दशावतार ककारादि कूर्माष्टोत्तरशतनामस्तोत्रम् Kakaradi Shri Kurmashtottarashatanamastotram

श्री हयग्रीवाय नमः ।हरिः ॐकमठः कन्धिमध्यस्थः करुणावरुणालयः ।कुलाचलसमुद्धर्ता कुण्डलीन्द्रसमाश्रयः ॥ १॥

śrī hayagrīvāya namaḥ |hariḥ oṃkamaṭhaḥ kandhimadhyasthaḥ karuṇāvaruṇālayaḥ |kulācalasamuddhartā kuṇḍalīndrasamāśrayaḥ || 1||

कठोरपृष्टः कुधरः कलुषीकृतसागरः ।कल्याणमूर्तिः क्रतुभुक्प्रार्थनाधृत विग्रहः ॥ २॥

kaṭhorapṛṣṭaḥ kudharaḥ kaluṣīkṛtasāgaraḥ |kalyāṇamūrtiḥ kratubhukprārthanādhṛta vigrahaḥ || 2||

कुलाचलसमुद्भ्रान्तिघृष्टकण्डूतिसौख्यवान् ।करालश्वाससङ्क्षुब्धसिन्धूर्मिप्रहताम्बरः ॥ ३॥

kulācalasamudbhrāntighṛṣṭakaṇḍūtisaukhyavān |karālaśvāsasaṅkṣubdhasindhūrmiprahatāmbaraḥ || 3||

कन्धिकर्दमकस्तूरीलिप्तवक्षःस्थलः कृती ।कुलीरादिपयस्सत्त्वनिष्पेषणचतुष्पदः ॥ ४॥

kandhikardamakastūrīliptavakṣaḥsthalaḥ kṛtī |kulīrādipayassattvaniṣpeṣaṇacatuṣpadaḥ || 4||

कराग्रादत्तसम्भुक्ततिमिङ्गिलगिलोत्करः ।कन्धिपुष्पद्विरेफाभः कपर्द्यादिसमीडितः ॥ ५॥

karāgrādattasambhuktatimiṅgilagilotkaraḥ |kandhipuṣpadvirephābhaḥ kapardyādisamīḍitaḥ || 5||

कल्याणाचलतुङ्गात्मागाधीकृतपयोनिधिः ।कुलिशत्पृष्ठसङ्घर्षक्षीणमूलकुलाचलः ॥ ६॥

kalyāṇācalatuṅgātmāgādhīkṛtapayonidhiḥ |kuliśatpṛṣṭhasaṅgharṣakṣīṇamūlakulācalaḥ || 6||

काश्यपीसत्कुचप्रायमन्दराहतपृष्ठकः ।कायैकदेशापर्याप्तशेषदिग्गजमण्डलः ॥ ७॥

kāśyapīsatkucaprāyamandarāhatapṛṣṭhakaḥ |kāyaikadeśāparyāptaśeṣadiggajamaṇḍalaḥ || 7||

कठोरचरणाघातद्वैधीकृतपयोनिधिः ।कालकूटकृतत्रासः काण्डदुर्मितवैभवः ॥ ८॥

kaṭhoracaraṇāghātadvaidhīkṛtapayonidhiḥ |kālakūṭakṛtatrāsaḥ kāṇḍadurmitavaibhavaḥ || 8||

कमनीयः कविस्तुत्यः कनिधिः कमलापतिः ।कमलासनकल्याणसन्धाता कलिनाशनः ॥ ९॥

kamanīyaḥ kavistutyaḥ kanidhiḥ kamalāpatiḥ |kamalāsanakalyāṇasandhātā kalināśanaḥ || 9||

कटाक्षक्षतदेवार्तिः केन्द्रादिविधृतांजलिः ।कालीपतिप्रीतिपात्रं कामितार्थप्रदः कविः ॥ १०॥

kaṭākṣakṣatadevārtiḥ kendrādividhṛtāṃjaliḥ |kālīpatiprītipātraṃ kāmitārthapradaḥ kaviḥ || 10||

कूटस्थः कूटकमठः कूटयोगिसुदुर्लभः ।कामहीनः कामहेतुः कामभृत्कंजलोचनः ॥ ११॥

kūṭasthaḥ kūṭakamaṭhaḥ kūṭayogisudurlabhaḥ |kāmahīnaḥ kāmahetuḥ kāmabhṛtkaṃjalocanaḥ || 11||

क्रतुभुग्दैन्यविध्वंसी क्रतुभुक्पालकः क्रतुः ।क्रतुपूज्यः क्रतुनिधिः क्रतुत्राता क्रतूद्भवः ॥ १२॥

kratubhugdainyavidhvaṃsī kratubhukpālakaḥ kratuḥ |kratupūjyaḥ kratunidhiḥ kratutrātā kratūdbhavaḥ || 12||

