वृत्तकुसुमार्पणम् Vritta Kusumarpanam

योगमुद्रामुपारूढं नरसिंहं हृदि स्मरन् । (अनुष्टुभ्)वृत्तलक्षणजिज्ञासुः नामसङ्कीर्तनं हरेः ॥ १॥

yogamudrāmupārūḍhaṃ narasiṃhaṃ hṛdi smaran | (anuṣṭubh)vṛttalakṣaṇajijñāsuḥ nāmasaṅkīrtanaṃ hareḥ || 1||

कुर्वन्नाप्नोत्ववगमं वृत्तानां लक्षणे जवात् ।इति सञ्चिन्त्य यतते कर्तुमेषां कृतिं ह्रिया ॥ २॥

kurvannāpnotvavagamaṃ vṛttānāṃ lakṣaṇe javāt |iti sañcintya yatate kartumeṣāṃ kṛtiṃ hriyā || 2||

गोरूरुग्रामसञ्जातः शेल्वपिल्लैसुतोऽल्पधीः ।मूर्त्युपाह्वः श्रीनिवासः सावधानं निबोधत ॥ ३॥

gorūrugrāmasañjātaḥ śelvapillaisuto'lpadhīḥ |mūrtyupāhvaḥ śrīnivāsaḥ sāvadhānaṃ nibodhata || 3||

प्रारम्भकांशाः शास्त्रस्य पूर्वार्धेऽत्र दर्शिताः ।ह्रस्वाक्षरोच्चारणाय यः कालः समपेक्षितः ॥ ४॥

prārambhakāṃśāḥ śāstrasya pūrvārdhe'tra darśitāḥ |hrasvākṣaroccāraṇāya yaḥ kālaḥ samapekṣitaḥ || 4||

स एकमात्रामित इत्युच्यते पूर्वसूरिभिः ।दीर्घाक्षरमनुस्वारविसर्गान्ताक्षराणि च ॥ ५॥

sa ekamātrāmita ityucyate pūrvasūribhiḥ |dīrghākṣaramanusvāravisargāntākṣarāṇi ca || 5||

मात्राद्वयमितानीति च्छन्दःशास्त्रे निगद्यते ।संयुक्ताक्षरपृष्ठस्थं द्विमात्रमिति गण्यते ॥ ६॥

mātrādvayamitānīti cchandaḥśāstre nigadyate |saṃyuktākṣarapṛṣṭhasthaṃ dvimātramiti gaṇyate || 6||

ह्रस्वाक्षरं चेत्त्पादान्ते द्विमात्रं तदपि स्मृतम् ।एकमात्रामितः कालः लघुरित्यादृतैर्बुधैः ॥ ७॥

hrasvākṣaraṃ cettpādānte dvimātraṃ tadapi smṛtam |ekamātrāmitaḥ kālaḥ laghurityādṛtairbudhaiḥ || 7||

द्विमात्राप्रमितस्तावद्गुरुरित्यभिधीयते ।छन्दसां लक्षणं वक्तुं सुकरं भवतादिति ॥ ८॥

dvimātrāpramitastāvadgururityabhidhīyate |chandasāṃ lakṣaṇaṃ vaktuṃ sukaraṃ bhavatāditi || 8||

अक्षराणि त्रिशः पद्ये गुम्फितान्यादितः क्रमात् ।तमक्षरगणं प्राहुः वृन्दं त्र्यक्षरसम्मितम् ॥ ९॥

akṣarāṇi triśaḥ padye gumphitānyāditaḥ kramāt |tamakṣaragaṇaṃ prāhuḥ vṛndaṃ tryakṣarasammitam || 9||

लघ्वादिर्यगणः प्रोक्तः रगणः लघुमध्यमः ।लघ्वन्तस्तगणश्चाथ गुर्वादिर्भगणः स्मृतः ॥ १०॥

laghvādiryagaṇaḥ proktaḥ ragaṇaḥ laghumadhyamaḥ |laghvantastagaṇaścātha gurvādirbhagaṇaḥ smṛtaḥ || 10||

