धन्वन्तर्यष्टोत्तरशतनामस्तोत्रम् Shridhanvantaryashtottarashatanamastotram

धन्वन्तरिः सुधापूर्णकलशढ्यकरो हरिः ।जरामृतित्रस्तदेवप्रार्थनासाधकः प्रभुः ॥ १॥

dhanvantariḥ sudhāpūrṇakalaśaḍhyakaro hariḥ |jarāmṛtitrastadevaprārthanāsādhakaḥ prabhuḥ || 1||

निर्विकल्पो निस्समानो मन्दस्मितमुखाम्बुजः ।आञ्जनेयप्रापिताद्रिः पार्श्वस्थविनतासुतः ॥ २॥

nirvikalpo nissamāno mandasmitamukhāmbujaḥ |āñjaneyaprāpitādriḥ pārśvasthavinatāsutaḥ || 2||

निमग्नमन्दरधरः कूर्मरूपी बृहत्तनुः ।नीलकुञ्चितकेशान्तः परमाद्भुतरूपधृत् ॥ ३॥

nimagnamandaradharaḥ kūrmarūpī bṛhattanuḥ |nīlakuñcitakeśāntaḥ paramādbhutarūpadhṛt || 3||

कटाक्षवीक्षणाश्वस्तवासुकिः सिंहविक्रमः ।स्मर्तृहृद्रोगहरणो महाविष्ण्वंशसम्भवः ॥ ४॥

kaṭākṣavīkṣaṇāśvastavāsukiḥ siṃhavikramaḥ |smartṛhṛdrogaharaṇo mahāviṣṇvaṃśasambhavaḥ || 4||

प्रेक्षणीयोत्पलश्याम आयुर्वेदाधिदैवतम् ।भेषजग्रहणानेहस्स्मरणीयपदाम्बुजः ॥ ५॥

prekṣaṇīyotpalaśyāma āyurvedādhidaivatam |bheṣajagrahaṇānehassmaraṇīyapadāmbujaḥ || 5||

नवयौवनसम्पन्नः किरीटान्वितमस्तकः ।नक्रकुण्डलसंशोभिश्रवणद्वयशष्कुलिः ॥ ६॥

navayauvanasampannaḥ kirīṭānvitamastakaḥ |nakrakuṇḍalasaṃśobhiśravaṇadvayaśaṣkuliḥ || 6||

दीर्घपीवरदोर्दण्डः कम्बुग्रीवोऽम्बुजेक्षणः ।चतुर्भुजः शङ्खधरश्चक्रहस्तो वरप्रदः ॥ ७॥

dīrghapīvaradordaṇḍaḥ kambugrīvo'mbujekṣaṇaḥ |caturbhujaḥ śaṅkhadharaścakrahasto varapradaḥ || 7||

सुधापात्रोपरिलसदाम्रपत्रलसत्करः ।शतपद्याढ्यहस्तश्च कस्तूरीतिलकाञ्चितः ॥ ८॥

sudhāpātroparilasadāmrapatralasatkaraḥ |śatapadyāḍhyahastaśca kastūrītilakāñcitaḥ || 8||

सुकपोलस्सुनासश्च सुन्दरभ्रूलताञ्चितः ।स्वङ्गुलीतलशोभाढ्यो गूढजत्रुर्महाहनुः ॥ ९॥

sukapolassunāsaśca sundarabhrūlatāñcitaḥ |svaṅgulītalaśobhāḍhyo gūḍhajatrurmahāhanuḥ || 9||

दिव्याङ्गदलसद्बाहुः केयूरपरिशोभितः ।विचित्ररत्नखचितवलयद्वयशोभितः ॥ १०॥

divyāṅgadalasadbāhuḥ keyūrapariśobhitaḥ |vicitraratnakhacitavalayadvayaśobhitaḥ || 10||

