विष्णुस्तोत्रम् शङ्करकृतं Shankarakritam Vishnustotram

श्रीशङ्कर उवाचनमस्ते परमानन्द नमो नीलाभलोचन ।नमस्ते हरये तुभ्यं त्रयीमूर्तिधराय च ॥ ४३॥

śrīśaṅkara uvācanamaste paramānanda namo nīlābhalocana |namaste haraye tubhyaṃ trayīmūrtidharāya ca || 43||

नीलजीमूतवपुषे नमस्ते लोकनायक ।देवानां वरदाताऽसि प्रसन्नार्तिहर प्रभो ॥ ४४॥

nīlajīmūtavapuṣe namaste lokanāyaka |devānāṃ varadātā'si prasannārtihara prabho || 44||

एकाम्रकनिवासाय नमस्ते पीतवाससे ।त्रिगुणैर्बाह्यरूपाय शङ्खचक्रावधारिणे ॥ ४५॥

ekāmrakanivāsāya namaste pītavāsase |triguṇairbāhyarūpāya śaṅkhacakrāvadhāriṇe || 45||

त्वमेको जगतामादिः कारणानां च कारणम् ।भक्तबन्धो जगन्नाथ करुणामयसागर ॥ ४६॥

tvameko jagatāmādiḥ kāraṇānāṃ ca kāraṇam |bhaktabandho jagannātha karuṇāmayasāgara || 46||

तव स्थानानि रम्याणि सन्ति देव सहस्रशः ।एकाम्रे गुप्तरूपं च न जानामि कथं प्रभो ॥ ४७॥

tava sthānāni ramyāṇi santi deva sahasraśaḥ |ekāmre guptarūpaṃ ca na jānāmi kathaṃ prabho || 47||

मामुवाच पुरा विष्णो त्वं ममार्द्धशरीरकः ।इदानीं तु कथं राज्यं कृतवानसि केशव ॥ ४८॥

māmuvāca purā viṣṇo tvaṃ mamārddhaśarīrakaḥ |idānīṃ tu kathaṃ rājyaṃ kṛtavānasi keśava || 48||

नारदस्तव भक्तस्तु शय्या ते भुजगेश्वरः ।केवलं तौ हि जानीतः कृपा नास्ति मयि प्रभो ॥ ४९॥

nāradastava bhaktastu śayyā te bhujageśvaraḥ |kevalaṃ tau hi jānītaḥ kṛpā nāsti mayi prabho || 49||

गोपीनां प्रेमभक्तानां दत्ता भक्तिस्त्वया प्रभो ।सनकाद्याश्च तिष्ठन्ति ईश्वरेच्छा निरङ्कुशाः ॥ ५०॥

gopīnāṃ premabhaktānāṃ dattā bhaktistvayā prabho |sanakādyāśca tiṣṭhanti īśvarecchā niraṅkuśāḥ || 50||

एकाम्रविपिने रम्ये तिष्ठन्ति परमेश्वर ।योगनिद्रां समाश्रित्य लोचनार्द्धौ च मुद्रितौ ॥ ५१॥

ekāmravipine ramye tiṣṭhanti parameśvara |yoganidrāṃ samāśritya locanārddhau ca mudritau || 51||

इदानीं करुणां कृत्वा देहि मे जगदीश्वर ।स्वस्थानं देहि मे स्थातुमागतोऽहं तवान्तिके ॥ ५२॥

idānīṃ karuṇāṃ kṛtvā dehi me jagadīśvara |svasthānaṃ dehi me sthātumāgato'haṃ tavāntike || 52||

इति कपिलपुराणे एकादशोऽध्यायान्तर्गतं शङ्करकृतंविष्णुस्तोत्रं सम्पूर्णम् ।

iti kapilapurāṇe ekādaśo'dhyāyāntargataṃ śaṅkarakṛtaṃviṣṇustotraṃ sampūrṇam |