मूर्तिरहस्यम् Murtirahasyam

श्रीगणेशाय नमः ॥ऋषिरुवाच ॥नन्दा भगवती नाम या भविष्यति नन्दजा ।सा स्तुता पूजिता ध्याता वशीकुर्याज्जगत्त्रयम् ॥ १॥

śrīgaṇeśāya namaḥ ||ṛṣiruvāca ||nandā bhagavatī nāma yā bhaviṣyati nandajā |sā stutā pūjitā dhyātā vaśīkuryājjagattrayam || 1||

कनकोत्तमकान्तिः सा सुकान्तिकनकाम्बरा ।देवी कनकवर्णाभा कनकोत्तमभूषणा ॥ २॥

kanakottamakāntiḥ sā sukāntikanakāmbarā |devī kanakavarṇābhā kanakottamabhūṣaṇā || 2||

कनकाङ्कुशपाशाब्जैरलङ्कृतचतुर्भुजा ।इदिरा कमला लक्ष्मीः सा श्रीरुक्माम्बुजासना ॥ ३॥

kanakāṅkuśapāśābjairalaṅkṛtacaturbhujā |idirā kamalā lakṣmīḥ sā śrīrukmāmbujāsanā || 3||

या रक्तदन्तिका नाम देवी प्रोक्ता मयानघ ।तस्याः स्वरूपं वक्ष्यामि शृणु सर्वभयापहम् ॥ ४॥

yā raktadantikā nāma devī proktā mayānagha |tasyāḥ svarūpaṃ vakṣyāmi śṛṇu sarvabhayāpaham || 4||

रक्ताम्बरा रक्तवर्णा रक्तसर्वाङ्गभूषणा ।रक्तायुधा रक्तनेत्रा रक्तकेशातिभीषणा ॥ ५॥

raktāmbarā raktavarṇā raktasarvāṅgabhūṣaṇā |raktāyudhā raktanetrā raktakeśātibhīṣaṇā || 5||

रक्ततीक्ष्णनखा रक्तदशना रक्तदंष्ट्रिका ।पतिं नारीवानुरक्ता देवी भक्तं भजेज्जनम् ॥ ६॥

raktatīkṣṇanakhā raktadaśanā raktadaṃṣṭrikā |patiṃ nārīvānuraktā devī bhaktaṃ bhajejjanam || 6||

वसुधेव विशाला सा सुमेरुयुगलस्तनी ॥दीर्घौ लम्बावतिस्थूलौ तावतीव मनोहरौ ॥ ७॥

vasudheva viśālā sā sumeruyugalastanī ||dīrghau lambāvatisthūlau tāvatīva manoharau || 7||

कर्कशावतिकान्तौ तौ सर्वानन्दपयोनिधी ।भक्तान्सपाययेद्देवी सर्वकामदुधौ स्तनौ ॥ ८॥

karkaśāvatikāntau tau sarvānandapayonidhī |bhaktānsapāyayeddevī sarvakāmadudhau stanau || 8||

खड्गपात्रं च मुसलं लाङ्गलं च बिभर्ति सा ।आख्याता रक्तचामुण्डा देवी योगेश्वरीति च ॥ ९॥

khaḍgapātraṃ ca musalaṃ lāṅgalaṃ ca bibharti sā |ākhyātā raktacāmuṇḍā devī yogeśvarīti ca || 9||

अनया व्याप्तमखिलं जगत्स्थावरजङ्गमम् ।इमां यः पूजयेद्भक्त्या स व्याप्नोति चराचरम् ॥ १०॥

anayā vyāptamakhilaṃ jagatsthāvarajaṅgamam |imāṃ yaḥ pūjayedbhaktyā sa vyāpnoti carācaram || 10||

अधीते य इमं नित्यं रक्तदन्त्या वपुःस्तवम् ।तं सा परिचरेद्देवी पतिं प्रियमिवाङ्गना ॥ ११॥

adhīte ya imaṃ nityaṃ raktadantyā vapuḥstavam |taṃ sā paricareddevī patiṃ priyamivāṅganā || 11||

