श्रीमहारमास्तोत्रम् Devadibhihkritam Shri Maharama Stotram

सभायां संहतास्तत्र सर्वस्त्रीजातिशोभिताः ।तुष्टवुः सहगन्धर्वाऽप्सरसश्च महारमाम् ॥ १६॥

sabhāyāṃ saṃhatāstatra sarvastrījātiśobhitāḥ |tuṣṭavuḥ sahagandharvā'psarasaśca mahāramām || 16||

नमो नमस्ते परमेश्वरस्त्रीमूर्द्धन्यमूर्तेऽर्धहरिस्वरूपे ।महाक्षरे चाक्षरधामवासे त्रिसृष्टिमातः सुनमो नमस्ते ॥ १७॥

namo namaste parameśvarastrīmūrddhanyamūrte'rdhaharisvarūpe |mahākṣare cākṣaradhāmavāse trisṛṣṭimātaḥ sunamo namaste || 17||

नमोऽवतारादिसमग्रवासे नमः समस्तेश्वरकोटिवासे ।नमः समग्रेश्वरिकानिवासे मुक्तानिकामुक्तगणाधिवासे ॥ १८॥

namo'vatārādisamagravāse namaḥ samasteśvarakoṭivāse |namaḥ samagreśvarikānivāse muktānikāmuktagaṇādhivāse || 18||

तुभ्यं नमः कृष्णनरायणाङ्गे सिद्धर्षिसत्पित्तृसुदे नमस्ते ।सुरेश्वरीवृन्दसुसेविते ते श्रीमानवीरूपिणि ते नमोऽस्तु ॥ १९॥

tubhyaṃ namaḥ kṛṣṇanarāyaṇāṅge siddharṣisatpittṛsude namaste |sureśvarīvṛndasusevite te śrīmānavīrūpiṇi te namo'stu || 19||

श्रीकम्भरे श्रीललिते सनाथे सन्तोषिकामातरथो नमस्ते ।गजाननेऽनन्तरमानुरूपे मातर्नमस्ते हरिणीस्वरूपे ॥ २०॥

śrīkambhare śrīlalite sanāthe santoṣikāmātaratho namaste |gajānane'nantaramānurūpe mātarnamaste hariṇīsvarūpe || 20||

सर्वेश्वरि सर्वरमाधिनाथे श्रीमाणिकीपाशवतीप्रमोदे ।लक्ष्मीमहासागरभाविके ते ब्रह्मप्रियास्थे सततं नमस्ते ॥ २१॥

sarveśvari sarvaramādhināthe śrīmāṇikīpāśavatīpramode |lakṣmīmahāsāgarabhāvike te brahmapriyāsthe satataṃ namaste || 21||

कामाधिनाथेऽर्थितदानदक्षे चिन्तामणे चित्रजगत्प्रसूते ।मोक्षप्रदे भास्करचन्द्रनेत्रे मन्दस्मिते योगिनि ते नमोऽस्तु ॥ २२॥

kāmādhināthe'rthitadānadakṣe cintāmaṇe citrajagatprasūte |mokṣaprade bhāskaracandranetre mandasmite yogini te namo'stu || 22||

नमो नमो भण्डमहासुरघ्ने समस्तदैत्यान्तककर्त्रि मातः ।मुद्राधिनाथे च सुयन्त्ररूपे सर्वश्रुतिप्रोद्भविके नमस्ते ॥ २३॥

namo namo bhaṇḍamahāsuraghne samastadaityāntakakartri mātaḥ |mudrādhināthe ca suyantrarūpe sarvaśrutiprodbhavike namaste || 23||

कृष्णे परे चक्रसुषट्कसंस्थे षडूर्मिहर्त्रि श्रमनाशिके ते ।षड्भावशून्येऽष्टगुणाश्रये ते मातर्नमो मुख्यसमस्तराज्ञि ॥ २४॥

kṛṣṇe pare cakrasuṣaṭkasaṃsthe ṣaḍūrmihartri śramanāśike te |ṣaḍbhāvaśūnye'ṣṭaguṇāśraye te mātarnamo mukhyasamastarājñi || 24||

