सप्तरात्रोत्सवप्रकारः Shaptaratrotsavaprakarah

देवोपदेवाः पितरो योगीन्द्राश्चक्रवर्तिनः ।श्रीविष्णुपार्षदाः सर्वेऽप्यायान्तूत्सवरक्षकाः ॥ १॥

devopadevāḥ pitaro yogīndrāścakravartinaḥ |śrīviṣṇupārṣadāḥ sarve'pyāyāntūtsavarakṣakāḥ || 1||

घ्नन्त्वन्तरायान्परितः कृन्तन्तु परिपन्थिनः ।सन्तारयन्तु कर्माब्धि सन्तु सन्तोषदाः सदा ॥ २॥

ghnantvantarāyānparitaḥ kṛntantu paripanthinaḥ |santārayantu karmābdhi santu santoṣadāḥ sadā || 2||

हीनतां पूरयन्त्वेते हानिर्मास्त्वत्र काचन ।ज्ञानानन्दमयः श्रीमान् श्रीनाथः प्रीयतां प्रभुः ॥ ३॥

hīnatāṃ pūrayantvete hānirmāstvatra kācana |jñānānandamayaḥ śrīmān śrīnāthaḥ prīyatāṃ prabhuḥ || 3||

सप्तरात्रोत्सवास्सर्वे सार्थकास्सन्तु सन्ततं ।तृप्तोऽस्तु लक्ष्मीरमणोऽस्माकं युष्मदनुग्रहात् ॥ ४॥

saptarātrotsavāssarve sārthakāssantu santataṃ |tṛpto'stu lakṣmīramaṇo'smākaṃ yuṣmadanugrahāt || 4||

इन्द्रो महैश्वर्यदः स्यादस्मिन्नुत्सवकर्मणि ।हुतं तु सुहुतं कुर्यात्सप्तजिह्वो हुताशनः ॥ ५॥

indro mahaiśvaryadaḥ syādasminnutsavakarmaṇi |hutaṃ tu suhutaṃ kuryātsaptajihvo hutāśanaḥ || 5||

यमो नियमयेच्छत्रून्निरृतिर्हन्तु राक्षसान् ।वरुणो वारयेद्विघ्नान्वायुर्ज्ञानप्रदोऽस्तु नः ॥ ६॥

yamo niyamayecchatrūnnirṛtirhantu rākṣasān |varuṇo vārayedvighnānvāyurjñānaprado'stu naḥ || 6||

धनदस्तु धनं भूरि दद्यादुत्सवपूर्तये ।चन्द्रः शान्तकरो भूयादाह्लादयतु च प्रजाः ॥ ७॥

dhanadastu dhanaṃ bhūri dadyādutsavapūrtaye |candraḥ śāntakaro bhūyādāhlādayatu ca prajāḥ || 7||

विद्रावयेदभद्राणि रुद्रो रौद्रपराक्रमः ।अनन्तोऽनन्तफलदमिमं कुर्यान्महोत्सवम् ॥ ८॥

vidrāvayedabhadrāṇi rudro raudraparākramaḥ |ananto'nantaphaladamimaṃ kuryānmahotsavam || 8||

ब्रह्मा सर्वाणि कर्माणि सम्यञ्चीह करोतु नः ।हरे भवत्प्रसादेन मोक्षाख्यफलसद्धये ॥ ९॥

brahmā sarvāṇi karmāṇi samyañcīha karotu naḥ |hare bhavatprasādena mokṣākhyaphalasaddhaye || 9||

अङ्कुरारोपणं पूर्वं किङ्करैः क्रियते तव ।पार्षदाः पान्त्वहोरात्रमस्मिन्नुत्सवकर्मणि ॥ १०॥

aṅkurāropaṇaṃ pūrvaṃ kiṅkaraiḥ kriyate tava |pārṣadāḥ pāntvahorātramasminnutsavakarmaṇi || 10||

विष्णोस्सर्वाणि भूतानि रक्षन्तु परितो दिशं ।विष्वक्सेनश्च विघ्नेशो विष्वक्स्वस्वगणैर्युतौ ॥ ११॥

viṣṇossarvāṇi bhūtāni rakṣantu parito diśaṃ |viṣvaksenaśca vighneśo viṣvaksvasvagaṇairyutau || 11||

निकृन्ततां चान्तरायं शान्तिं च कुरुतां सदा ।पञ्चोत्सवाः पञ्चदिनेष्वथो विष्णुरथोत्सवः ॥ १२॥

nikṛntatāṃ cāntarāyaṃ śāntiṃ ca kurutāṃ sadā |pañcotsavāḥ pañcadineṣvatho viṣṇurathotsavaḥ || 12||

