मारुतीस्तोत्रम् २ Shri Maruti Stotram

ॐ नमो वायुपुत्राय भीमरूपाय धीमते ।नमस्ते रामदूताय कामरूपाय श्रीमते ॥ १॥

oṃ namo vāyuputrāya bhīmarūpāya dhīmate |namaste rāmadūtāya kāmarūpāya śrīmate || 1||

मोहशोकविनाशाय सीताशोकविनाशिने ।भग्नाशोकवनायास्तु दग्धलङ्काय वाग्मिने ॥ २॥

mohaśokavināśāya sītāśokavināśine |bhagnāśokavanāyāstu dagdhalaṅkāya vāgmine || 2||

गतिर्निर्जितवाताय लक्ष्मणप्राणदाय च ।वनौकसां वरिष्ठाय वशिने वनवासिने ॥ ३॥

gatirnirjitavātāya lakṣmaṇaprāṇadāya ca |vanaukasāṃ variṣṭhāya vaśine vanavāsine || 3||

तत्त्वज्ञानसुधासिन्धुनिमग्नाय महीयसे ।आञ्जनेयाय शूराय सुग्रीवसचिवाय ते ॥ ४॥

tattvajñānasudhāsindhunimagnāya mahīyase |āñjaneyāya śūrāya sugrīvasacivāya te || 4||

जन्ममृत्यूभयघ्नाय सर्वक्लेशहराय च ।नेदिष्ठाय प्रेतभूतपिशाचभयहारिणे ॥ ५॥

janmamṛtyūbhayaghnāya sarvakleśaharāya ca |nediṣṭhāya pretabhūtapiśācabhayahāriṇe || 5||

यातनानाशनायास्तु नमो मर्कटरूपिणे ।यक्षराक्षसशार्दूलसर्पवृश्चिकभीहृते ॥ ६॥

yātanānāśanāyāstu namo markaṭarūpiṇe |yakṣarākṣasaśārdūlasarpavṛścikabhīhṛte || 6||

महाबलाय वीराय चिरञ्जीविन उद्धृते ।हारिणे वज्रदेहाय चोल्लङ्घितमहाब्धये ॥ ७॥

mahābalāya vīrāya cirañjīvina uddhṛte |hāriṇe vajradehāya collaṅghitamahābdhaye || 7||

बलिनामग्रगण्याय नमो नः पाहि मारुते ।लाभदोऽसि त्वमेवाशु हनुमन् राक्षसान्तक ॥ ८॥

balināmagragaṇyāya namo naḥ pāhi mārute |lābhado'si tvamevāśu hanuman rākṣasāntaka || 8||

यशो जयं च मे देहि शत्रून्नाशय नाशय ।स्वाश्रितानामभयदं य एवं स्तौति मारुतिम् ।हानिः कुतो भवेत्तस्य सर्वत्र विजयी भवेत् ॥ ९॥

yaśo jayaṃ ca me dehi śatrūnnāśaya nāśaya |svāśritānāmabhayadaṃ ya evaṃ stauti mārutim |hāniḥ kuto bhavettasya sarvatra vijayī bhavet || 9||

इति श्रीवासुदेवानन्दसरस्वतीविरचितं श्रीमारुतिस्तोत्रं सम्पूर्णम् ।

iti śrīvāsudevānandasarasvatīviracitaṃ śrīmārutistotraṃ sampūrṇam |