गुरुमध्यस्तु जगणः गुर्वन्तः सगणो भवेत् ।नगणः स्यात्सर्वलघुर्मगणो लघुवर्जितः ॥ ११॥

gurumadhyastu jagaṇaḥ gurvantaḥ sagaṇo bhavet |nagaṇaḥ syātsarvalaghurmagaṇo laghuvarjitaḥ || 11||

यत्रावश्यो विरामः स्यात् पद्यवाचनकर्मणि ।तत्स्थानं यतिमाहुः सा पादान्ते नियता भवेत् ॥ १२॥

yatrāvaśyo virāmaḥ syāt padyavācanakarmaṇi |tatsthānaṃ yatimāhuḥ sā pādānte niyatā bhavet || 12||

यतिस्थाने पदान्तस्स्यादितिच्छन्दोविदां मतम् ।प्रदर्श्यन्तेऽत्रोत्तरार्धे हृद्यवृत्तानि कानिचित् ॥ १३॥

yatisthāne padāntassyāditicchandovidāṃ matam |pradarśyante'trottarārdhe hṛdyavṛttāni kānicit || 13||

समवृत्तस्याद्यपादे दृश्यते वृत्तलक्षणम् ।यत्राक्षरगणस्याद्यमक्षरं गणसूचकम् ॥ १४॥

samavṛttasyādyapāde dṛśyate vṛttalakṣaṇam |yatrākṣaragaṇasyādyamakṣaraṃ gaṇasūcakam || 14||

यशस्विन् यगणं ब्रूते रक्ष मां रगणं तथा ।तृप्तोऽस्मि तगणं वक्ति सततं सगणं तथा ॥ १५॥

yaśasvin yagaṇaṃ brūte rakṣa māṃ ragaṇaṃ tathā |tṛpto'smi tagaṇaṃ vakti satataṃ sagaṇaṃ tathā || 15||

भगणं भार्गवपदं सूचयत्यत्र पश्यत ।जयन्तपदमेवं हि जगणं सूचयेदिह ॥ १६॥

bhagaṇaṃ bhārgavapadaṃ sūcayatyatra paśyata |jayantapadamevaṃ hi jagaṇaṃ sūcayediha || 16||

तथा निमिषशब्दस्तु निर्दिशेन्नगणं स्तुतौ ।माजाने मगणं ब्रूते हरे लघुगुरू तथा ॥ १७॥

tathā nimiṣaśabdastu nirdiśennagaṇaṃ stutau |mājāne magaṇaṃ brūte hare laghugurū tathā || 17||

स्तोत्रे विष्णोऽथवा शौरे गुरुद्वन्द्वे प्रयुज्यते ।पुनरुक्तिनिरोधार्थं युज्यन्तेऽन्यपदानि च ॥ १८॥

stotre viṣṇo'thavā śaure gurudvandve prayujyate |punaruktinirodhārthaṃ yujyante'nyapadāni ca || 18||

क्वचिल्लघुगुरुद्वन्द्वं गुरुद्वन्द्वं गुरु क्वचित् ।पृथङ्निर्दिश्यते तत्र हेतुर्यतिनिबन्धनम् ॥ १९॥

kvacillaghugurudvandvaṃ gurudvandvaṃ guru kvacit |pṛthaṅnirdiśyate tatra heturyatinibandhanam || 19||

पद्योत्तरार्धे दत्तौ स्तः यतिर्वृत्तस्य नाम च ।गुणाश्च वसवश्चैव मुनयोऽन्यपदानि च । २०॥

padyottarārdhe dattau staḥ yatirvṛttasya nāma ca |guṇāśca vasavaścaiva munayo'nyapadāni ca | 20||

सङ्ख्यावाचीनि युज्यन्ते यतिनिर्देशने क्वचित् ।न सर्वेषां तु वृत्तानां लक्षणं दिश्यतेऽधुना ॥ २१॥

saṅkhyāvācīni yujyante yatinirdeśane kvacit |na sarveṣāṃ tu vṛttānāṃ lakṣaṇaṃ diśyate'dhunā || 21||

