महाविद्यावैष्णवीकवचस्तोत्रम् Shri Mahavidya Vaishnavi Kavachastotram

श्रीभगवानुवाचअस्य मन्त्रस्य कवचं शृणु वेतालभैरव ।वैष्णवीतन्त्रसंज्ञस्य वैष्णव्याश्च विशेषतः ॥ १॥

śrībhagavānuvācaasya mantrasya kavacaṃ śṛṇu vetālabhairava |vaiṣṇavītantrasaṃjñasya vaiṣṇavyāśca viśeṣataḥ || 1||

तत्र मन्त्राद्यक्षरं तु वासुदेवस्वरूपधृक् ।वर्णो द्वितीयो ब्रह्मैव तृतीयश्चन्द्रशेखरः ॥ २॥

tatra mantrādyakṣaraṃ tu vāsudevasvarūpadhṛk |varṇo dvitīyo brahmaiva tṛtīyaścandraśekharaḥ || 2||

चतुर्थो गजवक्त्रश्च पञ्चमस्तु दिवाकरः ।शक्तिः स्वयं पकारश्च महामाया जगन्मयी ॥ ३॥

caturtho gajavaktraśca pañcamastu divākaraḥ |śaktiḥ svayaṃ pakāraśca mahāmāyā jaganmayī || 3||

यकारस्तु महालक्ष्मीः शेषवर्णः सरस्वती ।योगिनी पूर्ववर्णस्य शैलपुत्री प्रकीर्तिता ॥ ४॥

yakārastu mahālakṣmīḥ śeṣavarṇaḥ sarasvatī |yoginī pūrvavarṇasya śailaputrī prakīrtitā || 4||

द्वितीयस्य तु वर्णस्य चण्डिका योगिनी मता ।चण्डघण्टा तृतीयस्य कूष्माण्डा तत्परस्य च ॥ ५॥

dvitīyasya tu varṇasya caṇḍikā yoginī matā |caṇḍaghaṇṭā tṛtīyasya kūṣmāṇḍā tatparasya ca || 5||

स्कन्दमाता तकारस्य पस्य कात्यायनी स्वयम् ।कालरात्रिः सप्तमस्य महादेवीति संस्थिता ॥ ६॥

skandamātā takārasya pasya kātyāyanī svayam |kālarātriḥ saptamasya mahādevīti saṃsthitā || 6||

प्रथमं वर्णकवचं योगिनीकवचं तथा ।देवौघकवचं पश्चाद्देवीदिक्कवचं तथा ॥ ७॥

prathamaṃ varṇakavacaṃ yoginīkavacaṃ tathā |devaughakavacaṃ paścāddevīdikkavacaṃ tathā || 7||

ततस्तु पार्श्वकवचं द्वितीयान्ताव्ययस्य च ।कवचं तु ततः पश्चात् षड्वर्णकवचं तथा ॥ ८॥

tatastu pārśvakavacaṃ dvitīyāntāvyayasya ca |kavacaṃ tu tataḥ paścāt ṣaḍvarṇakavacaṃ tathā || 8||

अभेद्यकवचं चेति सर्वत्राणपरायणम् ।इमानि कवचान्यष्टौ यो जानाति नरोत्तमः ।सोऽहमेव महादेवो देवीरूपश्च शक्तिमान् ॥ ९॥

abhedyakavacaṃ ceti sarvatrāṇaparāyaṇam |imāni kavacānyaṣṭau yo jānāti narottamaḥ |so'hameva mahādevo devīrūpaśca śaktimān || 9||

ॐ अस्य श्रीवैष्णवीकवचस्तोत्रमहामन्त्रस्य नारायण ऋषिः ।अनुष्टुप् छन्दः । श्रीमहाविद्या वैष्णवीकात्यायनी देवता ।सर्वार्थसाधने जपे विनियोगः ॥अः पातु पूर्वकाष्ठायामाग्नेय्यां पातु कः सदा ।पातु चो यमकाष्ठायाण्टो नैरृत्यां च सर्वदा ॥ १०॥

oṃ asya śrīvaiṣṇavīkavacastotramahāmantrasya nārāyaṇa ṛṣiḥ |anuṣṭup chandaḥ | śrīmahāvidyā vaiṣṇavīkātyāyanī devatā |sarvārthasādhane jape viniyogaḥ ||aḥ pātu pūrvakāṣṭhāyāmāgneyyāṃ pātu kaḥ sadā |pātu co yamakāṣṭhāyāṇṭo nairṛtyāṃ ca sarvadā || 10||

