कार्तिकेयस्तोत्रम् २ Shri Kartikeya Stotram 2

ॐ श्रीगणेशाय नमः ।भास्वद्वज्रप्रकाशो दशशतनयनेनार्चितो वज्रपाणिःभास्वन्मुक्तासुवर्णाङ्गदमुकुटधरो दिव्यगन्धोज्ज्वलाङ्गः ।पावञ्जेशो गुणाढ्यो हिमगिरितनयानन्दनो वह्निजातःपातु श्रीकार्तिकेयो नतजनवरदो भक्तिगम्यो दयालुः ॥ १॥

oṃ śrīgaṇeśāya namaḥ |bhāsvadvajraprakāśo daśaśatanayanenārcito vajrapāṇiḥbhāsvanmuktāsuvarṇāṅgadamukuṭadharo divyagandhojjvalāṅgaḥ |pāvañjeśo guṇāḍhyo himagiritanayānandano vahnijātaḥpātu śrīkārtikeyo natajanavarado bhaktigamyo dayāluḥ || 1||

सेनानीर्देवसेनापतिरमरवरैः सन्ततं पूजिताङ्घ्रिःसेव्यो ब्रह्मर्षिमुख्यैर्विगतकलिमलैर्ज्ञानिभिर्मोक्षकामैः ।संसाराब्धौ निमग्नैर्गृहसुखरतिभिः पूजितो भक्तवृन्दैःसम्यक् श्रीशम्भुसूनुः कलयतु कुशलं श्रीमयूराधिरूढः ॥ २॥

senānīrdevasenāpatiramaravaraiḥ santataṃ pūjitāṅghriḥsevyo brahmarṣimukhyairvigatakalimalairjñānibhirmokṣakāmaiḥ |saṃsārābdhau nimagnairgṛhasukharatibhiḥ pūjito bhaktavṛndaiḥsamyak śrīśambhusūnuḥ kalayatu kuśalaṃ śrīmayūrādhirūḍhaḥ || 2||

लोकांस्त्रीन् पीडयन्तं दितिदनुजपतिं तारकं देवशत्रुंलोकेशात्प्राप्तसिद्धिं शितकनकशरैर्लीलया नाशयित्वा ।ब्रह्मेन्द्राद्यादितेयैर्मणिगणखचिते हेमसिंहासने योब्रह्मण्यः पातु नित्यं परिमलविलसत्पुष्पवृष्ट्याऽभिषिक्तः ॥ ३॥

lokāṃstrīn pīḍayantaṃ ditidanujapatiṃ tārakaṃ devaśatruṃlokeśātprāptasiddhiṃ śitakanakaśarairlīlayā nāśayitvā |brahmendrādyāditeyairmaṇigaṇakhacite hemasiṃhāsane yobrahmaṇyaḥ pātu nityaṃ parimalavilasatpuṣpavṛṣṭyā'bhiṣiktaḥ || 3||

युद्धे देवासुराणामनिमिषपतिना स्थापितो यूथपत्वेयुक्तः कोदण्डबाणासिकुलिशपरिघैः सेनया देवतानाम् ।हत्वा दैत्यान्प्रमत्तान् जयनिनदयुतैर्मङ्गलैर्वाद्यघोषैःहस्तिश्रेष्ठाधिरूढो विबुधयुवतिभिर्वीजितः पातु युक्तः ॥ ४॥

yuddhe devāsurāṇāmanimiṣapatinā sthāpito yūthapatveyuktaḥ kodaṇḍabāṇāsikuliśaparighaiḥ senayā devatānām |hatvā daityānpramattān jayaninadayutairmaṅgalairvādyaghoṣaiḥhastiśreṣṭhādhirūḍho vibudhayuvatibhirvījitaḥ pātu yuktaḥ || 4||

श्रीगौरीकान्तपुत्रं सुरपतनयया विष्णुपुत्र्या च युक्तंश्रीस्कन्दं ताम्रचूडाभयकुलिशधरं शक्तिहस्तं कुमारम् ।षड्ग्रीवं मञ्जुवेषं त्रिदिववरसुमस्रग्धरं देवदेवंषड्वक्त्रं द्वादशाक्षं गणपतिसहजं तारकारिं नमामि ॥ ५॥

