मातङ्गीकवचम् २ Shri Matangi Kavacha

अस्य श्रीमातङ्गीकवचमन्त्रस्य महायोगीश्वरऋषिःअनुष्टुप् छन्दः श्रीराजमातङ्गीश्वरीश्रीमनङ्गीप्रसादसिद्ध्यर्थे जपे विनियोगः ॥नीलोत्पलप्रतीकाशामञ्जनाद्रिसमप्रभाम् ।वीणाहस्तां गानरतां मधुपात्रं च बिभ्रतीम् ॥ १॥

asya śrīmātaṅgīkavacamantrasya mahāyogīśvaraṛṣiḥanuṣṭup chandaḥ śrīrājamātaṅgīśvarīśrīmanaṅgīprasādasiddhyarthe jape viniyogaḥ ||nīlotpalapratīkāśāmañjanādrisamaprabhām |vīṇāhastāṃ gānaratāṃ madhupātraṃ ca bibhratīm || 1||

सर्वालङ्कारसंयुक्तां श्यामलां मदशालिनीम् ।नमामि राजमातङ्गीं भक्तानामिष्टदायिनीम् ॥ २॥

sarvālaṅkārasaṃyuktāṃ śyāmalāṃ madaśālinīm |namāmi rājamātaṅgīṃ bhaktānāmiṣṭadāyinīm || 2||

एवं ध्यात्वा जपेन्नित्यं कवचं सर्वकामदम् ।शिखां मे श्यामला पातु मातङ्गी मे शिरोऽवतु ॥ ३॥

evaṃ dhyātvā japennityaṃ kavacaṃ sarvakāmadam |śikhāṃ me śyāmalā pātu mātaṅgī me śiro'vatu || 3||

ललाटं पातु चण्डाली भ्रुवौ मे मदशालिनी । वर् चण्डेशीकर्णौ मे पातु मातङ्गी शङ्खौ कुण्डलशोभिता ॥ ४॥

lalāṭaṃ pātu caṇḍālī bhruvau me madaśālinī | var caṇḍeśīkarṇau me pātu mātaṅgī śaṅkhau kuṇḍalaśobhitā || 4||

नेत्रे मे पातु रक्ताक्षी नासिकां पातु मे शिवा ।गण्डौ मे पातु देवेशी ओष्ठौ बिम्बफलाधरा ॥ ५॥

netre me pātu raktākṣī nāsikāṃ pātu me śivā |gaṇḍau me pātu deveśī oṣṭhau bimbaphalādharā || 5||

जिह्वां मे पातु वागीशी दन्तान् कल्याणकारिणी ।पातु मे राजमातङ्गी वदनं सर्वसिद्धिदा ॥ ६॥

jihvāṃ me pātu vāgīśī dantān kalyāṇakāriṇī |pātu me rājamātaṅgī vadanaṃ sarvasiddhidā || 6||

कण्ठं मे पातु हृद्याङ्गी वीणाहस्ता करौ मम ।हृदयं पातु मे लक्ष्मीर्नाभिं मे विशवनायिका ॥ ७॥

kaṇṭhaṃ me pātu hṛdyāṅgī vīṇāhastā karau mama |hṛdayaṃ pātu me lakṣmīrnābhiṃ me viśavanāyikā || 7||

मम पार्श्वद्वयं पातु सूक्ष्ममध्या महेश्वरी ।शुकश्यामा कटिं पातु गुह्यं मे लोकमोहिनी ॥ ८॥

mama pārśvadvayaṃ pātu sūkṣmamadhyā maheśvarī |śukaśyāmā kaṭiṃ pātu guhyaṃ me lokamohinī || 8||

ऊरू मे पातु भद्राङ्गी जानुनी पातु शाङ्करी ।जङ्घाद्वयं मे लोकेशी पादौ मे परमेश्वरी ॥ ९॥