कान्ताधिनाथे कमले सुनिर्मले कलाधिनाथे भुवनेश्वरि प्रिये ।रसायने सर्वरसाधिवासिनि दिव्यस्वरूपे च नमोऽस्त्वभीक्ष्णशः ॥ २५॥

kāntādhināthe kamale sunirmale kalādhināthe bhuvaneśvari priye |rasāyane sarvarasādhivāsini divyasvarūpe ca namo'stvabhīkṣṇaśaḥ || 25||

सदाणिमाद्यष्टकसेवनीये गोपालकृष्णात्मकमञ्चवासे ।देवाधिदेवप्रमदे सवित्रि लोकस्य मातः प्रणमो नमस्ते ॥ २६॥

sadāṇimādyaṣṭakasevanīye gopālakṛṣṇātmakamañcavāse |devādhidevapramade savitri lokasya mātaḥ praṇamo namaste || 26||

व्रह्मप्रियेब्रह्मरमे हरिश्रि ब्रह्मात्मिके श्रीललिते नमस्ते ।ब्रह्मामृतस्रोतसि जन्महन्त्रि ब्रह्मेश्वरि श्रीललिते नमस्ते ॥ २७॥

vrahmapriyebrahmarame hariśri brahmātmike śrīlalite namaste |brahmāmṛtasrotasi janmahantri brahmeśvari śrīlalite namaste || 27||

शुभाश्रये शुभप्रदेऽक्षराख्ये हतारिवर्गे ललिते नमस्ते ।सर्वाधिके सर्वगते समस्तसिद्धिप्रदे श्रीललिते नमस्ते ॥ २८॥

śubhāśraye śubhaprade'kṣarākhye hatārivarge lalite namaste |sarvādhike sarvagate samastasiddhiprade śrīlalite namaste || 28||

सर्वाऽमराऽऽकाङ्क्षितपूरयित्रि वरप्रदे श्रीललिते नमस्ते ।बिन्दुस्थिते बिन्दुसुरूपिणि श्रीबृहत्कुचाऽम्भोजविलोलहारे ॥ २९॥

sarvā'marā''kāṅkṣitapūrayitri varaprade śrīlalite namaste |bindusthite bindusurūpiṇi śrībṛhatkucā'mbhojavilolahāre || 29||

फलप्रदे कम्पलतेऽर्कशोभे सरोजवक्त्रे ललिते नमस्ते ।सारैकभूमे पुरुषोत्तमि श्रीभूपद्मिकाऽजा कमलात्मिके ते ॥ ३०॥

phalaprade kampalate'rkaśobhe sarojavaktre lalite namaste |sāraikabhūme puruṣottami śrībhūpadmikā'jā kamalātmike te || 30||

कृपानिधाने सुरकार्यशालिनि श्रीवैष्णवि श्रीसकलावतारिणि ।सारङ्गशावाक्षि मनोहरे प्रसु मातर्नमस्ते ललितेऽतिसुन्दरि ॥ ३१॥

kṛpānidhāne surakāryaśālini śrīvaiṣṇavi śrīsakalāvatāriṇi |sāraṅgaśāvākṣi manohare prasu mātarnamaste lalite'tisundari || 31||

श्रीमन्महालक्ष्मि समृद्धिदायिनि विपन्निवारेऽतिसनातनि प्रमे ।त्वया समस्तं भुवनं सुरक्षितं भण्डासुरादीन् विनिहत्य सङ्गरे ॥ ३२॥

śrīmanmahālakṣmi samṛddhidāyini vipannivāre'tisanātani prame |tvayā samastaṃ bhuvanaṃ surakṣitaṃ bhaṇḍāsurādīn vinihatya saṅgare || 32||

श्रीशम्भुना भस्मित एव मन्मथो भस्मोत्थभण्डोऽपि हतः पुनस्त्वया ।कामस्य भस्माऽपि सुभस्मिता यतो निष्कामता नीरतिता प्रदर्शिता ॥ ३३॥

śrīśambhunā bhasmita eva manmatho bhasmotthabhaṇḍo'pi hataḥ punastvayā |kāmasya bhasmā'pi subhasmitā yato niṣkāmatā nīratitā pradarśitā || 33||

