विष्णुनक्षत्रमाला Vishnu Nakshatramala

वन्दे नन्दितजिष्णुं घनरोचिष्णुं घनाघमभिभूष्णुम् ।निरयं निराकरिष्णुं हृदि वर्तिष्णुं हृतामयं विष्णुम् ॥ १॥

vande nanditajiṣṇuṃ ghanarociṣṇuṃ ghanāghamabhibhūṣṇum |nirayaṃ nirākariṣṇuṃ hṛdi vartiṣṇuṃ hṛtāmayaṃ viṣṇum || 1||

वन्दे मन्दिततृष्णं नन्दितकृष्णं नमज्जनानुष्णम् ।सततमसाधुमहोष्णं साधुसतृष्णं सकौस्तुभं कृष्णम् ॥ २॥

vande manditatṛṣṇaṃ nanditakṛṣṇaṃ namajjanānuṣṇam |satatamasādhumahoṣṇaṃ sādhusatṛṣṇaṃ sakaustubhaṃ kṛṣṇam || 2||

भुवनविमोहनरूपं यदुकुलदीपं यमीशसुप्रापम् ।माधवमपास्ततापं मधुरालापं नमामि नतगोपम् ॥ ३॥

bhuvanavimohanarūpaṃ yadukuladīpaṃ yamīśasuprāpam |mādhavamapāstatāpaṃ madhurālāpaṃ namāmi natagopam || 3||

उत्पादितसुमबाणं जितमुरबाणं कृताखिलत्राणम् ।ददतं निष्परिमाणं स्थिरनिर्वाणं भजे रमाप्राणम् ॥ ४॥

utpāditasumabāṇaṃ jitamurabāṇaṃ kṛtākhilatrāṇam |dadataṃ niṣparimāṇaṃ sthiranirvāṇaṃ bhaje ramāprāṇam || 4||

विदलितविविधसुरारिं विजितवलारिं नमामि नरकारिम् ।धृतनन्दकतरवारिं पदसृतवारिंपरात्परं शौरिम् ॥ ५॥

vidalitavividhasurāriṃ vijitavalāriṃ namāmi narakārim |dhṛtanandakataravāriṃ padasṛtavāriṃparātparaṃ śaurim || 5||

दीनजनावनदक्षं दीर्णविपक्षं दयाभृतावेक्षम् ।दितिभवगजहर्यक्षं देवाध्यक्षं भजे सरोजाक्षम् ॥ ६॥

dīnajanāvanadakṣaṃ dīrṇavipakṣaṃ dayābhṛtāvekṣam |ditibhavagajaharyakṣaṃ devādhyakṣaṃ bhaje sarojākṣam || 6||

जीर्णं तुलसीपर्णं तूर्णं स्वीकृत्य वेश्म विस्तीर्णम् ।पूर्णं धान्यमजीर्णं स्वर्णं कृष्णेन किन्नु न वितीर्णम् ॥ ७॥

jīrṇaṃ tulasīparṇaṃ tūrṇaṃ svīkṛtya veśma vistīrṇam |pūrṇaṃ dhānyamajīrṇaṃ svarṇaṃ kṛṣṇena kinnu na vitīrṇam || 7||

श्रुतियुवतिचिकुररत्नं कौस्तुभरत्रं जगच्च निर्यत्नम् ।दधतं नमतां प्रत्नं चिन्तारत्नं भजामि यदुरत्नम् ॥ ८॥

śrutiyuvaticikuraratnaṃ kaustubharatraṃ jagacca niryatnam |dadhataṃ namatāṃ pratnaṃ cintāratnaṃ bhajāmi yaduratnam || 8||

द्वारं कृत्वा पार्थं यस्तत्त्वार्थं जगौ तमत्यर्थम् ।कृष्णमबुध्बा व्यर्थं कालं स्वार्थं नयामि वाऽन्यार्थम् ॥ ९॥

dvāraṃ kṛtvā pārthaṃ yastattvārthaṃ jagau tamatyartham |kṛṣṇamabudhbā vyarthaṃ kālaṃ svārthaṃ nayāmi vā'nyārtham || 9||

