त्रिपुरसुन्दरीहृदयस्तोत्रम् महात्रिपुरसुन्दरीहृदयस्तोत्रम् Shri Mahatripura Sundari Hridayam

वन्दे सिन्दूरवर्णाभं वामोरुन्यस्तवल्लभम् ।इक्षुवारिधिमध्यस्थमिभराजमुखं महः ॥ १॥

vande sindūravarṇābhaṃ vāmorunyastavallabham |ikṣuvāridhimadhyasthamibharājamukhaṃ mahaḥ || 1||

गम्भीरलहरीजालगण्डूषितदिगन्तरः ।अव्यान्माममृताम्भोधिरनर्घमणिसंयुतः ॥ २॥

gambhīralaharījālagaṇḍūṣitadigantaraḥ |avyānmāmamṛtāmbhodhiranarghamaṇisaṃyutaḥ || 2||

मध्ये तस्य मनोहारि मधुपारवमेदुरम् ।प्रसूनविगलन्माध्वीप्रवाहपरिपूरितम् ॥ ३॥

madhye tasya manohāri madhupāravameduram |prasūnavigalanmādhvīpravāhaparipūritam || 3||

किन्नरीगानमेदस्वि क्रीडाकन्दरदन्तुरम् ।काञ्चनद्रुमधूलीभिः कल्पितावालवद्द्रुमम् ॥ ४॥

kinnarīgānamedasvi krīḍākandaradanturam |kāñcanadrumadhūlībhiḥ kalpitāvālavaddrumam || 4||

मुग्धकोकिलनिक्काणमुखरीकृतदिङ्मुखम् ।मन्दारतरुसन्तानमञ्जरीपुञ्जपिञ्जरम् ॥ ५॥

mugdhakokilanikkāṇamukharīkṛtadiṅmukham |mandāratarusantānamañjarīpuñjapiñjaram || 5||

नासानाडिन्धमस्मेरनमेरुसुमसौरभम् ।आवृन्तहसिताम्भोजदीव्यद्विभ्रमदीर्घिकम् ॥ ६॥

nāsānāḍindhamasmeranamerusumasaurabham |āvṛntahasitāmbhojadīvyadvibhramadīrghikam || 6||

मन्दरक्तशुकीदष्टमातुलुङ्गफलान्वितम् ।सविधस्यन्दमानाभ्रसरित्कल्लोलवेल्लितम् ॥ ७॥

mandaraktaśukīdaṣṭamātuluṅgaphalānvitam |savidhasyandamānābhrasaritkallolavellitam || 7||

प्रसूनपांसुसौरभ्यपश्यतोहरमारुतम् ।वकुलप्रसवाकीर्णं वन्दे नन्दनकाननम् ॥ ८॥

prasūnapāṃsusaurabhyapaśyatoharamārutam |vakulaprasavākīrṇaṃ vande nandanakānanam || 8||

तन्मध्ये नीपकान्तारं तरणिस्तम्भकारणम् ।मधुपालिविमर्दालिकलक्वाणकरम्बितम् ॥ ९॥

tanmadhye nīpakāntāraṃ taraṇistambhakāraṇam |madhupālivimardālikalakvāṇakarambitam || 9||

कोमलश्वशनाधूतकोरकोद्गतधूलिभिः ।सिन्दूरितनभोमार्गं चिन्तितं सिद्धवन्दिभिः ॥ १०॥

komalaśvaśanādhūtakorakodgatadhūlibhiḥ |sindūritanabhomārgaṃ cintitaṃ siddhavandibhiḥ || 10||

मध्ये तस्य मरुन्मार्गलम्बिमाणिक्यतोरणम् ।शाणोल्लिखितवैदूर्यक्लृप्तसालसमाकुलम् ॥ ११॥

madhye tasya marunmārgalambimāṇikyatoraṇam |śāṇollikhitavaidūryaklṛptasālasamākulam || 11||

माणिक्यस्तम्भपटलीमयूखव्याप्तदिक्तटम् ।पञ्चविंशतिसालाढ्यां नमामि नगरोत्तमम् ॥ १२॥

māṇikyastambhapaṭalīmayūkhavyāptadiktaṭam |pañcaviṃśatisālāḍhyāṃ namāmi nagarottamam || 12||

