नृसिंहस्तोत्रम् (इन्द्रद्युम्नकृतं स्कन्दपुराणान्तर्गतम्) Indradyumnakritam Nrisimha Stotram

इन्द्रद्युम्न उवाच ।एकानेकस्थूलसूक्ष्माणुमूर्ते व्योमातीत व्योमरूपैकरूप ।व्योमाकार व्यापक व्योमसंस्थ व्योमारूढ व्योमकेशाब्जयोने ॥ ३८॥

indradyumna uvāca |ekānekasthūlasūkṣmāṇumūrte vyomātīta vyomarūpaikarūpa |vyomākāra vyāpaka vyomasaṃstha vyomārūḍha vyomakeśābjayone || 38||

दुःखाम्भोधेस्त्राहि मां दिव्यसिंह प्रादुर्भूतानेककोट्यर्कधामन् ।नित्यासन्नो दूरसंस्थो न दूरो नासन्नो वा बोध्यबोधात्मभाव ॥ ३९॥

duḥkhāmbhodhestrāhi māṃ divyasiṃha prādurbhūtānekakoṭyarkadhāman |nityāsanno dūrasaṃstho na dūro nāsanno vā bodhyabodhātmabhāva || 39||

ज्ञेयज्ञेयो ज्ञानगम्योऽप्यगम्यो मायातीतो मानमेयोऽनुमानात् ।कृत्स्नस्यादिः कृत्स्नकर्त्तानुमन्ता पाता हर्त्ता विश्वसाक्षिन्नमस्ते ॥ २\।१६\।४०॥दुःखध्वंसस्यैकहेतुं न हेतुं भेत्तुं छेत्तुं संशयानग्रजातम् ।ज्योतीरूप ज्ञानरूप प्रकाश स्तोमव्यूहाकार निर्माणहेतो ॥ ४१॥

jñeyajñeyo jñānagamyo'pyagamyo māyātīto mānameyo'numānāt |kṛtsnasyādiḥ kṛtsnakarttānumantā pātā harttā viśvasākṣinnamaste || 2\|16\|40||duḥkhadhvaṃsasyaikahetuṃ na hetuṃ bhettuṃ chettuṃ saṃśayānagrajātam |jyotīrūpa jñānarūpa prakāśa stomavyūhākāra nirmāṇaheto || 41||

त्वत्पादाब्जे भक्तिमग्र्यां सदा मे देहि स्वामिन्मूलभूतां चतुर्णाम् ।श्रौतैः स्मार्तैर्नित्ययुक्ता जनास्ते दीनास्तिष्ठन्त्यत्र बद्धा भवाब्धौ ॥ ४२॥

tvatpādābje bhaktimagryāṃ sadā me dehi svāminmūlabhūtāṃ caturṇām |śrautaiḥ smārtairnityayuktā janāste dīnāstiṣṭhantyatra baddhā bhavābdhau || 42||

अनन्तपादं बहुहस्तनेत्रमनन्तकर्णं ककुभौघवस्त्रम् ।दिवानिशानाथसुकुण्डलाढ्यं नक्षत्रमालाकृतचारुहारम् ॥ ४३॥

anantapādaṃ bahuhastanetramanantakarṇaṃ kakubhaughavastram |divāniśānāthasukuṇḍalāḍhyaṃ nakṣatramālākṛtacāruhāram || 43||

त्वामद्भुतं दिव्यनृसिंहमूर्तिं भक्तेष्टपूर्तिं शरणं प्रपद्ये ।यत्पादपद्मं हि पितामहस्य किरीटरत्नैर्विकचत्वमेति ॥ ४४॥

tvāmadbhutaṃ divyanṛsiṃhamūrtiṃ bhakteṣṭapūrtiṃ śaraṇaṃ prapadye |yatpādapadmaṃ hi pitāmahasya kirīṭaratnairvikacatvameti || 44||

यदीयपादाब्जयुगान्तभूमौ लुठेच्छिरो यस्य हि पाञ्चभौतम् ।तद्दिव्यपादं शिरसा वहन्ति सुरेन्द्रनार्यः खलु तं नमामि ॥ ४५॥

yadīyapādābjayugāntabhūmau luṭhecchiro yasya hi pāñcabhautam |taddivyapādaṃ śirasā vahanti surendranāryaḥ khalu taṃ namāmi || 45||