निर्दिशेदन्यवृत्तानि यथानिर्दिष्टमञ्जसा ।बाल एव यथाशक्ति च्छन्दोव्युत्पत्तिहेतुना ॥ २२॥

nirdiśedanyavṛttāni yathānirdiṣṭamañjasā |bāla eva yathāśakti cchandovyutpattihetunā || 22||

तृप्तोऽस्मि तुष्टोऽस्मि जयन्त शौरे (इन्द्रवज्रा)गोविन्द नारायण कृष्ण विष्णो ।नाम्नेन्द्रवज्रेति वदन्ति लोकेछन्दोविदो वृत्तमिदं प्रतीच्छ ॥ २३॥

tṛpto'smi tuṣṭo'smi jayanta śaure (indravajrā)govinda nārāyaṇa kṛṣṇa viṣṇo |nāmnendravajreti vadanti lokechandovido vṛttamidaṃ pratīccha || 23||

जयन्त तुष्टोऽस्मि जयेश शौरे (उपेन्द्रवज्रा)रमेश लक्ष्मीश मुकुन्द विष्णो ।उपेन्द्रवज्रेति बुधैः प्रतीतंसमर्प्यते पादयुगे तवात्र ॥ २४॥

jayanta tuṣṭo'smi jayeśa śaure (upendravajrā)rameśa lakṣmīśa mukunda viṣṇo |upendravajreti budhaiḥ pratītaṃsamarpyate pādayuge tavātra || 24||

शौरे विष्णो राम हे रक्ष शार्ङ्गिन् (शालिनी)त्रातासि त्वं मत्प्रमादान् क्षमस्व ।भिद्येतादौ देव वर्णैश्चतुर्भिःशालिन्याख्यं वृत्तमेतत्प्रतीच्छ ॥ २५॥

śaure viṣṇo rāma he rakṣa śārṅgin (śālinī)trātāsi tvaṃ matpramādān kṣamasva |bhidyetādau deva varṇaiścaturbhiḥśālinyākhyaṃ vṛttametatpratīccha || 25||

रक्ष मां निमिष राम हे हरे (रथोद्धता)कृष्ण शार्ङ्गधर राघव प्रभो ।आमनन्ति कवयो रथोद्धतांवृत्तमेतदधुना समर्प्यते ॥ २६॥

rakṣa māṃ nimiṣa rāma he hare (rathoddhatā)kṛṣṇa śārṅgadhara rāghava prabho |āmananti kavayo rathoddhatāṃvṛttametadadhunā samarpyate || 26||

रक्ष मां निमिष भार्गव शौरे (स्वागत)राम हे वरद केशव कृष्ण ।स्वागतेति विदितं कविवृन्देसन्निधौ तव समर्पितमद्य ॥ २७॥

rakṣa māṃ nimiṣa bhārgava śaure (svāgata)rāma he varada keśava kṛṣṇa |svāgateti viditaṃ kavivṛndesannidhau tava samarpitamadya || 27||

भार्गव भावन भूषण शौरे (दोधकम्)श्रीधर केशव मोहनमूर्ते ।दोधकमेतदितिप्रथितं भोःस्वीकुरु मामव राघव विष्णो ॥ २८॥

bhārgava bhāvana bhūṣaṇa śaure (dodhakam)śrīdhara keśava mohanamūrte |dodhakametaditiprathitaṃ bhoḥsvīkuru māmava rāghava viṣṇo || 28||

तृप्तोऽस्मि तुष्टोऽस्मि जयन्त शौरे (उपेन्द्रवज्रा)जनेश तोत्रास्त्र जयेश विष्णो ।उपेन्द्रवज्रा क्वचिदिन्द्रवज्रानाम्नोपजातिः कृपया प्रतीच्छ ॥ २९॥

tṛpto'smi tuṣṭo'smi jayanta śaure (upendravajrā)janeśa totrāstra jayeśa viṣṇo |upendravajrā kvacidindravajrānāmnopajātiḥ kṛpayā pratīccha || 29||