सुन्दरपदारविन्दं समनुतिनिन्दं समर्पितानन्दम् ।नन्दककरं मुकुन्दं नन्दितनन्दं नमामि गोदिन्दम् ॥ १०॥

sundarapadāravindaṃ samanutinindaṃ samarpitānandam |nandakakaraṃ mukundaṃ nanditanandaṃ namāmi godindam || 10||

कमलां वक्षसि कलयन्कम्बुं रचयन् करे शुचं दलयन् ।अचलं कुशलं जनयन् अभयं कथयन् पुरोऽस्तु हरिरुदयन् ॥ ११॥

kamalāṃ vakṣasi kalayankambuṃ racayan kare śucaṃ dalayan |acalaṃ kuśalaṃ janayan abhayaṃ kathayan puro'stu harirudayan || 11||

प्रभुमवनतजनमोदं प्रकटितवेदं प्रभाजिताम्भोदम् ।करिगिरिशिखरविनोदं कमलाह्लादं कदापि नावेदम् ॥ १३॥

prabhumavanatajanamodaṃ prakaṭitavedaṃ prabhājitāmbhodam |karigiriśikharavinodaṃ kamalāhlādaṃ kadāpi nāvedam || 13||

अच्युतमधिगतरङ्गंरमणीयाङ्गं रमाकृतालिङ्गम् ।तल्पितशेषभुजङ्गं तार्थ्यशताङ्गं भजामि धृतशार्ङ्गम् ॥ १३॥

acyutamadhigataraṅgaṃramaṇīyāṅgaṃ ramākṛtāliṅgam |talpitaśeṣabhujaṅgaṃ tārthyaśatāṅgaṃ bhajāmi dhṛtaśārṅgam || 13||

वेङ्कटशैलावासं वेदश्वासं विपाटितायासम् ।नन्दितवेदव्यासं नीरदभासं हरिं भजन्नासम् ॥ १४॥

veṅkaṭaśailāvāsaṃ vedaśvāsaṃ vipāṭitāyāsam |nanditavedavyāsaṃ nīradabhāsaṃ hariṃ bhajannāsam || 14||

सद्गुणरत्ननिशान्तं सततं भान्तं सतामधिस्वान्तम् ।भवगदवैद्यमनन्तं भवुकोदन्तं भजे रमाकान्तम् ॥ १५॥

sadguṇaratnaniśāntaṃ satataṃ bhāntaṃ satāmadhisvāntam |bhavagadavaidyamanantaṃ bhavukodantaṃ bhaje ramākāntam || 15||

वृन्दावनसञ्चारी कंसविदारी किरीटिहितकारी ।यमुनातीरविहारी कौस्तुभधारी पुरोऽस्तु मधुवैरी ॥ १६॥

vṛndāvanasañcārī kaṃsavidārī kirīṭihitakārī |yamunātīravihārī kaustubhadhārī puro'stu madhuvairī || 16||

सुखयतु जगतां कर्ता नमतां भर्ता मुरस्य संहर्ता ।चक्रगदादरधर्ता विपदपहर्ता रमाधराभर्ता ॥ १७॥

sukhayatu jagatāṃ kartā namatāṃ bhartā murasya saṃhartā |cakragadādaradhartā vipadapahartā ramādharābhartā || 17||

सकलचराचरनेतासम्पद्दाता समस्तरिपुजेता ।सुखयतु भद्रभ्राता सुखसन्धाता सुमायुधाधाता ॥ १८॥

sakalacarācaranetāsampaddātā samastaripujetā |sukhayatu bhadrabhrātā sukhasandhātā sumāyudhādhātā || 18||

चम्पकवनवास्तव्यं सन्ततभव्यं सुरालिसम्भाव्यम् ।देवीदक्षिणसव्यं गोपंदिव्यं विहाय किं सेव्यम् ॥ १९॥

campakavanavāstavyaṃ santatabhavyaṃ surālisambhāvyam |devīdakṣiṇasavyaṃ gopaṃdivyaṃ vihāya kiṃ sevyam || 19||