मां पातु तोऽसौ पाश्चात्ये शक्तिर्वायव्यदिग्गता ।मूर्ध्नि रक्षतु मां सोऽसौ बाहौ मां दक्षिणे तु कः ।मां वामबाहौ च पातु हृदि तो मां सदावतु ॥ ११॥

māṃ pātu to'sau pāścātye śaktirvāyavyadiggatā |mūrdhni rakṣatu māṃ so'sau bāhau māṃ dakṣiṇe tu kaḥ |māṃ vāmabāhau ca pātu hṛdi to māṃ sadāvatu || 11||

तः पातु कण्ठदेशे मां कट्योः शक्तिस्तथावतु ।यः पातु दक्षिणे पादे शो मां वामपदे तथा ॥ १२॥

taḥ pātu kaṇṭhadeśe māṃ kaṭyoḥ śaktistathāvatu |yaḥ pātu dakṣiṇe pāde śo māṃ vāmapade tathā || 12||

शैलपुत्री तु पूर्वस्यांआग्नेय्यां पातु चण्डिका ।चण्डाघण्टा पातु याम्यां यमभीतिविमर्दिनी ॥ १३॥

śailaputrī tu pūrvasyāṃāgneyyāṃ pātu caṇḍikā |caṇḍāghaṇṭā pātu yāmyāṃ yamabhītivimardinī || 13||

नैरृत्ये त्वथ कूष्माण्डा पातु मां जगतां प्रसूः ।स्कन्दमाता पश्चिमायां मां रक्षतु सदैव हि ॥ १४॥

nairṛtye tvatha kūṣmāṇḍā pātu māṃ jagatāṃ prasūḥ |skandamātā paścimāyāṃ māṃ rakṣatu sadaiva hi || 14||

कात्यायनी मां वायव्ये पातु लोकेश्वरी सदा ।कालरात्री तु कौबेर्यां सदा रक्षतु मां स्वयम् ॥ १५॥

kātyāyanī māṃ vāyavye pātu lokeśvarī sadā |kālarātrī tu kauberyāṃ sadā rakṣatu māṃ svayam || 15||

महागौरी तथेशान्यां सततं पातु पावनी ।नेत्रयोर्वासुदेवो मां पातु नित्यं सनातनः ॥ १६॥

mahāgaurī tatheśānyāṃ satataṃ pātu pāvanī |netrayorvāsudevo māṃ pātu nityaṃ sanātanaḥ || 16||

ब्रह्मा मां पातु वदने पद्मयोनिरयोनिजः ।नासाभागे रक्षतु मां सर्वदा चन्द्रशेखरः ॥ १७॥

brahmā māṃ pātu vadane padmayonirayonijaḥ |nāsābhāge rakṣatu māṃ sarvadā candraśekharaḥ || 17||

गजवक्त्रः स्तन्ययुग्मे पातु नित्यं हरात्मजः ।वामदक्षिणपाण्योर्मां नित्यं पातु दिवाकरः ॥ १८॥

gajavaktraḥ stanyayugme pātu nityaṃ harātmajaḥ |vāmadakṣiṇapāṇyormāṃ nityaṃ pātu divākaraḥ || 18||

महामाया स्वयं नाभौ मां पातु परमेश्वरी ।महालक्ष्मीः पातु गुह्ये जानुनी तु सरस्वती ॥ १९॥

mahāmāyā svayaṃ nābhau māṃ pātu parameśvarī |mahālakṣmīḥ pātu guhye jānunī tu sarasvatī || 19||

महामाया पूर्वभागे नित्यं रक्षतु मांशुभा ।अग्निज्वाला तथाग्नेय्यां पायान्नित्यं वरासनी ॥ २०॥

mahāmāyā pūrvabhāge nityaṃ rakṣatu māṃśubhā |agnijvālā tathāgneyyāṃ pāyānnityaṃ varāsanī || 20||

