नैरात्माष्टकस्तोत्रम् Nairatmashtaka Stotram

निरालम्बनिराकारनिर्विकल्पस्वरूपिणी ।नैरात्मा वरदा देवी नित्यमेव नमोऽस्तु ते ॥ १॥

nirālambanirākāranirvikalpasvarūpiṇī |nairātmā varadā devī nityameva namo'stu te || 1||

एकवक्त्रां त्रिनेत्रां च ऊर्ध्वपिङ्गलमूर्धजाम् ।करे कर्तिकपालां च नमामि विश्वमातरीम् ॥ २॥

ekavaktrāṃ trinetrāṃ ca ūrdhvapiṅgalamūrdhajām |kare kartikapālāṃ ca namāmi viśvamātarīm || 2||

नवनृत्यभूषितां च सहस्रमुखरूपिणीम् ।योगेश्वरीं योगगम्यां नमामि ज्ञानरूपिणीम् ॥ ३॥

navanṛtyabhūṣitāṃ ca sahasramukharūpiṇīm |yogeśvarīṃ yogagamyāṃ namāmi jñānarūpiṇīm || 3||

शवारूढां महातेजां सर्वदुष्टनिकृन्तनीम् ।सर्वपापहरां देवीं नमामि जगदीश्वरीम् ॥ ४॥

śavārūḍhāṃ mahātejāṃ sarvaduṣṭanikṛntanīm |sarvapāpaharāṃ devīṃ namāmi jagadīśvarīm || 4||

गौरीं चौरीं च वेतालीं घस्मरीं पुक्कसीं तथा ।शबरीं चाण्डालीं डोम्बीं नमामि चाष्टयोगिनीम् ॥ ५॥

gaurīṃ caurīṃ ca vetālīṃ ghasmarīṃ pukkasīṃ tathā |śabarīṃ cāṇḍālīṃ ḍombīṃ namāmi cāṣṭayoginīm || 5||

ब्रह्माविष्णुशिवशक्रचतुर्मारविनाशिनीम् ।त्रैलोक्यमोहिनीं देवीं नमामि सुरसुन्दरीम् ॥ ६॥

brahmāviṣṇuśivaśakracaturmāravināśinīm |trailokyamohinīṃ devīṃ namāmi surasundarīm || 6||

अक्षमालविभूषाङ्गीमकारबीजसम्भवाम् ।नित्यं ध्यानरतां देवीं नमामि विश्वमातरीम् ॥ ७॥

akṣamālavibhūṣāṅgīmakārabījasambhavām |nityaṃ dhyānaratāṃ devīṃ namāmi viśvamātarīm || 7||

सर्वभूतप्रियां देवीं सर्वमन्त्रप्रबोधिनीम् ।सर्वमन्त्रमयीं मातर्नैरात्मां त्वां नमाम्यहम् ॥ ८॥

sarvabhūtapriyāṃ devīṃ sarvamantraprabodhinīm |sarvamantramayīṃ mātarnairātmāṃ tvāṃ namāmyaham || 8||

इति नैरात्माष्टकस्तोत्रं सम्पूर्णम् ॥

iti nairātmāṣṭakastotraṃ sampūrṇam ||