भगवन्नामानुसारं फलप्राप्तिः Bhagavannamanusaram Phalapraptih

एकस्यैव सतस्तस्य ब्रह्मणो द्विजसत्तम ।नाम्नां बहुत्वं लोकानामुपकारकरं शृणु ॥ १०॥

ekasyaiva satastasya brahmaṇo dvijasattama |nāmnāṃ bahutvaṃ lokānāmupakārakaraṃ śṛṇu || 10||

निमित्तशक्तयो नाम्नो भेदतस्तदुदीरणात् ।विभिन्नान्येव साध्यन्ते फलानि कुरुनन्दन ॥ ११॥

nimittaśaktayo nāmno bhedatastadudīraṇāt |vibhinnānyeva sādhyante phalāni kurunandana || 11||

यच्छक्ति नाम तत्तस्य तत्तस्मिन्नेव वस्तुनि ।साधकं पुरुषव्याघ्र सौम्यक्रूरेषु वस्तुषु ॥ १२॥

yacchakti nāma tattasya tattasminneva vastuni |sādhakaṃ puruṣavyāghra saumyakrūreṣu vastuṣu || 12||

वासुदेवाच्युतानन्तसत्याज्य?पुरुषोत्तमैः ।परमात्मेश्वराद्यैश्च स्तुतो नामभिरव्ययः ॥ १३॥

vāsudevācyutānantasatyājya?puruṣottamaiḥ |paramātmeśvarādyaiśca stuto nāmabhiravyayaḥ || 13||

निमित्तभावं भगवान्विमुक्तेर्यात्यधोक्षजः ।तथान्यकार्यसंसिद्धौ यद्यत्तत्तन्निशामय ॥ १४॥

nimittabhāvaṃ bhagavānvimukteryātyadhokṣajaḥ |tathānyakāryasaṃsiddhau yadyattattanniśāmaya || 14||

धनकृद्धर्मकृद्धर्मी धर्मात्मा विश्वकृच्छुचिःशुचिषद्विष्णुरब्जाक्षः पुष्कराक्षो ह्यधोक्षयः ।शुचिश्रवाः शिपिविष्टो यज्ञेशो यज्ञभावनः ॥ १५॥

dhanakṛddharmakṛddharmī dharmātmā viśvakṛcchuciḥśuciṣadviṣṇurabjākṣaḥ puṣkarākṣo hyadhokṣayaḥ |śuciśravāḥ śipiviṣṭo yajñeśo yajñabhāvanaḥ || 15||

नाम्नामित्येवमादीनां समुच्चारणतो नरः ।धर्मं महान्तमाप्नोति पापबन्धक्षयं तथा ॥ १६॥

nāmnāmityevamādīnāṃ samuccāraṇato naraḥ |dharmaṃ mahāntamāpnoti pāpabandhakṣayaṃ tathā || 16||

तथार्थप्राप्तये ब्रह्मन्देवनामानि मे शृणु ।येषां समुच्चारणतो वित्तमाप्नोति भक्तिमान् ॥ १७॥

tathārthaprāptaye brahmandevanāmāni me śṛṇu |yeṣāṃ samuccāraṇato vittamāpnoti bhaktimān || 17||

श्रीदः श्रीशः श्रीनिवासः श्रीधरः श्रीनिकेतनः ।श्रियः पतिः श्रीपरमः श्रीमान् श्रीवत्सलाञ्छनः ॥ १८॥

śrīdaḥ śrīśaḥ śrīnivāsaḥ śrīdharaḥ śrīniketanaḥ |śriyaḥ patiḥ śrīparamaḥ śrīmān śrīvatsalāñchanaḥ || 18||

नृसिंहो दुष्टदामनो जयो विष्णुस्त्रिविक्रमः ।स्तुतः प्रयच्छते चार्थमेवमादिभिरच्युतः ॥ १९॥

nṛsiṃho duṣṭadāmano jayo viṣṇustrivikramaḥ |stutaḥ prayacchate cārthamevamādibhiracyutaḥ || 19||

काम्यः कामप्रदः कान्तः कामपालस्तथा हरिः ।आनन्दो माधवश्चैव कामसंसिद्धये नृप ॥ २०॥

kāmyaḥ kāmapradaḥ kāntaḥ kāmapālastathā hariḥ |ānando mādhavaścaiva kāmasaṃsiddhaye nṛpa || 20||

