लक्ष्मीहयवदनमङ्गलम् Shri lakshmi Hayavadana Mangalam

मणिमण्डपिकास्थानीमण्डनाय महीयसे ।मङ्गलाभरणायास्तु तुरगास्याय मङ्गलम् ॥ १॥

maṇimaṇḍapikāsthānīmaṇḍanāya mahīyase |maṅgalābharaṇāyāstu turagāsyāya maṅgalam || 1||

इन्दिरालिङ्गनानन्दनिधये निधये सताम् ।सुन्दराय सुपूर्णाय वाजिवक्त्राय मङ्गलम् ॥ २॥

indirāliṅganānandanidhaye nidhaye satām |sundarāya supūrṇāya vājivaktrāya maṅgalam || 2||

विरिञ्चिमुखदेवादिवेदव्याख्यानकारिणे ।वाख्याङ्कितकलायास्तु वागधीशाय मङ्गलम् ॥ ३॥

viriñcimukhadevādivedavyākhyānakāriṇe |vākhyāṅkitakalāyāstu vāgadhīśāya maṅgalam || 3||

वाचि वेदश्रियं स्वान्ते कृपाश्रियमपाङ्गयोः ।अनुग्रहश्रियं धर्त्रे हयशीर्षाय मङ्गलम् ॥ ४॥

vāci vedaśriyaṃ svānte kṛpāśriyamapāṅgayoḥ |anugrahaśriyaṃ dhartre hayaśīrṣāya maṅgalam || 4||

प्रपन्नाभयदायास्तु दिव्यदृष्टिप्रदायिने ।देशिकाराध्यदैवाय हयग्रीवाय मङ्गलम् ॥ ५॥

prapannābhayadāyāstu divyadṛṣṭipradāyine |deśikārādhyadaivāya hayagrīvāya maṅgalam || 5||

ज्ञानानन्दसुखारोग्यभुक्तिमुक्त्यादिदायिने ।स्वाश्रिताय शरण्याय वाग्वरेण्याय मङ्गलम् ॥ ६॥

jñānānandasukhārogyabhuktimuktyādidāyine |svāśritāya śaraṇyāya vāgvareṇyāya maṅgalam || 6||

गोदाशठारिभगवद्रामानुजमुखैस्सदा ।देशिकेन च युक्ताय नित्यं भवतु मङ्गलम् ॥ ७॥

godāśaṭhāribhagavadrāmānujamukhaissadā |deśikena ca yuktāya nityaṃ bhavatu maṅgalam || 7||

आत्रेयश्री श्रीनिवास राघवेणानुसंहितम् ।श्रेयो ददातु पठतां श्रीहयाननमङ्गलम् ॥ ८॥

ātreyaśrī śrīnivāsa rāghaveṇānusaṃhitam |śreyo dadātu paṭhatāṃ śrīhayānanamaṅgalam || 8||

इति श्रीलक्ष्मीहयवदनमङ्गलं सम्पूर्णम् ।

iti śrīlakṣmīhayavadanamaṅgalaṃ sampūrṇam |