तुलसीस्तोत्रम् १ Shri Tulasi Stotram

जगद्धात्रि! नमस्तुभ्यं विष्णोश्च प्रियवल्लभे ।यतो ब्रह्मादयो देवाः सृष्टि स्थित्यन्तकारिणः ॥ १॥

jagaddhātri! namastubhyaṃ viṣṇośca priyavallabhe |yato brahmādayo devāḥ sṛṣṭi sthityantakāriṇaḥ || 1||

नमस्तुलसि कल्याणि नमो विष्णुप्रिये शुभे ।नमो मोक्षप्रदे देवि नमः सम्पत्प्रदायिके ॥ २॥

namastulasi kalyāṇi namo viṣṇupriye śubhe |namo mokṣaprade devi namaḥ sampatpradāyike || 2||

तुलसी पातु मां नित्यं सर्वापद्भ्योऽपि सर्वदा ।कीर्तितापि स्मृता वापि पवित्रयति मानवम् ॥ ३॥

tulasī pātu māṃ nityaṃ sarvāpadbhyo'pi sarvadā |kīrtitāpi smṛtā vāpi pavitrayati mānavam || 3||

नमामि शिरसा देवीं तुलसीं विलसत्तनुम् ।यां दृष्ट्वा पापिनो मर्त्या मुच्यन्ते सर्वकिल्बिषात् ॥ ४॥

namāmi śirasā devīṃ tulasīṃ vilasattanum |yāṃ dṛṣṭvā pāpino martyā mucyante sarvakilbiṣāt || 4||

तुलस्या रक्षितं सर्वं जगदेतच्चराचरम् ।या विनिहन्ति पापानि दृष्ट्वा वा पापिभिर्नरैः ॥ ५॥

tulasyā rakṣitaṃ sarvaṃ jagadetaccarācaram |yā vinihanti pāpāni dṛṣṭvā vā pāpibhirnaraiḥ || 5||

नमस्तुलस्यतितरां यस्यै बद्धाञ्जलिं कलौ ।कलयन्ति सुखं सर्वं स्त्रियो वैश्यास्तथाऽपरे ॥ ६॥

namastulasyatitarāṃ yasyai baddhāñjaliṃ kalau |kalayanti sukhaṃ sarvaṃ striyo vaiśyāstathā'pare || 6||

तुलस्या नापरं किञ्चिद्दैवतं जगतीतले ।यथा पवित्रितो लोको विष्णुसङ्गेन वैष्णवः ॥ ७॥

tulasyā nāparaṃ kiñciddaivataṃ jagatītale |yathā pavitrito loko viṣṇusaṅgena vaiṣṇavaḥ || 7||

तुलस्याः पल्लवं विष्णोः शिरस्यारोपितं कलौ ।आरोपयति सर्वाणि श्रेयांसि वरमस्तके ॥ ८॥

tulasyāḥ pallavaṃ viṣṇoḥ śirasyāropitaṃ kalau |āropayati sarvāṇi śreyāṃsi varamastake || 8||

तुलस्यां सकला देवा वसन्ति सततं यतः ।अतस्तामर्चयेल्लोके सर्वान् देवान् समर्चयन् ॥ ९॥

tulasyāṃ sakalā devā vasanti satataṃ yataḥ |atastāmarcayelloke sarvān devān samarcayan || 9||

नमस्तुलसि सर्वज्ञे पुरुषोत्तमवल्लभे ।पाहि मां सर्व पापेभ्यः सर्वसम्पत्प्रदायिके ॥ १०॥

namastulasi sarvajñe puruṣottamavallabhe |pāhi māṃ sarva pāpebhyaḥ sarvasampatpradāyike || 10||

इति स्तोत्रं पुरा गीतं पुण्डरीकेण धीमता ।विष्णुमर्चयता नित्यं शोभनैस्तुलसीदलैः ॥ ११॥

iti stotraṃ purā gītaṃ puṇḍarīkeṇa dhīmatā |viṣṇumarcayatā nityaṃ śobhanaistulasīdalaiḥ || 11||

तुलसी श्रीर्महालक्ष्मीर्विद्याविद्या यशस्विनी ।धर्म्या धर्मानना देवी देवीदेवमनःप्रिया ॥ १२॥

tulasī śrīrmahālakṣmīrvidyāvidyā yaśasvinī |dharmyā dharmānanā devī devīdevamanaḥpriyā || 12||

लक्ष्मीप्रियसखी देवी द्यौर्भूमिरचला चला ।षोडशैतानि नामानि तुलस्याः कीर्तयन्नरः ॥ १३॥

lakṣmīpriyasakhī devī dyaurbhūmiracalā calā |ṣoḍaśaitāni nāmāni tulasyāḥ kīrtayannaraḥ || 13||

लभते सुतरां भक्तिमन्ते विष्णुपदं लभेत् ।तुलसी भूर्महालक्ष्मीः पद्मिनी श्रीर्हरिप्रिया ॥ १४॥

labhate sutarāṃ bhaktimante viṣṇupadaṃ labhet |tulasī bhūrmahālakṣmīḥ padminī śrīrharipriyā || 14||

तुलसि श्रीसखि शुभे पापहारिणि पुण्यदे ।नमस्ते नारदनुते नारायणमनःप्रिये ॥ १५॥

tulasi śrīsakhi śubhe pāpahāriṇi puṇyade |namaste nāradanute nārāyaṇamanaḥpriye || 15||

इति श्रीपुण्डरीककृतं तुलसीस्तोत्रं सम्पूर्णम् ॥

iti śrīpuṇḍarīkakṛtaṃ tulasīstotraṃ sampūrṇam ||