कैवल्यसौख्यदकथः कैशोरोत्क्षिप्तमन्दरः ।कैवल्यनिर्वाणमयः कैटभप्रतिसूदनः ॥ १३॥

kaivalyasaukhyadakathaḥ kaiśorotkṣiptamandaraḥ |kaivalyanirvāṇamayaḥ kaiṭabhapratisūdanaḥ || 13||

क्रान्तसर्वाम्बुधिः क्रान्तपातालः कोमलोदरः ।कन्धिसोर्मिजलक्षौमः कुलाचलकचोत्करः ॥ १४॥

krāntasarvāmbudhiḥ krāntapātālaḥ komalodaraḥ |kandhisormijalakṣaumaḥ kulācalakacotkaraḥ || 14||

कटुनिश्श्वासनिर्धूतरक्षस्तूलः कृताद्भुतः ।कौमोदकीहतामित्रः कौतुकाकविताहवः ॥ १५॥

kaṭuniśśvāsanirdhūtarakṣastūlaḥ kṛtādbhutaḥ |kaumodakīhatāmitraḥ kautukākavitāhavaḥ || 15||

करालिकंटकोद्धर्ता कविताब्धिमणीसुमः ।कैवल्यवल्लरीकन्दः कन्दुकीकृतचन्दिरः ॥ १६॥

karālikaṃṭakoddhartā kavitābdhimaṇīsumaḥ |kaivalyavallarīkandaḥ kandukīkṛtacandiraḥ || 16||

करपीतसमस्ताब्धिः कायान्तर्गतवाश्चरः ।कर्पराब्जद्विरेफाभमन्दरः कन्दलत्स्मितः ॥ १७॥

karapītasamastābdhiḥ kāyāntargatavāścaraḥ |karparābjadvirephābhamandaraḥ kandalatsmitaḥ || 17||

काश्यपीव्रततीकन्दः कश्यपादिसमानतः ।कल्याणजालनिलयः क्रतुभुङ्नेत्रनन्दनः ॥ १८॥

kāśyapīvratatīkandaḥ kaśyapādisamānataḥ |kalyāṇajālanilayaḥ kratubhuṅnetranandanaḥ || 18||

कबन्धचरहर्यक्षः क्रान्तदर्शिमनोहरः ।कर्मठाविषयः कर्मकर्तृभावादिवर्जितः ॥ १९॥

kabandhacaraharyakṣaḥ krāntadarśimanoharaḥ |karmaṭhāviṣayaḥ karmakartṛbhāvādivarjitaḥ || 19||

कर्मानधीनः कर्मज्ञः कर्मपः कर्मचोदनः ।कर्मसाक्षी कर्महेतुः कर्मज्ञानविभागकृत् ॥ २०॥

karmānadhīnaḥ karmajñaḥ karmapaḥ karmacodanaḥ |karmasākṣī karmahetuḥ karmajñānavibhāgakṛt || 20||

कर्ता कारयिता कार्यं कारणं करणं कृतिः ।कृत्स्नं कृत्स्नातिगः कृत्स्नचेतनः कृत्स्नमोहनः ॥ २१॥

kartā kārayitā kāryaṃ kāraṇaṃ karaṇaṃ kṛtiḥ |kṛtsnaṃ kṛtsnātigaḥ kṛtsnacetanaḥ kṛtsnamohanaḥ || 21||

करणागोचरः कालः कार्यकारणतातिगः ।कालावशः कालपाशबद्धभक्तावनाभिधः ॥ २२॥

karaṇāgocaraḥ kālaḥ kāryakāraṇatātigaḥ |kālāvaśaḥ kālapāśabaddhabhaktāvanābhidhaḥ || 22||

कृतकृत्यः केलिफलः कीर्तनीयः कृतोत्सवः ।कृतेतरमहानन्दः कृतज्ञः कृतसत्सुखः ॥ २३॥

kṛtakṛtyaḥ keliphalaḥ kīrtanīyaḥ kṛtotsavaḥ |kṛtetaramahānandaḥ kṛtajñaḥ kṛtasatsukhaḥ || 23||

॥ इति ककारादि श्री कमठावताराष्टोत्तरशतम् रामेण पराभववैशाख बहुलद्वादश्यां लिखितम् श्री हयग्रीवायार्पितम् ॥

|| iti kakārādi śrī kamaṭhāvatārāṣṭottaraśatam rāmeṇa parābhavavaiśākha bahuladvādaśyāṃ likhitam śrī hayagrīvāyārpitam ||