद्धीर्वशा नयेत्तथा ।लक्ष्मीवान् धनवान् स्याच्च स्मृद्धिमान् स भवेत्तथा ॥ १०१॥

dvādaśalakṣajāpaiśca siddhīrvaśā nayettathā |lakṣmīvān dhanavān syācca smṛddhimān sa bhavettathā || 101||

यथेष्टं लभते सर्वमैश्वर्यं दैवतं तथा ।ध्यायन्तस्तां जपन्तस्तां लभन्ते महतीं श्रियम् ॥ १०२॥

yatheṣṭaṃ labhate sarvamaiśvaryaṃ daivataṃ tathā |dhyāyantastāṃ japantastāṃ labhante mahatīṃ śriyam || 102||

सम्प्राप्यते सिद्धिरेषा नाऽसद्भिस्तु कदाचन ।इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे११९अध्यायान्तर्गतं पुरुषोत्तमप्रोक्तं सर्वदेवतामन्त्रस्तोत्रं सम्पूर्णम् ।लक्ष्मीनारायणीयसंहिता । खण्ड ३। अध्याय ११९/६५१०२॥लक्ष्मीनारायणीयसंहिता । खण्ड ३। अध्याय ११९/६५-१०२॥

samprāpyate siddhireṣā nā'sadbhistu kadācana |iti śrīlakṣmīnārāyaṇīyasaṃhitāyāḥ dvāparayugasantānātmakasya tṛtīyakhaṇḍe119adhyāyāntargataṃ puruṣottamaproktaṃ sarvadevatāmantrastotraṃ sampūrṇam |lakṣmīnārāyaṇīyasaṃhitā | khaṇḍa 3| adhyāya 119/65102||lakṣmīnārāyaṇīyasaṃhitā | khaṇḍa 3| adhyāya 119/65-102||