रुद्राणी पातु मां याम्यां नैरृत्यां चण्डनायिका ।उग्रचण्डा पश्चिमायां पातु नित्यं महेश्वरी ॥ २१॥

rudrāṇī pātu māṃ yāmyāṃ nairṛtyāṃ caṇḍanāyikā |ugracaṇḍā paścimāyāṃ pātu nityaṃ maheśvarī || 21||

प्रचण्डा पातु वायव्ये कौबेर्यां घोररूपिणी ।ईश्वरी च तथैशान्यां पातु नित्यं सनातनी ॥ २२॥

pracaṇḍā pātu vāyavye kauberyāṃ ghorarūpiṇī |īśvarī ca tathaiśānyāṃ pātu nityaṃ sanātanī || 22||

ऊर्ध्वे पातु महामाया पात्वधः परमेश्वरी ।अग्रतः पातु मामुग्रा पृष्ठतो वैष्णवी तथा ॥ २३॥

ūrdhve pātu mahāmāyā pātvadhaḥ parameśvarī |agrataḥ pātu māmugrā pṛṣṭhato vaiṣṇavī tathā || 23||

ब्रह्माणी दक्षिणे पार्श्वे नित्यं रक्षतु शोभना ।कौमारी पर्वते पातु वाराही सलिले च माम् ॥ २४॥

brahmāṇī dakṣiṇe pārśve nityaṃ rakṣatu śobhanā |kaumārī parvate pātu vārāhī salile ca mām || 24||

नारसिंही दंष्ट्रिभये पातु मां विपिनेषु च ।ऐन्द्री मां पातु चाकाशे तथा सर्वजले स्थले ॥ २५॥

nārasiṃhī daṃṣṭribhaye pātu māṃ vipineṣu ca |aindrī māṃ pātu cākāśe tathā sarvajale sthale || 25||

सेतुः सर्वाङ्गुलीः पातु देवादिः पातु कर्णयोः ।देवान्तश्चिबुके पातु पार्श्वयोः शक्तिपञ्चमः ॥ २६॥

setuḥ sarvāṅgulīḥ pātu devādiḥ pātu karṇayoḥ |devāntaścibuke pātu pārśvayoḥ śaktipañcamaḥ || 26||

हा पातु मां तथैर्वोर्वोर्माया रक्षतु जङ्घयोः ।सर्वेन्द्रियाणि मे पातु रोमकूपेषु सर्वदा ॥ २७॥

hā pātu māṃ tathairvorvormāyā rakṣatu jaṅghayoḥ |sarvendriyāṇi me pātu romakūpeṣu sarvadā || 27||

त्वचि मां वै सदा पातु मांशम्भुः पातु सर्वदा ।नखदन्तकरोष्ठादौ यो मां पातु सदैव हि ॥ २८॥

tvaci māṃ vai sadā pātu māṃśambhuḥ pātu sarvadā |nakhadantakaroṣṭhādau yo māṃ pātu sadaiva hi || 28||

देवादिः पातु मां हस्तौ देवान्तः स्तनकक्षयोः ।एतदादौ तु यः सेतुर्बाह्ये मां पातु देहतः ॥ २९॥

devādiḥ pātu māṃ hastau devāntaḥ stanakakṣayoḥ |etadādau tu yaḥ seturbāhye māṃ pātu dehataḥ || 29||

आज्ञाचक्रे सुषुम्नायांषट्चक्रे हृदिसन्धिषु ।आदिषोडशचक्रे च ललाटाकाश एव च ॥ ३०॥

ājñācakre suṣumnāyāṃṣaṭcakre hṛdisandhiṣu |ādiṣoḍaśacakre ca lalāṭākāśa eva ca || 30||

वैष्णवीतन्त्रमन्त्रश्च मां नित्यं रक्षतात्सदा ।कर्णनाडीषु सर्वासु पार्श्वकक्षशिखासु च ॥ ३१॥

vaiṣṇavītantramantraśca māṃ nityaṃ rakṣatātsadā |karṇanāḍīṣu sarvāsu pārśvakakṣaśikhāsu ca || 31||