शाकम्भरी नीलवर्णा नीलोत्पलविलोचना ।गम्भीरनाभिस्त्रिवलीविभूषिततनूदरी ॥ १२॥

śākambharī nīlavarṇā nīlotpalavilocanā |gambhīranābhistrivalīvibhūṣitatanūdarī || 12||

सुकर्कशसमोत्तुङ्गवृत्तपीनघनस्तनी ।मुष्टिं शिलीमुखैः पूर्णं कमलं कमलालया ॥ १३॥

sukarkaśasamottuṅgavṛttapīnaghanastanī |muṣṭiṃ śilīmukhaiḥ pūrṇaṃ kamalaṃ kamalālayā || 13||

पुष्पपल्लवमूलादिफलाढ्यं शाकसञ्चयम् ।काम्यानन्तरसैर्युक्तं क्षुत्तृण्मृत्युजरापहम् ॥ १४॥

puṣpapallavamūlādiphalāḍhyaṃ śākasañcayam |kāmyānantarasairyuktaṃ kṣuttṛṇmṛtyujarāpaham || 14||

कार्मुकं च स्फुरत्कान्ति बिभर्ति परमेश्वरी ।शाकम्भरी शताक्षी स्यात् सैव दुर्गा प्रकीर्तिता ॥ १५॥

kārmukaṃ ca sphuratkānti bibharti parameśvarī |śākambharī śatākṣī syāt saiva durgā prakīrtitā || 15||

शाकम्भरीं स्तुवन्ध्यायन् जपन्सम्पूजयन्नमन् ।अक्षव्यमश्नुते शीघ्रमन्नपानादि सर्वशः ॥ १६॥

śākambharīṃ stuvandhyāyan japansampūjayannaman |akṣavyamaśnute śīghramannapānādi sarvaśaḥ || 16||

भीमापि नीलवर्णा सा दंष्ट्रादशनभासुरा ।विशाललोचना नारी वृत्तपीनघनस्तनी ॥ १७॥

bhīmāpi nīlavarṇā sā daṃṣṭrādaśanabhāsurā |viśālalocanā nārī vṛttapīnaghanastanī || 17||

चन्द्रहासं च डमरुं शिरःपात्रं च बिभ्रती ।एकवीरा कालरात्रिः सैवोक्ता कामदा स्तुता ॥ १८॥

candrahāsaṃ ca ḍamaruṃ śiraḥpātraṃ ca bibhratī |ekavīrā kālarātriḥ saivoktā kāmadā stutā || 18||

तेजोमण्डलदुर्धर्षा भ्रामरी चित्रकान्तिभृत् ।चित्रभ्रमरसङ्काशा महामारीति गीयते ॥ १९॥

tejomaṇḍaladurdharṣā bhrāmarī citrakāntibhṛt |citrabhramarasaṅkāśā mahāmārīti gīyate || 19||

इत्येता मूर्तयो देव्या व्याख्याता वसुधाधिप ।जगन्मातुश्चडिकायाः कीर्तिताः कामधेनवः ॥ २०॥

ityetā mūrtayo devyā vyākhyātā vasudhādhipa |jaganmātuścaḍikāyāḥ kīrtitāḥ kāmadhenavaḥ || 20||

इदं रहस्यं परमं न वाच्यं यस्य कस्यचित् ।व्याख्यानं दिव्यमूर्तीनामधीष्वावहितः स्वयम् ॥ २१॥

idaṃ rahasyaṃ paramaṃ na vācyaṃ yasya kasyacit |vyākhyānaṃ divyamūrtīnāmadhīṣvāvahitaḥ svayam || 21||

देव्या ध्यानं तवाख्यातं गुह्याद्गुह्यतरं महत् ।तस्मात्सर्वप्रयत्नेन सर्वकामफलप्रदम् ॥ २२॥

devyā dhyānaṃ tavākhyātaṃ guhyādguhyataraṃ mahat |tasmātsarvaprayatnena sarvakāmaphalapradam || 22||

इति श्रीमार्कण्डेयपुराणे सावर्णिके मन्वन्तरे देवीमाहात्म्येमूर्तिरहस्यं सम्पूर्णम् ॥ अध्याय १६

iti śrīmārkaṇḍeyapurāṇe sāvarṇike manvantare devīmāhātmyemūrtirahasyaṃ sampūrṇam || adhyāya 16