नरनारायणनामा नवघनधामा निरस्तभवदामा ।सुखयतु बदरीधामा सुखितसुदामा सुरेषु सप्रेमा ॥ २०॥

naranārāyaṇanāmā navaghanadhāmā nirastabhavadāmā |sukhayatu badarīdhāmā sukhitasudāmā sureṣu sapremā || 20||

अवने प्रतिभावन्तं हृदि मणिमन्तं श्रिते दयावन्तम् ।भुवने विभूतिमन्तं श्रियि रतिमन्तं भजामि भगवन्तम् ॥ २१॥

avane pratibhāvantaṃ hṛdi maṇimantaṃ śrite dayāvantam |bhuvane vibhūtimantaṃ śriyi ratimantaṃ bhajāmi bhagavantam || 21||

द्वाराट्टध्वजवत्यां द्वारावत्यां स्थितं प्रभावत्याम् ।मधुयदुवृष्णिमहत्यां मङ्गलवत्यां हरिं दधे मत्याम् ॥ २२॥

dvārāṭṭadhvajavatyāṃ dvārāvatyāṃ sthitaṃ prabhāvatyām |madhuyaduvṛṣṇimahatyāṃ maṅgalavatyāṃ hariṃ dadhe matyām || 22||

सन्तं द्वारावत्यां सुकृतवसत्यां जितामरावत्याम् ।प्रासादजालवत्यामुत्सववत्यां हरिं दधे मत्याम् ॥ २३॥

santaṃ dvārāvatyāṃ sukṛtavasatyāṃ jitāmarāvatyām |prāsādajālavatyāmutsavavatyāṃ hariṃ dadhe matyām || 23||

कम्बुसहोदरकण्ठं नतभयकुण्ठं नमामि वैकुण्ठम् ।सज्जनलसदुपकण्ठं श्रीवैकुण्ठं श्रितं रमोत्कण्ठम् ॥ २४॥

kambusahodarakaṇṭhaṃ natabhayakuṇṭhaṃ namāmi vaikuṇṭham |sajjanalasadupakaṇṭhaṃ śrīvaikuṇṭhaṃ śritaṃ ramotkaṇṭham || 24||

पदरुचिजिताब्जशोभं पद्मालोभं परास्तविक्षोभम् ।पाटितविमतमहेभं पङ्कजनाभं प्रणौमि जलदाभम् ॥ २५॥

padarucijitābjaśobhaṃ padmālobhaṃ parāstavikṣobham |pāṭitavimatamahebhaṃ paṅkajanābhaṃ praṇaumi jaladābham || 25||

विमलगुणप्राग्भारं विश्वाधारं विधेर्विधातारम् ।विनुतं विबुधैर्धीरं वीरमुदारं विनौमि यदुशूरम् ॥ २६॥

vimalaguṇaprāgbhāraṃ viśvādhāraṃ vidhervidhātāram |vinutaṃ vibudhairdhīraṃ vīramudāraṃ vinaumi yaduśūram || 26||

प्रतिपादितपुरुषार्थं प्रमुदितपार्थं प्रकृष्टगुणसार्थम् ।प्रभुमच्युतमत्यर्थं प्रास्तानर्थं प्रणौमि तत्त्वार्थम् ॥ २७॥

pratipāditapuruṣārthaṃ pramuditapārthaṃ prakṛṣṭaguṇasārtham |prabhumacyutamatyarthaṃ prāstānarthaṃ praṇaumi tattvārtham || 27||

विष्णोस्तारामालां पठितुरबालां श्रियञ्च धारालाम् ।स्वस्मिन् भक्तिमलोलां वचसां विमलां हरिर्दिशेन्मालाम् ॥ २८॥

viṣṇostārāmālāṃ paṭhiturabālāṃ śriyañca dhārālām |svasmin bhaktimalolāṃ vacasāṃ vimalāṃ harirdiśenmālām || 28||

इति श्वेतारण्यनारायणयज्वकृता विष्णुनक्षत्रमाला सम्पूर्णा ॥

iti śvetāraṇyanārāyaṇayajvakṛtā viṣṇunakṣatramālā sampūrṇā ||