हरिस्तवं Haristavam

अरुणायुतदीप्रकिरीटमहः प्रकराञ्चितनीरदनीलकचम् ।कुटिलालकसञ्जितभृङ्गचयं कलये हरिमम्बुजनेत्रमहम् ॥ १॥

aruṇāyutadīprakirīṭamahaḥ prakarāñcitanīradanīlakacam |kuṭilālakasañjitabhṛṅgacayaṃ kalaye harimambujanetramaham || 1||

अमृतांशुकिशोरललाटतटस्फुरदूर्ध्वगचन्दनपुण्ड्रधरम् ।कुसुमेषुधनुभ्रुवमभ्रतनुं कलये हरिमम्बुजनेत्रमहम् ॥ २॥

amṛtāṃśukiśoralalāṭataṭasphuradūrdhvagacandanapuṇḍradharam |kusumeṣudhanubhruvamabhratanuṃ kalaye harimambujanetramaham || 2||

नतरक्षणदीक्षितपूर्णकृपामृतविक्षणपक्ष्मलनेत्रयुगम् ।मृदुलोन्नतनासममेयगुणं कलये हरिमम्बुजनेत्रमहम् ॥ ३॥

natarakṣaṇadīkṣitapūrṇakṛpāmṛtavikṣaṇapakṣmalanetrayugam |mṛdulonnatanāsamameyaguṇaṃ kalaye harimambujanetramaham || 3||

मकराकृतिकुण्डलमण्डितसन्मणिदर्पणनिर्मलगण्डतलम् ।कमलास्वदिताधरबिम्बसुधं कलये हरिमम्बुजनेत्रमहम् ॥ ४॥

makarākṛtikuṇḍalamaṇḍitasanmaṇidarpaṇanirmalagaṇḍatalam |kamalāsvaditādharabimbasudhaṃ kalaye harimambujanetramaham || 4||

मृदुलस्मितचारुमुखच्छविनिर्जितपार्विकशीतकरम् ।नवभास्करकौस्तुभशोभिगलं कलये हरिमम्बुजनेत्रमहम् ॥ ५॥

mṛdulasmitacārumukhacchavinirjitapārvikaśītakaram |navabhāskarakaustubhaśobhigalaṃ kalaye harimambujanetramaham || 5||

अरिकबुगदाम्बुरुहात्तरिपुक्षतिकण्ठतुलार्तिशमात्मतुलैः ।परमाद्भुतपाणिभिरुज्ज्वलितं कलये हरिमम्बुजनेत्रमहम् ॥ ६॥

arikabugadāmburuhāttaripukṣatikaṇṭhatulārtiśamātmatulaiḥ |paramādbhutapāṇibhirujjvalitaṃ kalaye harimambujanetramaham || 6||

सदुपायचतुष्टयसङ्कथनैरिव सुन्दरकङ्कणसङ्क्वणनैः ।स्फुरितैरपि तैस्सुभुजैर्लसितं कलये हरिमम्बुजनेत्रमहम् ॥ ७॥

sadupāyacatuṣṭayasaṅkathanairiva sundarakaṅkaṇasaṅkvaṇanaiḥ |sphuritairapi taissubhujairlasitaṃ kalaye harimambujanetramaham || 7||

भृगुपादसमर्पणसम्भणितश्रितमन्तु सहिष्णु सुबन्धुगुणे ।उरसि श्रियमात्तरसा दधतं कलये हरिमम्बुजनेत्रमहम् ॥ ८॥

bhṛgupādasamarpaṇasambhaṇitaśritamantu sahiṣṇu subandhuguṇe |urasi śriyamāttarasā dadhataṃ kalaye harimambujanetramaham || 8||

रसमज्जनसूनसुगन्धसुखप्रदकेलिकृते जलधेर्दुहितुः ।धृतहारसरिद्वनमालमजं कलये हरिमम्बुजनेत्रमहम् ॥ ९॥

rasamajjanasūnasugandhasukhapradakelikṛte jaladherduhituḥ |dhṛtahārasaridvanamālamajaṃ kalaye harimambujanetramaham || 9||