भार्गव विष्णो निमिष यशस्विन् (मौक्तिकमाला)भूषण शौरे दमय ममत्वम् ।भूतयतिस्स्यादिह नरकारेमौक्तिकमालां वरद गृहाण ॥ ३०॥

bhārgava viṣṇo nimiṣa yaśasvin (mauktikamālā)bhūṣaṇa śaure damaya mamatvam |bhūtayatissyādiha narakāremauktikamālāṃ varada gṛhāṇa || 30||

रक्ष मां निमिष जयन्त विष्णो (चन्द्रिका)प्रत्यहं वितर मनः प्रशान्तिम् ।अक्षरैर्भवति यतिस्तु षड्भिःचन्द्रिकाख्यनववृत्तमवेहि ॥ ३१॥

rakṣa māṃ nimiṣa jayanta viṣṇo (candrikā)pratyahaṃ vitara manaḥ praśāntim |akṣarairbhavati yatistu ṣaḍbhiḥcandrikākhyanavavṛttamavehi || 31||

रक्ष मां निमिष भार्गव शौरे (नन्दन)पुष्कराक्ष मधुसूदन कृष्ण ।नूत्नवृत्तमिह नन्दननामप्रार्थये भवतु तेऽमितभोग्यम् ॥ ३२॥

rakṣa māṃ nimiṣa bhārgava śaure (nandana)puṣkarākṣa madhusūdana kṛṣṇa |nūtnavṛttamiha nandananāmaprārthaye bhavatu te'mitabhogyam || 32||

जयन्त तृप्तोऽस्मि जयेश राम हे (वंशस्थम्)मुकुन्द गोविन्द रमेश मध्वरे ।वदन्ति वंशस्थमिदं पुरातनाःसमर्पयाम्यत्र तवाङ्घ्रिपङ्कजे ॥ ३३॥

jayanta tṛpto'smi jayeśa rāma he (vaṃśastham)mukunda govinda rameśa madhvare |vadanti vaṃśasthamidaṃ purātanāḥsamarpayāmyatra tavāṅghripaṅkaje || 33||

सततं सुमते सदयं सहसे (तोटकम्)मम मन्दमतिं मम धार्ष्ट्यमहो ।कथयन्ति हि तोटकमेतदितिप्रथिताः कृपयानुगृहाण हरे ॥ ३४॥

satataṃ sumate sadayaṃ sahase (toṭakam)mama mandamatiṃ mama dhārṣṭyamaho |kathayanti hi toṭakametaditiprathitāḥ kṛpayānugṛhāṇa hare || 34||

निमिष भार्गव भावन राम हे (द्रुतविलम्बितम्)वरद केशव माधव रक्ष माम् ।द्रुतविलम्बितमद्य मयार्पितंसदयमद्य गृहाण बलानुज ॥ ३५॥

nimiṣa bhārgava bhāvana rāma he (drutavilambitam)varada keśava mādhava rakṣa mām |drutavilambitamadya mayārpitaṃsadayamadya gṛhāṇa balānuja || 35||

तृप्तोऽस्मि तुष्टोऽस्मि जयन्त राम हे (इन्द्रवंशा)गोविन्द लक्ष्मीश नमामि मध्वरे ।भक्त्येन्द्रवंशाख्यमिदं कृतं मयास्वीकृत्य मां पाहि कृपापयोनिधे ॥ ३६॥

tṛpto'smi tuṣṭo'smi jayanta rāma he (indravaṃśā)govinda lakṣmīśa namāmi madhvare |bhaktyendravaṃśākhyamidaṃ kṛtaṃ mayāsvīkṛtya māṃ pāhi kṛpāpayonidhe || 36||

यशस्विन् यथेष्टं यदीत्थं यतेऽहं (भुजङ्गप्रयात)कवित्वे क्षमस्व प्रभो वेङ्कटेश ।भुजङ्गप्रयाते मदीयं प्रयासंप्रतीच्छात्र दोषानशेषान्क्षमस्व ॥ ३७॥

yaśasvin yatheṣṭaṃ yadītthaṃ yate'haṃ (bhujaṅgaprayāta)kavitve kṣamasva prabho veṅkaṭeśa |bhujaṅgaprayāte madīyaṃ prayāsaṃpratīcchātra doṣānaśeṣānkṣamasva || 37||