रामः परशुरामश्च नृसिंहो विष्णुरेव च ।विक्रमश्चैवमादीनि जप्यान्यरिजिगीषुभिः ॥ २१॥

rāmaḥ paraśurāmaśca nṛsiṃho viṣṇureva ca |vikramaścaivamādīni japyānyarijigīṣubhiḥ || 21||

विद्यामभ्यसता नित्यं जप्तव्यः पुरुषोत्तमः ।दामोदरं बन्धगतो नित्यमेव जपन्नरः ॥ २२॥

vidyāmabhyasatā nityaṃ japtavyaḥ puruṣottamaḥ |dāmodaraṃ bandhagato nityameva japannaraḥ || 22||

केशवं पुण्डरीकाक्षं पुष्कराक्षं तथा जपेत् ।नेत्रबाधासु सर्वासु हृषीकेशं भयेषु च ॥ २३॥

keśavaṃ puṇḍarīkākṣaṃ puṣkarākṣaṃ tathā japet |netrabādhāsu sarvāsu hṛṣīkeśaṃ bhayeṣu ca || 23||

अच्युतं चामृतं चैव जपेदौषधकर्मणि ।भ्राजिष्णुमग्निहानौ च जपेदालम्बने स्थितम् ॥ २४॥

acyutaṃ cāmṛtaṃ caiva japedauṣadhakarmaṇi |bhrājiṣṇumagnihānau ca japedālambane sthitam || 24||

सङ्ग्रामाभिमुखं गच्छन्संस्मरेदपराजितम् ।पातालनरसिंहं च जलप्रतरणे स्मरेत् ॥ २५॥

saṅgrāmābhimukhaṃ gacchansaṃsmaredaparājitam |pātālanarasiṃhaṃ ca jalaprataraṇe smaret || 25||

चक्रिणं गदिनं चैव शार्ङ्गिणं खड्गिनं तथा ।क्षेमार्थे प्रसवन्राजन्दिक्षु प्राच्यादिषु स्मरेत् ॥ २६॥

cakriṇaṃ gadinaṃ caiva śārṅgiṇaṃ khaḍginaṃ tathā |kṣemārthe prasavanrājandikṣu prācyādiṣu smaret || 26||

अजितं चाधिकं चैव सर्वं सर्वेश्वरं तथा ।संस्मरेत्पुरुषो भक्त्या व्यवहारेषु सर्वदा ॥ २७॥

ajitaṃ cādhikaṃ caiva sarvaṃ sarveśvaraṃ tathā |saṃsmaretpuruṣo bhaktyā vyavahāreṣu sarvadā || 27||

नारायणं सर्वकालं क्षुतप्रस्खलितादिषु ।ग्रहनक्षत्रपीडासु देवबाधाटवीषु च ॥ २८॥

nārāyaṇaṃ sarvakālaṃ kṣutapraskhalitādiṣu |grahanakṣatrapīḍāsu devabādhāṭavīṣu ca || 28||

दस्युवैरिनिरोधेषु व्याघ्रसिंहादिसङ्कटेअन्धकारे च तीव्रे च नरसिंहमनुस्मरेत् ।तरत्यखिलदुर्गाणि तापार्तो जलशायिनम् ॥ २९॥

dasyuvairinirodheṣu vyāghrasiṃhādisaṅkaṭeandhakāre ca tīvre ca narasiṃhamanusmaret |taratyakhiladurgāṇi tāpārto jalaśāyinam || 29||

गरुडध्वजानुस्मरणादापद्भ्यो मुच्यते नरः ।ज्वरदुष्टशिरोरोगविषवीर्यं प्रशाम्यति ॥ ३०॥

garuḍadhvajānusmaraṇādāpadbhyo mucyate naraḥ |jvaraduṣṭaśirorogaviṣavīryaṃ praśāmyati || 30||

स्नाने देवार्चने होमे प्रणिपाते प्रदक्षिणे ।कीर्तयेद्भगवन्नाम वासुदेवेति तत्परः ॥ ३१॥

snāne devārcane home praṇipāte pradakṣiṇe |kīrtayedbhagavannāma vāsudeveti tatparaḥ || 31||

स्थगने वित्तधान्यादेरपध्याने च दुष्टजे ।कुर्वीत तन्मना भूत्वा अनन्ताच्युतकीर्तनम् ॥ ३२॥

sthagane vittadhānyāderapadhyāne ca duṣṭaje |kurvīta tanmanā bhūtvā anantācyutakīrtanam || 32||

