हरिस्तोत्रम् (शम्भुकृतं लक्ष्मीनारायणीयसंहितान्तर्गतम् ॐ नमोऽक्षरवासाय परधाम्नि विराजते) Shambhukritam Hari Stotram

ॐ नमोऽक्षरवासाय परधाम्नि विराजते ।परेशाय किशोराय मुक्तेशाय नमोऽस्तु ते ॥ २॥

oṃ namo'kṣaravāsāya paradhāmni virājate |pareśāya kiśorāya mukteśāya namo'stu te || 2||

शुद्धाय मूलरूपायाऽनन्ताय ते नमो नमः ।सर्वरूपस्वरूपाय सहस्रबाहवे नमः ॥ ३॥

śuddhāya mūlarūpāyā'nantāya te namo namaḥ |sarvarūpasvarūpāya sahasrabāhave namaḥ || 3||

सहस्ररश्मियुक्ताय वेधसे शुद्धकर्मणे ।विशालदेहवासाय विश्वार्त्तिहारिणे नमः ॥ ४॥

sahasraraśmiyuktāya vedhase śuddhakarmaṇe |viśāladehavāsāya viśvārttihāriṇe namaḥ || 4||

सहस्रार्कस्वरूपाय शम्भवे तै नमो नमः ।समस्तविद्यावासाय चक्रिणे ते नमो नमः ॥ ५॥

sahasrārkasvarūpāya śambhave tai namo namaḥ |samastavidyāvāsāya cakriṇe te namo namaḥ || 5||

सदा समस्तगीर्वाणैर्नुते कृष्णाय ते नमः ।अनादिने भूपतयेऽच्युताय शेषवासिने ॥ ६॥

sadā samastagīrvāṇairnute kṛṣṇāya te namaḥ |anādine bhūpataye'cyutāya śeṣavāsine || 6||

मरुतां पतये सर्वपतये ते सदा नमः ।जलेशाय क्षितीशाय विश्वनेत्राय ते नमः ॥ ७॥

marutāṃ pataye sarvapataye te sadā namaḥ |jaleśāya kṣitīśāya viśvanetrāya te namaḥ || 7||

शशाङ्काय च सूर्याय विश्वेश्वराय ते नमः ।अप्रतर्क्यस्वरूपायाऽमृतरूपाय ते नमः ॥ ८॥

śaśāṅkāya ca sūryāya viśveśvarāya te namaḥ |apratarkyasvarūpāyā'mṛtarūpāya te namaḥ || 8||

दिगन्तरप्रकाशाय हृदम्बराय ते नमः ।नारायणाऽयनायेति विश्वतोमुखिने नमः ॥ ९॥

digantaraprakāśāya hṛdambarāya te namaḥ |nārāyaṇā'yanāyeti viśvatomukhine namaḥ || 9||

देवार्तिहारिणेऽसङ्ख्यवक्त्राय विष्णवे नमः ।पुराणाय महेशाय जगत्प्रसूयते नमः ॥ १०॥

devārtihāriṇe'saṅkhyavaktrāya viṣṇave namaḥ |purāṇāya maheśāya jagatprasūyate namaḥ || 10||

कोटिदेहिषु कैश्चित् त्वं सन्मार्गिभिरुपास्यसे ।एको भवान् प्रकृतेश्च परादक्षरतः परः ॥ ११॥

koṭidehiṣu kaiścit tvaṃ sanmārgibhirupāsyase |eko bhavān prakṛteśca parādakṣarataḥ paraḥ || 11||

विदामग्रेसरः सर्वविज्ञो विशालमूर्तिकः ।सूक्ष्मरूपो गुणा यत्र प्राकृता न वसन्ति हिम् ॥ १२॥

vidāmagresaraḥ sarvavijño viśālamūrtikaḥ |sūkṣmarūpo guṇā yatra prākṛtā na vasanti him || 12||

वाचा न विषयो यश्च भक्तवाग्विषयोऽस्ति सः ।न च कर्माऽभिभूतो यः करोति सततं सृजिम् ॥ १३॥

vācā na viṣayo yaśca bhaktavāgviṣayo'sti saḥ |na ca karmā'bhibhūto yaḥ karoti satataṃ sṛjim || 13||

अनिन्द्रियोऽपि चेन्द्राद्यैरुपास्यश्चेन्द्रियादिमान् ।असारेऽपि च संसारे साररूपोऽस्ति वै भवान् ॥ १४॥

anindriyo'pi cendrādyairupāsyaścendriyādimān |asāre'pi ca saṃsāre sārarūpo'sti vai bhavān || 14||

