स्कन्दषट्कम् Shriskandashatkam

ॐ श्रीगणेशाय नमः ।षण्मुखं पार्वतीपुत्रं क्रौञ्चशैलविमर्दनम् ।देवसेनापतिं देवं स्कन्दं वन्दे शिवात्मजम् ॥ १॥

oṃ śrīgaṇeśāya namaḥ |ṣaṇmukhaṃ pārvatīputraṃ krauñcaśailavimardanam |devasenāpatiṃ devaṃ skandaṃ vande śivātmajam || 1||

तारकासुरहन्तारं मयूरासनसंस्थितम् ।शक्तिपाणिं च देवेशं स्कन्दं वन्दे शिवात्मजम् ॥ २॥

tārakāsurahantāraṃ mayūrāsanasaṃsthitam |śaktipāṇiṃ ca deveśaṃ skandaṃ vande śivātmajam || 2||

विश्वेश्वरप्रियं देवं विश्वेश्वरतनूद्भवम् ।कामुकं कामदं कान्तं स्कन्दं वन्दे शिवात्मजम् ॥ ३॥

viśveśvarapriyaṃ devaṃ viśveśvaratanūdbhavam |kāmukaṃ kāmadaṃ kāntaṃ skandaṃ vande śivātmajam || 3||

कुमारं मुनिशार्दूलमानसानन्दगोचरम् ।वल्लीकान्तं जगद्योनिं स्कन्दं वन्दे शिवात्मजम् ॥ ४॥

kumāraṃ muniśārdūlamānasānandagocaram |vallīkāntaṃ jagadyoniṃ skandaṃ vande śivātmajam || 4||

प्रलयस्थितिकर्तारं आदिकर्तारमीश्वरम् ।भक्तप्रियं मदोन्मत्तं स्कन्दं वन्दे शिवात्मजम् ॥ ५॥

pralayasthitikartāraṃ ādikartāramīśvaram |bhaktapriyaṃ madonmattaṃ skandaṃ vande śivātmajam || 5||

विशाखं सर्वभूतानां स्वामिनं कृत्तिकासुतम् ।सदाबलं जटाधारं स्कन्दं वन्दे शिवात्मजम् ॥ ६॥

viśākhaṃ sarvabhūtānāṃ svāminaṃ kṛttikāsutam |sadābalaṃ jaṭādhāraṃ skandaṃ vande śivātmajam || 6||

स्कन्दषट्कं स्तोत्रमिदं यः पठेत् शृणुयान्नरः ।वाञ्छितान् लभते सद्यश्चान्ते स्कन्दपुरं व्रजेत् ॥ ७॥

skandaṣaṭkaṃ stotramidaṃ yaḥ paṭhet śṛṇuyānnaraḥ |vāñchitān labhate sadyaścānte skandapuraṃ vrajet || 7||

इति श्रीस्कन्दषट्कं सम्पूर्णम् ॥

iti śrīskandaṣaṭkaṃ sampūrṇam ||