मोहिनीकवचम् अथवा महालसा कवचम् Mohini Kavacham

श्रीगणेशाय नमः ॥भगवन् सर्वधर्मज्ञ सर्वागमविशारद ।कवचं देवतायास्तु कृपया कथय प्रभो ॥ १॥

śrīgaṇeśāya namaḥ ||bhagavan sarvadharmajña sarvāgamaviśārada |kavacaṃ devatāyāstu kṛpayā kathaya prabho || 1||

ब्रह्मोवाच ।शृणु देव महाप्राज्ञ सर्वशास्त्रविशारद ।कवचं मोहिनीदेव्या महासिद्धिकरं परम् ॥ २॥

brahmovāca |śṛṇu deva mahāprājña sarvaśāstraviśārada |kavacaṃ mohinīdevyā mahāsiddhikaraṃ param || 2||

मोहिनी मे शिरः पातु भालं नेत्रयुगं तथा ।भ्रुवौ च कामिनी रक्षेन्मुखं वागीश्वरी तथा ॥ ३॥

mohinī me śiraḥ pātu bhālaṃ netrayugaṃ tathā |bhruvau ca kāminī rakṣenmukhaṃ vāgīśvarī tathā || 3||

श्रोत्रे मङ्गलरूपा च कण्ठं महिषमर्दिनी ।भुजौ सौदर्यनिलया हस्तौ रक्षेद्यशस्विनी ॥ ४॥

śrotre maṅgalarūpā ca kaṇṭhaṃ mahiṣamardinī |bhujau saudaryanilayā hastau rakṣedyaśasvinī || 4||

सर्वदा नाभिदेशे तु कमला पातु चोदरम् ।विजया हृदयं पातु कटिं सुरवरार्चिता ॥ ५॥

sarvadā nābhideśe tu kamalā pātu codaram |vijayā hṛdayaṃ pātu kaṭiṃ suravarārcitā || 5||

करौ महालया रक्षेदङ्गुलीर्भक्तवत्सला ।वैष्णवी पातु जङ्घे च माया मेढ्रं गुदं तथा ॥ ६॥

karau mahālayā rakṣedaṅgulīrbhaktavatsalā |vaiṣṇavī pātu jaṅghe ca māyā meḍhraṃ gudaṃ tathā || 6||

पादौ च देवजननी तलं पातालवासिनी ।पूर्वे तु मोहिनी रक्षेद्दक्षिणे सुखदायिनी ॥ ७॥

pādau ca devajananī talaṃ pātālavāsinī |pūrve tu mohinī rakṣeddakṣiṇe sukhadāyinī || 7||

पश्चिमे वारुणी रक्षेदुत्तरेऽमृतवासिनी ।ईशान्यां पातु चेशानी आग्नेय्यामग्निदेवता ॥ ८॥

paścime vāruṇī rakṣeduttare'mṛtavāsinī |īśānyāṃ pātu ceśānī āgneyyāmagnidevatā || 8||

नैरृत्यां खड्गधृग्देवी वायव्यां मृगवाहिनी ।ऊर्ध्वं ब्रह्माणी मे रक्षेदधस्ताद्वैष्णवी तथा ॥ ९॥

nairṛtyāṃ khaḍgadhṛgdevī vāyavyāṃ mṛgavāhinī |ūrdhvaṃ brahmāṇī me rakṣedadhastādvaiṣṇavī tathā || 9||

अग्रतः पातु चेन्द्राणी वाराही पृष्ठतस्तथा ।कौबेरी चोत्तरे पातु दीक्षणे विष्णुवल्लभा ॥ १०॥

agrataḥ pātu cendrāṇī vārāhī pṛṣṭhatastathā |kauberī cottare pātu dīkṣaṇe viṣṇuvallabhā || 10||

