दण्डपाणिपञ्चरत्नम् Shri Dandapanipancharatnam

चण्डपापहरपादसेवनं गण्डशोभिवरकुण्डलद्वयम् ।दण्डिताखिलसुरारिमण्डलं दण्डपाणिमनिशं विभावये ॥ १॥

caṇḍapāpaharapādasevanaṃ gaṇḍaśobhivarakuṇḍaladvayam |daṇḍitākhilasurārimaṇḍalaṃ daṇḍapāṇimaniśaṃ vibhāvaye || 1||

कालकालतनुजं कृपालयं बालचन्द्रविलसज्जटाधरम् ।चेलधूतशिशुवासरेश्वरं दण्डपाणिमनिशं विभावये ॥ २॥

kālakālatanujaṃ kṛpālayaṃ bālacandravilasajjaṭādharam |celadhūtaśiśuvāsareśvaraṃ daṇḍapāṇimaniśaṃ vibhāvaye || 2||

तारकेशसदृशाननोज्ज्वलं तारकारिमखिलार्थदं जवात् ।तारकं निरवधेर्भवाम्बुधेर्दण्डपाणिमनिशं विभावये ॥ ३॥

tārakeśasadṛśānanojjvalaṃ tārakārimakhilārthadaṃ javāt |tārakaṃ niravadherbhavāmbudherdaṇḍapāṇimaniśaṃ vibhāvaye || 3||

तापहारिनिजपादसंस्तुतिं कोपकाममुखवैरिवारकम् ।प्रापकं निजपदस्य सत्वरं दण्डपाणिमनिशं विभावये ॥ ४॥

tāpahārinijapādasaṃstutiṃ kopakāmamukhavairivārakam |prāpakaṃ nijapadasya satvaraṃ daṇḍapāṇimaniśaṃ vibhāvaye || 4||

कामनीयकविनिर्जिताङ्गजं रामलक्ष्मणकराम्बुजार्चितम् ।कोमलाङ्गमतिसुन्दराकृतिं दण्डपाणिमनिशं विभावये ॥ ५॥

kāmanīyakavinirjitāṅgajaṃ rāmalakṣmaṇakarāmbujārcitam |komalāṅgamatisundarākṛtiṃ daṇḍapāṇimaniśaṃ vibhāvaye || 5||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितं श्रीदण्डपाणिपञ्चरत्नं सम्पूर्णम् ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaṃ śrīdaṇḍapāṇipañcaratnaṃ sampūrṇam |