तत्र चिन्तामणिगृहं तडित्कोटिसमुज्ज्वलम् ।नीलोत्पलसमाकीर्णनिर्यूहशतसङ्कुलम् ॥ १३॥

tatra cintāmaṇigṛhaṃ taḍitkoṭisamujjvalam |nīlotpalasamākīrṇaniryūhaśatasaṅkulam || 13||

सोमकान्तमणिक्लृप्तसोपानोद्भासिवेदिकम् ।चन्द्रशालाचरत्केतुसमालीढनभोन्तरम् ॥ १४॥

somakāntamaṇiklṛptasopānodbhāsivedikam |candraśālācaratketusamālīḍhanabhontaram || 14||

गारुत्मतमणीक्लृप्तमण्डपव्यूहमण्डितम् ।नित्यसेवापरामर्त्यनिबिडद्वारशोभितम् ॥ १५॥

gārutmatamaṇīklṛptamaṇḍapavyūhamaṇḍitam |nityasevāparāmartyanibiḍadvāraśobhitam || 15||

अधिष्ठितं द्वारपालैरसितोमरपाणिभिः ।नमामि नाकनारीणां सान्द्रसङ्गीतमेदुरम् ॥ १६॥

adhiṣṭhitaṃ dvārapālairasitomarapāṇibhiḥ |namāmi nākanārīṇāṃ sāndrasaṅgītameduram || 16||

तन्मध्ये तरुणार्काभं तप्तकाञ्चननिर्मितम् ।शक्रादिमद्द्वारपालैस्सन्ततं परिवेष्टितम् ॥ १७॥

tanmadhye taruṇārkābhaṃ taptakāñcananirmitam |śakrādimaddvārapālaissantataṃ pariveṣṭitam || 17||

चतुष्षष्टिमहाविद्याकलाभिरभिसंवृतम् ।रक्षितं योगिनीवृन्दै रत्नसिंहासनं भजे ॥ १८॥

catuṣṣaṣṭimahāvidyākalābhirabhisaṃvṛtam |rakṣitaṃ yoginīvṛndai ratnasiṃhāsanaṃ bhaje || 18||

मध्ये तस्य मरुत्सेव्यं चतुर्द्वारसमुज्ज्वलम् ।चतुरस्रत्रिरेखाढ्यां चारुत्रिवलयान्वितम् ॥ १९॥

madhye tasya marutsevyaṃ caturdvārasamujjvalam |caturasratrirekhāḍhyāṃ cārutrivalayānvitam || 19||

कलादलसमायुक्तं कनदष्टदलान्वितम् ।चतुर्दशारसहितं दशारद्वितयान्वितम् ॥ २०॥

kalādalasamāyuktaṃ kanadaṣṭadalānvitam |caturdaśārasahitaṃ daśāradvitayānvitam || 20||

अष्टकोणयुतं दिव्यमग्निकोणविराजितम् ।योगिभिः पूजितं योगियोगिनीगणसेवितम् ॥ २१॥

aṣṭakoṇayutaṃ divyamagnikoṇavirājitam |yogibhiḥ pūjitaṃ yogiyoginīgaṇasevitam || 21||

सर्वदुःखप्रशमनं सर्वव्याधिविनाशनम् ।विषज्वरहरं पुण्यं विविधापद्विदारणम् ॥ २२॥

sarvaduḥkhapraśamanaṃ sarvavyādhivināśanam |viṣajvaraharaṃ puṇyaṃ vividhāpadvidāraṇam || 22||

सर्वदारिद्र्यशमनं सर्वभूपालमोहनम् ।आशाभिपूरकं दिव्यमर्चकानामहर्निशम् ॥ २३॥

sarvadāridryaśamanaṃ sarvabhūpālamohanam |āśābhipūrakaṃ divyamarcakānāmaharniśam || 23||

अष्टादशसुमर्माढ्यं चतुर्विंशतिसन्धिनम् ।श्रीमद्विन्दुगृहोपेतं श्रीचक्रं प्रणमाम्यहम् ॥ २४॥

aṣṭādaśasumarmāḍhyaṃ caturviṃśatisandhinam |śrīmadvindugṛhopetaṃ śrīcakraṃ praṇamāmyaham || 24||

