त्रिपुरास्तवराजः Shritripurastavarajah

श्रीनाथादि गुरुत्रयं गणपतिं पीठत्रयं भैरवंसिद्धौघं वटुकत्रयं पदयुगं दूतीक्रमं मण्डलम् ।वीरान्द्व्यष्टचतुष्कषष्टिनवकं वीरावलीपञ्चकम् ।श्रीमन्मालिनिमन्त्रराजसहितं वन्दे गुरोर्मण्डलम् ॥ १॥

śrīnāthādi gurutrayaṃ gaṇapatiṃ pīṭhatrayaṃ bhairavaṃsiddhaughaṃ vaṭukatrayaṃ padayugaṃ dūtīkramaṃ maṇḍalam |vīrāndvyaṣṭacatuṣkaṣaṣṭinavakaṃ vīrāvalīpañcakam |śrīmanmālinimantrarājasahitaṃ vande gurormaṇḍalam || 1||

सेवे सिन्दूरसन्दोहसुन्दरस्वाङ्गभासुराम् ।करुणापूरपीयूषकटाक्षां कुलनायिकाम् ॥ २॥

seve sindūrasandohasundarasvāṅgabhāsurām |karuṇāpūrapīyūṣakaṭākṣāṃ kulanāyikām || 2||

द्विनेत्रं द्विभुजं शान्तं गुरुं पद्मासनस्थितम् ।योगपीठे समासीनं नमामि शिरसिस्थितम् ॥ ३॥

dvinetraṃ dvibhujaṃ śāntaṃ guruṃ padmāsanasthitam |yogapīṭhe samāsīnaṃ namāmi śirasisthitam || 3||

नमामि सद्गुरुं शान्तं प्रत्यक्षशिवरूपिणम् ।शिरसा योगपीठस्थं मुक्तिकामार्थसिद्धये ॥ ४॥

namāmi sadguruṃ śāntaṃ pratyakṣaśivarūpiṇam |śirasā yogapīṭhasthaṃ muktikāmārthasiddhaye || 4||

या नित्या परमा शक्तिर्जगच्चैतन्यरूपिणी ।तां नमामि महादेवीं पञ्चमीं मातृरूपिणीम् ॥ ५॥

yā nityā paramā śaktirjagaccaitanyarūpiṇī |tāṃ namāmi mahādevīṃ pañcamīṃ mātṛrūpiṇīm || 5||

यस्याः सर्वं समुत्पन्नं यस्यामद्यापि तिष्ठति ।लयमेष्यति यस्यां तां पञ्चमीं प्रणमाम्यहम् ॥ ६॥

yasyāḥ sarvaṃ samutpannaṃ yasyāmadyāpi tiṣṭhati |layameṣyati yasyāṃ tāṃ pañcamīṃ praṇamāmyaham || 6||

श्रीमत्कल्पतरोर्मूले भवान्या रत्नमन्दिरे ।रत्नसिंहासने देव्याः श्रीचक्रं प्रणमाम्यहम् ॥ ७॥

śrīmatkalpatarormūle bhavānyā ratnamandire |ratnasiṃhāsane devyāḥ śrīcakraṃ praṇamāmyaham || 7||

भूगृहं गुणरेखाढ्यं वेदद्वारोपशोभितम् ।त्रिवृत्तं षोडशदलं तथाष्टदलकर्णिकम् ॥ ८॥

bhūgṛhaṃ guṇarekhāḍhyaṃ vedadvāropaśobhitam |trivṛttaṃ ṣoḍaśadalaṃ tathāṣṭadalakarṇikam || 8||

मनुकोणं द्विदिक्कोणं वसुकोणं त्रिकोणकम् ।मध्ये बिन्दुमहाचक्रं नित्यं श्रीत्रिपुरामयम् ॥ ९॥

manukoṇaṃ dvidikkoṇaṃ vasukoṇaṃ trikoṇakam |madhye bindumahācakraṃ nityaṃ śrītripurāmayam || 9||