śrīgaurīkāntaputraṃ surapatanayayā viṣṇuputryā ca yuktaṃśrīskandaṃ tāmracūḍābhayakuliśadharaṃ śaktihastaṃ kumāram |ṣaḍgrīvaṃ mañjuveṣaṃ tridivavarasumasragdharaṃ devadevaṃṣaḍvaktraṃ dvādaśākṣaṃ gaṇapatisahajaṃ tārakāriṃ namāmi || 5||

कैलासोत्तुङ्गशृङ्गे प्रमथसुरगणैः पूजितं वारिवाहंकैलासाद्रीशपुत्रं मुनिजनहृदयानन्दनं वारिजाक्षम् ।गन्धाड्यां पारिजातप्रभृतिसुमकृतां मालिकां धारयन्तंगङ्गापत्यं भजेऽहं गुहममरनुतं तप्तजाम्बूनदाभम् ॥ ६॥

kailāsottuṅgaśṛṅge pramathasuragaṇaiḥ pūjitaṃ vārivāhaṃkailāsādrīśaputraṃ munijanahṛdayānandanaṃ vārijākṣam |gandhāḍyāṃ pārijātaprabhṛtisumakṛtāṃ mālikāṃ dhārayantaṃgaṅgāpatyaṃ bhaje'haṃ guhamamaranutaṃ taptajāmbūnadābham || 6||

भक्तेष्टार्थप्रदाने निरतमभयदं ज्ञानशक्तिं सुरेशंभक्त्या नित्यं सुरर्षिप्रमुखमुनिगणैरर्चितं रक्तवर्णम् ।वन्द्यं गन्धर्वमुख्यैर्भवजलधितरिं पीतकौशेयवस्त्रंवन्दे श्रीबाहुलेयं मदनरिपुसुतं कोटिचन्द्रप्रकाशम् ॥ ७॥

bhakteṣṭārthapradāne niratamabhayadaṃ jñānaśaktiṃ sureśaṃbhaktyā nityaṃ surarṣipramukhamunigaṇairarcitaṃ raktavarṇam |vandyaṃ gandharvamukhyairbhavajaladhitariṃ pītakauśeyavastraṃvande śrībāhuleyaṃ madanaripusutaṃ koṭicandraprakāśam || 7||

तप्तस्वर्णाभकायं मधुरिपुतनयाकान्तमम्भोजनेत्रंतत्त्वज्ञं चन्द्रमौलिप्रियसुतमिभवक्त्रानुजं शक्तिपाणिम् ।गाङ्गेयं कार्तिकेयं स्मरसदृशवपुं रत्नहारोज्ज्वलाङ्गंगानप्रेमं शुभाङ्गं स्मितरुचिरमुखं चारुभूषं नमामि ॥ ८॥

taptasvarṇābhakāyaṃ madhuriputanayākāntamambhojanetraṃtattvajñaṃ candramaulipriyasutamibhavaktrānujaṃ śaktipāṇim |gāṅgeyaṃ kārtikeyaṃ smarasadṛśavapuṃ ratnahārojjvalāṅgaṃgānapremaṃ śubhāṅgaṃ smitaruciramukhaṃ cārubhūṣaṃ namāmi || 8||

ध्यायेद्बालार्ककान्तिं शरवणजनितं पार्वतीप्रीतिपुत्रंध्यानप्रेमं कृपालुं वरदमघहरं पुण्यरूपं पवित्रम् ।नित्यानन्दं वरेण्यं रजतगिरिवरोत्तुङ्गशृङ्गाधिवासंनित्यं देवर्षिवन्द्यं भवहरममलं वेदवेद्यं पुराणम् ॥ ९॥

dhyāyedbālārkakāntiṃ śaravaṇajanitaṃ pārvatīprītiputraṃdhyānapremaṃ kṛpāluṃ varadamaghaharaṃ puṇyarūpaṃ pavitram |nityānandaṃ vareṇyaṃ rajatagirivarottuṅgaśṛṅgādhivāsaṃnityaṃ devarṣivandyaṃ bhavaharamamalaṃ vedavedyaṃ purāṇam || 9||

इति श्रीकार्तिकेयस्तोत्रं सम्पूर्णम् ॥

iti śrīkārtikeyastotraṃ sampūrṇam ||