रुधिरस्नायुमज्जासु मस्तिष्केषु च पर्वसु ।द्वितीयाष्टाक्षरो मन्त्रः कवचं पातु सर्वतः ॥ ३२॥

rudhirasnāyumajjāsu mastiṣkeṣu ca parvasu |dvitīyāṣṭākṣaro mantraḥ kavacaṃ pātu sarvataḥ || 32||

रेतो वायौ नाभिरन्ध्रे पृष्ठसन्धिषु सर्वतः ।षडक्षरस्तृतीयोऽयं मन्त्रो मां पातु सर्वदा ॥ ३३॥

reto vāyau nābhirandhre pṛṣṭhasandhiṣu sarvataḥ |ṣaḍakṣarastṛtīyo'yaṃ mantro māṃ pātu sarvadā || 33||

नासारन्ध्रे महामाया कण्ठरन्ध्रे तु वैष्णवी ।सर्वसन्धिषु मां पातु दुर्गा दुर्गार्तिहारिणी ॥ ३४॥

nāsārandhre mahāmāyā kaṇṭharandhre tu vaiṣṇavī |sarvasandhiṣu māṃ pātu durgā durgārtihāriṇī || 34||

श्रोत्रयोर्हुं फडित्येवं नित्यं रक्षतु कालिका ।नेत्रबीजत्रयं नेत्रे सदा तिष्ठतु रक्षितुम् ॥ ३५॥

śrotrayorhuṃ phaḍityevaṃ nityaṃ rakṣatu kālikā |netrabījatrayaṃ netre sadā tiṣṭhatu rakṣitum || 35||

ॐ ऐं ह्रीं ह्रौं नासिकायां रक्षन्ती चास्तु चण्डिका ।ॐ ह्रीं ह्रूं मां सदा तारा जिह्वमूले तु तिष्ठतु ॥ ३६॥

oṃ aiṃ hrīṃ hrauṃ nāsikāyāṃ rakṣantī cāstu caṇḍikā |oṃ hrīṃ hrūṃ māṃ sadā tārā jihvamūle tu tiṣṭhatu || 36||

हृदि तिष्ठतु मे सेतुर्ज्ञानं रक्षितुमुत्तमम् ।ॐ क्षौं फट् च महामारी पातु मां सर्वतः सदा ॥ ३७॥

hṛdi tiṣṭhatu me seturjñānaṃ rakṣitumuttamam |oṃ kṣauṃ phaṭ ca mahāmārī pātu māṃ sarvataḥ sadā || 37||

ॐ जूं सः कौशिकी मां प्राणन् रक्षतु रक्षिता ।ॐ ह्रीं ह्रूं मां भर्गदयिता देहशून्येषु पातु माम् ॥ ३८॥

oṃ jūṃ saḥ kauśikī māṃ prāṇan rakṣatu rakṣitā |oṃ hrīṃ hrūṃ māṃ bhargadayitā dehaśūnyeṣu pātu mām || 38||

ॐ मः सदाशैलपुत्री सर्वानोग्रान् प्रमृज्यताम् ।ॐ ह्रीं सः स्फें क्षः फडस्त्राय सिंहव्याघ्रभयाद्रणात् ॥ ३९॥

oṃ maḥ sadāśailaputrī sarvānogrān pramṛjyatām |oṃ hrīṃ saḥ spheṃ kṣaḥ phaḍastrāya siṃhavyāghrabhayādraṇāt || 39||

शिवदूती पातु नित्यं ह्रीं सर्वास्त्रेषु तिष्ठतु ।ॐ ह्रां ह्रीं सः चण्डघण्टा कर्णछिद्रेषु पातु माम् ॥ ४०॥

śivadūtī pātu nityaṃ hrīṃ sarvāstreṣu tiṣṭhatu |oṃ hrāṃ hrīṃ saḥ caṇḍaghaṇṭā karṇachidreṣu pātu mām || 40||