स्थूलं शरीरं मदनस्य शम्भुना दग्धं च सूक्ष्मं तु ततः पुनस्त्वया ।एवं शरीरोभयवर्जितं पतिं विलोक्य तज्जीवनमार्थयद्रतिः ॥ ३४॥

sthūlaṃ śarīraṃ madanasya śambhunā dagdhaṃ ca sūkṣmaṃ tu tataḥ punastvayā |evaṃ śarīrobhayavarjitaṃ patiṃ vilokya tajjīvanamārthayadratiḥ || 34||

तदा पुनः कारणवर्ष्म कल्पनात्मकं यदासीद्बहुवासनात्मकम् ।तस्माददृश्यं रमणस्य वर्ष्म वै व्याप्तं बृहत्कृत्य ददौ रतिस्त्रियै ॥ ३५॥

tadā punaḥ kāraṇavarṣma kalpanātmakaṃ yadāsīdbahuvāsanātmakam |tasmādadṛśyaṃ ramaṇasya varṣma vai vyāptaṃ bṛhatkṛtya dadau ratistriyai || 35||

रतिर्निजं कान्तमनुत्तमं पुनः समस्तलोकस्थितिकं हृदि स्थितम् ।अदृश्यरूपं प्रसमीक्ष्य रञ्जिता प्रसन्नतापूर्वकमाश्लिषत् पतिम् ॥ ३६॥

ratirnijaṃ kāntamanuttamaṃ punaḥ samastalokasthitikaṃ hṛdi sthitam |adṛśyarūpaṃ prasamīkṣya rañjitā prasannatāpūrvakamāśliṣat patim || 36||

अवर्ष्मरूपो ह्यपि वर्ष्मकार्यकृत् कामो भवत्या विहितस्ततो ह्यसौ ।तवाज्ञया व्याप्तिमगाच्छिवापतौ स्कन्दोऽभवच्छैलसुतासुयोगतः ॥ ३७॥

avarṣmarūpo hyapi varṣmakāryakṛt kāmo bhavatyā vihitastato hyasau |tavājñayā vyāptimagācchivāpatau skando'bhavacchailasutāsuyogataḥ || 37||

स्थूलस्य कामस्य जयस्य कर्ता शम्भुस्वरूपो भवतीति बोध्यः ।सूक्ष्मस्य कामस्य जयस्य कर्ता लक्ष्मीस्वरूपो भवतीति बोध्यः ॥ ३८॥

sthūlasya kāmasya jayasya kartā śambhusvarūpo bhavatīti bodhyaḥ |sūkṣmasya kāmasya jayasya kartā lakṣmīsvarūpo bhavatīti bodhyaḥ || 38||

कुवासनाऽनङ्गजयस्यकर्ता नारायणश्चोर्ध्वगतिर्हिं बोध्यः ।एवं त्वया बोधितमेव सर्वेभ्यो नः परेशेश्वरि मुक्तये नः ॥ ३९॥

kuvāsanā'naṅgajayasyakartā nārāyaṇaścordhvagatirhiṃ bodhyaḥ |evaṃ tvayā bodhitameva sarvebhyo naḥ pareśeśvari muktaye naḥ || 39||

इति स्तुत्वा पूजयित्वा निषेदुर्हृष्टमानसाः ।उत्सवं तन्निमित्तं च चक्रुः सर्वे रणाजिरे ॥ ४०॥

iti stutvā pūjayitvā niṣedurhṛṣṭamānasāḥ |utsavaṃ tannimittaṃ ca cakruḥ sarve raṇājire || 40||

इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे११८अध्यायान्तर्गतं देवादिभिःकृतं श्रीमहारमास्तोत्रं सम्पूर्णम् ।लक्ष्मीनारायणीयसंहिता । खण्ड ३। अध्याय ११८/१६४०॥लक्ष्मीनारायणीयसंहिता । खण्ड ३। अध्याय ११८/१६-४०॥

iti śrīlakṣmīnārāyaṇīyasaṃhitāyāḥ dvāparayugasantānātmakasya tṛtīyakhaṇḍe118adhyāyāntargataṃ devādibhiḥkṛtaṃ śrīmahāramāstotraṃ sampūrṇam |lakṣmīnārāyaṇīyasaṃhitā | khaṇḍa 3| adhyāya 118/1640||lakṣmīnārāyaṇīyasaṃhitā | khaṇḍa 3| adhyāya 118/16-40||