नारायणस्तुतिः (राज्ञाअश्वशिरसाकृता वराहपुराणान्तर्गता) Rajna Ashvashirasa Krita Narayana Stutih

श्रीवराहः (राजा अश्वशिरा) उवाच ।नमामि याज्यं त्रिदशाधिपस्य भवस्य सूर्यस्य हुताशनस्य ।सोमस्य राज्ञो मरुतामनेकरूपं हरिं यज्ञनरं नमस्ये ॥ ४६॥

śrīvarāhaḥ (rājā aśvaśirā) uvāca |namāmi yājyaṃ tridaśādhipasya bhavasya sūryasya hutāśanasya |somasya rājño marutāmanekarūpaṃ hariṃ yajñanaraṃ namasye || 46||

सुभीमदंष्ट्रं शशिसूर्यनेत्रं संवत्सरे चायनयुग्मकुक्षम् ।दर्भाङ्गरोमाणमथेध्मशक्तिं सनातनं यज्ञनरं नमामि ॥ ४७॥

subhīmadaṃṣṭraṃ śaśisūryanetraṃ saṃvatsare cāyanayugmakukṣam |darbhāṅgaromāṇamathedhmaśaktiṃ sanātanaṃ yajñanaraṃ namāmi || 47||

द्यावापृथिव्योरिदमन्तरं हि व्याप्तं शरीरेण दिशश्च सर्वाः ।तमीड्यमीशं जगतां प्रसूतिं जनार्दनं तं प्रणतोऽस्मि नित्यम् ॥ ४८॥

dyāvāpṛthivyoridamantaraṃ hi vyāptaṃ śarīreṇa diśaśca sarvāḥ |tamīḍyamīśaṃ jagatāṃ prasūtiṃ janārdanaṃ taṃ praṇato'smi nityam || 48||

सुरासुराणां च जयाजयाय युगे युगे यः स्वशरीरमाद्यम् ।सृजत्यनादिः परमेश्वरो यस्तं यज्ञमूर्तिं प्रणतोऽस्मि नाथम् ॥ ४९॥

surāsurāṇāṃ ca jayājayāya yuge yuge yaḥ svaśarīramādyam |sṛjatyanādiḥ parameśvaro yastaṃ yajñamūrtiṃ praṇato'smi nātham || 49||

दधार मायामयमुग्रतेजा जयाय चक्रं त्वमलांशुशुभ्रम् ।गदासिशार्ङ्गादिचतुर्भुजोऽयं तं यज्ञमूर्तिं प्रणतोऽस्मि नित्यम् ॥ ५०॥

dadhāra māyāmayamugratejā jayāya cakraṃ tvamalāṃśuśubhram |gadāsiśārṅgādicaturbhujo'yaṃ taṃ yajñamūrtiṃ praṇato'smi nityam || 50||

क्वचित् सहस्रं शिरसां दधार क्वचिन्महापर्वततुल्यकायम् ।क्वचित्स एव त्रसरेणुतुल्यो यस्तं सदा यज्ञनरं नमामि ॥ ५१॥

kvacit sahasraṃ śirasāṃ dadhāra kvacinmahāparvatatulyakāyam |kvacitsa eva trasareṇutulyo yastaṃ sadā yajñanaraṃ namāmi || 51||

चतुर्मुखो यः सृजते समग्रं रथाङ्गपाणिः प्रतिपालनाय ।क्षयाय कालानलसन्निभो यस्तं यज्ञमूर्तिं प्रणतोऽस्मि नित्यम् ॥ ५२॥

caturmukho yaḥ sṛjate samagraṃ rathāṅgapāṇiḥ pratipālanāya |kṣayāya kālānalasannibho yastaṃ yajñamūrtiṃ praṇato'smi nityam || 52||

संसारचक्रक्रमणक्रियायै य इज्यते सर्वगतः पुराणः ।यो योगिभिर्ध्यायते चाप्रमेयस्तं यज्ञमूर्तिं प्रणतोऽस्मि नित्यम् ॥ ५३॥

saṃsāracakrakramaṇakriyāyai ya ijyate sarvagataḥ purāṇaḥ |yo yogibhirdhyāyate cāprameyastaṃ yajñamūrtiṃ praṇato'smi nityam || 53||

सम्यङ्मनस्यर्पितवानहं ते यदा सुदृश्यं स्वतनौ नु तत्त्वम् ।न चान्यदस्तीति मतिः स्थिरा मे यतस्ततो मावतु शुद्धभावम् ॥ ५४॥

samyaṅmanasyarpitavānahaṃ te yadā sudṛśyaṃ svatanau nu tattvam |na cānyadastīti matiḥ sthirā me yatastato māvatu śuddhabhāvam || 54||

इतीरितस्तस्य हुताशनार्चिः प्रख्यं तु तेजः पुरतो बभूव ।तस्मिन् स राजा प्रविवेश बुद्धिं कृत्वा लयं प्राप्तवान् यज्ञमूर्तौ ॥ ५५॥

itīritastasya hutāśanārciḥ prakhyaṃ tu tejaḥ purato babhūva |tasmin sa rājā praviveśa buddhiṃ kṛtvā layaṃ prāptavān yajñamūrtau || 55||

इति श्रीवराहपुराणे पञ्चमाध्यायान्तर्गता राज्ञा अश्वशिरसा कृतानारायणस्तुतिः समाप्ता ॥वराहपुराण । अध्याय ५/४६५५॥वराहपुराण । अध्याय ५/४६-५५॥

iti śrīvarāhapurāṇe pañcamādhyāyāntargatā rājñā aśvaśirasā kṛtānārāyaṇastutiḥ samāptā ||varāhapurāṇa | adhyāya 5/4655||varāhapurāṇa | adhyāya 5/46-55||