ॐ ह्रीं सः कामेश्वरी कामानभितिष्ठतु रक्षतु ।ॐ आं हूं फट् उग्रचण्डा रिपून् विघ्नान् विमर्दताम् ॥ ४१॥

oṃ hrīṃ saḥ kāmeśvarī kāmānabhitiṣṭhatu rakṣatu |oṃ āṃ hūṃ phaṭ ugracaṇḍā ripūn vighnān vimardatām || 41||

ॐ आं लां पातु मां नित्यं वैष्णवी जगदीश्वरी ।ॐ कं ब्रह्माणी पातु चक्रात् ॐ चं रुद्राणी तु शक्तितः ॥ ४२॥

oṃ āṃ lāṃ pātu māṃ nityaṃ vaiṣṇavī jagadīśvarī |oṃ kaṃ brahmāṇī pātu cakrāt oṃ caṃ rudrāṇī tu śaktitaḥ || 42||

ॐ टं कौमारी पातु वज्रात् ॐ तं वाराही तु काण्डतः ।ॐ पं पातु नारसिंही मां क्रव्यादेभ्यस्तथास्त्रतः ॥ ४३॥

oṃ ṭaṃ kaumārī pātu vajrāt oṃ taṃ vārāhī tu kāṇḍataḥ |oṃ paṃ pātu nārasiṃhī māṃ kravyādebhyastathāstrataḥ || 43||

शस्त्रास्त्रेभ्यः समस्तेभ्यो यन्त्रेभ्योऽनिष्टमन्त्रतः ।चण्डिका मां सदा पातु ॐ यं सं देव्यै नमो नमः ॥ ४४॥

śastrāstrebhyaḥ samastebhyo yantrebhyo'niṣṭamantrataḥ |caṇḍikā māṃ sadā pātu oṃ yaṃ saṃ devyai namo namaḥ || 44||

विश्वासघातकेभ्यो मामैन्द्री रक्षतु मन्मनः ।ॐ नमो महामायायै ॐ वैष्णव्यै नमो नमः ।रक्ष मां सर्वभूतेभ्यः सर्वत्र परमेश्वरी ॥ ४५॥

viśvāsaghātakebhyo māmaindrī rakṣatu manmanaḥ |oṃ namo mahāmāyāyai oṃ vaiṣṇavyai namo namaḥ |rakṣa māṃ sarvabhūtebhyaḥ sarvatra parameśvarī || 45||

आधारे वायुमार्गे हृदि कमलदले चन्द्रवत्स्मेरसूर्येहस्तौ वह्नौ समिद्धे विशतु वरदयामन्त्रमष्टाक्षरं तत् ।यद्ब्रह्मा मूर्ध्नि धत्ते हरिरवति गले चन्द्रचूडो हृदिस्थंतन्मां पातु प्रधानं निखिलमतिशयम्प्रद्मगर्भाभबीजम् ॥ ४६॥

ādhāre vāyumārge hṛdi kamaladale candravatsmerasūryehastau vahnau samiddhe viśatu varadayāmantramaṣṭākṣaraṃ tat |yadbrahmā mūrdhni dhatte hariravati gale candracūḍo hṛdisthaṃtanmāṃ pātu pradhānaṃ nikhilamatiśayampradmagarbhābhabījam || 46||

आद्याः शेषाः स्वरौघैर्नमयबलवरैरस्वरेणापि युक्तैःसानुस्वारा विसर्गैर्हरिहरविदितं यत्सहस्रं च साष्टम् ।मन्त्राणां सेतुबन्धं निवसति सततं वैष्णवीतन्त्रमन्त्रेतन्मां पायात्पवित्रं परमवरमजम्भूतलव्योमभागे ॥ ४७॥

ādyāḥ śeṣāḥ svaraughairnamayabalavarairasvareṇāpi yuktaiḥsānusvārā visargairhariharaviditaṃ yatsahasraṃ ca sāṣṭam |mantrāṇāṃ setubandhaṃ nivasati satataṃ vaiṣṇavītantramantretanmāṃ pāyātpavitraṃ paramavaramajambhūtalavyomabhāge || 47||

