लक्ष्मीगद्यम् Lakshmigadyam

श्रीरस्तु ।श्रीवेङ्कटेशमहिषी श्रितकल्पवल्लीपद्मावती विजयतामिह पद्महस्ता ।श्रीवेङ्कटाख्य धरणीभृदुपत्यकायांया श्रीशुकस्य नगरे कमलाकरे भूत् ॥ १॥

śrīrastu |śrīveṅkaṭeśamahiṣī śritakalpavallīpadmāvatī vijayatāmiha padmahastā |śrīveṅkaṭākhya dharaṇībhṛdupatyakāyāṃyā śrīśukasya nagare kamalākare bhūt || 1||

भगवति जयजय पद्मावति हे ॥ १॥

bhagavati jayajaya padmāvati he || 1||

भागवतनिकर बहुतर भयकर बहुलोद्यम यमसद्मायति हे ॥ २॥

bhāgavatanikara bahutara bhayakara bahulodyama yamasadmāyati he || 2||

भविजन भयनाशि भाग्यपयोराशि वेलातिगलोल विपुलतरोल्लोलवीचिलीलावहे ॥३॥

bhavijana bhayanāśi bhāgyapayorāśi velātigalola vipulatarollolavīcilīlāvahe ||3||

पद्मजभवयुवति प्रमुखामरयुवति परिचारकयुवति वितति सरति सततविरचित परिचरण चरणाम्भोरुहे ॥ ४॥

padmajabhavayuvati pramukhāmarayuvati paricārakayuvati vitati sarati satataviracita paricaraṇa caraṇāmbhoruhe || 4||

अकुण्ठवैकुण्ठ महाविभूतिनायकि ॥ ५॥

akuṇṭhavaikuṇṭha mahāvibhūtināyaki || 5||

अखिलाण्डकोटि ब्रह्माण्डनायकि ॥ ६॥

akhilāṇḍakoṭi brahmāṇḍanāyaki || 6||

श्रीवेङ्कटनायकि ॥ ७॥

śrīveṅkaṭanāyaki || 7||

श्रीमति पद्मावति ॥ ८॥

śrīmati padmāvati || 8||

जय विजयीभव ॥ ९॥

jaya vijayībhava || 9||

क्षीराम्भोराशिसारैः प्रभवति रुचिरैः यत्स्वरूपे प्रदीपेशेषाण्येषामृजीषाण्य जनिषत स्सुधाकल्पदेवाङ्गनाद्याः ।यस्यास्सिंहासनस्य प्रविलसति सदा तोरणं वैजयन्तीसेयं श्रीवेङ्कटाद्रि प्रभुवरमहिषी भातु पद्मावती श्रीः ॥ २॥

kṣīrāmbhorāśisāraiḥ prabhavati ruciraiḥ yatsvarūpe pradīpeśeṣāṇyeṣāmṛjīṣāṇya janiṣata ssudhākalpadevāṅganādyāḥ |yasyāssiṃhāsanasya pravilasati sadā toraṇaṃ vaijayantīseyaṃ śrīveṅkaṭādri prabhuvaramahiṣī bhātu padmāvatī śrīḥ || 2||

जय जय जय जगदीश्वरकमलापति करुणारस वरुणालयवेले ॥ १॥

jaya jaya jaya jagadīśvarakamalāpati karuṇārasa varuṇālayavele || 1||

चरणाम्बुज शरणागत करुणारस वरुणालय मुरबाधनकरबोधन सफलीकृत शरणागत जनतागमवेले ॥ २॥

caraṇāmbuja śaraṇāgata karuṇārasa varuṇālaya murabādhanakarabodhana saphalīkṛta śaraṇāgata janatāgamavele || 2||

किञ्चिदुदञ्चित सुस्मितभञ्जित चन्द्रकलामदसूचित सम्पदविमल विलोचन जितकमलानन सकृदवलोकन सज्जनदुर्जनभेदविलोपन लीलालोले ॥ ३॥

kiñcidudañcita susmitabhañjita candrakalāmadasūcita sampadavimala vilocana jitakamalānana sakṛdavalokana sajjanadurjanabhedavilopana līlālole || 3||

