कालीस्तुतिः ब्रह्मप्रोक्ता Brahmaprokta Kali Stuti

ब्रह्मोवाचविद्याविद्यात्मिकां शुद्धां निरालम्बां निराकुलाम् ।स्तौमि देवीं जगद्धात्रीं स्थूलाणीयःस्वरूपिणीम् ॥ १५॥

brahmovācavidyāvidyātmikāṃ śuddhāṃ nirālambāṃ nirākulām |staumi devīṃ jagaddhātrīṃ sthūlāṇīyaḥsvarūpiṇīm || 15||

यस्या उदेति च जगत्प्रधानाख्यं जगत्परम् ।यस्यास्तदंशभूतां त्वां स्तौमि निद्रां सनातनीम् ॥ १६॥

yasyā udeti ca jagatpradhānākhyaṃ jagatparam |yasyāstadaṃśabhūtāṃ tvāṃ staumi nidrāṃ sanātanīm || 16||

त्वं चितिः परमानन्दा परमात्मस्वरूपिणी ।शक्तिस्त्वं सर्वभूतानां त्वं सर्वेषां च पावनी ॥ १७॥

tvaṃ citiḥ paramānandā paramātmasvarūpiṇī |śaktistvaṃ sarvabhūtānāṃ tvaṃ sarveṣāṃ ca pāvanī || 17||

त्वं सावित्री जगद्धात्री त्वं सन्ध्या त्वं रतिर्धृतिः ।त्वं हि ज्योतिस्वरूपेण संसारस्य प्रकाशिनी ॥ १८॥

tvaṃ sāvitrī jagaddhātrī tvaṃ sandhyā tvaṃ ratirdhṛtiḥ |tvaṃ hi jyotisvarūpeṇa saṃsārasya prakāśinī || 18||

तथा तमःस्वरूपेण छादयन्ती सदा जगत् ।त्वमेव सृष्टिरूपेण संसारपरिपूरणी ॥ १९॥

tathā tamaḥsvarūpeṇa chādayantī sadā jagat |tvameva sṛṣṭirūpeṇa saṃsāraparipūraṇī || 19||

स्थितिरूपेण च हरेर्जगतां च हितैषिणी ।तथैवान्तस्वरूपेण जगतामन्तकारिणी ॥ २०॥

sthitirūpeṇa ca harerjagatāṃ ca hitaiṣiṇī |tathaivāntasvarūpeṇa jagatāmantakāriṇī || 20||

त्वं मेधा त्वं महामाया त्वं स्वधा पितृमोदिनी ।त्वं स्वाहा त्वं नमस्कारवषट्कारौ तथा स्मृतिः ॥ २१॥

tvaṃ medhā tvaṃ mahāmāyā tvaṃ svadhā pitṛmodinī |tvaṃ svāhā tvaṃ namaskāravaṣaṭkārau tathā smṛtiḥ || 21||

त्वं पुष्टिस्त्वं धृतिर्मैत्री करुणा मुदिता तथा ।त्वमेव लज्जा त्वं शान्तिस्त्वं कान्तिर्जगदीश्वरी ॥ २२॥

tvaṃ puṣṭistvaṃ dhṛtirmaitrī karuṇā muditā tathā |tvameva lajjā tvaṃ śāntistvaṃ kāntirjagadīśvarī || 22||

महामाया त्वं च स्वाहा स्वधा च पितृदेवता ।या सृष्टिशक्तिरस्माकं स्थितिशक्तिश्च या हरेः ॥ २३॥

mahāmāyā tvaṃ ca svāhā svadhā ca pitṛdevatā |yā sṛṣṭiśaktirasmākaṃ sthitiśaktiśca yā hareḥ || 23||

अन्तश्शक्तिस्तथेशानी सा त्वं शक्तिः सनातनि ॥ २४॥

antaśśaktistatheśānī sā tvaṃ śaktiḥ sanātani || 24||

एका त्वं द्विविधा भूत्वा मोक्षसंसारकारिणी ।विद्याविद्यास्वरूपेण स्वप्रकाशाप्रकाशतः ॥ २५॥

ekā tvaṃ dvividhā bhūtvā mokṣasaṃsārakāriṇī |vidyāvidyāsvarūpeṇa svaprakāśāprakāśataḥ || 25||

त्वं लक्ष्मीः सर्वभूतानां त्वं छाया त्वं सरस्वती ।त्रयीमयी त्रिमात्रा त्वं सर्वभूतस्वरूपिणी ॥ २६॥

tvaṃ lakṣmīḥ sarvabhūtānāṃ tvaṃ chāyā tvaṃ sarasvatī |trayīmayī trimātrā tvaṃ sarvabhūtasvarūpiṇī || 26||