अङ्गान्यष्टौ तथाष्टौ वसव इह तथैवाष्टमूर्तिर्दलानिप्रोक्तान्यष्टौ तथाष्टौ मधुमतिरचिताः सिद्धयोऽष्टौ तथैव ।अष्टावष्टाष्टसङ्ख्या जगति रतिकलाः क्षिप्रकाष्टाङ्गयोगामय्यष्टावक्षराणि क्षरतु सहिगणो यद्धृदोयस्त्वमूषाम् ॥ ४८॥

aṅgānyaṣṭau tathāṣṭau vasava iha tathaivāṣṭamūrtirdalāniproktānyaṣṭau tathāṣṭau madhumatiracitāḥ siddhayo'ṣṭau tathaiva |aṣṭāvaṣṭāṣṭasaṅkhyā jagati ratikalāḥ kṣiprakāṣṭāṅgayogāmayyaṣṭāvakṣarāṇi kṣaratu sahigaṇo yaddhṛdoyastvamūṣām || 48||

फलश्रुतिःइति तत्कवचं प्रोक्तं धर्मकामार्थसाधकम् ।इदं रहस्यं परममिदं सर्वार्थसाधकम् ॥ ४९॥

phalaśrutiḥiti tatkavacaṃ proktaṃ dharmakāmārthasādhakam |idaṃ rahasyaṃ paramamidaṃ sarvārthasādhakam || 49||

यः सकृच्छृणुयादेतत्कवचं यन्मयोदितम् ।स सर्वान् लभते कामान् परत्र शिवरूपताम् ॥ ५०॥

yaḥ sakṛcchṛṇuyādetatkavacaṃ yanmayoditam |sa sarvān labhate kāmān paratra śivarūpatām || 50||

सकृद्यस्तु पठेदेतत् कवचं यन्मयोदितम् ।स सर्वयज्ञस्य फलं लभते नात्र संशयः ॥ ५१॥

sakṛdyastu paṭhedetat kavacaṃ yanmayoditam |sa sarvayajñasya phalaṃ labhate nātra saṃśayaḥ || 51||

सङ्ग्रामेषु जयेच्छत्रून् मतङ्गानिव केसरी ।दहेत्तृणं यथा वह्निस्तथाशत्रून् दहेत्सदा ॥ ५२॥

saṅgrāmeṣu jayecchatrūn mataṅgāniva kesarī |dahettṛṇaṃ yathā vahnistathāśatrūn dahetsadā || 52||

नास्त्राणि तस्य शस्त्राणि शरीरे प्रविशन्ति वै ।न तस्य जायते व्याधिर्न च दुःखं कदाचन ॥ ५३॥

nāstrāṇi tasya śastrāṇi śarīre praviśanti vai |na tasya jāyate vyādhirna ca duḥkhaṃ kadācana || 53||

गुटिकाञ्जनपातालपादलेपरसाञ्जनम् ।उच्चाटनाद्यास्ताः सर्वाः प्रसीदन्ति च सिद्धयः ॥ ५४॥

guṭikāñjanapātālapādaleparasāñjanam |uccāṭanādyāstāḥ sarvāḥ prasīdanti ca siddhayaḥ || 54||

वायोरिव गतिस्तस्य भवेदन्यैरवारिता ।दीर्घायुः कामभोगी च धनवानभिजायते ॥ ५५॥

vāyoriva gatistasya bhavedanyairavāritā |dīrghāyuḥ kāmabhogī ca dhanavānabhijāyate || 55||

अष्टम्यां संयुतो भूत्वा नवम्यां विधिवच्छिवाम् ।पूजयित्वा विधानेन विचिन्त्य मनसाशिवाम् ॥ ५६॥

aṣṭamyāṃ saṃyuto bhūtvā navamyāṃ vidhivacchivām |pūjayitvā vidhānena vicintya manasāśivām || 56||

यो न्यसेत् कवचं देहे तस्य पुण्यफलंशृणु ।जितव्याधिः शतायुश्च रूपवान् गुणवान् सदा ॥ ५७॥

yo nyaset kavacaṃ dehe tasya puṇyaphalaṃśṛṇu |jitavyādhiḥ śatāyuśca rūpavān guṇavān sadā || 57||

