नवाक्षरीस्तोत्रम् Navaksharistotram

श्रीगुरुचरणसरोजं श्रीकरभवतरणसुकरदृढनावम् ।मच्चितमधुपझङ्कृतमानन्दं नौमि शाङ्करं शरण्यम् ॥ १॥

śrīgurucaraṇasarojaṃ śrīkarabhavataraṇasukaradṛḍhanāvam |maccitamadhupajhaṅkṛtamānandaṃ naumi śāṅkaraṃ śaraṇyam || 1||

ऐन्द्रधनुर्मरतकमामैरावतनाथगीर्भिरभ्यर्च्याम् ।ऐङ्कारार्थस्वरूपामैशानीनाथसेवितां वन्दे ॥ २॥

aindradhanurmaratakamāmairāvatanāthagīrbhirabhyarcyām |aiṅkārārthasvarūpāmaiśānīnāthasevitāṃ vande || 2||

ह्रीनतदैत्यसमूहां हृद्यां सुरलोकसेविताङ्घ्रियुगाम् ।ह्रींकारान्त्यसरूपां हृदयविलासप्रचोदितां वन्दे ॥ ३॥

hrīnatadaityasamūhāṃ hṛdyāṃ suralokasevitāṅghriyugām |hrīṃkārāntyasarūpāṃ hṛdayavilāsapracoditāṃ vande || 3||

क्लींकारकामजननीं क्लीमितिशब्दप्रपूरितदिगन्ताम् ।क्लीबस्त्रीपुंशब्दक्रीडारूपां नमामि विश्वमयीम् ॥ ४॥

klīṃkārakāmajananīṃ klīmitiśabdaprapūritadigantām |klībastrīpuṃśabdakrīḍārūpāṃ namāmi viśvamayīm || 4||

चामरबिभ्रद्वाणीचन्द्रसजातासुसेव्यपार्श्वयुगाम् ।चरणतलमहिषमुण्डां चापादिकरां नमामि चामुण्डाम् ॥ ५॥

cāmarabibhradvāṇīcandrasajātāsusevyapārśvayugām |caraṇatalamahiṣamuṇḍāṃ cāpādikarāṃ namāmi cāmuṇḍām || 5||

मुण्डमणिहारकण्ठीं मुकुरकपोलप्रभासुशोभमुखीम् ।मुहुरास्फालितधनुषं मुरहरभागिनीं नमामि मुग्धतनुम् ॥ ६॥

muṇḍamaṇihārakaṇṭhīṃ mukurakapolaprabhāsuśobhamukhīm |muhurāsphālitadhanuṣaṃ muraharabhāginīṃ namāmi mugdhatanum || 6||

डाकिन्याद्यभितुष्टां डमरुकनादेन पूरितदिगन्ताम् ।डम्भाभिमानहन्त्रीं डामरतन्त्रप्रकाशितां वन्दे ॥ ७॥

ḍākinyādyabhituṣṭāṃ ḍamarukanādena pūritadigantām |ḍambhābhimānahantrīṃ ḍāmaratantraprakāśitāṃ vande || 7||

यैवर्णसत्यमायायस्यै दत्तान्यायुधानि शक्राद्यैः ।यौवनमदसाम्राज्यायै तस्यै नमोऽस्तु विद्यायै ॥ ८॥

yaivarṇasatyamāyāyasyai dattānyāyudhāni śakrādyaiḥ |yauvanamadasāmrājyāyai tasyai namo'stu vidyāyai || 8||

विश्वोत्तीर्णां विद्यां विविधजगच्चित्रकल्पनारूपाम् ।वियदादिसृष्टिहेतुं विश्वासैकप्रकाशितां नौमि ॥ ९॥

viśvottīrṇāṃ vidyāṃ vividhajagaccitrakalpanārūpām |viyadādisṛṣṭihetuṃ viśvāsaikaprakāśitāṃ naumi || 9||

चेतसि नितरां वासितचेतोमयि चैत्यचेतने चतुरे ।चम्पककलिकानासे चामीकरभासुराङ्गि नौमि त्वाम् ॥ १०॥

cetasi nitarāṃ vāsitacetomayi caityacetane cature |campakakalikānāse cāmīkarabhāsurāṅgi naumi tvām || 10||

अक्षरनवाक्षरीयं निक्षेपमयी सुवाक्सुधारूपा ।एतत् स्तोत्रम् पठतां यच्छति सौभाग्यकीर्तिपुष्टिधृतीः ॥ ११॥

akṣaranavākṣarīyaṃ nikṣepamayī suvāksudhārūpā |etat stotram paṭhatāṃ yacchati saubhāgyakīrtipuṣṭidhṛtīḥ || 11||

॥ इत्यानन्दनाथपादपद्मोपजीविना काश्यपगोत्रोत्पन्नेनान्ध्रेणत्यागराजनाम्ना विरचितं नवाक्षरीस्तोत्रं सम्पूर्णम् ॥

|| ityānandanāthapādapadmopajīvinā kāśyapagotrotpannenāndhreṇatyāgarājanāmnā viracitaṃ navākṣarīstotraṃ sampūrṇam ||