यजद्भिरवसीयेताऽतादृशोऽपि चतुर्भुजः ।परं रूपं न जानीमो जानीमो दृष्टिगोचरम् ॥ १५॥

yajadbhiravasīyetā'tādṛśo'pi caturbhujaḥ |paraṃ rūpaṃ na jānīmo jānīmo dṛṣṭigocaram || 15||

अवतारतनुं विद्मस्तद्द्वाराऽऽश्रयमाप्नुमः ।अब्जयोनिस्तव वर्ष्म नैव वेद न चाप्यहम् ॥ १६॥

avatāratanuṃ vidmastaddvārā''śrayamāpnumaḥ |abjayonistava varṣma naiva veda na cāpyaham || 16||

वेद्मि विशुद्धतपसा पुराणं कविमीश्वरम् ।अहं पद्मासनाद्याश्च प्रसूताश्चासकृद्विभोः ॥ १७॥

vedmi viśuddhatapasā purāṇaṃ kavimīśvaram |ahaṃ padmāsanādyāśca prasūtāścāsakṛdvibhoḥ || 17||

बालेनैव मया चान्यैः सम्बुद्।ह्ध्यसे न कीदृशः ।नत्या तुष्टिं प्रगच्छामः स्तुत्या तृप्ताश्च वैदिकाः ॥ १८॥

bālenaiva mayā cānyaiḥ sambud|hdhyase na kīdṛśaḥ |natyā tuṣṭiṃ pragacchāmaḥ stutyā tṛptāśca vaidikāḥ || 18||

जन्मान्तरविवेकोत्थत्वत्प्रसादान्मतिर्यदि ।लब्धलाभा भवेत्तेन शिवं स्याद्ब्रह्मपारगम् ॥ १९॥

janmāntaravivekotthatvatprasādānmatiryadi |labdhalābhā bhavettena śivaṃ syādbrahmapāragam || 19||

सूक्ष्मः स्थूलो भवँश्चाऽद्य मम नेत्रस्य भूरभूः ।दृष्टोऽसि कृतकृत्योऽहं सुलभो मेऽद्य भाग्यतः ॥ २०॥

sūkṣmaḥ sthūlo bhavam̐ścā'dya mama netrasya bhūrabhūḥ |dṛṣṭo'si kṛtakṛtyo'haṃ sulabho me'dya bhāgyataḥ || 20||

नतोऽस्मि दण्डवद्विष्णोऽर्पितोऽस्मि पादयोस्तव ।स्तुतिं जुषस्व भक्तस्य जनार्दन! विशेषतः ॥ २१॥

nato'smi daṇḍavadviṣṇo'rpito'smi pādayostava |stutiṃ juṣasva bhaktasya janārdana! viśeṣataḥ || 21||

सृष्टिं सृजस्व वै ब्रह्मा निदेशमकरोन्मम ।देहि तद्विज्ञतां सार्वभौमीं सृजामि सेवया ॥ २२॥

sṛṣṭiṃ sṛjasva vai brahmā nideśamakaronmama |dehi tadvijñatāṃ sārvabhaumīṃ sṛjāmi sevayā || 22||

हृदिस्थोऽसि नमस्तेऽस्तु बहिःष्ठोऽस्मि नमामि ते ।सर्वगस्य न चात्राऽस्ति व्यवस्था मत्पृथक् तव ॥ २३॥

hṛdistho'si namaste'stu bahiḥṣṭho'smi namāmi te |sarvagasya na cātrā'sti vyavasthā matpṛthak tava || 23||

इति प्रकाशं स्तवनं बुद्ध्वाऽऽन्तरं च वाचिकम् ।भीतं पुनीहि भगवन् तवास्मीति विभावय ॥ २४॥

iti prakāśaṃ stavanaṃ buddhvā''ntaraṃ ca vācikam |bhītaṃ punīhi bhagavan tavāsmīti vibhāvaya || 24||

इति श्रीलक्ष्मीनारायणीयसंहितायां प्रथमे कृतयुगसन्ताने ५५३अध्यायान्तर्गतंशम्भुकृतं हरिस्तोत्रं सम्पूर्णम् ।लक्ष्मीनारायणीयसंहिता । खण्ड १। अध्याय ५५३/२२४॥लक्ष्मीनारायणीयसंहिता । खण्ड १। अध्याय ५५३/२-२४॥

iti śrīlakṣmīnārāyaṇīyasaṃhitāyāṃ prathame kṛtayugasantāne 553adhyāyāntargataṃśambhukṛtaṃ haristotraṃ sampūrṇam |lakṣmīnārāyaṇīyasaṃhitā | khaṇḍa 1| adhyāya 553/224||lakṣmīnārāyaṇīyasaṃhitā | khaṇḍa 1| adhyāya 553/2-24||