ब्रह्माण्डाधारशक्तिश्च कलास्मरपुरन्दराः ।एताः संयोज्य पुरत ईश्वरीं योजयेच्छिवे ॥ १०॥

brahmāṇḍādhāraśaktiśca kalāsmarapurandarāḥ |etāḥ saṃyojya purata īśvarīṃ yojayecchive || 10||

चन्द्रबीजं बिन्दुसंस्थं शिवबीजं नियोजयेत् ।मादनं शक्रबीजस्थं योजयेद्भुवनेश्वरीम् ॥ ११॥

candrabījaṃ bindusaṃsthaṃ śivabījaṃ niyojayet |mādanaṃ śakrabījasthaṃ yojayedbhuvaneśvarīm || 11||

शिवबीजं मादनस्थं शक्रषष्टिसमन्वितम् ।सप्तमं तच्च शक्रस्थं मायाबीजं समुद्धरेत् ॥ १२॥

śivabījaṃ mādanasthaṃ śakraṣaṣṭisamanvitam |saptamaṃ tacca śakrasthaṃ māyābījaṃ samuddharet || 12||

तुङ्गाक्षरं शिवादिस्थं मरुदिन्द्रसमन्वितम् ।धरन्धरसुताबीजमेकत्रापि नियोजयेत् ॥ १३॥

tuṅgākṣaraṃ śivādisthaṃ marudindrasamanvitam |dharandharasutābījamekatrāpi niyojayet || 13||

बगलातुरीयबीजाधः षोडशं च नियोजयेत् ।वाक्स्थं तुरीयकं बीजं शाक्रबीजं नियोजयेत् ॥ १४॥

bagalāturīyabījādhaḥ ṣoḍaśaṃ ca niyojayet |vāksthaṃ turīyakaṃ bījaṃ śākrabījaṃ niyojayet || 14||

पिनाकेशं चन्द्रसंस्थमाकाशं रससंस्थितम् ।चतुर्थस्वरसंयुक्तं नादबिन्दुसमन्वितम् ॥ १५॥

pinākeśaṃ candrasaṃsthamākāśaṃ rasasaṃsthitam |caturthasvarasaṃyuktaṃ nādabindusamanvitam || 15||

सर्वमेकत्र संयोज्य पञ्चपञ्चाक्षरी भवेत् ।पञ्चकूटात्मिका विद्या सर्वतन्त्रेषु गोपिता ॥ १६॥

sarvamekatra saṃyojya pañcapañcākṣarī bhavet |pañcakūṭātmikā vidyā sarvatantreṣu gopitā || 16||

कलह्रीं हसकलह्रीं हकहलह्रीं हकलह्रीं हकलसह्रींविद्याचूडामणिर्देवी प्रोक्ता सर्वोत्तमोत्तमा ।तव स्नेहान्मयाख्याता नाख्येया यस्य कस्यचित् ॥ १७॥

kalahrīṃ hasakalahrīṃ hakahalahrīṃ hakalahrīṃ hakalasahrīṃvidyācūḍāmaṇirdevī proktā sarvottamottamā |tava snehānmayākhyātā nākhyeyā yasya kasyacit || 17||

इन्द्रो मां रक्षयेत्प्राच्यामाग्नेय्यामग्निदेवता ।याम्ये यमः सदा पातु नैरृते निरृतिश्च माम् ॥ १८॥

indro māṃ rakṣayetprācyāmāgneyyāmagnidevatā |yāmye yamaḥ sadā pātu nairṛte nirṛtiśca mām || 18||

पश्चिमे वरुणः पातु वायव्ये वायुदेवता ।धनदश्चेत्तरे पातु ऐशान्यामीश्वरोऽवतु ॥ १९॥

paścime varuṇaḥ pātu vāyavye vāyudevatā |dhanadaścettare pātu aiśānyāmīśvaro'vatu || 19||