निमिष यशस्विन् नियम यतेऽहं (कुसुमविचित्रा)मम कविताया कुसुममकिञ्चित् ।तव पदयुग्मे सपदि निधातुंवितरतु तोषं कुसुमविचित्रा ॥ ३८॥

nimiṣa yaśasvin niyama yate'haṃ (kusumavicitrā)mama kavitāyā kusumamakiñcit |tava padayugme sapadi nidhātuṃvitaratu toṣaṃ kusumavicitrā || 38||

राम हे रक्ष मां रंहसा राविणं (स्रग्विणी)कृच्छ्रगर्ते गतं श्रीनिधे मध्वरे ।पण्डिता मण्डिताः स्रग्विणीं मन्वतेवृत्तमेतत्प्रभो स्वीकुरु प्रार्थये ॥ ३९॥

rāma he rakṣa māṃ raṃhasā rāviṇaṃ (sragviṇī)kṛcchragarte gataṃ śrīnidhe madhvare |paṇḍitā maṇḍitāḥ sragviṇīṃ manvatevṛttametatprabho svīkuru prārthaye || 39||

सततं भार्गव रक्ष मां यशस्विन् (मधुरा)सदयं सान्त्वय दुःखितं कृपालो ।मधुराख्यं नवमर्पयामि वृत्तंयदि हृद्यं न भवेत्तदा क्षमस्व ॥ ४०॥

satataṃ bhārgava rakṣa māṃ yaśasvin (madhurā)sadayaṃ sāntvaya duḥkhitaṃ kṛpālo |madhurākhyaṃ navamarpayāmi vṛttaṃyadi hṛdyaṃ na bhavettadā kṣamasva || 40||

माजाने निमिष जयन्त रक्ष मां भोः (प्रहर्षिणी)कंसारे वरद रमेश राम शौरे ।प्रोक्तं यद्भुवनयतिः प्रहर्षिणीतिप्रेम्णा ते पदयुगले समर्पयामि ॥ ४१॥

mājāne nimiṣa jayanta rakṣa māṃ bhoḥ (praharṣiṇī)kaṃsāre varada rameśa rāma śaure |proktaṃ yadbhuvanayatiḥ praharṣiṇītipremṇā te padayugale samarpayāmi || 41||

निमिष भार्गव जयन्त जनेश भोः (मदनिका)वरद केशव रमेश हरे प्रभो ।अभिनवं तव पदेऽद्य निवेशितंमदनिकाख्यमिह वृत्तमधोक्षज ॥ ४२॥

nimiṣa bhārgava jayanta janeśa bhoḥ (madanikā)varada keśava rameśa hare prabho |abhinavaṃ tava pade'dya niveśitaṃmadanikākhyamiha vṛttamadhokṣaja || 42||

तृप्तोऽस्मि भार्गव जयन्त जयेश शौरे (वसन्ततिलका)गोविन्द केशव रमेश रथाङ्गपाणे ।ख्यातं वसन्ततिलकेति कविप्रधानैःवृत्तं भवत्पदयुगेऽद्य समर्पयामि ॥ ४३॥

tṛpto'smi bhārgava jayanta jayeśa śaure (vasantatilakā)govinda keśava rameśa rathāṅgapāṇe |khyātaṃ vasantatilaketi kavipradhānaiḥvṛttaṃ bhavatpadayuge'dya samarpayāmi || 43||

निमिष राम विष्णो रक्ष मां रम्यमूर्ते (बदरिकाख्य)शमय कामबाधां दुर्भरां सत्वरं मे ।बदरिकाख्यवृत्ते सप्तवर्णैर्यतिः स्यात्इदमपूर्वमीश प्रार्थये स्वीकुरु त्वम् ॥ ४४॥

nimiṣa rāma viṣṇo rakṣa māṃ ramyamūrte (badarikākhya)śamaya kāmabādhāṃ durbharāṃ satvaraṃ me |badarikākhyavṛtte saptavarṇairyatiḥ syātidamapūrvamīśa prārthaye svīkuru tvam || 44||