समोल्लसत्सुजातांसश्चाङ्गुलीयविभूषितः ।सुधाघन्धरसास्वादमिलद्भृङ्गमनोहरः ॥ ११॥

samollasatsujātāṃsaścāṅgulīyavibhūṣitaḥ |sudhāghandharasāsvādamiladbhṛṅgamanoharaḥ || 11||

लक्ष्मीसमर्पितोत्फुल्लकञ्जमालालसद्गलः ।लक्ष्मीशोभितवक्षस्को वनमालाविराजितः ॥ १२॥

lakṣmīsamarpitotphullakañjamālālasadgalaḥ |lakṣmīśobhitavakṣasko vanamālāvirājitaḥ || 12||

नवरत्नमणीक्लृप्तहारशोभितकन्धरः ।हीरनक्षत्रमालादिशोभारञ्जितदिङ्मुखः ॥ १३॥

navaratnamaṇīklṛptahāraśobhitakandharaḥ |hīranakṣatramālādiśobhārañjitadiṅmukhaḥ || 13||

विरजोऽम्बरसंवीतो विशालोराः पृथुश्रवाः ।निम्ननाभिः सूक्ष्ममध्यः स्थूलजङ्घो निरञ्जनः ॥ १४॥

virajo'mbarasaṃvīto viśālorāḥ pṛthuśravāḥ |nimnanābhiḥ sūkṣmamadhyaḥ sthūlajaṅgho nirañjanaḥ || 14||

सुलक्षणपदाङ्गुष्ठः सर्वसामुद्रिकान्वितः ।अलक्तकारक्तपादो मूर्तिमद्वाधिपूजितः ॥ १५॥

sulakṣaṇapadāṅguṣṭhaḥ sarvasāmudrikānvitaḥ |alaktakāraktapādo mūrtimadvādhipūjitaḥ || 15||

सुधार्थान्योन्यसंयुध्यद्देवदैतेयसान्त्वनः ।कोटिमन्मथसङ्काशः सर्वावयवसुन्दरः ॥ १६॥

sudhārthānyonyasaṃyudhyaddevadaiteyasāntvanaḥ |koṭimanmathasaṅkāśaḥ sarvāvayavasundaraḥ || 16||

अमृतास्वादनोद्युक्तदेवसङ्घपरिष्टुतः ।पुष्पवर्षणसंयुक्तगन्धर्वकुलसेवितः ॥ १७॥

amṛtāsvādanodyuktadevasaṅghapariṣṭutaḥ |puṣpavarṣaṇasaṃyuktagandharvakulasevitaḥ || 17||

शङ्खतूर्यमृदङ्गादिसुवादित्राप्सरोवृतः ।विष्वक्सेनादियुक्पार्श्वः सनकादिमुनिस्तुतः ॥ १८॥

śaṅkhatūryamṛdaṅgādisuvāditrāpsarovṛtaḥ |viṣvaksenādiyukpārśvaḥ sanakādimunistutaḥ || 18||

साश्चर्यसस्मितचतुर्मुखनेत्रसमीक्षितः ।साशङ्कसम्भ्रमदितिदनुवंश्यसमीडितः ॥ १९॥

sāścaryasasmitacaturmukhanetrasamīkṣitaḥ |sāśaṅkasambhramaditidanuvaṃśyasamīḍitaḥ || 19||

नमनोन्मुखदेवादिमौलीरत्नलसत्पदः ।दिव्यतेजःपुञ्जरूपः सर्वदेवहितोत्सुकः ॥ २०॥

namanonmukhadevādimaulīratnalasatpadaḥ |divyatejaḥpuñjarūpaḥ sarvadevahitotsukaḥ || 20||

स्वनिर्गमक्षुब्धदुग्धवाराशिर्दुन्दुभिस्वनः ।गन्धर्वगीतापदानश्रवणोत्कमहामनाः ॥ २१॥

svanirgamakṣubdhadugdhavārāśirdundubhisvanaḥ |gandharvagītāpadānaśravaṇotkamahāmanāḥ || 21||