शोभनशीले ॥ ४॥

śobhanaśīle || 4||

शुभगणमाले ॥ ५॥

śubhagaṇamāle || 5||

सुन्दरभाले ॥ ६॥

sundarabhāle || 6||

कुटिलनिरन्तर कुन्तलमाले ॥ ७॥

kuṭilanirantara kuntalamāle || 7||

मणिवरविरचित मञ्जुलमाले ॥ ८॥

maṇivaraviracita mañjulamāle || 8||

पद्म सुरभिगन्ध मार्दवमकरन्द फलिताकृतिबन्ध पद्मिनी बाले ॥ ९॥

padma surabhigandha mārdavamakaranda phalitākṛtibandha padminī bāle || 9||

अकुण्ठवैकुण्ठ महाविभूति नायकि ॥ १०॥

akuṇṭhavaikuṇṭha mahāvibhūti nāyaki || 10||

अखिलाण्डकोटि ब्रह्माण्डनायकि ॥ ११॥

akhilāṇḍakoṭi brahmāṇḍanāyaki || 11||

श्रीवेङ्कटनायकि ॥ १२॥

śrīveṅkaṭanāyaki || 12||

श्रीमति पद्मावति ॥ १३॥

śrīmati padmāvati || 13||

जय विजयीभव ॥ १४॥

jaya vijayībhava || 14||

श्रीशैलानन्तसूरे स्सधव मुपवने चोरलीलां चरन्तीचाम्पेये तेन बद्धा स्वपतिमवरयत्तस्य कन्या सती या ।यस्याः श्रीशैलपूर्ण श्श्वशुरति च हरे स्तातभावं प्रपन्नःसेयं श्रीवेङ्कटाद्रि प्रभुवरमहिशी भातु पद्मावती श्रीः ॥ ३॥

śrīśailānantasūre ssadhava mupavane coralīlāṃ carantīcāmpeye tena baddhā svapatimavarayattasya kanyā satī yā |yasyāḥ śrīśailapūrṇa śśvaśurati ca hare stātabhāvaṃ prapannaḥseyaṃ śrīveṅkaṭādri prabhuvaramahiśī bhātu padmāvatī śrīḥ || 3||

खर्वीभवदतिगर्वी कृत गुरुमेर्वीशगिरि मुखोर्वीधरकुलदर्वीकरदयितोर्वी धर शिखरोर्वी फणिपति गुर्वीश्वरकृतरामानुजमुनि नामाङ्कित बहुभूमाश्रय सुरधामालय वरनन्दन वनसुन्दरतरानन्द मन्दिरानन्त गुरुवनानन्त केलियुत निभृततरविहृति रत लीलाचोर राजकुमार निजपति स्वैरसहविहार समयनिभृतोषित फणिपति गुरुभक्ति पाशवशंवद निगृहीतारामचम्पक निबद्धे ॥ १॥

kharvībhavadatigarvī kṛta gurumervīśagiri mukhorvīdharakuladarvīkaradayitorvī dhara śikharorvī phaṇipati gurvīśvarakṛtarāmānujamuni nāmāṅkita bahubhūmāśraya suradhāmālaya varanandana vanasundaratarānanda mandirānanta guruvanānanta keliyuta nibhṛtataravihṛti rata līlācora rājakumāra nijapati svairasahavihāra samayanibhṛtoṣita phaṇipati gurubhakti pāśavaśaṃvada nigṛhītārāmacampaka nibaddhe || 1||

भक्तजनावन बद्ध श्रद्धे ॥ २॥

bhaktajanāvana baddha śraddhe || 2||

भजन विमुख भविजन भगवदुपसदन समय निरीक्षणसन्तत सन्नद्धे ॥ ३॥

bhajana vimukha bhavijana bhagavadupasadana samaya nirīkṣaṇasantata sannaddhe || 3||