धनरत्नौघसम्पूर्णो विद्यावान् स च जायते ।नाग्निर्दहति तत्कायं नापः सङ्क्लेदयन्ति च ॥ ५८॥

dhanaratnaughasampūrṇo vidyāvān sa ca jāyate |nāgnirdahati tatkāyaṃ nāpaḥ saṅkledayanti ca || 58||

न शोषयति तं वायुः क्रव्यात्तन्न हिनस्ति च ।शस्त्राणि नैनं छिन्दन्ति न तापयति भास्करः ॥ ५९॥

na śoṣayati taṃ vāyuḥ kravyāttanna hinasti ca |śastrāṇi nainaṃ chindanti na tāpayati bhāskaraḥ || 59||

न तस्य जायते विघ्नो नास्ति तस्य च सञ्ज्वरः ।वेतालाश्च पिशाचाश्च राक्षसा गणनायकाः ॥ ६०॥

na tasya jāyate vighno nāsti tasya ca sañjvaraḥ |vetālāśca piśācāśca rākṣasā gaṇanāyakāḥ || 60||

सर्वे तस्य वशं यान्ति भूतग्रामाश्चतुर्विधाः ।नित्यं पठति यो भक्त्या कवचं हरनिर्मितम् ॥ ६१॥

sarve tasya vaśaṃ yānti bhūtagrāmāścaturvidhāḥ |nityaṃ paṭhati yo bhaktyā kavacaṃ haranirmitam || 61||

सोऽहमेव महादेवो महामाया च मातृका ।धर्मार्थकाममोक्षाश्च तस्य नित्यं करे स्थिताः ॥ ६२॥

so'hameva mahādevo mahāmāyā ca mātṛkā |dharmārthakāmamokṣāśca tasya nityaṃ kare sthitāḥ || 62||

अन्यस्य वरदः सो वै नित्यं भवति पण्डितः ।कवित्वं सत्यवादित्वं सततं तस्य जायते ॥ ६३॥

anyasya varadaḥ so vai nityaṃ bhavati paṇḍitaḥ |kavitvaṃ satyavāditvaṃ satataṃ tasya jāyate || 63||

वदेत् श्लोकसहस्राणि भवेत् श्रुतिधरस्तथा ।लिखितं यस्य गेहे तु कवचं भैरवस्थितम् ॥ ६४॥

vadet ślokasahasrāṇi bhavet śrutidharastathā |likhitaṃ yasya gehe tu kavacaṃ bhairavasthitam || 64||

न तस्य दुर्गतिः क्वापि जायते तस्य दूषणम् ।ग्रहाश्च सर्वे तुष्यन्ति वशं गच्छन्ति भूमिपाः ॥ ६५॥

na tasya durgatiḥ kvāpi jāyate tasya dūṣaṇam |grahāśca sarve tuṣyanti vaśaṃ gacchanti bhūmipāḥ || 65||

यद्राज्ये कवचज्ञोऽस्ति जायन्ते तत्र नेतयः ।सेतुर्देवः शक्तिबीजं पञ्चमो हायने नमः ॥ ६६॥

yadrājye kavacajño'sti jāyante tatra netayaḥ |seturdevaḥ śaktibījaṃ pañcamo hāyane namaḥ || 66||

वायुर्बलेन चैतायै द्वितीयाष्टाक्षरं त्विदम् ।सेतुर्देवोऽथ वैष्णव्यै षडक्षरमिदं स्मृतम् ॥ ६७॥

vāyurbalena caitāyai dvitīyāṣṭākṣaraṃ tvidam |seturdevo'tha vaiṣṇavyai ṣaḍakṣaramidaṃ smṛtam || 67||

एतद्द्वयं तु जिह्वाग्रे सततं यस्य वर्तते ।तस्य देवी महामाया काये तिष्ठति वै सदा ॥ ६८॥

etaddvayaṃ tu jihvāgre satataṃ yasya vartate |tasya devī mahāmāyā kāye tiṣṭhati vai sadā || 68||

मन्त्राणां प्रणवः सेतुः तत्सेतुः प्रणवः स्मृतः ।क्षरत्यनोङ्कृतं पूर्वं परस्ताच्च विशीर्यते ॥ ६९॥

mantrāṇāṃ praṇavaḥ setuḥ tatsetuḥ praṇavaḥ smṛtaḥ |kṣaratyanoṅkṛtaṃ pūrvaṃ parastācca viśīryate || 69||