ऊर्ध्वं प्रजापतिः पायादधश्चानन्तदेवता ।एवं दश दिशो रक्षां कुर्वन्त्वाशाधिदेवताः ॥ २०॥

ūrdhvaṃ prajāpatiḥ pāyādadhaścānantadevatā |evaṃ daśa diśo rakṣāṃ kurvantvāśādhidevatāḥ || 20||

गणेशः सर्वदा पातु क्षेत्रेशो रक्षयेत्सदा ।द्वारश्रीः सर्वदा पातु देहली पातु सर्वदा ॥ २१॥

gaṇeśaḥ sarvadā pātu kṣetreśo rakṣayetsadā |dvāraśrīḥ sarvadā pātu dehalī pātu sarvadā || 21||

गणनाथः सदा पातु दुर्गा मां परिरक्षतु ।वटुको भैरवश्चान्ते क्षेत्रपालोऽभिरक्षतु ॥ २२॥

gaṇanāthaḥ sadā pātu durgā māṃ parirakṣatu |vaṭuko bhairavaścānte kṣetrapālo'bhirakṣatu || 22||

सह रत्या स्वपत्न्या च कामदेवश्च सर्वदा ।प्रीत्या सह वसन्तोऽपि पातु मां नन्दने वने ॥ २३॥

saha ratyā svapatnyā ca kāmadevaśca sarvadā |prītyā saha vasanto'pi pātu māṃ nandane vane || 23||

चक्रस्य पश्चिमे द्वारे भवान्या रत्नमन्दिरे ।शङ्खपद्म निधी रक्षां कुरुतां कामसिद्धये ॥ २४॥

cakrasya paścime dvāre bhavānyā ratnamandire |śaṅkhapadma nidhī rakṣāṃ kurutāṃ kāmasiddhaye || 24||

पातु मां रत्नसोपानं परमैश्वर्यशोभितम् ।रक्षयेत्पश्चिमद्वारे भवान्या रत्नमन्दिरे ॥ २५॥

pātu māṃ ratnasopānaṃ paramaiśvaryaśobhitam |rakṣayetpaścimadvāre bhavānyā ratnamandire || 25||

सरस्वती महालक्ष्मीर्माया दुर्गा विभूतये ।भद्रकाली तथा स्वस्ती स्वाहा चैव शुभङ्करी ॥ २६॥

sarasvatī mahālakṣmīrmāyā durgā vibhūtaye |bhadrakālī tathā svastī svāhā caiva śubhaṅkarī || 26||

गौरी च लोकधात्री च वागीश्वर्यादयो मम ।एताश्चात्र स्थिताः सर्वा रक्षां कुर्वन्तु सर्वदा ॥ २७॥

gaurī ca lokadhātrī ca vāgīśvaryādayo mama |etāścātra sthitāḥ sarvā rakṣāṃ kurvantu sarvadā || 27||

पाषण्डाचारिणो भूता भूमौ ये चान्तरिक्षगाः ।दिवि लोके स्थिता ये च ते गच्छन्तु शिवाज्ञया ॥ २८॥

pāṣaṇḍācāriṇo bhūtā bhūmau ye cāntarikṣagāḥ |divi loke sthitā ye ca te gacchantu śivājñayā || 28||

वास्तूनामधिपो ब्रह्मा स्रष्टा रक्षतु सर्वदा ।कुलनाथः सदा पातु द्वीपनाथोऽपि सर्वदा ॥शिवं कुर्वन्तु ताः सर्वा आसने पञ्च देवताः ॥ २९॥

vāstūnāmadhipo brahmā sraṣṭā rakṣatu sarvadā |kulanāthaḥ sadā pātu dvīpanātho'pi sarvadā ||śivaṃ kurvantu tāḥ sarvā āsane pañca devatāḥ || 29||

पृथ्वि त्वया धृता लोका देवि त्वं विष्णुना धृता ।त्वं च धारय मां देवि पवित्रं कुरु चासनम् ॥ ३०॥

pṛthvi tvayā dhṛtā lokā devi tvaṃ viṣṇunā dhṛtā |tvaṃ ca dhāraya māṃ devi pavitraṃ kuru cāsanam || 30||