भागधेयगुरु भव्यशेषगुरु बाहुमूल धृत बालिकाभूते ॥ ४॥

bhāgadheyaguru bhavyaśeṣaguru bāhumūla dhṛta bālikābhūte || 4||

श्रीवेङ्कटनाथ वरपरिगृहीते ॥ ५॥

śrīveṅkaṭanātha varaparigṛhīte || 5||

श्रीवेङ्कटनाथतातभूत श्रीशैलपूर्णगुरु गृहस्नुषाभूते ॥ ६॥

śrīveṅkaṭanāthatātabhūta śrīśailapūrṇaguru gṛhasnuṣābhūte || 6||

अकुण्ठवैकुण्ठ महाविभूतिनायकि ॥ ७॥

akuṇṭhavaikuṇṭha mahāvibhūtināyaki || 7||

अखिलाण्डकोटि ब्रह्माण्डनायकि ॥ ८॥

akhilāṇḍakoṭi brahmāṇḍanāyaki || 8||

श्रीवेङ्कटनायकि ॥ ९॥

śrīveṅkaṭanāyaki || 9||

श्रीमति पद्मावति ॥ १०॥

śrīmati padmāvati || 10||

जय विजयीभव ॥ ११॥

jaya vijayībhava || 11||

श्रीशैले केलिकाले मुनिसमुपगमे या भयात्प्राक् प्रयातातस्यैवोपत्यकायां तदनु शुकपुरे पद्मकासारमध्ये ।प्रादुर्भूताऽरविन्दे विकचदलचये पत्युरुग्रैस्तपोभिःसेयं श्रीवेङ्कटाद्रिप्रभुवरमहिषी भातु पद्मावती श्रीः ॥ ४॥

śrīśaile kelikāle munisamupagame yā bhayātprāk prayātātasyaivopatyakāyāṃ tadanu śukapure padmakāsāramadhye |prādurbhūtā'ravinde vikacadalacaye patyurugraistapobhiḥseyaṃ śrīveṅkaṭādriprabhuvaramahiṣī bhātu padmāvatī śrīḥ || 4||

भद्रे ॥ १॥

bhadre || 1||

भक्तजनावन निर्निद्रे ॥ २॥

bhaktajanāvana nirnidre || 2||

भगवद्दक्षिण वक्षोलक्षण लाक्षालक्षित मृदुपदमुद्रे ॥ ३॥

bhagavaddakṣiṇa vakṣolakṣaṇa lākṣālakṣita mṛdupadamudre || 3||

भञ्जित भव्यनव्यदरदलितदल मृदुल कोकनद मदविलसदधरोर्ध्व विन्यास सव्यापसव्यकर विराजदनितर शरणभक्तगणनिजचरण शरणीकरणाभय वितरण निपुणनिरूपण निर्निद्रमुद्रे ॥ ४॥

bhañjita bhavyanavyadaradalitadala mṛdula kokanada madavilasadadharordhva vinyāsa savyāpasavyakara virājadanitara śaraṇabhaktagaṇanijacaraṇa śaraṇīkaraṇābhaya vitaraṇa nipuṇanirūpaṇa nirnidramudre || 4||

उल्लसदूर्ध्व तरापरकर शिखरयुगल शेखर निजमञ्जिममदभञ्जन कुशलवदन विधुमण्डल विलोकन विदीर्ण हृदयताविभ्रमधरदर विदलितदल कोमल कमलमुकुल युगलनिरर्गलविनिर्गलत्कान्ति सुमुद्रे ॥ ५॥

ullasadūrdhva tarāparakara śikharayugala śekhara nijamañjimamadabhañjana kuśalavadana vidhumaṇḍala vilokana vidīrṇa hṛdayatāvibhramadharadara vidalitadala komala kamalamukula yugalanirargalavinirgalatkānti sumudre || 5||

श्रीवेङ्कट शिखरसहमहिषी निकर कान्तलीलावसर सङ्गतमुनिनिकरसमुदित बहुलतर भयलसदपसारकेलि बहुमान्ये ॥ ६॥

śrīveṅkaṭa śikharasahamahiṣī nikara kāntalīlāvasara saṅgatamuninikarasamudita bahulatara bhayalasadapasārakeli bahumānye || 6||

श्रीशैलाधीश रचित दिनाधीश बिम्बरमाधीशविषय तपोजन्ये ॥ ७॥

śrīśailādhīśa racita dinādhīśa bimbaramādhīśaviṣaya tapojanye || 7||

श्रीशैलासन्न शुकपुरीसम्पन्न पद्मसर उत्पन्न पद्मिनीकन्ये ॥ ८॥

śrīśailāsanna śukapurīsampanna padmasara utpanna padminīkanye || 8||

पद्म सरोवर्य विरचित महाश्चर्य घोरतपश्चर्यश्रीशुकमुनिधुर्य कामित वदान्ये ॥ ९॥

padma sarovarya viracita mahāścarya ghoratapaścaryaśrīśukamunidhurya kāmita vadānye || 9||

