शिवार्चनोपदेशम् स्कन्दप्रोक्तं Skandaproktam Shivarchanopadesham

(शिवरहस्यान्तर्गते महादेवाख्ये)शिवमिष्ट्वा नरः सोऽपि प्रयाति परमां गतिम् ।शिवं सर्वत्र सम्पूज्य सविशेषं सविस्तरम् ॥ ३८॥

(śivarahasyāntargate mahādevākhye)śivamiṣṭvā naraḥ so'pi prayāti paramāṃ gatim |śivaṃ sarvatra sampūjya saviśeṣaṃ savistaram || 38||

अश्वमेधायुतं पुण्यं लभते नात्र संशयः ।सरित्समुद्रतीरेषु पर्वतेषु वनेषु च ॥ ३९॥

aśvamedhāyutaṃ puṇyaṃ labhate nātra saṃśayaḥ |saritsamudratīreṣu parvateṣu vaneṣu ca || 39||

गिरिकन्दरदुर्गेषु गह्वरेषु वनेषु च ।पुष्करिण्यां तथाऽन्यत्र तीर्थायतनसंश्रये ॥ ४०॥

girikandaradurgeṣu gahvareṣu vaneṣu ca |puṣkariṇyāṃ tathā'nyatra tīrthāyatanasaṃśraye || 40||

यत्र वा रमते बुद्धिस्तत्रैव शिवमर्चयेत् ।सर्वयज्ञेषु यत्पुण्यं लभते नात्र संशयः ॥ ४१॥

yatra vā ramate buddhistatraiva śivamarcayet |sarvayajñeṣu yatpuṇyaṃ labhate nātra saṃśayaḥ || 41||

यः समर्चयते भक्त्या तस्य पुण्यं ततोऽधिकम् ।अतो विनापि मन्त्रेण पुण्यराशिः प्रकीर्तितः ॥ ४२॥

yaḥ samarcayate bhaktyā tasya puṇyaṃ tato'dhikam |ato vināpi mantreṇa puṇyarāśiḥ prakīrtitaḥ || 42||

स्यादयं मन्त्रसंयुक्तः पुण्यं शतगुणाधिकम् ।तस्मान्मन्त्रेण शर्वाय स्नानगन्धफलादिकम् ॥ ४३॥

syādayaṃ mantrasaṃyuktaḥ puṇyaṃ śataguṇādhikam |tasmānmantreṇa śarvāya snānagandhaphalādikam || 43||

भूम्यश्वरथवस्त्रं च हेमाद्यादि निवेदयेत् ।जप्यो नमः शिवायेति मन्त्रः सर्वार्थसाधकः ॥ ४४॥

bhūmyaśvarathavastraṃ ca hemādyādi nivedayet |japyo namaḥ śivāyeti mantraḥ sarvārthasādhakaḥ || 44||

सर्वमन्त्राधिकश्चायमोङ्काराद्यः षडक्षरः ।शिवो नान्तर्बहिर्यस्माद् व्याप्तं सर्वं चराचरम् ॥ ४५॥

sarvamantrādhikaścāyamoṅkārādyaḥ ṣaḍakṣaraḥ |śivo nāntarbahiryasmād vyāptaṃ sarvaṃ carācaram || 45||

जगदमिति यद्ब्रूते तस्मादोमिति स स्मृतः ।अयमर्थो हि तिसृभिर्मातृभिः परिगीयते ॥ ४६॥

jagadamiti yadbrūte tasmādomiti sa smṛtaḥ |ayamartho hi tisṛbhirmātṛbhiḥ parigīyate || 46||

ब्रह्मा हरिश्च रुद्रश्च मातृभिस्तत्प्रकीर्तिताः ।दक्षिणाङ्गे भवेद्ब्रह्मा हरिर्वामाङ्गसम्भवः ॥ ४७॥

brahmā hariśca rudraśca mātṛbhistatprakīrtitāḥ |dakṣiṇāṅge bhavedbrahmā harirvāmāṅgasambhavaḥ || 47||