चक्रस्य दक्षिणे भागे श्रीमत्पात्रस्य मण्डले ।पञ्चरत्नानि मे पान्तु पूजकानां च सिद्धये ॥ ३१॥

cakrasya dakṣiṇe bhāge śrīmatpātrasya maṇḍale |pañcaratnāni me pāntu pūjakānāṃ ca siddhaye || 31||

तत्र पात्रासने पुण्ये सर्वदा वह्निमण्डले ।वह्नेश्च मण्डलं पातु कुलदेव्याश्च पूजने ॥ ३२॥

tatra pātrāsane puṇye sarvadā vahnimaṇḍale |vahneśca maṇḍalaṃ pātu kuladevyāśca pūjane || 32||

धूम्रार्चिरूष्मा ज्वलिनी ज्वालिनी विस्फुलिङ्गिनी ।सुश्रीः सुरूपा कपिला हव्यकव्यवहे दश ॥ ३३॥

dhūmrārcirūṣmā jvalinī jvālinī visphuliṅginī |suśrīḥ surūpā kapilā havyakavyavahe daśa || 33||

वह्नेर्दशकला ज्ञेयाः सर्वधर्मफलप्रदाः ।एताभिः सहितो रक्षां कुर्याद्वैश्वानरो मम ॥ ३४॥

vahnerdaśakalā jñeyāḥ sarvadharmaphalapradāḥ |etābhiḥ sahito rakṣāṃ kuryādvaiśvānaro mama || 34||

तत्र पात्रवरे दिव्ये श्रीमदादित्यमण्डले ।सूर्यस्य मण्डलं पातु मम सर्वार्थसिद्धये ॥ ३५॥

tatra pātravare divye śrīmadādityamaṇḍale |sūryasya maṇḍalaṃ pātu mama sarvārthasiddhaye || 35||

तपिनी तापिनी धूम्रा मरीचिर्ज्वालिनी रुचिः ।सुषुम्ना भोगदा विश्वा बोधिनी धारिणी क्षमा ॥ ३६॥

tapinī tāpinī dhūmrā marīcirjvālinī ruciḥ |suṣumnā bhogadā viśvā bodhinī dhāriṇī kṣamā || 36||

कभाद्यर्णयुता भानोष्ठडान्ता द्वादशेरिताः ।एताः कलास्तु सूर्यस्य सूर्यमण्डलसंस्थिताः ॥एताभिः सहितो रक्षामादित्यः प्रकरोतु मे ॥ ३७॥

kabhādyarṇayutā bhānoṣṭhaḍāntā dvādaśeritāḥ |etāḥ kalāstu sūryasya sūryamaṇḍalasaṃsthitāḥ ||etābhiḥ sahito rakṣāmādityaḥ prakarotu me || 37||

तत्र पात्रामृते दिव्ये सोमस्यामृतमण्डले ।अमृतं सर्वदा पातु भैरवानन्दहेतुकम् ॥ ३८॥

tatra pātrāmṛte divye somasyāmṛtamaṇḍale |amṛtaṃ sarvadā pātu bhairavānandahetukam || 38||

अमृता मानदा पूषा तुष्टिः पुष्टी रतिर्धृतिः ।शशिनी चन्द्रिका कान्तिर्ज्योत्स्ना श्रीः प्रीतिरङ्गदा ॥ ३९॥

amṛtā mānadā pūṣā tuṣṭiḥ puṣṭī ratirdhṛtiḥ |śaśinī candrikā kāntirjyotsnā śrīḥ prītiraṅgadā || 39||

पूर्णा पूर्णामृता कामदायिन्यः स्वरजाः कलाः ।सोममण्डलमध्यस्था रक्षां कुर्वन्तु सर्वदा ॥ ४०॥

pūrṇā pūrṇāmṛtā kāmadāyinyaḥ svarajāḥ kalāḥ |somamaṇḍalamadhyasthā rakṣāṃ kurvantu sarvadā || 40||