मानव कर्मजाल दुर्मलमर्म निर्मूलन लब्धवर्ण निजसलिलजवर्णनिर्जित दुर्वर्ण वज्रस्फटिक सवर्ण सलिल सम्पूर्णसुवर्णमुखरी सैकत सञ्जात सन्तत मकरन्द बिन्दुसन्दोहनिष्यन्द सन्दानितामन्दानन्द मिलिन्द वृन्द मधुरतर झङ्काररवरुचिरसन्ततसम्फुल्ल मल्ली मालती प्रमुख व्रतति वितति कुन्दकुरवकमरुवक दमनकादि गुल्मकुसुम महिम घुम घुमित सर्व दिङ्मुखसर्वतोमुख महनीयामन्द माकन्दाविरल नारिकेल निरवधिक क्रमुकप्रमुख तरुनिकरवीथि रमणीय विपुल तटोद्यान विहारिणि ॥ १०॥

mānava karmajāla durmalamarma nirmūlana labdhavarṇa nijasalilajavarṇanirjita durvarṇa vajrasphaṭika savarṇa salila sampūrṇasuvarṇamukharī saikata sañjāta santata makaranda bindusandohaniṣyanda sandānitāmandānanda milinda vṛnda madhuratara jhaṅkāraravarucirasantatasamphulla mallī mālatī pramukha vratati vitati kundakuravakamaruvaka damanakādi gulmakusuma mahima ghuma ghumita sarva diṅmukhasarvatomukha mahanīyāmanda mākandāvirala nārikela niravadhika kramukapramukha tarunikaravīthi ramaṇīya vipula taṭodyāna vihāriṇi || 10||

मञ्जुलतर मणिहारिणि ॥ ११॥

mañjulatara maṇihāriṇi || 11||

महनीयतर मणिजिततरणि मकुटमनोहारिणि ॥ १२॥

mahanīyatara maṇijitataraṇi makuṭamanohāriṇi || 12||

मन्थरतर सुन्दरगति मत्तमराल युवति सुगति मदापहारिणि ॥ १३॥

mantharatara sundaragati mattamarāla yuvati sugati madāpahāriṇi || 13||

कलकण्ठ युवाकुण्ठ कण्ठनाद कलव्याहारिणि ॥ १४॥

kalakaṇṭha yuvākuṇṭha kaṇṭhanāda kalavyāhāriṇi || 14||

अकुण्ठवैकुण्ठ महाविभूतिनायकि ॥ १५॥

akuṇṭhavaikuṇṭha mahāvibhūtināyaki || 15||

अखिलाण्डकोटि ब्रह्माण्डनायकि ॥ १६॥

akhilāṇḍakoṭi brahmāṇḍanāyaki || 16||

श्रीवेङ्कटनायकि ॥ १७॥

śrīveṅkaṭanāyaki || 17||

श्रीमति पद्मावति ॥ १८॥

śrīmati padmāvati || 18||

जय विजयीभव ॥ १९॥

jaya vijayībhava || 19||

यां लावण्यनदीं वदन्ति कवयः श्रीमाधवाम्भोनिधिंगच्छन्तीं स्ववशङ्गतांश्च तरसा जन्तून्नयन्तीमपि ।यस्या मानसनेत्रहस्त चरणाद्यङ्गानि भूषारुचीरम्भोजान्यमलोज्ज्वलं च सलिलं सा भातु पद्मावती ॥ ५॥

yāṃ lāvaṇyanadīṃ vadanti kavayaḥ śrīmādhavāmbhonidhiṃgacchantīṃ svavaśaṅgatāṃśca tarasā jantūnnayantīmapi |yasyā mānasanetrahasta caraṇādyaṅgāni bhūṣārucīrambhojānyamalojjvalaṃ ca salilaṃ sā bhātu padmāvatī || 5||

अम्भोरुहवासिनि ॥ १॥

ambhoruhavāsini || 1||

अम्भोरुहासन प्रमुखाखिल भूतानुशासिनि ॥ २॥

ambhoruhāsana pramukhākhila bhūtānuśāsini || 2||

अनवरतात्मनाथ वक्षस्सिंहासनाध्यासिनि ॥ ३॥

anavaratātmanātha vakṣassiṃhāsanādhyāsini || 3||

अङ्घ्रियुगावतार पथसन्तत सङ्गाहमान घोरतराभङ्गुरसंसार घर्मसन्तप्त मनुज सन्ताप नाशिनि ॥ ४॥

aṅghriyugāvatāra pathasantata saṅgāhamāna ghoratarābhaṅgurasaṃsāra gharmasantapta manuja santāpa nāśini || 4||

बहुल कुन्तल वदनमण्डल पाणिपल्लव रुचिरलोचन सुभगकन्दराबाहुवल्लिका जघन नितम्ब मण्डलमय वितत शैवाल सम्फुल्ल कमलकुवलय कम्बुकमलिनी नालोत्तुङ्ग विपुलपुलिनशोभिनि ॥ ५॥

bahula kuntala vadanamaṇḍala pāṇipallava ruciralocana subhagakandarābāhuvallikā jaghana nitamba maṇḍalamaya vitata śaivāla samphulla kamalakuvalaya kambukamalinī nālottuṅga vipulapulinaśobhini || 5||