निमिष नियम विष्णो रक्ष मां राम शौरे (मालिनी)वरद सुखद भक्तं पश्य मां सत्यवाक्य ।यतिरिह वसुसंज्ञा मालिनीति प्रसिद्धंतवपदयुगलेऽहं वृत्तमार्तोऽर्पयामि ॥ ४५॥

nimiṣa niyama viṣṇo rakṣa māṃ rāma śaure (mālinī)varada sukhada bhaktaṃ paśya māṃ satyavākya |yatiriha vasusaṃjñā mālinīti prasiddhaṃtavapadayugale'haṃ vṛttamārto'rpayāmi || 45||

यतेऽहं माजाने निमिष सततं भार्गव हरे (शिखरिणी)कवित्वे वैदुष्यं न मयि सुतरां यादवपते ।यतिः षड्भिर्वर्णैरिह शिखरिणीवृत्तमधुनाप्रतीच्छेदं विष्णो परिहर मदीयानघगणान् ॥ ४६॥

yate'haṃ mājāne nimiṣa satataṃ bhārgava hare (śikhariṇī)kavitve vaiduṣyaṃ na mayi sutarāṃ yādavapate |yatiḥ ṣaḍbhirvarṇairiha śikhariṇīvṛttamadhunāpratīcchedaṃ viṣṇo parihara madīyānaghagaṇān || 46||

जगत्सु सततं हरे नियम राम हे रक्षकाः (पृथ्वी)भवन्ति न भवद्विधाः प्रणतपालने जागराः ।रमेश भुवि कथ्यते बुधजनेषु पृथ्वीति यन्मयात्र हि समर्प्यते यतिरिहाष्टवर्णैः प्रभो ॥ ४७॥

jagatsu satataṃ hare niyama rāma he rakṣakāḥ (pṛthvī)bhavanti na bhavadvidhāḥ praṇatapālane jāgarāḥ |rameśa bhuvi kathyate budhajaneṣu pṛthvīti yanmayātra hi samarpyate yatirihāṣṭavarṇaiḥ prabho || 47||

शौरे विष्णो शार्ङ्गिन् निमिश सुमते भूषण हरे (संरम्भम्)दृप्तं मत्तं दुष्टं शमद सुरुचे मामव विधो ।वृत्तं संरम्भाख्यं ऋतुयतियुतं स्वीकुरु नवंप्रीत्यै भूयात्तेऽदो वरद करुणाब्धे नरहरे ॥ ४८॥

śaure viṣṇo śārṅgin nimiśa sumate bhūṣaṇa hare (saṃrambham)dṛptaṃ mattaṃ duṣṭaṃ śamada suruce māmava vidho |vṛttaṃ saṃrambhākhyaṃ ṛtuyatiyutaṃ svīkuru navaṃprītyai bhūyātte'do varada karuṇābdhe narahare || 48||

विष्णो शौरे निमिष सततं रक्ष मां राम दासं (मन्दाक्रान्ता)प्रह्वं भक्तं रघुवर हरे देव कारुण्यमूर्ते ।मन्दाक्रान्तेत्यभिहितमिदं वृत्तमास्वाद्यलास्यंत्वत्पादाब्जे मुनियतियुतं न्यस्य शान्तिं व्रजामि ॥ ४९॥

viṣṇo śaure nimiṣa satataṃ rakṣa māṃ rāma dāsaṃ (mandākrāntā)prahvaṃ bhaktaṃ raghuvara hare deva kāruṇyamūrte |mandākrāntetyabhihitamidaṃ vṛttamāsvādyalāsyaṃtvatpādābje muniyatiyutaṃ nyasya śāntiṃ vrajāmi || 49||

शौरे विष्णो यशस्विन् निमिष सुमते भार्गव हरे (मन्दार)पश्चात्तापात्प्रदग्धं वरद कृपया पारय भवात् ।प्रोक्तं मन्दारनाम्ना मुनियतियुतं स्वीकुरु नवंभूयात्तुभ्यं मुदार्थं सहृदयहितं माधव विभो ॥ ५०॥

