देवराजाष्टकम् Shri Devarajashtakam

देवराजाष्टकम्(काञ्च्यां वरदराज क्षेत्रे)नमस्ते हस्तिशैलेश श्रीमन्नम्बुजलोचन ।शरणं त्वां प्रपन्नोऽस्मि प्रणतार्तिहराच्युत ॥ १॥

devarājāṣṭakam(kāñcyāṃ varadarāja kṣetre)namaste hastiśaileśa śrīmannambujalocana |śaraṇaṃ tvāṃ prapanno'smi praṇatārtiharācyuta || 1||

समस्तप्राणिसन्त्राण प्रवीण करुणोल्बणाः ।विलसन्तु कटाक्षास्ते मय्यस्मिन् जगतां पते ॥ २॥

samastaprāṇisantrāṇa pravīṇa karuṇolbaṇāḥ |vilasantu kaṭākṣāste mayyasmin jagatāṃ pate || 2||

निन्दिताचारकरणं निवृत्तं कृत्यकर्मणः ।पापीयांसममर्यादं पाहि मां वरद प्रभो ॥ ३॥

ninditācārakaraṇaṃ nivṛttaṃ kṛtyakarmaṇaḥ |pāpīyāṃsamamaryādaṃ pāhi māṃ varada prabho || 3||

संसारमरुकान्तारे दुर्व्याधिव्याघ्रभीषिणे ।विषयक्षुद्रगुल्माढ्ये तृषापादपशालिनि ॥ ४॥

saṃsāramarukāntāre durvyādhivyāghrabhīṣiṇe |viṣayakṣudragulmāḍhye tṛṣāpādapaśālini || 4||

पुत्रदारगृहक्षेत्रमृगतृष्णाम्बुपुष्कले ।कृत्याकृत्यविवेकान्धं परिभ्रान्तमितस्ततः ॥ ५॥

putradāragṛhakṣetramṛgatṛṣṇāmbupuṣkale |kṛtyākṛtyavivekāndhaṃ paribhrāntamitastataḥ || 5||

अजस्रं जाततृष्णार्तमवसन्नाङ्गमक्षमम् ।क्षीणशक्तिबलारोग्यं केवलं क्लेशसंश्रयम् ॥ ६॥

ajasraṃ jātatṛṣṇārtamavasannāṅgamakṣamam |kṣīṇaśaktibalārogyaṃ kevalaṃ kleśasaṃśrayam || 6||

सन्तप्तं विविधैर्दुःखैर्दुर्वचैरेवमादिभिः ।देवराज दयासिन्धो देवदेव जगत्पते ॥ ७॥

santaptaṃ vividhairduḥkhairdurvacairevamādibhiḥ |devarāja dayāsindho devadeva jagatpate || 7||

त्वदीक्षणसुधासिन्धुवीचिविक्षेपशीकरैः ।कारुण्यमारुतानीतैश्शीतलैरभिषिञ्च माम् ॥ ८॥

tvadīkṣaṇasudhāsindhuvīcivikṣepaśīkaraiḥ |kāruṇyamārutānītaiśśītalairabhiṣiñca mām || 8||

इति श्रीकाञ्चीपूर्णविरचितं देवराजाष्टकं सम्पूर्णम् ।

iti śrīkāñcīpūrṇaviracitaṃ devarājāṣṭakaṃ sampūrṇam |