वीरेश्वरस्तुतिः ३ वाराणसीनाथार्चनं Vireshvara Stuti – 3

॥ वीरेश्वरस्तुतिः ३ वाराणसीनाथार्चनम् ॥सद्भस्मनाङ्गानि विलेपयामो रुद्राक्षरत्तैश्च विभूषयामः ।पञ्चाक्षरं पापहरं जपामो वाराणसीनाथ किमाचरामः ॥ १॥

|| vīreśvarastutiḥ 3 vārāṇasīnāthārcanam ||sadbhasmanāṅgāni vilepayāmo rudrākṣarattaiśca vibhūṣayāmaḥ |pañcākṣaraṃ pāpaharaṃ japāmo vārāṇasīnātha kimācarāmaḥ || 1||

धर्माणि सर्वाणि विवेचयामः कर्माण्यपाराणि विनाशयामः ।श्रीभावलिङ्गं हृदि भावयामो वाराणसीनाथ किमाचरामः ॥ २॥

dharmāṇi sarvāṇi vivecayāmaḥ karmāṇyapārāṇi vināśayāmaḥ |śrībhāvaliṅgaṃ hṛdi bhāvayāmo vārāṇasīnātha kimācarāmaḥ || 2||

कुन्दैरमन्दैः शिवमर्चयामो वृन्दारवृन्दाश्रयमाश्रयामः ।गौरीसमेतं सततं भजामो वाराणसीनाथ किमाचरामः ॥ ३॥

kundairamandaiḥ śivamarcayāmo vṛndāravṛndāśrayamāśrayāmaḥ |gaurīsametaṃ satataṃ bhajāmo vārāṇasīnātha kimācarāmaḥ || 3||

अहर्निशं सादरमिन्दिरादिवृन्दारनारीकवरीनिरुद्धम् ।गौरीपदाम्भोजयुगं स्मरामो वाराणसीनाथ किमाचरामः ॥ ४॥

aharniśaṃ sādaramindirādivṛndāranārīkavarīniruddham |gaurīpadāmbhojayugaṃ smarāmo vārāṇasīnātha kimācarāmaḥ || 4||

परात्परं यन्महतो महान्तं यदेकमव्यक्तमनन्तरूपम् ।तद्वपमेतद्धृदि चिन्तयामो वाराणसीनाथ किमाचरामः ॥ ५॥

parātparaṃ yanmahato mahāntaṃ yadekamavyaktamanantarūpam |tadvapametaddhṛdi cintayāmo vārāṇasīnātha kimācarāmaḥ || 5||

काशीपुरीवीथिषु सञ्चरामो भवादिनामानि सदा वदामः ।श्रीभावमूर्तिं बहुधा नमामो वाराणसीनाथ किमाचरामः ॥ ६॥

kāśīpurīvīthiṣu sañcarāmo bhavādināmāni sadā vadāmaḥ |śrībhāvamūrtiṃ bahudhā namāmo vārāṇasīnātha kimācarāmaḥ || 6||

आराध्यमेकं शिवरूपमेव विश्वं पुराणं तमसः परस्तात् ।अनन्तकोट्यर्कसमं भजामो वाराणसीनाथ किमाचरामः ॥ ७॥

ārādhyamekaṃ śivarūpameva viśvaṃ purāṇaṃ tamasaḥ parastāt |anantakoṭyarkasamaṃ bhajāmo vārāṇasīnātha kimācarāmaḥ || 7||

आनन्दकल्लोलकुलातिलोललीलाविलासालयशैलवालाम् ।त्वां कालकालं च विलोकयामो वाराणसीनाथ किमाचरामः ॥ ८॥

ānandakallolakulātilolalīlāvilāsālayaśailavālām |tvāṃ kālakālaṃ ca vilokayāmo vārāṇasīnātha kimācarāmaḥ || 8||

गङ्गाम्भसा कुम्भसमन्वितेन वातेन शीतेन सुशीतलेन ।वीरेश्वरं त्वामभिषिञ्चयामो वाराणसीनाथ किमाचरामः ॥ ९॥

gaṅgāmbhasā kumbhasamanvitena vātena śītena suśītalena |vīreśvaraṃ tvāmabhiṣiñcayāmo vārāṇasīnātha kimācarāmaḥ || 9||

जलामलैः कोमलबिल्वपल्लवैः श्रौतेन शुद्धोज्वलभस्मना च ।वीरेश लिङ्गानि समर्चयामो वाराणसीनाथ किमाचरामः ॥ १०॥

jalāmalaiḥ komalabilvapallavaiḥ śrautena śuddhojvalabhasmanā ca |vīreśa liṅgāni samarcayāmo vārāṇasīnātha kimācarāmaḥ || 10||

॥ इति शिवरहस्यान्तर्गते वीरेश्वरस्तुतिः ३ वाराणसीनाथार्चनं सम्पूर्णम् ॥बृहस्पतिशतानन्दसंवादे वीरेश्वरस्तुतिवर्णनं॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ४७। ८०८९ ॥

|| iti śivarahasyāntargate vīreśvarastutiḥ 3 vārāṇasīnāthārcanaṃ sampūrṇam ||bṛhaspatiśatānandasaṃvāde vīreśvarastutivarṇanaṃ|| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 47| 8089 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः ४७। ८०-८९ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 47| 80-89 ||