हृदयान्निर्गतो रुद्रो ब्रह्मविष्णुप्रबोधकः ।जगत्सृष्टिकरो ब्रह्मा विष्णुर्लोकविमोहनः ॥ ४८॥

hṛdayānnirgato rudro brahmaviṣṇuprabodhakaḥ |jagatsṛṣṭikaro brahmā viṣṇurlokavimohanaḥ || 48||

अनुग्रहपरो नित्यं नीलरुद्रः शिवात्मकः ।त्रिभिरेतैर्जगद्व्याप्तं कारणैरात्ममूर्तिभिः ॥ ४९॥

anugrahaparo nityaṃ nīlarudraḥ śivātmakaḥ |tribhiretairjagadvyāptaṃ kāraṇairātmamūrtibhiḥ || 49||

शिवस्य मातरश्चैताः सर्वलोकप्रपूजिताः ।एता एव त्रयो वेदास्त्रयो लोकास्त्रयो गुणाः ॥ ५०॥

śivasya mātaraścaitāḥ sarvalokaprapūjitāḥ |etā eva trayo vedāstrayo lokāstrayo guṇāḥ || 50||

त्रयोऽग्नयः त्रिवर्गश्च यच्चान्यज्जगति स्थितम् ।अर्धमात्रापरो रुद्रः शिवः परमकाराणः ॥ ५१॥

trayo'gnayaḥ trivargaśca yaccānyajjagati sthitam |ardhamātrāparo rudraḥ śivaḥ paramakārāṇaḥ || 51||

तस्मादेतत्समुत्पन्नं जगतः कारणत्रयम् ।सर्वयज्ञपरः शुद्धो नमस्कारो महामखः ॥ ५२॥

tasmādetatsamutpannaṃ jagataḥ kāraṇatrayam |sarvayajñaparaḥ śuddho namaskāro mahāmakhaḥ || 52||

नमस्कारात्मयज्ञेन तस्मात्सम्पूजयेच्छिवम् ।अज्ञानमशिवं त्वस्य सर्वदुःखालयं यतः ॥ ५३॥

namaskārātmayajñena tasmātsampūjayecchivam |ajñānamaśivaṃ tvasya sarvaduḥkhālayaṃ yataḥ || 53||

स्वभावात्तदपायो हि तस्माद्रुदः परः शिवः ।नमः शिवाय शान्ताय कारणत्रयहेतवे ॥ ५४॥

svabhāvāttadapāyo hi tasmādrudaḥ paraḥ śivaḥ |namaḥ śivāya śāntāya kāraṇatrayahetave || 54||

निवेदयामि चात्मानं मुक्त्यै च परमेश्वरम् ।उक्त्वा नमः शिवायेति मुच्यते सर्वबन्धनात् ॥ ५५॥

nivedayāmi cātmānaṃ muktyai ca parameśvaram |uktvā namaḥ śivāyeti mucyate sarvabandhanāt || 55||

यस्मात्तस्मात्सदा मन्त्रमोङ्काराद्यं मनुं स्मरेत् ।सर्वदा सर्वकार्येषु क्षुतनिष्ठो वनादिषु ॥ ५६॥

yasmāttasmātsadā mantramoṅkārādyaṃ manuṃ smaret |sarvadā sarvakāryeṣu kṣutaniṣṭho vanādiṣu || 56||

धन्यो नमः शिवायेति गिरमुक्त्वा शिवं पदम् ।यः सर्ववित्प्रबुद्धात्मा प्राणान्ते तु सकृत्स्मरेत् ॥ ५७॥

dhanyo namaḥ śivāyeti giramuktvā śivaṃ padam |yaḥ sarvavitprabuddhātmā prāṇānte tu sakṛtsmaret || 57||

भक्त्यों नमः शिवायेति स गच्छेत्परमां गतिं ।पाठ्येनापि नमस्कारः प्रयुक्तः शूलपाणये ॥ ५८॥

bhaktyoṃ namaḥ śivāyeti sa gacchetparamāṃ gatiṃ |pāṭhyenāpi namaskāraḥ prayuktaḥ śūlapāṇaye || 58||

