तुलसीपत्रपूजामहिमा नारायणकृता Importance of worshipping using Tulasi

तुलस्युवाच ।पुनस्तुष्टाव तुष्टात्मा वचोभिरमलैः सखि ॥ १॥

tulasyuvāca |punastuṣṭāva tuṣṭātmā vacobhiramalaiḥ sakhi || 1||

ॐकाराय नमस्तेऽस्तु शङ्कराय नमो नमः ।शिवाय हरये दक्षबलिक्रतुहराय ते ॥ २॥

oṃkārāya namaste'stu śaṅkarāya namo namaḥ |śivāya haraye dakṣabalikratuharāya te || 2||

एकत्रिपुरहन्त्रे ते कैटभान्धकघातिने ।श्रीगौरीपतये कृष्ण महादेव नमोऽस्तु ते ॥ ३॥

ekatripurahantre te kaiṭabhāndhakaghātine |śrīgaurīpataye kṛṣṇa mahādeva namo'stu te || 3||

इत्यादि स्तुवतीं देवीं तुलसीं शिवसन्निधौ ।जगाद वरदो देवो देवकीनन्दनो हरिः ॥ ४॥

ityādi stuvatīṃ devīṃ tulasīṃ śivasannidhau |jagāda varado devo devakīnandano hariḥ || 4||

हरिरुवाच ।तुलसि श्रीमति श्रेष्ठे वृन्दे वृन्दावने प्रिये ।स्थिरीभव मम प्रीत्यै यावदाचन्द्रतारकम् ॥ ५॥

hariruvāca |tulasi śrīmati śreṣṭhe vṛnde vṛndāvane priye |sthirībhava mama prītyai yāvadācandratārakam || 5||

सदाभिनन्द्या वन्द्या च सुरासुरनरोरगैः ।तव पत्रमृते पूजा नाद्यारभ्य भवेन्मम ॥ ६॥

sadābhinandyā vandyā ca surāsuranaroragaiḥ |tava patramṛte pūjā nādyārabhya bhavenmama || 6||

एकतः सर्वनैवेद्यनानापुष्पविभूषणम् ।एकतः पचमेकं ते द्वादशाक्षरमन्त्रवत् ॥ ७॥

ekataḥ sarvanaivedyanānāpuṣpavibhūṣaṇam |ekataḥ pacamekaṃ te dvādaśākṣaramantravat || 7||

त्वां यः प्रदक्षिणीकृत्य प्रणमेत् दण्डवत् तरुम् ।ससप्तद्वीपा पृथिवी कृता तेन प्रदक्षिणा ॥ ८॥

tvāṃ yaḥ pradakṣiṇīkṛtya praṇamet daṇḍavat tarum |sasaptadvīpā pṛthivī kṛtā tena pradakṣiṇā || 8||

श्राद्धे च तर्पणे चैव दाने नैवेद्यदापने ।त्वत्पत्रेण विना न स्यात् तत्तत्कर्मफलोत्तरम् ।पूजिते मयि पत्रैस्ते तुष्टाः स्युः सर्वदेवताः ॥ ९॥

śrāddhe ca tarpaṇe caiva dāne naivedyadāpane |tvatpatreṇa vinā na syāt tattatkarmaphalottaram |pūjite mayi patraiste tuṣṭāḥ syuḥ sarvadevatāḥ || 9||

कार्त्तिके मासि ते पत्रमेकं यच्छति यो जनः ।स गोसहस्त्रदानस्य फलमाप्नोति मानवः ॥ १०॥

kārttike māsi te patramekaṃ yacchati yo janaḥ |sa gosahastradānasya phalamāpnoti mānavaḥ || 10||

माघे मासि च ते पत्रमालां यच्छति यो जनः ।तस्मै अहं प्रयच्छामि वाजिमेधक्रतोः फलम् ॥ ११॥

māghe māsi ca te patramālāṃ yacchati yo janaḥ |tasmai ahaṃ prayacchāmi vājimedhakratoḥ phalam || 11||

वैशाखे मासि ते पत्रैर्यो मे शय्यां प्रयच्छति ।तस्मै अहं प्रयच्छामि स्वमेव किमितोऽधिकम् ॥ १२॥

vaiśākhe māsi te patrairyo me śayyāṃ prayacchati |tasmai ahaṃ prayacchāmi svameva kimito'dhikam || 12||

वैशाखे मासि ते पत्रजलेन योऽभिषिञ्चति ।तस्मै अहं प्रयच्छामि सदामृतनिधिस्थितिम् ॥ १३॥

vaiśākhe māsi te patrajalena yo'bhiṣiñcati |tasmai ahaṃ prayacchāmi sadāmṛtanidhisthitim || 13||

आषाढे मासि यो मह्यं त्वत्पत्ररसवासितम् ।जलं ददाति तस्मै च ददाम्यपुनरुद्भवम् ॥ १४॥

āṣāḍhe māsi yo mahyaṃ tvatpatrarasavāsitam |jalaṃ dadāti tasmai ca dadāmyapunarudbhavam || 14||

त्वत्पत्रं यत्र तत्रापि पतेत् यत्र महीतले ।तदहं शिरसा ग्राह्यं करिष्यामि शिवाज्ञया ॥ १५॥

tvatpatraṃ yatra tatrāpi patet yatra mahītale |tadahaṃ śirasā grāhyaṃ kariṣyāmi śivājñayā || 15||

त्वत्पत्रजलसिक्तान्नं यो भुङ्क्ते मानवः क्वचित् ।तदेवामृतमित्युक्तं भुक्तं भाग्यवता शुभे ॥ १६॥

tvatpatrajalasiktānnaṃ yo bhuṅkte mānavaḥ kvacit |tadevāmṛtamityuktaṃ bhuktaṃ bhāgyavatā śubhe || 16||

त्वत्पत्ररसभोजी यो गङ्गाजलसमन्वितम् ।सोऽहमित्येव विज्ञेयं सत्यं सत्यं शपे शपे ॥ १७॥

tvatpatrarasabhojī yo gaṅgājalasamanvitam |so'hamityeva vijñeyaṃ satyaṃ satyaṃ śape śape || 17||

स्पृष्ट्वा यस्तुलसीपत्रं मिथ्या वदति शोभने ।न तस्य नरकादुग्रादुद्धारः कल्पकोटिषु ॥ १८॥

spṛṣṭvā yastulasīpatraṃ mithyā vadati śobhane |na tasya narakādugrāduddhāraḥ kalpakoṭiṣu || 18||

त्वत्काष्ठमालां त्वत्काष्ठघृष्टपङ्कञ्च योऽदधत् ।अहं तस्यानुगः शुद्धे भवामि सुतवत्पितुः ॥ १९॥

tvatkāṣṭhamālāṃ tvatkāṣṭhaghṛṣṭapaṅkañca yo'dadhat |ahaṃ tasyānugaḥ śuddhe bhavāmi sutavatpituḥ || 19||

इति बृहद्धर्मपुराणान्तर्गता नारायणकृता तुलसीपत्रपूजामहिमा सम्पूर्णा ॥॥ बृहद्धर्मपुराणम् । पूर्वखण्डः । अध्यायः ८। १८३२॥

iti bṛhaddharmapurāṇāntargatā nārāyaṇakṛtā tulasīpatrapūjāmahimā sampūrṇā |||| bṛhaddharmapurāṇam | pūrvakhaṇḍaḥ | adhyāyaḥ 8| 1832||