तत्रैव बैन्दवस्थाने तरुणादित्यसन्निभम् ।पाशाङ्कुशधनुर्बाणपरिष्कृतकराम्बुजम् ॥ २५॥

tatraiva baindavasthāne taruṇādityasannibham |pāśāṅkuśadhanurbāṇapariṣkṛtakarāmbujam || 25||

पूर्णेन्दुबिम्बवदनं फुल्लपङ्कजलोचनम् ।कुसुमायुधशृङ्गारकोदण्डकुटिलभ्रुवम् ॥ २६॥

pūrṇendubimbavadanaṃ phullapaṅkajalocanam |kusumāyudhaśṛṅgārakodaṇḍakuṭilabhruvam || 26||

चारुचन्द्रकलोपेतं चन्दनागुरुरूषितम् ।मन्दस्मितमधूकालिकिञ्जल्कितमुखाम्बुजम् ॥ २७॥

cārucandrakalopetaṃ candanāgururūṣitam |mandasmitamadhūkālikiñjalkitamukhāmbujam || 27||

पाटीरतिलकोद्भासिफालस्थलमनोहरम् ।अनेककोटिकन्दर्पलावण्यमरुणाधरम् ॥ २८॥

pāṭīratilakodbhāsiphālasthalamanoharam |anekakoṭikandarpalāvaṇyamaruṇādharam || 28||

तपनीयांशुकधरं तारुण्यश्रीनिषेवितम् ।कामेश्वरमहं वन्दे कामितार्थप्रदं नृणाम् ॥ २९॥

tapanīyāṃśukadharaṃ tāruṇyaśrīniṣevitam |kāmeśvaramahaṃ vande kāmitārthapradaṃ nṛṇām || 29||

तस्याङ्कमध्यमासीनां तप्तहाटकसन्निभाम् ।माणिक्यमुकुटच्छायामण्डलारुणदिङ्मुखाम् ॥ ३०॥

tasyāṅkamadhyamāsīnāṃ taptahāṭakasannibhām |māṇikyamukuṭacchāyāmaṇḍalāruṇadiṅmukhām || 30||

कलवेणीकनत्फुल्लकह्लारकुसुमोज्ज्वलाम् ।उडुराजकृतोत्तंसामुत्पलश्यामलालकाम् ॥ ३१॥

kalaveṇīkanatphullakahlārakusumojjvalām |uḍurājakṛtottaṃsāmutpalaśyāmalālakām || 31||

चतुर्थीचन्द्रसच्छात्रफालरेखापरिष्कृताम् ।कस्तूरीतिलकारूढकमनीयललन्तिकाम् ॥ ३२॥

caturthīcandrasacchātraphālarekhāpariṣkṛtām |kastūrītilakārūḍhakamanīyalalantikām || 32||

भ्रुलताश्रीपराभूतपुष्पायुधशरासनाम् ।नालीकदलदायादनयनत्रयशोभिताम् ॥ ३३॥

bhrulatāśrīparābhūtapuṣpāyudhaśarāsanām |nālīkadaladāyādanayanatrayaśobhitām || 33||

करुणारसम्पूर्णकटाक्षहसितोज्ज्वलाम् ।भव्यमुक्तामणिचारुनासामौक्तिकवेष्टिताम् ॥ ३४॥

karuṇārasampūrṇakaṭākṣahasitojjvalām |bhavyamuktāmaṇicārunāsāmauktikaveṣṭitām || 34||

कपोलयुगलीनृत्यकर्णताटङ्कशोभिताम् ।माणिक्यवालीयुगलीमयूखारुणदिङ्मुखाम् ॥ ३५॥

kapolayugalīnṛtyakarṇatāṭaṅkaśobhitām |māṇikyavālīyugalīmayūkhāruṇadiṅmukhām || 35||

परिपक्वसुबिम्बाभापाटलाधरपल्लवाम् ।मञ्जुलाधरपर्वस्थमन्दस्मितमनोहराम् ॥ ३६॥

paripakvasubimbābhāpāṭalādharapallavām |mañjulādharaparvasthamandasmitamanoharām || 36||