नारायणं शार्ङ्गधरं श्रीधरं पुरुषोत्तमम् ।वामनं खड्गिनं चैव दुःस्वप्नेषु च संस्मरेत् ॥ ३३॥

nārāyaṇaṃ śārṅgadharaṃ śrīdharaṃ puruṣottamam |vāmanaṃ khaḍginaṃ caiva duḥsvapneṣu ca saṃsmaret || 33||

एकार्णवाहिपर्यङ्कशायिनं च नरः स्मरेत् ।वाय्वग्नीगृहदाहाय प्रवृद्धावुपलक्ष्य च ॥ ३४॥

ekārṇavāhiparyaṅkaśāyinaṃ ca naraḥ smaret |vāyvagnīgṛhadāhāya pravṛddhāvupalakṣya ca || 34||

विद्यार्थी मोहविभ्रान्तिवेगाघूर्णितमानसः ।मनुष्यो मुनिशार्दूल सदाश्वशिरसं स्मरेत् ॥ ३५॥

vidyārthī mohavibhrāntivegāghūrṇitamānasaḥ |manuṣyo muniśārdūla sadāśvaśirasaṃ smaret || 35||

बलभद्रं समृद्।ह्ध्यर्थी सीरकर्मणि कीर्तयेत् ।जगत्सूतिमपत्यार्थी स्तुवन्भक्त्या न सीदति ॥ ३६॥

balabhadraṃ samṛd|hdhyarthī sīrakarmaṇi kīrtayet |jagatsūtimapatyārthī stuvanbhaktyā na sīdati || 36||

जप्तव्यं सुप्रजाख्यं तु देवदेवस्य सत्तम ।दम्पत्योरात्मसम्बन्धे विवाहाख्ये पुनः पुनः ॥ ३७॥

japtavyaṃ suprajākhyaṃ tu devadevasya sattama |dampatyorātmasambandhe vivāhākhye punaḥ punaḥ || 37||

श्रीशं सर्वाभ्युदयिके कर्मणि सम्प्रकीर्तयेत् ।अरिष्टान्तेष्वशेषेषु विशोकं च सदा जपेत् ॥ ३८॥

śrīśaṃ sarvābhyudayike karmaṇi samprakīrtayet |ariṣṭānteṣvaśeṣeṣu viśokaṃ ca sadā japet || 38||

मरुत्प्रतापाग्निजलबन्धनादिषु मृत्युषु ।स्वातन्त्र्यपरतन्त्रेषु वासुदेवं जपेद्बुधः ॥ ३९॥

marutpratāpāgnijalabandhanādiṣu mṛtyuṣu |svātantryaparatantreṣu vāsudevaṃ japedbudhaḥ || 39||

सर्वार्थशक्तियुक्तस्य देवदेवस्य चक्रिणः ।यद्वाभिरोचते नाम तत्सर्वार्थेषु कीर्तयेत् ॥ ४०॥

sarvārthaśaktiyuktasya devadevasya cakriṇaḥ |yadvābhirocate nāma tatsarvārtheṣu kīrtayet || 40||

सर्वार्थसिद्धिमाप्नोति नाम्नामेकार्थता यतः ।सर्वाण्येतानि नामानि परस्य ब्रह्मणोऽनघ ॥ ४१॥

sarvārthasiddhimāpnoti nāmnāmekārthatā yataḥ |sarvāṇyetāni nāmāni parasya brahmaṇo'nagha || 41||

एवमेतानि नामानि देवदेवस्य कीर्तयेत्यं यं काममभिध्यायेत्तं तमाप्नोत्यसंशयम् ।सर्वान्कामानवाप्नोति समाराध्य जगद्गुरुम् ॥ ४२॥

evametāni nāmāni devadevasya kīrtayetyaṃ yaṃ kāmamabhidhyāyettaṃ tamāpnotyasaṃśayam |sarvānkāmānavāpnoti samārādhya jagadgurum || 42||

तन्मयत्वेन गोविन्दमित्येतद्दाल्भ्य नान्यथा ।तन्मयो वाञ्छितान्कामान्यदवाप्नोति मानवः ॥ ४३॥

tanmayatvena govindamityetaddālbhya nānyathā |tanmayo vāñchitānkāmānyadavāpnoti mānavaḥ || 43||

इति विष्णुधर्मेषु चत्वारिंशोऽध्यायान्तर्गताभगवन्नामानुसारं फलप्राप्तिः समाप्ता ।

iti viṣṇudharmeṣu catvāriṃśo'dhyāyāntargatābhagavannāmānusāraṃ phalaprāptiḥ samāptā |