दक्षिणकालिकास्तोत्रम् Dakshinakalika Stotram

ॐ कृशोदरि महाचण्डि मुक्तकेशि बलिप्रिये ।कुलाचारप्रसन्नास्ये नमस्ते शङ्करप्रिये ॥ १॥

oṃ kṛśodari mahācaṇḍi muktakeśi balipriye |kulācāraprasannāsye namaste śaṅkarapriye || 1||

घोरदंष्ट्रे कोटराक्षि गीतिशब्दप्रसाधिनि । (किचिशब्द, कितिशब्द, प्रणादिनि, निनादिनि)घुरघोरारवास्फारे नमस्ते चित्तवासिनि ॥ २॥ (घोरघोरारवास्फाले, गुरुघोरारवास्फाले, चितिवासिनि)

ghoradaṃṣṭre koṭarākṣi gītiśabdaprasādhini | (kiciśabda, kitiśabda, praṇādini, ninādini)ghuraghorāravāsphāre namaste cittavāsini || 2|| (ghoraghorāravāsphāle, gurughorāravāsphāle, citivāsini)

बन्धूकपुष्पसङ्काशे त्रिपुरे भयनाशिनि ।भाग्योदयसमुत्पन्ने नमस्ते वरवर्णिनि ॥ ३॥

bandhūkapuṣpasaṅkāśe tripure bhayanāśini |bhāgyodayasamutpanne namaste varavarṇini || 3||

जय देवि जगद्धात्रि त्रिपुराद्ये त्रिदेवते । (त्रिदैवते)भक्तेभ्यो वरदे देवि महिषघ्नि नमोऽस्तुते ॥ ४॥

jaya devi jagaddhātri tripurādye tridevate | (tridaivate)bhaktebhyo varade devi mahiṣaghni namo'stute || 4||

घोरविघ्नविनाशाय कुलाचारसमृद्धये ।नमामि वरदे देवि मुण्डमालाविभूषणे ॥ ५॥

ghoravighnavināśāya kulācārasamṛddhaye |namāmi varade devi muṇḍamālāvibhūṣaṇe || 5||

रक्तधारासमाकीर्णे कलकाञ्चीविभूषिते । (करकाञ्ची, कृतकाञ्ची)सर्वविघ्नहरे कालि नमस्ते भैरवप्रिये ॥ ६॥

raktadhārāsamākīrṇe kalakāñcīvibhūṣite | (karakāñcī, kṛtakāñcī)sarvavighnahare kāli namaste bhairavapriye || 6||

नमस्ते दक्षिणामूर्त्ते कालि त्रिपुरभैरवि ।भिन्नाञ्जनचयप्रख्ये प्रवीणशवसंस्थिते ॥ ७॥

namaste dakṣiṇāmūrtte kāli tripurabhairavi |bhinnāñjanacayaprakhye pravīṇaśavasaṃsthite || 7||

गलच्छोणितधाराभिः स्मेराननसरोरुहे ।पीनोन्नतकुचद्बन्द्वे नमस्ते घोरदक्षिणे ॥ ८॥

galacchoṇitadhārābhiḥ smerānanasaroruhe |pīnonnatakucadbandve namaste ghoradakṣiṇe || 8||

आरक्तमुखशान्ताभिर्नेत्रालिभिर्विराजिते ।शवद्वयकृतोत्तंसे नमस्ते मदविह्वले ॥ ९॥

āraktamukhaśāntābhirnetrālibhirvirājite |śavadvayakṛtottaṃse namaste madavihvale || 9||

पञ्चाशन्मुण्डघटितमालालोहितलोहिते ।नानामणिविशोभाढ्ये नमस्ते ब्रह्मसेविते ॥ १०॥

pañcāśanmuṇḍaghaṭitamālālohitalohite |nānāmaṇiviśobhāḍhye namaste brahmasevite || 10||

शवास्थिकृतकेयूरे शङ्खकङ्कणमण्डिते ।शववक्षःसमारूढे नमस्ते विष्णुपूजिते ॥ ११॥

śavāsthikṛtakeyūre śaṅkhakaṅkaṇamaṇḍite |śavavakṣaḥsamārūḍhe namaste viṣṇupūjite || 11||

शवमांसकृतग्रासे साट्टहासे मुहुर्मुहुः ।मुखशीघ्रस्मितामोदे नमस्ते शिववन्दिते ॥ १२॥

śavamāṃsakṛtagrāse sāṭṭahāse muhurmuhuḥ |mukhaśīghrasmitāmode namaste śivavandite || 12||

खड्गमुण्डधरे वामे सव्येऽभयवरप्रदे ।दन्तुरे च महारौद्रे नमस्ते चण्डनायिके ॥ १३॥

khaḍgamuṇḍadhare vāme savye'bhayavaraprade |danture ca mahāraudre namaste caṇḍanāyike || 13||