निष्किञ्चनजनप्रीतो भवसम्प्राप्तरोगहृत् ।अन्तर्हितसुधापात्रो महात्मा मायिकाग्रणीः ॥ २२॥

niṣkiñcanajanaprīto bhavasamprāptarogahṛt |antarhitasudhāpātro mahātmā māyikāgraṇīḥ || 22||

क्षणार्धमोहिनीरूपः सर्वस्त्रीशुभलक्षणः ।मदमत्तेभगमनः सर्वलोकविमोहनः ॥ २३॥

kṣaṇārdhamohinīrūpaḥ sarvastrīśubhalakṣaṇaḥ |madamattebhagamanaḥ sarvalokavimohanaḥ || 23||

स्रंसन्नीवीग्रन्थिबन्धासक्तदिव्यकराङ्गुलिः ।रत्नदर्वीलसद्धस्तो देवदैत्यविभागकृत् ॥ २४॥

sraṃsannīvīgranthibandhāsaktadivyakarāṅguliḥ |ratnadarvīlasaddhasto devadaityavibhāgakṛt || 24||

सङ्ख्यातदेवतान्यासो दैत्यदानववञ्चकः ।देवामृतप्रदाता च परिवेषणहृष्टधीः ॥ २५॥

saṅkhyātadevatānyāso daityadānavavañcakaḥ |devāmṛtapradātā ca pariveṣaṇahṛṣṭadhīḥ || 25||

उन्मुखोन्मुखदैत्येन्द्रदन्तपङ्कितविभाजकः ।पुष्पवत्सुविनिर्दिष्टराहुरक्षःशिरोहरः ॥ २६॥

unmukhonmukhadaityendradantapaṅkitavibhājakaḥ |puṣpavatsuvinirdiṣṭarāhurakṣaḥśiroharaḥ || 26||

राहुकेतुग्रहस्थानपश्चाद्गतिविधायकः ।अमृतालाभनिर्विण्णयुध्यद्देवारिसूदनः ॥ २७॥

rāhuketugrahasthānapaścādgatividhāyakaḥ |amṛtālābhanirviṇṇayudhyaddevārisūdanaḥ || 27||

गरुत्मद्वाहनारूढः सर्वेशस्तोत्रसंयुतः ।स्वस्वाधिकारसन्तुष्टशक्रवह्न्यादिपूजितः ॥ २८॥

garutmadvāhanārūḍhaḥ sarveśastotrasaṃyutaḥ |svasvādhikārasantuṣṭaśakravahnyādipūjitaḥ || 28||

मोहिनीदर्शनायातस्थाणुचित्तविमोहकः ।शचीस्वाहादिदिक्पालपत्नीमण्डलसन्नुतः ॥ २९॥

mohinīdarśanāyātasthāṇucittavimohakaḥ |śacīsvāhādidikpālapatnīmaṇḍalasannutaḥ || 29||

वेदान्तवेद्यमहिमा सर्वलौकैकरक्षकः ।राजराजप्रपूज्याङ्घ्रिः चिन्तितार्थप्रदायकः ॥ ३०॥

vedāntavedyamahimā sarvalaukaikarakṣakaḥ |rājarājaprapūjyāṅghriḥ cintitārthapradāyakaḥ || 30||

धन्वन्तरेर्भगवतो नाम्नामष्टोत्तरं शतम् ।यः पठेत्सततं भक्त्या नीरोगस्सुखभाग्भवेत् ॥ ३१॥

dhanvantarerbhagavato nāmnāmaṣṭottaraṃ śatam |yaḥ paṭhetsatataṃ bhaktyā nīrogassukhabhāgbhavet || 31||

इति बृहद्ब्रह्मानन्दोपनिषदान्तर्गतंश्रीधन्वन्तर्यष्टोत्तरशतनामस्तोत्रं सम्पूर्णम् ।

iti bṛhadbrahmānandopaniṣadāntargataṃśrīdhanvantaryaṣṭottaraśatanāmastotraṃ sampūrṇam |