ūrū me pātu bhadrāṅgī jānunī pātu śāṅkarī |jaṅghādvayaṃ me lokeśī pādau me parameśvarī || 9||

प्रागादिदिक्षु मां पातु सर्वैश्वर्यप्रदायिनी ।रोमाणि पातु मे कृष्णा भार्यां मे भववल्लभा ॥ १०॥

prāgādidikṣu māṃ pātu sarvaiśvaryapradāyinī |romāṇi pātu me kṛṣṇā bhāryāṃ me bhavavallabhā || 10||

शङ्करी सर्वतः पातु मम सर्ववशङ्करी ।महालक्ष्मीर्मम धनं विश्वमाता सुतान् मम ॥ ११॥

śaṅkarī sarvataḥ pātu mama sarvavaśaṅkarī |mahālakṣmīrmama dhanaṃ viśvamātā sutān mama || 11||

श्रीमातङ्गीश्वरी नित्यं मां पातु जगदीश्वरी ।मातङ्गी कवचं नित्यं य एतत्प्रपठेन्नरः ॥ १२॥

śrīmātaṅgīśvarī nityaṃ māṃ pātu jagadīśvarī |mātaṅgī kavacaṃ nityaṃ ya etatprapaṭhennaraḥ || 12||

सुखित्वं सकलान् लोकान् दासीभूतान्करोत्यसौ ।प्राप्नोति महतीं कान्तिं भवेत्काम शतप्रभः ॥ १३॥

sukhitvaṃ sakalān lokān dāsībhūtānkarotyasau |prāpnoti mahatīṃ kāntiṃ bhavetkāma śataprabhaḥ || 13||

लभते महतीं लक्ष्मीं त्रैलोक्ये चापि दुर्लभाम् ।अणिमाद्यष्टसिद्धं यं सञ्चरत्येष मानवः ॥ १४॥

labhate mahatīṃ lakṣmīṃ trailokye cāpi durlabhām |aṇimādyaṣṭasiddhaṃ yaṃ sañcaratyeṣa mānavaḥ || 14||

सर्वविद्यानिधिरयं भवेद्वागीश्वरेश्वरः ।ब्रह्मराक्षसवेतालभूतप्रेत पिशाचकैः ॥ १५॥

sarvavidyānidhirayaṃ bhavedvāgīśvareśvaraḥ |brahmarākṣasavetālabhūtapreta piśācakaiḥ || 15||

ज्वलन्वह्निरिव शस्यैर्वेश्यते भूतपूर्वकैः ।परमं योगमाप्नोति दिव्यज्ञानं समश्नुते ॥ १६॥

jvalanvahniriva śasyairveśyate bhūtapūrvakaiḥ |paramaṃ yogamāpnoti divyajñānaṃ samaśnute || 16||

पुत्रान् पौत्रानवाप्नोति श्रीर्विद्याकान्ति संयुतान् ।तद्भार्या दुर्भगा चापि कान्त्या रतिसमाभवेत् ॥ १७॥

putrān pautrānavāpnoti śrīrvidyākānti saṃyutān |tadbhāryā durbhagā cāpi kāntyā ratisamābhavet || 17||

सर्वान् कामानवाप्नोति महाभोगांश्च दुर्लभान् । महाभोगान् सुदुर्लभान्भुक्तिमन्ते समाप्नोति साक्षात्परशिवो भवेत् ॥ १८॥

sarvān kāmānavāpnoti mahābhogāṃśca durlabhān | mahābhogān sudurlabhānbhuktimante samāpnoti sākṣātparaśivo bhavet || 18||

इति श्री महाऽऽगमरहस्ये दत्तात्रेय वामदेव संवादेसप्तमपरिच्छेदे श्रीमातङ्गी कवचं सम्पूर्णम् ।

iti śrī mahā''gamarahasye dattātreya vāmadeva saṃvādesaptamaparicchede śrīmātaṅgī kavacaṃ sampūrṇam |