संसारस्थर्णबन्धानामुच्छेदनकरो भवेत् ।अपवित्रः पवित्रो वा सर्वावस्थां गतोऽपि वा ॥ ५९॥

saṃsārastharṇabandhānāmucchedanakaro bhavet |apavitraḥ pavitro vā sarvāvasthāṃ gato'pi vā || 59||

यः स्मरेत्संयतो नित्यं स बाह्याभ्यन्तरः शुचिः ।स्मरणादेव रुद्रस्य पापसङ्घातजं परम् ॥ ६०॥

yaḥ smaretsaṃyato nityaṃ sa bāhyābhyantaraḥ śuciḥ |smaraṇādeva rudrasya pāpasaṅghātajaṃ param || 60||

शतधा भेदमायाति गिरिर्वज्रहतो यथा ।सर्वेषां शिवभक्तानामशेषार्थप्रसिद्धये ॥ ६१॥

śatadhā bhedamāyāti girirvajrahato yathā |sarveṣāṃ śivabhaktānāmaśeṣārthaprasiddhaye || 61||

मन्त्रमाह शिवः साक्षादशेषार्थनिबन्धनम् ।सद्बीजं सर्वविद्यानामाद्यं ब्रह्म परात्परम् ॥ ६२॥

mantramāha śivaḥ sākṣādaśeṣārthanibandhanam |sadbījaṃ sarvavidyānāmādyaṃ brahma parātparam || 62||

सर्वसाधनको मन्त्रः शिवसूत्रं षडक्षरः ।तस्मादनेन मन्त्रेण प्रकुर्वीत शिवार्चनम् ॥ ६३॥

sarvasādhanako mantraḥ śivasūtraṃ ṣaḍakṣaraḥ |tasmādanena mantreṇa prakurvīta śivārcanam || 63||

तत्र देशे न दुर्भिक्षं न च मारी प्रवर्तते ।नाकाले म्रियते कश्चित् पूज्यते यत्र शङ्करः ॥ ६४॥

tatra deśe na durbhikṣaṃ na ca mārī pravartate |nākāle mriyate kaścit pūjyate yatra śaṅkaraḥ || 64||

दीक्षितः सूत्रमन्त्रज्ञो योऽर्चयेत्तु सदाशिवम् ।स च यत्फलमाप्नोति तदेकाग्रमनाः शृणु ॥ ६५॥

dīkṣitaḥ sūtramantrajño yo'rcayettu sadāśivam |sa ca yatphalamāpnoti tadekāgramanāḥ śṛṇu || 65||

ईश्वर उवाच ।यः पूजयेच्छशिकलाऽमलमौलि लिङ्गंभस्माक्षधृत् प्रथितपर्वसु शर्वमेकम् ।सर्वैश्च पातकवरैः स विमुक्त ईशेसंसारघोरविषसर्पमुखाभिलग्नः ॥ ६६॥

īśvara uvāca |yaḥ pūjayecchaśikalā'malamauli liṅgaṃbhasmākṣadhṛt prathitaparvasu śarvamekam |sarvaiśca pātakavaraiḥ sa vimukta īśesaṃsāraghoraviṣasarpamukhābhilagnaḥ || 66||

॥ इति शिवरहस्यान्तर्गते स्कन्दप्रोक्तं शिवार्चनोपदेशं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ४२ स्कन्दप्रोक्तं शिवपर्वपूजाकथनम् । ३८६६॥

|| iti śivarahasyāntargate skandaproktaṃ śivārcanopadeśaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 42 skandaproktaṃ śivaparvapūjākathanam | 3866||

– ॥ श्रीशिवरहस्यम् ।महादेवाख्यः एकादशमांशः ।अध्यायः ४२ स्कन्दप्रोक्तं शिवपर्वपूजाकथनम् ।३८-६६॥

– || śrīśivarahasyam |mahādevākhyaḥ ekādaśamāṃśaḥ |adhyāyaḥ 42 skandaproktaṃ śivaparvapūjākathanam | 38-66||