रविवेदकलापूर्णे सुधासम्पूर्णमण्डले ।नक्षत्राधिपती रक्षां करोतु मम भूतये ॥ ४१॥

ravivedakalāpūrṇe sudhāsampūrṇamaṇḍale |nakṣatrādhipatī rakṣāṃ karotu mama bhūtaye || 41||

सूर्याग्निमण्डले दिव्ये सम्पूर्णे शशिमण्डले ।पातु मां खेचरीबीजं दोषैकादशनाशकृत् ॥ ४२॥

sūryāgnimaṇḍale divye sampūrṇe śaśimaṇḍale |pātu māṃ khecarībījaṃ doṣaikādaśanāśakṛt || 42||

शक्तियुक्ते सुरानन्दे भैरवाद्यैः सशक्तिभिः ।आनन्दभैरवो रक्षां करोतु मम सर्वदा ॥ ४३॥

śaktiyukte surānande bhairavādyaiḥ saśaktibhiḥ |ānandabhairavo rakṣāṃ karotu mama sarvadā || 43||

तत्र पूर्णामृते पुण्ये शक्तिर्या वारणी कला ।आनन्दरूपिणी रक्षां करोतु मम सर्वदा ॥ ४४॥

tatra pūrṇāmṛte puṇye śaktiryā vāraṇī kalā |ānandarūpiṇī rakṣāṃ karotu mama sarvadā || 44||

सृष्टिर्बुद्धिः स्मृतिर्मेधा कान्तिर्लक्ष्मीर्द्युतिः स्थिरा ।स्थितिः सिद्धिरिति ख्याताः कचवर्गकला दश ॥ ४५॥

sṛṣṭirbuddhiḥ smṛtirmedhā kāntirlakṣmīrdyutiḥ sthirā |sthitiḥ siddhiriti khyātāḥ kacavargakalā daśa || 45||

अकाराद्ब्रह्मणोत्पन्नाः सृष्टिकर्मणि तत्पराः ।एताभिः सहितः पायाद्ब्रह्मा मां वाक्प्रदः सदा ॥ ४६॥

akārādbrahmaṇotpannāḥ sṛṣṭikarmaṇi tatparāḥ |etābhiḥ sahitaḥ pāyādbrahmā māṃ vākpradaḥ sadā || 46||

जरा च पालिनी शान्तिरीश्वरी रतिकामिके ।वरदा ह्लादीनी प्रीतिर्दीर्घा च टतवर्गगाः ॥ ४७॥

jarā ca pālinī śāntirīśvarī ratikāmike |varadā hlādīnī prītirdīrghā ca ṭatavargagāḥ || 47||

उकाराद्विष्णुसम्भूताः स्थितिकर्मणि तत्पराः ।एताभिः सहितः पायान्मां विष्णुः पुष्टिदायकः ॥ ४८॥

ukārādviṣṇusambhūtāḥ sthitikarmaṇi tatparāḥ |etābhiḥ sahitaḥ pāyānmāṃ viṣṇuḥ puṣṭidāyakaḥ || 48||

तीक्ष्णा रौद्री भया निद्रा तन्द्री क्षुत् क्रोधिनी क्रिया ।उद्गारा मृत्युरूपा च पयवर्गकला दश ॥ ४९॥

tīkṣṇā raudrī bhayā nidrā tandrī kṣut krodhinī kriyā |udgārā mṛtyurūpā ca payavargakalā daśa || 49||

मकाराद्रुद्रसम्भूताः संहारनिरताः सदा ।एताभिः सहितो रुद्रो मां पायान्मृत्युनाशकः ॥ ५०॥

makārādrudrasambhūtāḥ saṃhāraniratāḥ sadā |etābhiḥ sahito rudro māṃ pāyānmṛtyunāśakaḥ || 50||