तद्दिव्यसिंहं हतपापसङ्घं पादाश्रितानां करुणाब्धिसिंहम् ।पादाऽब्जसङ्घट्टविघट्टमानब्रह्माण्डभाण्डं प्रणमामि चण्डम् ॥ ४६॥

taddivyasiṃhaṃ hatapāpasaṅghaṃ pādāśritānāṃ karuṇābdhisiṃham |pādā'bjasaṅghaṭṭavighaṭṭamānabrahmāṇḍabhāṇḍaṃ praṇamāmi caṇḍam || 46||

सटाच्छटाकम्पनशीर्यमाणघनौघविद्रावितपापसङ्घम् ।चण्डाट्टहासान्तरिताब्दशब्दं त्रिलोकगर्भं नृहरिं नमामि ॥ ४७॥

saṭācchaṭākampanaśīryamāṇaghanaughavidrāvitapāpasaṅgham |caṇḍāṭṭahāsāntaritābdaśabdaṃ trilokagarbhaṃ nṛhariṃ namāmi || 47||

नमस्ते नमस्ते नमस्तेऽद्य विष्णो परित्राहि दीनानुकम्पिन्ननाथम् ।भवन्तं समासाद्य मे देहबन्धो मुरारे न संसारकारागृहेऽस्तु ॥ ४८॥

namaste namaste namaste'dya viṣṇo paritrāhi dīnānukampinnanātham |bhavantaṃ samāsādya me dehabandho murāre na saṃsārakārāgṛhe'stu || 48||

हयमेधसहस्रान्ते यथा त्वां चर्मचक्षुषा ।दिव्यरूपं प्रपश्यामि तथानुक्रोशय प्रभो ॥ ४९॥

hayamedhasahasrānte yathā tvāṃ carmacakṣuṣā |divyarūpaṃ prapaśyāmi tathānukrośaya prabho || 49||

यथा चेज्यासहस्रं मे निर्विघ्नं तत्समाप्यते ।यज्ञेश त्वत्प्रसादान्मे तथा सान्निध्यमस्तु ते ॥ २\।१६\।५०॥कोटयः पापराशीनां क्षयं यान्ति यथा प्रभो ।धर्मार्थकामा हस्तस्था नैषां चित्रं स्तुवन्ति ये ।मोक्षस्य भाजनं विष्णो ते नरा ये तवाश्रयाः ॥ ५१॥

yathā cejyāsahasraṃ me nirvighnaṃ tatsamāpyate |yajñeśa tvatprasādānme tathā sānnidhyamastu te || 2\|16\|50||koṭayaḥ pāparāśīnāṃ kṣayaṃ yānti yathā prabho |dharmārthakāmā hastasthā naiṣāṃ citraṃ stuvanti ye |mokṣasya bhājanaṃ viṣṇo te narā ye tavāśrayāḥ || 51||

स्तुत्वेत्थं दिव्यसिंहं तं भूपतिर्हृष्टमानसः ।दण्डपातप्रणामेन जगाम धरणीं मुहुः ॥ ५२॥

stutvetthaṃ divyasiṃhaṃ taṃ bhūpatirhṛṣṭamānasaḥ |daṇḍapātapraṇāmena jagāma dharaṇīṃ muhuḥ || 52||

इति श्रीस्कन्दपुराणे वैष्णवखण्डे पुरुषोत्तमजगन्नाथमाहात्म्येषोडशाध्यायान्तर्गतं इन्द्रद्युम्नकृतं विष्णुस्तोत्रं समाप्तम् ।स्कन्दपुराण । वैष्णवखण्ड । पुरुषोत्तमखण्ड । अध्याय १६/३८५१॥स्कन्दपुराण । वैष्णवखण्ड । पुरुषोत्तमखण्ड । अध्याय १६/३८-५१॥

iti śrīskandapurāṇe vaiṣṇavakhaṇḍe puruṣottamajagannāthamāhātmyeṣoḍaśādhyāyāntargataṃ indradyumnakṛtaṃ viṣṇustotraṃ samāptam |skandapurāṇa | vaiṣṇavakhaṇḍa | puruṣottamakhaṇḍa | adhyāya 16/3851||skandapurāṇa | vaiṣṇavakhaṇḍa | puruṣottamakhaṇḍa | adhyāya 16/38-51||