द्विखण्डद्विजराजाभगण्डद्वितयमण्डिताम् ।दरफुल्ललसद्गण्डधवलापूरिताननाम् ॥ ३७॥

dvikhaṇḍadvijarājābhagaṇḍadvitayamaṇḍitām |daraphullalasadgaṇḍadhavalāpūritānanām || 37||

पचेलिमेन्दुसुषमापाटच्चरमुखप्रभाम् ।कन्धराकान्तिहसितकम्बुबिम्बोकडम्बराम् ॥ ३८॥

pacelimendusuṣamāpāṭaccaramukhaprabhām |kandharākāntihasitakambubimbokaḍambarām || 38||

कस्तूरीकर्दमाश्यामकन्धरामूलकन्दराम् ।वामांसशिखरोपान्तव्यालम्बिघनवेणिकाम् ॥ ३९॥

kastūrīkardamāśyāmakandharāmūlakandarām |vāmāṃsaśikharopāntavyālambighanaveṇikām || 39||

मृणालकाण्डदायादमृदुबाहुचतुष्टयाम् ।मणिकेयूरयुगलीमयूखारुणविग्रहाम् ॥ ४०॥

mṛṇālakāṇḍadāyādamṛdubāhucatuṣṭayām |maṇikeyūrayugalīmayūkhāruṇavigrahām || 40||

करमूललसद्रत्नकङ्कणक्वाणपेशलाम् ।करकान्तिसमाधूतकल्पानोकहपल्लवाम् ॥ ४१॥

karamūlalasadratnakaṅkaṇakvāṇapeśalām |karakāntisamādhūtakalpānokahapallavām || 41||

पद्मरागोर्मिकाश्रेणिभासुराङ्गुलिपालिकाम् ।पुण्ड्रकोदण्डपुष्पास्त्रपाशाङ्कुशलसत्कराम् ॥ ४२॥

padmarāgormikāśreṇibhāsurāṅgulipālikām |puṇḍrakodaṇḍapuṣpāstrapāśāṅkuśalasatkarām || 42||

तप्तकाञ्चनकुम्भाभस्तनमण्डलमण्डिताम् ।घनस्तनतटीक्लृप्तकाश्मीरक्षोदपाटलाम् ॥ ४३॥

taptakāñcanakumbhābhastanamaṇḍalamaṇḍitām |ghanastanataṭīklṛptakāśmīrakṣodapāṭalām || 43||

कूलङ्कषकुचस्फारतारहारविराजिताम् ।चारुकौसुम्भकूर्पासच्छन्नवक्षोजमण्डलाम् ॥ ४४॥

kūlaṅkaṣakucasphāratārahāravirājitām |cārukausumbhakūrpāsacchannavakṣojamaṇḍalām || 44||

नवनीलघनश्यामरोमराजिविराजिताम् ।लावण्यसागरावर्तनिभनाभिविभूषिताम् ॥ ४५॥

navanīlaghanaśyāmaromarājivirājitām |lāvaṇyasāgarāvartanibhanābhivibhūṣitām || 45||

डिम्भमुष्टितलग्राह्यमध्ययष्टिमनोहराम् ।नितम्बमण्डलाभोगनिक्वणन्मणिमेखलाम् ॥ ४६॥

ḍimbhamuṣṭitalagrāhyamadhyayaṣṭimanoharām |nitambamaṇḍalābhoganikvaṇanmaṇimekhalām || 46||

सन्ध्यारुणक्षौमपटीसञ्छन्नजघनस्थलाम् ।घनोरुकान्तिहसितकदलीकाण्डविभ्रमाम् ॥ ४७॥

sandhyāruṇakṣaumapaṭīsañchannajaghanasthalām |ghanorukāntihasitakadalīkāṇḍavibhramām || 47||

जानुसम्पुटकद्वन्द्वजितमाणिक्यदर्पणाम् ।जङ्घायुगलसौन्दर्यविजितानङ्गकाहलाम् ॥ ४८॥

jānusampuṭakadvandvajitamāṇikyadarpaṇām |jaṅghāyugalasaundaryavijitānaṅgakāhalām || 48||