माधव महार्णवगाहिनि ॥ ६॥

mādhava mahārṇavagāhini || 6||

महितलावण्यमहावाहिनि ॥ ७॥

mahitalāvaṇyamahāvāhini || 7||

मुखचन्द्र समुद्यत भालतलविराजमान किञ्चिदुदञ्चितसूक्ष्माग्र कस्तूरीतिलक शूल समुद्भूतभीति विशीर्णसमुज्झितसम्मुखभागपरिसरयुगल सरभस विसृमर तिमिर निकर सन्देहसन्दायि ससीमन्तकुन्तल कान्ते ॥ ८॥

mukhacandra samudyata bhālatalavirājamāna kiñcidudañcitasūkṣmāgra kastūrītilaka śūla samudbhūtabhīti viśīrṇasamujjhitasammukhabhāgaparisarayugala sarabhasa visṛmara timira nikara sandehasandāyi sasīmantakuntala kānte || 8||

स्फटिक मणिमय कन्दर्प दर्पण सन्देह सन्दोहि सकल जन सम्मोहिफलफलविमललावण्य ललित सततमुदित मुदितमुखमण्डले ॥ ९॥

sphaṭika maṇimaya kandarpa darpaṇa sandeha sandohi sakala jana sammohiphalaphalavimalalāvaṇya lalita satatamudita muditamukhamaṇḍale || 9||

महित म्रदिम महिममन्दहासा सहिष्णु तदुदय समुदितक्लमोदीर्णारुणवर्ण विभ्रमदविडम्बित परिणत बिम्बविद्रुम विलसदोष्टयुगले ॥ १०॥

mahita mradima mahimamandahāsā sahiṣṇu tadudaya samuditaklamodīrṇāruṇavarṇa vibhramadaviḍambita pariṇata bimbavidruma vilasadoṣṭayugale || 10||

परिहसित दरहसित कोकनद कुन्दरद मन्थरतरोद्गत्वर विसृत्वरकान्तिवीचि कमनीयामन्द मन्दहास सदनवदने ॥ ११॥

parihasita darahasita kokanada kundarada mantharatarodgatvara visṛtvarakāntivīci kamanīyāmanda mandahāsa sadanavadane || 11||

समुज्ज्वलतर मणितर्जित तरणिताटङ्क निराटङ्क कन्दलितकान्ति पूरकरम्बित कर्णशष्कुलीवलये ॥ १२॥

samujjvalatara maṇitarjita taraṇitāṭaṅka nirāṭaṅka kandalitakānti pūrakarambita karṇaśaṣkulīvalaye || 12||

बहिरुपगत स्फुरणाधिगतान्तरङ्गण भूषणगण वदन कोशसदनस्फटिक मणिमय भित्ति शङ्काङ्कुरण चणप्रतिफलित कर्णपूरकर्णावतंस ताटङ्क कुण्डल मण्डन निगनिगायमानविमलकपोल मण्डले ॥ १३॥

bahirupagata sphuraṇādhigatāntaraṅgaṇa bhūṣaṇagaṇa vadana kośasadanasphaṭika maṇimaya bhitti śaṅkāṅkuraṇa caṇapratiphalita karṇapūrakarṇāvataṃsa tāṭaṅka kuṇḍala maṇḍana niganigāyamānavimalakapola maṇḍale || 13||

निजभ्रुकुटी भटीभूत त्र्यक्षा ष्टाक्षद्वादशाक्षसहस्राक्षप्रभृति सर्वसुपर्व शोभन भ्रूमण्डले ॥ १४॥

nijabhrukuṭī bhaṭībhūta tryakṣā ṣṭākṣadvādaśākṣasahasrākṣaprabhṛti sarvasuparva śobhana bhrūmaṇḍale || 14||