इदं कवचमज्ञात्वा यो भजेन्मोहिनीं नरः ।वृथा श्रमो भवेत्तस्य न मन्त्रः सिद्धिदायकः ॥ ११॥

idaṃ kavacamajñātvā yo bhajenmohinīṃ naraḥ |vṛthā śramo bhavettasya na mantraḥ siddhidāyakaḥ || 11||

भूर्जपत्रे समालिख्य कुङ्कुमादिकचन्दनैः ।शतमष्टोत्तरं जाप्यं स्वर्गस्थं धार्यते यदि ॥ १२॥

bhūrjapatre samālikhya kuṅkumādikacandanaiḥ |śatamaṣṭottaraṃ jāpyaṃ svargasthaṃ dhāryate yadi || 12||

कण्ठे वा दीक्षणे बाहावष्टसिद्धिर्भवेद्ध्रुवम् ।सर्वथा सर्वदा नित्यं मोहिनीकवचं जपेत् ॥ १३॥

kaṇṭhe vā dīkṣaṇe bāhāvaṣṭasiddhirbhaveddhruvam |sarvathā sarvadā nityaṃ mohinīkavacaṃ japet || 13||

राजद्वारे सभास्थाने कारागृहनिबन्धने ।जलमध्ये भूमिमध्ये तथा निर्जनके वने ॥ १४॥

rājadvāre sabhāsthāne kārāgṛhanibandhane |jalamadhye bhūmimadhye tathā nirjanake vane || 14||

अरण्ये प्रान्तरे घोरे शत्रुसङ्घे महाहवे ।शस्त्रघाते विषे पीते जपन् सिद्धिमवाप्नुयात् ॥ १५॥

araṇye prāntare ghore śatrusaṅghe mahāhave |śastraghāte viṣe pīte japan siddhimavāpnuyāt || 15||

ब्रह्मराक्षसवेतालाः कूष्माण्डा भैरवादयः ।नश्यन्ति दर्शनात्तस्य कवचे हृदि संस्थिते ॥ १६॥

brahmarākṣasavetālāḥ kūṣmāṇḍā bhairavādayaḥ |naśyanti darśanāttasya kavace hṛdi saṃsthite || 16||

मनसा चिन्तितं कार्यं सहस्रं जपतस्तथा ।पलाशमूले प्रजपेत्सहस्रत्रितयं मुदा ॥ १७॥

manasā cintitaṃ kāryaṃ sahasraṃ japatastathā |palāśamūle prajapetsahasratritayaṃ mudā || 17||

शत्रुहानिर्ध्रुवं चात्र जायते नात्र संशयः ।अर्कमूले जपेन्नित्यं मन्त्रराजमिमं शुभम् ॥ १८॥

śatruhānirdhruvaṃ cātra jāyate nātra saṃśayaḥ |arkamūle japennityaṃ mantrarājamimaṃ śubham || 18||

भोजयेद्ब्राह्मणांश्चैव लक्ष्मीर्वसति सर्वदा ।यदिदं कवचं नित्यं भक्त्या तव मयोदितम् ॥ १९॥

bhojayedbrāhmaṇāṃścaiva lakṣmīrvasati sarvadā |yadidaṃ kavacaṃ nityaṃ bhaktyā tava mayoditam || 19||

यो जपेत्सर्वदा भक्त्या मोहिन्याः कवचं शुभम् ।वाञ्छितं फलमाप्नोति नात्र कार्या विचारणा ॥ २०॥

yo japetsarvadā bhaktyā mohinyāḥ kavacaṃ śubham |vāñchitaṃ phalamāpnoti nātra kāryā vicāraṇā || 20||

इति श्रीभविष्योत्तरपुराणे ब्रह्मप्रोक्तं मोहिनीकवचं स्तोत्रं सम्पूर्णम् ॥महालसा कवचम्

iti śrībhaviṣyottarapurāṇe brahmaproktaṃ mohinīkavacaṃ stotraṃ sampūrṇam ||mahālasā kavacam