बालामन्त्रसिद्धिस्तवः Shri Bala Mantra Siddhi Stavah

ब्राह्मीरूपधरे देवि ब्रह्मात्मा ब्रह्मपालिका ।विद्यामन्त्रादिकं सर्वं सिद्धिं देहि परेश्वरि ॥ १॥

brāhmīrūpadhare devi brahmātmā brahmapālikā |vidyāmantrādikaṃ sarvaṃ siddhiṃ dehi pareśvari || 1||

महेश्वरी महामाया मानन्दा मोहहारिणी ।मन्त्रसिद्धिफलं देहि महामन्त्रार्णवेश्वरि ॥ २॥

maheśvarī mahāmāyā mānandā mohahāriṇī |mantrasiddhiphalaṃ dehi mahāmantrārṇaveśvari || 2||

गुह्येश्वरी गुणातीता गुह्यतत्त्वार्थदायिनी ।गुणत्रयात्मिका देवी मन्त्रसिद्धिं ददस्व माम् ॥ ३॥

guhyeśvarī guṇātītā guhyatattvārthadāyinī |guṇatrayātmikā devī mantrasiddhiṃ dadasva mām || 3||

नारायणी च नाकेशी नृमुण्डमालिनी परा ।नानानना नाकुलेशी मन्त्रसिद्धिं प्रदेहि मे ॥ ४॥

nārāyaṇī ca nākeśī nṛmuṇḍamālinī parā |nānānanā nākuleśī mantrasiddhiṃ pradehi me || 4||

घृष्टिचक्रा महारौद्री घनोपमविवर्णका ।घोरघोरतरा घोरा मन्त्रसिद्धिप्रदा भव ॥ ५॥

ghṛṣṭicakrā mahāraudrī ghanopamavivarṇakā |ghoraghoratarā ghorā mantrasiddhipradā bhava || 5||

शक्राणी सर्वदैत्यघ्नी सहस्रलोचनी शुभा ।सर्वारिष्टविनिर्मुक्ता सा देवी मन्त्रसिद्धिदा ॥ ६॥

śakrāṇī sarvadaityaghnī sahasralocanī śubhā |sarvāriṣṭavinirmuktā sā devī mantrasiddhidā || 6||

चामुण्डारूपदेवेशी चलज्जिह्वा भयानका ।चतुष्पीठेश्वरी देहि मन्त्रसिद्धिं सदा मम ॥ ७॥

cāmuṇḍārūpadeveśī calajjihvā bhayānakā |catuṣpīṭheśvarī dehi mantrasiddhiṃ sadā mama || 7||

लक्ष्मीलावण्यवर्णा च रक्ता रक्तमहाप्रिया ।लम्बकेशा रत्नभूषा मन्त्रसिद्धिं सदा दद ॥ ८॥

lakṣmīlāvaṇyavarṇā ca raktā raktamahāpriyā |lambakeśā ratnabhūṣā mantrasiddhiṃ sadā dada || 8||

बाला वीरार्चिता विद्या विशालनयनानना ।विभूतिदा विष्णुमाता मन्त्रसिद्धिं प्रयच्छ मे ॥ ९॥

bālā vīrārcitā vidyā viśālanayanānanā |vibhūtidā viṣṇumātā mantrasiddhiṃ prayaccha me || 9||

फलश्रुतिः ।मन्त्रसिद्धिस्तवं पुण्यं महामोक्षफलप्रदम् ।महामोहहरं साक्षात् सत्यं मन्त्रस्य सिद्धिदम् ॥ १०॥

phalaśrutiḥ |mantrasiddhistavaṃ puṇyaṃ mahāmokṣaphalapradam |mahāmohaharaṃ sākṣāt satyaṃ mantrasya siddhidam || 10||

इति महाकालसंहितायां श्रीबालामन्त्रसिद्धिस्तवः सम्पूर्णः ।

iti mahākālasaṃhitāyāṃ śrībālāmantrasiddhistavaḥ sampūrṇaḥ |