पश्चादवभृथस्नानं द्रष्टॄणां सन्तु तुष्टये ।प्राग्रत्नमण्टपे कुर्यादुत्सवं श्रीपतेः सुधीः ॥ १३॥

paścādavabhṛthasnānaṃ draṣṭṝṇāṃ santu tuṣṭaye |prāgratnamaṇṭape kuryādutsavaṃ śrīpateḥ sudhīḥ || 13||

पश्चात्सिंहोत्सवं कुर्याद्गजोत्सवमतः परं ।शेषोत्सवं ततः कुर्यात्तार्क्ष्योत्सवमतः परम् ॥ १४॥

paścātsiṃhotsavaṃ kuryādgajotsavamataḥ paraṃ |śeṣotsavaṃ tataḥ kuryāttārkṣyotsavamataḥ param || 14||

रथोत्सवं ततः कुर्यादलङ्कृत्य जनार्दनं ।सर्वोत्सवस्य श्रीभर्तुः सर्वोत्सवशिरोमणिः ॥ १५॥

rathotsavaṃ tataḥ kuryādalaṅkṛtya janārdanaṃ |sarvotsavasya śrībhartuḥ sarvotsavaśiromaṇiḥ || 15||

रथोत्सवोऽयं दद्यान्नो मनोरथमहोत्सवं ।सप्तरात्रोत्सवान्यस्तु भक्त्या सेवेत मानवः ॥ १६॥

rathotsavo'yaṃ dadyānno manorathamahotsavaṃ |saptarātrotsavānyastu bhaktyā seveta mānavaḥ || 16||

सप्तलोकोपरिस्थोऽस्य विष्णुर्हस्तगतो भवेत् ।नमोऽस्तु विष्णवे तुभ्यं श्रियै चास्तु नमोनमः ॥ १७॥

saptalokoparistho'sya viṣṇurhastagato bhavet |namo'stu viṣṇave tubhyaṃ śriyai cāstu namonamaḥ || 17||

नमोऽस्तु परिवारेभ्यो देवेभ्यः शिवमस्तु नः ।तृपतस्त्रिविक्रमस्सर्वोत्तमस्सप्तभिरुत्सवैः ॥ १८॥

namo'stu parivārebhyo devebhyaḥ śivamastu naḥ |tṛpatastrivikramassarvottamassaptabhirutsavaiḥ || 18||

दद्यादायुः श्रियं भक्तिं मुक्तिं च भजतां सतां ।जनास्सुकृतिनस्सन्तु मनोऽस्तु मधुसूदने ॥ १९॥

dadyādāyuḥ śriyaṃ bhaktiṃ muktiṃ ca bhajatāṃ satāṃ |janāssukṛtinassantu mano'stu madhusūdane || 19||

भक्तिर्भवेद्भवो नश्येन्नश्येयुरघराशयः ।पूर्वापूर्वक्रमज्ञप्त्यै सप्तरात्रमहर्निशम् ॥ २०॥

bhaktirbhavedbhavo naśyennaśyeyuragharāśayaḥ |pūrvāpūrvakramajñaptyai saptarātramaharniśam || 20||

इमं स्तवं यस्तु पठेद्वादिराजसमीरितं ।दिनेदिने तस्य भवेदायुः श्रेयश्च मङ्गलम् ॥ २१॥

imaṃ stavaṃ yastu paṭhedvādirājasamīritaṃ |dinedine tasya bhavedāyuḥ śreyaśca maṅgalam || 21||

आहूय देवतास्सर्वा मन्त्रेणानेन मान्त्रिकः ।आरभेतोत्सवं विष्णोर्भेरीताडनपूर्वकम् ॥ २२॥

āhūya devatāssarvā mantreṇānena māntrikaḥ |ārabhetotsavaṃ viṣṇorbherītāḍanapūrvakam || 22||

वाचयित्वा स्वस्त्ययनं स्तोत्रमेदद्दिवौकसां ।अङ्कुरारोपणत्पूर्वं पठेयुर्हरिकिङ्कराः ॥ २३॥

vācayitvā svastyayanaṃ stotramedaddivaukasāṃ |aṅkurāropaṇatpūrvaṃ paṭheyurharikiṅkarāḥ || 23||

इति श्रीमद्वादिराजपूज्यचरणविरचितंसप्तरात्रोत्सवप्रकारः सम्पूर्णः ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājapūjyacaraṇaviracitaṃsaptarātrotsavaprakāraḥ sampūrṇaḥ |bhāratīramaṇamukhyaprāṇāntargata śrīkṛṣṇārpaṇamastu |