त्वं गतिः परमा देवि त्वं माता परमेश्वरि ।त्राहि मां करुणासार्द्रे नमस्ते चण्डनायिके ॥ १४॥

tvaṃ gatiḥ paramā devi tvaṃ mātā parameśvari |trāhi māṃ karuṇāsārdre namaste caṇḍanāyike || 14||

नमस्ते कालिके देवि नमस्ते भक्तवत्सले ।मूर्खतां हर मे देवि प्रतिभाजयदायिनि ॥ १५॥

namaste kālike devi namaste bhaktavatsale |mūrkhatāṃ hara me devi pratibhājayadāyini || 15||

गद्यपद्यमयीं वाणीं तर्कव्याकरणादिकम् ।अनधीतागतां विद्यां देहि दक्षिणकालिके ॥ १६॥

gadyapadyamayīṃ vāṇīṃ tarkavyākaraṇādikam |anadhītāgatāṃ vidyāṃ dehi dakṣiṇakālike || 16||

जयं देहि सभामध्ये धनं देहि धनागमे ।देहि मे चिरजीवित्वं कालिके रक्ष दक्षिणे ॥ १७॥

jayaṃ dehi sabhāmadhye dhanaṃ dehi dhanāgame |dehi me cirajīvitvaṃ kālike rakṣa dakṣiṇe || 17||

राज्यं देहि यशो देहि पुत्रान् दारान् धनं तथा ।देहान्ते देहि मे मुक्तिं जगन्मातः प्रसीद मे ॥ १८॥

rājyaṃ dehi yaśo dehi putrān dārān dhanaṃ tathā |dehānte dehi me muktiṃ jaganmātaḥ prasīda me || 18||

ॐ मङ्गला भैरवी दुर्गा कालिका त्रिदशेश्वरी ।उमा हैमवती कन्या कल्याणी भैरवेश्वरी ॥ १९॥

oṃ maṅgalā bhairavī durgā kālikā tridaśeśvarī |umā haimavatī kanyā kalyāṇī bhairaveśvarī || 19||

काली ब्राह्मी च माहेशी कौमारी वैष्णवी तथा ।वाराही वासवी चण्डी त्वां जगुर्मुनयः सदा ॥ २०॥

kālī brāhmī ca māheśī kaumārī vaiṣṇavī tathā |vārāhī vāsavī caṇḍī tvāṃ jagurmunayaḥ sadā || 20||

उग्रतारेति तारेति शिवेत्येकजटेति च ।लोकोत्तरेति कालीति गीयसे कृतिभिः सदा ॥ २१॥

ugratāreti tāreti śivetyekajaṭeti ca |lokottareti kālīti gīyase kṛtibhiḥ sadā || 21||

यथा काली तथा तारा तथा छिन्ना च कुल्लुका ।एकमूर्त्तिश्चतुर्भेदा देवि त्वं कालिका पुरा ॥ २२॥

yathā kālī tathā tārā tathā chinnā ca kullukā |ekamūrttiścaturbhedā devi tvaṃ kālikā purā || 22||

एकद्वित्रिविधा देवी कोटिधानन्तरूपिणी ।अङ्गाङ्गिकैर्नामभेदैः कालिकेति प्रगीयते ॥ २३॥

ekadvitrividhā devī koṭidhānantarūpiṇī |aṅgāṅgikairnāmabhedaiḥ kāliketi pragīyate || 23||

शम्भुः पञ्चमुखेनैव गुणान् वक्तुं न ते क्षमः ।चापल्यैर्यत्कृतं स्तोत्रं क्षमस्व वरदा भव ॥ २४॥

śambhuḥ pañcamukhenaiva guṇān vaktuṃ na te kṣamaḥ |cāpalyairyatkṛtaṃ stotraṃ kṣamasva varadā bhava || 24||

प्राणान् रक्ष यशो रक्ष पुत्रान् दारान् धनं तथा ।सर्वकाले सर्वदेशे पाहि दक्षिणकालिके ॥ २५॥

prāṇān rakṣa yaśo rakṣa putrān dārān dhanaṃ tathā |sarvakāle sarvadeśe pāhi dakṣiṇakālike || 25||

यः सम्पूज्य पठेत् स्तोत्रं दिवा वा रात्रिसन्ध्ययोः ।धनं धान्यं तथा पुत्रं लभते नात्र संशयः ॥ २६॥

yaḥ sampūjya paṭhet stotraṃ divā vā rātrisandhyayoḥ |dhanaṃ dhānyaṃ tathā putraṃ labhate nātra saṃśayaḥ || 26||

इति दक्षिणकालिकास्तोत्रं सम्पूर्णम् ।

iti dakṣiṇakālikāstotraṃ sampūrṇam |