गरुडदण्डकम् Shri Garuda Dandakam

श्रीमते निगमान्तमहादेशिकाय नमः ।श्रीमान् वेङ्कटनाथार्यः कवितार्किककेसरी ।वेदान्तचार्यवर्यो मे सन्निधत्ताम् सदाहृदि ॥नमः पन्नगनद्धाय वैकुण्ठवशवर्तिने ।श्रुतिसिन्धु सुधोत्पादमन्दराय गरुत्मते ॥ १॥

śrīmate nigamāntamahādeśikāya namaḥ |śrīmān veṅkaṭanāthāryaḥ kavitārkikakesarī |vedāntacāryavaryo me sannidhattām sadāhṛdi ||namaḥ pannaganaddhāya vaikuṇṭhavaśavartine |śrutisindhu sudhotpādamandarāya garutmate || 1||

गरुडमखिलवेदनीडाधिरूढम् द्विषत्पीडनोत्कण्ठिताकुण्ठवैकुण्ठपीठीकृतस्कन्धमीडे स्वनीडागतिप्रीतरुद्रासुकीर्तिस्तनाभोगगाढोपगूढस्फुरत्कण्टकव्रात वेधव्यथावेपमान द्विजिह्वाधिपाकल्पविष्फार्यमाणस्फटावाटिका रत्नरोचिश्छटा राजिनीराजितं कान्तिकल्लोलिनीराजितम् ॥ २॥

garuḍamakhilavedanīḍādhirūḍham dviṣatpīḍanotkaṇṭhitākuṇṭhavaikuṇṭhapīṭhīkṛtaskandhamīḍe svanīḍāgatiprītarudrāsukīrtistanābhogagāḍhopagūḍhasphuratkaṇṭakavrāta vedhavyathāvepamāna dvijihvādhipākalpaviṣphāryamāṇasphaṭāvāṭikā ratnarociśchaṭā rājinīrājitaṃ kāntikallolinīrājitam || 2||

जयगरुड सुपर्ण दर्वीकराहार देवाधिपाहारहारिन्दिवौकस्पतिक्षिप्तदम्भोळिधाराकिणाकल्प कल्पान्तवातूल कल्पोदयानल्पवीरायितोद्यच्चमत्कार दैत्यारि जैत्रध्वजारोहनिर्धारितोत्कर्षसङ्कर्षणात्मन् गरुत्मन् मरुत्पञ्च काधीश सत्यादिमूर्ते न कश्चित्समस्ते नमस्ते पुनस्ते नमः ॥ ३॥

jayagaruḍa suparṇa darvīkarāhāra devādhipāhārahārindivaukaspatikṣiptadambhoḷidhārākiṇākalpa kalpāntavātūla kalpodayānalpavīrāyitodyaccamatkāra daityāri jaitradhvajārohanirdhāritotkarṣasaṅkarṣaṇātman garutman marutpañca kādhīśa satyādimūrte na kaścitsamaste namaste punaste namaḥ || 3||

नम इदमजहत्सपर्याय पर्यायनिर्यातपक्षानिलास्फालनोद्वेलपाथोधिवीचीचपेटाहतागाधपाताळभाङ्कारसंक्रुद्धनागेन्द्रपीडासृणीभावभास्वन्नखश्रेणये चण्डतुण्डाय नृत्यद्भुजङ्गभ्रुवे वज्रिणे दंष्ट्रयातुभ्यमध्यात्मविद्या विधेया विधेया भवद्दास्यमापादयेथा दयेथाश्च मे ॥ ४॥

nama idamajahatsaparyāya paryāyaniryātapakṣānilāsphālanodvelapāthodhivīcīcapeṭāhatāgādhapātāḷabhāṅkārasaṃkruddhanāgendrapīḍāsṛṇībhāvabhāsvannakhaśreṇaye caṇḍatuṇḍāya nṛtyadbhujaṅgabhruve vajriṇe daṃṣṭrayātubhyamadhyātmavidyā vidheyā vidheyā bhavaddāsyamāpādayethā dayethāśca me || 4||

मनुरनुगत पक्षिवक्त्र स्फुरत्तारकस्तावकश्चित्रभानुप्रियाशेखरस्त्रायतांनस्त्रिवर्गापवर्गप्रसूतिः परव्योमधामन्वलद्वेषिदर्पज्वलद्वालखिल्यप्रतिज्ञावतीर्ण स्थिरां तत्त्वबुद्धिं परांभक्तिधेनुं जगन्मूलकन्दे मुकुन्दे महानन्ददोग्ध्रीं दधीथामुधाकामहीनामहीनामहीनान्तक ॥ ५॥

manuranugata pakṣivaktra sphurattārakastāvakaścitrabhānupriyāśekharastrāyatāṃnastrivargāpavargaprasūtiḥ paravyomadhāmanvaladveṣidarpajvaladvālakhilyapratijñāvatīrṇa sthirāṃ tattvabuddhiṃ parāṃbhaktidhenuṃ jaganmūlakande mukunde mahānandadogdhrīṃ dadhīthāmudhākāmahīnāmahīnāmahīnāntaka || 5||

षट्त्रिंशद्गणचरणो नरपरिपाटीनवीनगुम्भगणः ।विष्णुरथदण्डकोऽयं विघटयतु विपक्षवाहिनीव्यूहम् ॥ ६॥

ṣaṭtriṃśadgaṇacaraṇo naraparipāṭīnavīnagumbhagaṇaḥ |viṣṇurathadaṇḍako'yaṃ vighaṭayatu vipakṣavāhinīvyūham || 6||

विचित्रसिद्धिदः सोऽयं वेङ्कटेशविपश्चिता ।गरुडध्वजतोषाय गीतो गरुडदण्डकः ॥ ७॥

vicitrasiddhidaḥ so'yaṃ veṅkaṭeśavipaścitā |garuḍadhvajatoṣāya gīto garuḍadaṇḍakaḥ || 7||

कवितार्किकसिंहाय कल्यणगुणशालिने ।श्रीमते वेङ्कटेशाय वेदान्तगुरवे नमः ॥श्रीमते निगमान्तमहादेशिकाय नमः ॥इति श्रीवेदान्तदेशिकविरचितः गरुडदण्डकः सम्पूर्णः ।

kavitārkikasiṃhāya kalyaṇaguṇaśāline |śrīmate veṅkaṭeśāya vedāntagurave namaḥ ||śrīmate nigamāntamahādeśikāya namaḥ ||iti śrīvedāntadeśikaviracitaḥ garuḍadaṇḍakaḥ sampūrṇaḥ |