बलरामस्तोत्रम् Shribalaramastotram

श्रीगणेशाय नमः ।श्रीः जय राम सदाराम सच्चिदानन्दविग्रह ।अविद्यापङ्कगलितनिर्मलाकार ते नमः ॥ १॥

śrīgaṇeśāya namaḥ |śrīḥ jaya rāma sadārāma saccidānandavigraha |avidyāpaṅkagalitanirmalākāra te namaḥ || 1||

जयाखिलजगद्भारधारण श्रमवर्जित ।तापत्रयविकर्षाय हलं कलयते सदा ॥ २॥

jayākhilajagadbhāradhāraṇa śramavarjita |tāpatrayavikarṣāya halaṃ kalayate sadā || 2||

प्रपन्नदीनत्राणाय बलरामाय ते नमः ।त्वमेवेश पराशेषकलुषक्षालनप्रभुः ॥ ३॥

prapannadīnatrāṇāya balarāmāya te namaḥ |tvameveśa parāśeṣakaluṣakṣālanaprabhuḥ || 3||

प्रपन्नकरुणासिन्धो भक्तप्रिय नमोऽस्तुते ।चराचरा फणाग्रेण धृता येन वसुन्धरा ॥ ४॥

prapannakaruṇāsindho bhaktapriya namo'stute |carācarā phaṇāgreṇa dhṛtā yena vasundharā || 4||

मामुद्धरास्मद्दुष्पाराद्भवाम्भोधेरपारतः ।परापराणां परमं परमेश नमोऽस्तु ते ॥ ५॥

māmuddharāsmadduṣpārādbhavāmbhodherapārataḥ |parāparāṇāṃ paramaṃ parameśa namo'stu te || 5||

इमं स्तवं यः पठति बलरामाधिदैवतम् ।बलिष्ठः सर्वकार्येषु गरिष्ठः सोऽभिजायते ॥ ६॥

imaṃ stavaṃ yaḥ paṭhati balarāmādhidaivatam |baliṣṭhaḥ sarvakāryeṣu gariṣṭhaḥ so'bhijāyate || 6||

इति श्रीबलरामस्तोत्रम् ।

iti śrībalarāmastotram |