निटलफलक मृगमदतिलकच्छल विलोक लोक विलोचनदोषविरचित विदलन वदन विधुमण्डल विगलित नासिका प्रणालिकानिगूढ निस्तृत नासाग्रस्थूल मुक्ताफलच्छलाभिव्यक्त वदनबिलनिलीन कण्ठनालिकान्तः प्रवृत्त ग्रीवामध्योच्छ भागकृतविभागग्रीवागर्त विनिस्सृत पृथुल विलसदुरोजशैल युगलनिर्झर झरीभूत गम्भीर नाभि ह्रदाव गाढ विलीन दीर्घतरपृथुल सुधाधारा प्रवाहयुगल विभ्रमाधार विस्पष्ट वीक्ष्यमाणविशुद्धस्थूल मुक्ताफल माला विद्योतित दिगन्तरे ॥ १५॥

niṭalaphalaka mṛgamadatilakacchala viloka loka vilocanadoṣaviracita vidalana vadana vidhumaṇḍala vigalita nāsikā praṇālikānigūḍha nistṛta nāsāgrasthūla muktāphalacchalābhivyakta vadanabilanilīna kaṇṭhanālikāntaḥ pravṛtta grīvāmadhyoccha bhāgakṛtavibhāgagrīvāgarta vinissṛta pṛthula vilasadurojaśaila yugalanirjhara jharībhūta gambhīra nābhi hradāva gāḍha vilīna dīrghatarapṛthula sudhādhārā pravāhayugala vibhramādhāra vispaṣṭa vīkṣyamāṇaviśuddhasthūla muktāphala mālā vidyotita digantare || 15||

सकलाभरण कलाविलासकृत जङ्गमचिरस्थायिसौदामनीशङ्काङ्कुरे ॥ १६॥

sakalābharaṇa kalāvilāsakṛta jaṅgamacirasthāyisaudāmanīśaṅkāṅkure || 16||

कनक रशनाकिङ्किणी कलनादिनि ॥ १७॥

kanaka raśanākiṅkiṇī kalanādini || 17||

निज जनतागुण निजपतिनिकट निवेदिनि ॥१८॥

nija janatāguṇa nijapatinikaṭa nivedini ||18||

निखिल जनामोदिनि ॥ १९॥

nikhila janāmodini || 19||

निजपतिसम्मोदिनि ॥ २०॥

nijapatisammodini || 20||

मन्थर तरमेहि ॥ २१॥

manthara taramehi || 21||

मन्दमिममवेहि ॥ २२॥

mandamimamavehi || 22||

मयि मन आधेहि ॥ २३॥

mayi mana ādhehi || 23||

मम शुभमवदेहि ॥ २४॥

mama śubhamavadehi || 24||

मङ्गलमयि भाहि ॥ २५॥

maṅgalamayi bhāhi || 25||

अकुण्ठवैकुण्ठ महाविभूतिनायकि ॥ २६॥

akuṇṭhavaikuṇṭha mahāvibhūtināyaki || 26||

अखिलाण्डकोटि ब्रह्माण्डनायकि ॥ २७॥

akhilāṇḍakoṭi brahmāṇḍanāyaki || 27||

श्रीवेङ्कटनायकि ॥ २८॥

śrīveṅkaṭanāyaki || 28||

श्रीमति पद्मावति ॥ २९॥

śrīmati padmāvati || 29||

जय विजयीभव ॥ ३०॥

jaya vijayībhava || 30||

जीयाच्छ्री वेङ्कटाद्रि प्रभुवरमहिषी नाम पद्मावती श्रीःजीयाच्चास्याः कटाक्षामृतरसरसिको वेङ्कटाद्रे रधीशःजीयाच्छ्रीवैष्णवाली हतकुमत कथावीक्षणै रेतदीयैःजीयाच्च श्रीशुकर्षेः पुरमनवरतं सर्वसम्पत्समृद्धम् ॥ ६॥

jīyācchrī veṅkaṭādri prabhuvaramahiṣī nāma padmāvatī śrīḥjīyāccāsyāḥ kaṭākṣāmṛtarasarasiko veṅkaṭādre radhīśaḥjīyācchrīvaiṣṇavālī hatakumata kathāvīkṣaṇai retadīyaiḥjīyācca śrīśukarṣeḥ puramanavarataṃ sarvasampatsamṛddham || 6||

श्रीरङ्गसूरिणेदं श्रीशैलानन्तसूरिवंश्येन ।भक्त्या रचितं गद्यं लक्ष्मीः पद्मावती समादत्ताम् ॥ ७॥

śrīraṅgasūriṇedaṃ śrīśailānantasūrivaṃśyena |bhaktyā racitaṃ gadyaṃ lakṣmīḥ padmāvatī samādattām || 7||

॥ श्रीलक्ष्मीगद्यं सम्पूर्णम् ॥

|| śrīlakṣmīgadyaṃ sampūrṇam ||