उद्गीतिः सामवेदस्य या पितृगणरञ्जनी ।त्वं वेदिः सर्वयज्ञानां सामिधेनी तथा हविः ॥ २७॥

udgītiḥ sāmavedasya yā pitṛgaṇarañjanī |tvaṃ vediḥ sarvayajñānāṃ sāmidhenī tathā haviḥ || 27||

यदव्यक्तमनिर्देश्यं निष्कलं परमात्मनः ।रूपं तथैव तन्मात्रं सकलं च जगन्मयम् ॥ २८॥

yadavyaktamanirdeśyaṃ niṣkalaṃ paramātmanaḥ |rūpaṃ tathaiva tanmātraṃ sakalaṃ ca jaganmayam || 28||

या मूर्त्तिर्विरता सर्वधरित्री बिभ्रती क्षितिम् ।सा त्वं विश्वम्भरे लोके शक्तिभूतिप्रदा सदा ॥ २९॥

yā mūrttirviratā sarvadharitrī bibhratī kṣitim |sā tvaṃ viśvambhare loke śaktibhūtipradā sadā || 29||

त्वं लक्ष्मीश्चेतना कान्तिस्त्वं पुष्टिस्त्वं सनातनी ।त्वं कालरात्रिस्त्वं मुक्तिः शान्तिः प्रज्ञा तथा स्मृतिः ॥ ३०॥

tvaṃ lakṣmīścetanā kāntistvaṃ puṣṭistvaṃ sanātanī |tvaṃ kālarātristvaṃ muktiḥ śāntiḥ prajñā tathā smṛtiḥ || 30||

संसारसागरोत्तारतरणिः सुखमोक्षदे ।प्रसीद सर्वजगतां त्वं गतिस्त्वं मतिः सदा ॥ ३१॥

saṃsārasāgarottārataraṇiḥ sukhamokṣade |prasīda sarvajagatāṃ tvaṃ gatistvaṃ matiḥ sadā || 31||

त्वं नित्या त्वमनित्या च त्वं चराचरमोहिनी ।त्वं सन्धिनी सर्वयोगसाङ्गोपाङ्गविभाविनी ॥ ३२॥

tvaṃ nityā tvamanityā ca tvaṃ carācaramohinī |tvaṃ sandhinī sarvayogasāṅgopāṅgavibhāvinī || 32||

चिन्ता कीर्तिर्यतीनां त्वं त्वं तदष्टाङ्गसंयुता ।त्वं खड्गिनी शूलिनी च चक्रिणी घोररूपिणी ॥ ३३॥

cintā kīrtiryatīnāṃ tvaṃ tvaṃ tadaṣṭāṅgasaṃyutā |tvaṃ khaḍginī śūlinī ca cakriṇī ghorarūpiṇī || 33||

त्वमीश्वरी जनानां त्वं सर्वानुग्रहकारिणी ।विश्वादिस्त्वमनादिस्त्वं विश्वयोनिरयोनिजा ।अनन्ता सर्वजगतस्त्वमेवैकान्तकारिणी ॥ ३४॥

tvamīśvarī janānāṃ tvaṃ sarvānugrahakāriṇī |viśvādistvamanādistvaṃ viśvayonirayonijā |anantā sarvajagatastvamevaikāntakāriṇī || 34||

नितान्तनिर्मला त्वं हि तामसीति च गीयसे ।त्वं हिंसा त्वमहिंसा च त्वं काली चतुरानना ॥ ३५॥

nitāntanirmalā tvaṃ hi tāmasīti ca gīyase |tvaṃ hiṃsā tvamahiṃsā ca tvaṃ kālī caturānanā || 35||

त्वं परा सर्वजननी दमनी दामिनी तथा ।त्वय्येव लीयते विश्वं भाति तत्त्वं बिभर्षि च ॥ ३६॥

tvaṃ parā sarvajananī damanī dāminī tathā |tvayyeva līyate viśvaṃ bhāti tattvaṃ bibharṣi ca || 36||

त्वं सृष्टिहीना त्वं सृष्टिस्त्वमकर्णापि सश्रुतिः ।तपस्विनी पाणिपादहीना त्वं नितरां ग्रहा ॥ ३७॥

tvaṃ sṛṣṭihīnā tvaṃ sṛṣṭistvamakarṇāpi saśrutiḥ |tapasvinī pāṇipādahīnā tvaṃ nitarāṃ grahā || 37||

त्वं द्यौस्त्वमापस्त्वं ज्योतिर्वायुस्त्वं च नभो मनः ।अहङ्कारोऽपि जगतामष्टधा प्रकृतिः कृतिः ॥ ३८॥

tvaṃ dyaustvamāpastvaṃ jyotirvāyustvaṃ ca nabho manaḥ |ahaṅkāro'pi jagatāmaṣṭadhā prakṛtiḥ kṛtiḥ || 38||