śaure viṣṇo yaśasvin nimiṣa sumate bhārgava hare (mandāra)paścāttāpātpradagdhaṃ varada kṛpayā pāraya bhavāt |proktaṃ mandāranāmnā muniyatiyutaṃ svīkuru navaṃbhūyāttubhyaṃ mudārthaṃ sahṛdayahitaṃ mādhava vibho || 50||

माजाने सततं जडोऽस्मि सुमतेऽतृप्तोऽस्मि तप्तोऽस्मिभोः (शार्दूलविक्रीडित)शान्तिं देहि भवत्कटाक्षसलिलैर्मद्विग्रहं स्नापयन् ।वर्णैर्द्वादशभिर्यतिर्नियमिता शार्दूलविक्रीडितेवृत्तेऽस्मिन् भवते समर्पितमिदं लक्ष्मीप्रिय स्वीकुरु ॥ ५१॥

mājāne satataṃ jaḍo'smi sumate'tṛpto'smi tapto'smibhoḥ (śārdūlavikrīḍita)śāntiṃ dehi bhavatkaṭākṣasalilairmadvigrahaṃ snāpayan |varṇairdvādaśabhiryatirniyamitā śārdūlavikrīḍitevṛtte'smin bhavate samarpitamidaṃ lakṣmīpriya svīkuru || 51||

विष्णो शौरे यशस्विन् नियत नियम ते देव तृप्तोऽस्मि दासः (स्रग्धरा)कंसाराते विधातः मधुमथन हरे चक्रपाणे दयालो ।यस्मिन् द्विः स्यान्मुनियतिनियमः स्रग्धरेतीरिते भोःतत्त्वत्प्रीत्यै कृपालो तवपदयुगले सादरं निक्षिपामि ॥ ५२॥

viṣṇo śaure yaśasvin niyata niyama te deva tṛpto'smi dāsaḥ (sragdharā)kaṃsārāte vidhātaḥ madhumathana hare cakrapāṇe dayālo |yasmin dviḥ syānmuniyatiniyamaḥ sragdharetīrite bhoḥtattvatprītyai kṛpālo tavapadayugale sādaraṃ nikṣipāmi || 52||

सुमते सततं जयन्त भोः सदयं भावन रक्ष मां हरे । (ललिता)ललितेति बुधैरुदाहृते तव नेत्रद्युतिपातमादिशेः ॥ ५३॥

sumate satataṃ jayanta bhoḥ sadayaṃ bhāvana rakṣa māṃ hare | (lalitā)laliteti budhairudāhṛte tava netradyutipātamādiśeḥ || 53||

वरद निमिष रक्ष मां यशस्विन् (पुष्पिताग्रा)नियम जयन्त जनेश रामभद्र ।तव पदयुगले निवेश्य भक्त्यादृढचरणां प्रणमामि पुष्पिताग्राम् ॥ ५४॥

varada nimiṣa rakṣa māṃ yaśasvin (puṣpitāgrā)niyama jayanta janeśa rāmabhadra |tava padayugale niveśya bhaktyādṛḍhacaraṇāṃ praṇamāmi puṣpitāgrām || 54||

वृत्तकुसुमानि तवपदयुगले भक्त्या समर्पितानि हरे । (आर्या)स्वीकुर्वकिञ्चननृणा सुरभिःप्रसरतु तव करुणया ॥ ५५॥

vṛttakusumāni tavapadayugale bhaktyā samarpitāni hare | (āryā)svīkurvakiñcananṛṇā surabhiḥprasaratu tava karuṇayā || 55||

इति वृत्तकुसुमार्पणं समाप्तम् ।ग़् ष् ष् ंउर्थ्य् मुर्थ्य्ग्स्स् अत् ग्मैल्ॅओम्

iti vṛttakusumārpaṇaṃ samāptam |ग़ ṣ ṣ ṃurthy murthygss at gmaileom