उदरान्तरुदूढजगद्गणनानिपुणाननुमेयसुरोमलतम् ।त्रिवलिस्फुरितं जठरं दधतं कलये हरिमम्बुजनेत्रमहम् ॥ १०॥

udarāntarudūḍhajagadgaṇanānipuṇānanumeyasuromalatam |trivalisphuritaṃ jaṭharaṃ dadhataṃ kalaye harimambujanetramaham || 10||

असमास्त्ररथाङ्गजयात्तकनत्कनकाम्बराशोभिनितम्बतलंमणिमेखलया दृढबद्धकटीं कलये हरिमम्बुजनेत्रमहम् ॥ ११॥

asamāstrarathāṅgajayāttakanatkanakāmbarāśobhinitambatalaṃmaṇimekhalayā dṛḍhabaddhakaṭīṃ kalaye harimambujanetramaham || 11||

कदलीतरुकाण्डकरीन्द्रकरप्रतिमानमनोज्ञतरोरुयुगम् ।विधिभूषितनाभिशुभाम्बुरुहं कलये हरिमम्बुजनेत्रमहम् ॥ १२॥

kadalītarukāṇḍakarīndrakarapratimānamanojñataroruyugam |vidhibhūṣitanābhiśubhāmburuhaṃ kalaye harimambujanetramaham || 12||

शरणागतलोकहितार्थलसन्निधिमुग्धसमुद्गकजानुयुगंशिखिवर्यगलस्तुतजङ्घमजं कलये हरिमम्बुजनेत्रमहम् ॥ १३॥

śaraṇāgatalokahitārthalasannidhimugdhasamudgakajānuyugaṃśikhivaryagalastutajaṅghamajaṃ kalaye harimambujanetramaham || 13||

प्रपदद्युतिनिन्दितकूर्मवरं मणिनूपुरशिञ्जितमञ्जुपदम् ।शशिशुभ्रनखं दुरितौघहरं कलये हारिमम्बुजनेत्रमहम् ॥ १४॥

prapadadyutininditakūrmavaraṃ maṇinūpuraśiñjitamañjupadam |śaśiśubhranakhaṃ duritaughaharaṃ kalaye hārimambujanetramaham || 14||

विधिमाधवशम्भुविभेदकृतत्रिजगद्भवपालनसंहरणम् ।सकलागमसारागतं सततं कलये हरिमम्बुजनेत्रमहम् ॥ १५॥

vidhimādhavaśambhuvibhedakṛtatrijagadbhavapālanasaṃharaṇam |sakalāgamasārāgataṃ satataṃ kalaye harimambujanetramaham || 15||

मुनिमानससारसहंसवरं भुजगाधिपत्ल्पगतं सुखदम् ।भवसागरपातुकपोतपदं कलये हरिमम्बुजनेत्रमहम् ॥ १६॥

munimānasasārasahaṃsavaraṃ bhujagādhipatlpagataṃ sukhadam |bhavasāgarapātukapotapadaṃ kalaye harimambujanetramaham || 16||

श्रितलोकहितार्थदकल्पतरुं दितिजक्षयतत्परचक्रधरम् ।विहगाधिपवाहनमाधिहरं कलये हरिमम्बुजनेत्रमहम् ॥ १७॥

śritalokahitārthadakalpataruṃ ditijakṣayatatparacakradharam |vihagādhipavāhanamādhiharaṃ kalaye harimambujanetramaham || 17||

जगदार्तिहरस्य हरेरिति यः स्तवमेतमहर्मुखमेव पठेत् ।स लभेदखिलेप्सितमत्रपरं चरमे समुपेति हि मुक्तिपदम् ॥ १८॥

jagadārtiharasya hareriti yaḥ stavametamaharmukhameva paṭhet |sa labhedakhilepsitamatraparaṃ carame samupeti hi muktipadam || 18||

इति श्रीमति कुञ्ञिलक्ष्मियम्म कृतं हरिस्तवं सम्पूर्णम् ।

iti śrīmati kuññilakṣmiyamma kṛtaṃ haristavaṃ sampūrṇam |