नमस्कारो महामन्त्रो देव इत्युच्यते सुरैः ।द्विजातीनामयं मन्त्रः शूद्राणां सर्वकर्मणि ॥ ७०॥

namaskāro mahāmantro deva ityucyate suraiḥ |dvijātīnāmayaṃ mantraḥ śūdrāṇāṃ sarvakarmaṇi || 70||

अकारं चाप्युकारं च मकारं च प्रजापतिः ।वेदत्रयात्समुद्धृत्य प्रणवं निर्ममे पुरा ॥ ७१॥

akāraṃ cāpyukāraṃ ca makāraṃ ca prajāpatiḥ |vedatrayātsamuddhṛtya praṇavaṃ nirmame purā || 71||

स उदात्तो द्विजातीनां राज्ञां स्यादनुदात्तकः ।प्रचितश्चोरुजातानां मनसापि तथा स्मरेत् ॥ ७२॥

sa udātto dvijātīnāṃ rājñāṃ syādanudāttakaḥ |pracitaścorujātānāṃ manasāpi tathā smaret || 72||

चतुर्दशस्वरो योऽसौ शेष औकारसंज्ञकः ।स चानुस्वारचन्द्राभ्यांशूद्राणां सेतुरुच्यते ॥ ७३॥

caturdaśasvaro yo'sau śeṣa aukārasaṃjñakaḥ |sa cānusvāracandrābhyāṃśūdrāṇāṃ seturucyate || 73||

निःसेतु च यथा तोयं क्षणान्निम्नं प्रसर्पति ।मन्त्रस्तथैव निःसेतुः क्षणात् क्षरति यज्ज्वनाम् ॥ ७४॥

niḥsetu ca yathā toyaṃ kṣaṇānnimnaṃ prasarpati |mantrastathaiva niḥsetuḥ kṣaṇāt kṣarati yajjvanām || 74||

तस्मात्सर्वत्र मन्त्रेषु चतुर्वर्णा द्विजातयः ।पार्श्वयोः सेतुमादाय जपकर्म समाचरेत् ॥ ७५॥

tasmātsarvatra mantreṣu caturvarṇā dvijātayaḥ |pārśvayoḥ setumādāya japakarma samācaret || 75||

शूद्राणामादिसेतुर्वा द्विः सेतुर्वा यथेच्छतः ।द्विः सेतवः समाख्याताः सर्वदैव द्विजातयः ॥ ७६॥

śūdrāṇāmādiseturvā dviḥ seturvā yathecchataḥ |dviḥ setavaḥ samākhyātāḥ sarvadaiva dvijātayaḥ || 76||

और्व उवाचएतत्ते सर्वमाख्यातं कवचं त्र्यम्बकोदितम् ।अभेद्यं कवचं तत्तु कवचाष्टकमुत्तमम् ॥ ७७॥

aurva uvācaetatte sarvamākhyātaṃ kavacaṃ tryambakoditam |abhedyaṃ kavacaṃ tattu kavacāṣṭakamuttamam || 77||

महामायामन्त्रकल्पं कवचं मन्त्रसंयुतम् ।षडक्षरसमायुक्तं त्रिषु लोकेषु दुर्लभम् ॥ ७८॥

mahāmāyāmantrakalpaṃ kavacaṃ mantrasaṃyutam |ṣaḍakṣarasamāyuktaṃ triṣu lokeṣu durlabham || 78||

एत्तत्वं नृपशार्दूल नित्यं भक्तियुतः पठन् ।जपन् मन्त्रं च वैष्णव्याः सर्वसिद्धिमवाप्स्यसि ॥ ७९॥

ettatvaṃ nṛpaśārdūla nityaṃ bhaktiyutaḥ paṭhan |japan mantraṃ ca vaiṣṇavyāḥ sarvasiddhimavāpsyasi || 79||

इति श्रीमहाविद्या वैष्णवी कवचस्तोत्रं सम्पूर्णम् ।

iti śrīmahāvidyā vaiṣṇavī kavacastotraṃ sampūrṇam |