प्रपदच्छायसन्तानजितप्राचीनकच्छपाम् ।नीरजासनकोटीरनिघृष्टचरणाम्बुजाम् ॥ ४९॥

prapadacchāyasantānajitaprācīnakacchapām |nīrajāsanakoṭīranighṛṣṭacaraṇāmbujām || 49||

पादशोभापराभूतपाकारितरुपल्लवाम् ।चरणाम्भोजशिञ्जनमणिमञ्जीरमञ्जुलाम् ॥ ५०॥

pādaśobhāparābhūtapākāritarupallavām |caraṇāmbhojaśiñjanamaṇimañjīramañjulām || 50||

विबुधेन्द्रवधूत्सङ्गविन्यस्तपदपल्लवाम् ।पार्श्वस्थभारतीलक्ष्मीपाणिचामरवीजिताम् ॥ ५१॥

vibudhendravadhūtsaṅgavinyastapadapallavām |pārśvasthabhāratīlakṣmīpāṇicāmaravījitām || 51||

पुरतो नाकनारीणां पश्यन्तीं नृत्तमद्भुतम् ।भ्रूलताञ्चलसम्भूतपुष्पायुधपरम्पराम् ॥ ५२॥

purato nākanārīṇāṃ paśyantīṃ nṛttamadbhutam |bhrūlatāñcalasambhūtapuṣpāyudhaparamparām || 52||

प्रत्यग्रयौवनोन्मत्तपरिफुल्लविलोचनाम् ।ताम्रोष्ठीं तरलापाङ्गीं सुनासां सुन्दरस्मिताम् ॥ ५३॥

pratyagrayauvanonmattapariphullavilocanām |tāmroṣṭhīṃ taralāpāṅgīṃ sunāsāṃ sundarasmitām || 53||

चतुरर्थध्रुवोदारां चाम्पेयोद्गन्धिकुन्तलाम् ।मधुस्नपितमृद्वीकमधुरालापपेशलाम् ॥ ५४॥

caturarthadhruvodārāṃ cāmpeyodgandhikuntalām |madhusnapitamṛdvīkamadhurālāpapeśalām || 54||

शिवां षोडशवार्षीकां शिवाङ्कतलवासिनीम् ।चिन्मयीं हृदयम्भोजे चिन्तयेज्जापकोत्तमः ॥ ५५॥

śivāṃ ṣoḍaśavārṣīkāṃ śivāṅkatalavāsinīm |cinmayīṃ hṛdayambhoje cintayejjāpakottamaḥ || 55||

फलश्रुतिः ।इति त्रिपुरसुन्दर्या हृदयं सर्वकामदम् ।सर्वदारिद्र्यशमनं सर्वसम्पत्प्रदं नृणाम् ॥ ५६॥

phalaśrutiḥ |iti tripurasundaryā hṛdayaṃ sarvakāmadam |sarvadāridryaśamanaṃ sarvasampatpradaṃ nṛṇām || 56||

तापज्वरार्तिशमनं तरुणीजनमोहनम् ।महाविषहरं पुण्यं माङ्गल्यकरमद्भुतम् ॥ ५७॥

tāpajvarārtiśamanaṃ taruṇījanamohanam |mahāviṣaharaṃ puṇyaṃ māṅgalyakaramadbhutam || 57||

अपमृत्युहरं दिव्यमायुष्यश्रीकरं परम् ।अपवर्गैकनिलयमवनीपालवश्यदम् ॥ ५८॥

apamṛtyuharaṃ divyamāyuṣyaśrīkaraṃ param |apavargaikanilayamavanīpālavaśyadam || 58||

पठति ध्यानरत्नं यः प्रातस्सायमतन्द्रितः ।न विषादैस्स च पुमान् प्राप्नोति भुवनत्रयम् ॥ ५९॥

paṭhati dhyānaratnaṃ yaḥ prātassāyamatandritaḥ |na viṣādaissa ca pumān prāpnoti bhuvanatrayam || 59||

इति श्रीमहात्रिपुरसुन्दरीहृदयं सम्पूर्णम् ।श्रीपराम्बा सुप्रसन्ना वरदाऽस्तु ॥

iti śrīmahātripurasundarīhṛdayaṃ sampūrṇam |śrīparāmbā suprasannā varadā'stu ||