जगन्नाभिर्मेरुरूपधारिणी नालिकापरा ।परापरात्मिका शुद्धा माया मोहातिकारिणी ॥ ३९॥

jagannābhirmerurūpadhāriṇī nālikāparā |parāparātmikā śuddhā māyā mohātikāriṇī || 39||

कारणं कार्यभूतञ्च सत्यं शान्तं शिवाशिवे ।रूपाणि तव विश्वार्थे रागवृक्षफलानि च ॥ ४०॥

kāraṇaṃ kāryabhūtañca satyaṃ śāntaṃ śivāśive |rūpāṇi tava viśvārthe rāgavṛkṣaphalāni ca || 40||

नितान्तह्रस्वा दीर्घा च नितान्ताणुबृहत्तनुः ।सूक्ष्माप्यखिललोकस्य व्यापिनी त्वं जगन्मयी ॥ ४१॥

nitāntahrasvā dīrghā ca nitāntāṇubṛhattanuḥ |sūkṣmāpyakhilalokasya vyāpinī tvaṃ jaganmayī || 41||

मानहीना विमानातिविमानोन्मानसम्भवा ।यदष्टिव्यष्टिसम्भोगरागादिगलिताशया ।तत्ते महिम्नि तद्रूपं तव भ्रान्त्यादिकं च यत् ॥ ४२॥

mānahīnā vimānātivimānonmānasambhavā |yadaṣṭivyaṣṭisambhogarāgādigalitāśayā |tatte mahimni tadrūpaṃ tava bhrāntyādikaṃ ca yat || 42||

इष्टानिष्टविपाकज्ञा यथेष्टानिष्टकारणम् ।सर्गादिमध्यान्तमयं निम्नं रूपं तथैव च ॥ ४३॥

iṣṭāniṣṭavipākajñā yatheṣṭāniṣṭakāraṇam |sargādimadhyāntamayaṃ nimnaṃ rūpaṃ tathaiva ca || 43||

विचाराष्टाङ्गयोगेन सम्पाद्यैवं मुहुर्मुहुः ।यत् स्थिरीक्रियते तत्त्वं तत्ते रूपं सनातनम् ॥ ४४॥

vicārāṣṭāṅgayogena sampādyaivaṃ muhurmuhuḥ |yat sthirīkriyate tattvaṃ tatte rūpaṃ sanātanam || 44||

बाह्याबाह्ये सुखं दुःखं ज्ञानाज्ञाने लयालयौ ।उपतापस्तथा शान्तिर्भूतिस्त्वं जगतः पतेः ॥ ४५॥

bāhyābāhye sukhaṃ duḥkhaṃ jñānājñāne layālayau |upatāpastathā śāntirbhūtistvaṃ jagataḥ pateḥ || 45||

यस्याः प्रभावं नो वक्तुं शक्नोति भुवनत्रये ।तयैव सम्मोहकरी सा त्वं किं स्तूयसे मया ॥ ४६॥

yasyāḥ prabhāvaṃ no vaktuṃ śaknoti bhuvanatraye |tayaiva sammohakarī sā tvaṃ kiṃ stūyase mayā || 46||

योगनिद्रा महानिद्रा मोहनिद्रा जगन्मयी ।विष्णुमाया च प्रकृतिः कस्त्वां स्तुत्या विभावयेत् ॥ ४७॥

yoganidrā mahānidrā mohanidrā jaganmayī |viṣṇumāyā ca prakṛtiḥ kastvāṃ stutyā vibhāvayet || 47||

मम विष्णोः शङ्करस्य या वपुर्वहनात्मिका ।तस्याः प्रभावं को वक्तुं गुणान् वेत्तुं च कः क्षमः ॥ ४८॥

mama viṣṇoḥ śaṅkarasya yā vapurvahanātmikā |tasyāḥ prabhāvaṃ ko vaktuṃ guṇān vettuṃ ca kaḥ kṣamaḥ || 48||

प्रकाशकरणज्योतिःस्वरूपान्तरगोचरा ।त्वमेव जङ्गमस्थेयरूपैका बाह्यगोचरा ॥ ४९॥

prakāśakaraṇajyotiḥsvarūpāntaragocarā |tvameva jaṅgamastheyarūpaikā bāhyagocarā || 49||

प्रसीद सर्वजगतां जननि स्त्रीस्वरूपिणि ।विश्वरूपिणि विश्वेशे प्रसीद त्वं सनातनि ॥ ५०॥

prasīda sarvajagatāṃ janani strīsvarūpiṇi |viśvarūpiṇi viśveśe prasīda tvaṃ sanātani || 50||

इति कालिकापुराणे पञ्चमाध्यायान्तर्गता ब्रह्मप्रोक्ता कालीस्तुतिः समाप्ता ।

iti kālikāpurāṇe pañcamādhyāyāntargatā brahmaproktā kālīstutiḥ samāptā |