शिवसुवर्णमालास्तवः Shrishivasuvarnamalastavah

श्रीगणेशाय नमः ॥अनेककोटिब्रह्माण्डजननीनायकप्रभो ।अनेकप्रमुखस्कन्दपरिसेवित पाहि माम् ॥ १॥

śrīgaṇeśāya namaḥ ||anekakoṭibrahmāṇḍajananīnāyakaprabho |anekapramukhaskandaparisevita pāhi mām || 1||

आकारापारनिर्व्याजकरुणायाः सतीपते ।आशाभिपूरकानम्रविततेः पाहि शङ्कर ॥ २॥

ākārāpāranirvyājakaruṇāyāḥ satīpate |āśābhipūrakānamravitateḥ pāhi śaṅkara || 2||

इभाश्वमुखसम्पत्तिदानदक्षकृपालव ।इष्टप्रालेयशैलेन्द्रपुत्र्याः पाहि गिरीश माम् ॥ ३॥

ibhāśvamukhasampattidānadakṣakṛpālava |iṣṭaprāleyaśailendraputryāḥ pāhi girīśa mām || 3||

ईहाशून्यजनावाप्य नतानन्दाब्धिचन्द्रमः ।ईशान सर्वविद्यानामिन्दुचूड सदाऽव माम् ॥ ४॥

īhāśūnyajanāvāpya natānandābdhicandramaḥ |īśāna sarvavidyānāminducūḍa sadā'va mām || 4||

उरगाधिपसंराजत्पदपङ्केरुहद्वय ।उडुराजकृतोत्तंस गिरिजासख मामव ॥ ५॥

uragādhipasaṃrājatpadapaṅkeruhadvaya |uḍurājakṛtottaṃsa girijāsakha māmava || 5||

ऊरीकृतविनम्रेष्टपूगसम्पूरणव्रत ।अखिलामरकोटीरनिघृष्टपद पाहि माम् ॥ ६॥

ūrīkṛtavinamreṣṭapūgasampūraṇavrata |akhilāmarakoṭīranighṛṣṭapada pāhi mām || 6||

ऋद्धिदाम्भोजवासायाः काममाशु नमत्ततेः ।शैलेन्द्रतनयाऽऽश्लिष्ट शर्व मां पाहि सर्वदा ॥ ७॥

ṛddhidāmbhojavāsāyāḥ kāmamāśu namattateḥ |śailendratanayā''śliṣṭa śarva māṃ pāhi sarvadā || 7||

ऋस्वराख्येयरूपाय भूतिदायादराद्दुतम् ।षण्मुखेभास्यपूज्याय नमश्चन्द्रार्धमौलये ॥ ८॥

ṛsvarākhyeyarūpāya bhūtidāyādarāddutam |ṣaṇmukhebhāsyapūjyāya namaścandrārdhamaulaye || 8||

लृकाराख्याय लक्ष्मीशद्रुहिणाद्यर्चिताङ्घ्रये ।अपारकरुणाजन्मभूमये शम्भवे नमः ॥ ९॥

lṛkārākhyāya lakṣmīśadruhiṇādyarcitāṅghraye |apārakaruṇājanmabhūmaye śambhave namaḥ || 9||

लॄस्वरूप ललाटाक्ष लाकिन्यादिनिषेवित ।लावण्याकर कारुण्यवारिधे पाहिमां प्रभो ॥ १०॥

lṝsvarūpa lalāṭākṣa lākinyādiniṣevita |lāvaṇyākara kāruṇyavāridhe pāhimāṃ prabho || 10||

एणाङ्कचूड काणादशास्त्रप्रज्ञाप्रदायक ।शोणाधर नमस्यामि त्वत्पादाम्बुरुहद्वयम् ॥ ११॥

eṇāṅkacūḍa kāṇādaśāstraprajñāpradāyaka |śoṇādhara namasyāmi tvatpādāmburuhadvayam || 11||

ऐहिकामुष्मिके पुंसां सुलभे यत्पदार्चनात् ।चन्द्रार्धविलसन्मौलिं नमामि तमुमापतिम् ॥ १२॥

aihikāmuṣmike puṃsāṃ sulabhe yatpadārcanāt |candrārdhavilasanmauliṃ namāmi tamumāpatim || 12||

ओमित्याख्यां यस्य वेदा वेदान्ताश्च जगुर्मुहुः ।ओङ्कारजपतुष्टं तं नौमि चन्द्रार्धशेखरम् ॥ १३॥

omityākhyāṃ yasya vedā vedāntāśca jagurmuhuḥ |oṅkārajapatuṣṭaṃ taṃ naumi candrārdhaśekharam || 13||

औदासीन्यं समस्तेषु विषयेषु प्रकुर्वताम् ।सुलभं जगदीशानं पार्वतीपतिमाश्रये ॥ १४॥

audāsīnyaṃ samasteṣu viṣayeṣu prakurvatām |sulabhaṃ jagadīśānaṃ pārvatīpatimāśraye || 14||

अङ्गशोभापराभूतकोटिराकानिशाकरम् ।अन्तकान्तककामादिगर्वहारिणमाश्रये ॥ १५॥

aṅgaśobhāparābhūtakoṭirākāniśākaram |antakāntakakāmādigarvahāriṇamāśraye || 15||

अश्च उश्च मकारश्च यन्नामावयवाक्षराः ।अशेषशुभदातारं तं नौमि शशिशेखरम् ॥ १६॥

aśca uśca makāraśca yannāmāvayavākṣarāḥ |aśeṣaśubhadātāraṃ taṃ naumi śaśiśekharam || 16||

कविता वृणुते रतीशतुल्यं पतिमास्थासहितेव मानिनी ।तरसा पुरुषं यदङ्घ्रिनम्रं तमहं नौमि शशाङ्कबालचूडम् ॥ १७॥

kavitā vṛṇute ratīśatulyaṃ patimāsthāsahiteva māninī |tarasā puruṣaṃ yadaṅghrinamraṃ tamahaṃ naumi śaśāṅkabālacūḍam || 17||

खण्डेन चान्द्रेण किरीटगेन विराजमानं वृषभाधिरूढ ।खवायुतेजोऽम्बुधरादिरूपं नमामि शैलेन्द्रसुतासमेतम् ॥ १८॥

khaṇḍena cāndreṇa kirīṭagena virājamānaṃ vṛṣabhādhirūḍha |khavāyutejo'mbudharādirūpaṃ namāmi śailendrasutāsametam || 18||

गद्यानि पद्यानि च शीघ्रमेव मूकस्य वक्त्रादपि निःसरन्ति ।यदीयकारुण्यलवात्तमीशं नमामि चन्द्रार्धकभासिमौलिम् ॥ १९॥

gadyāni padyāni ca śīghrameva mūkasya vaktrādapi niḥsaranti |yadīyakāruṇyalavāttamīśaṃ namāmi candrārdhakabhāsimaulim || 19||

घटोद्भवाद्या मुनयो यदङ्घ्रिसमर्चनातो महतीं प्रपन्नाः ।सिद्धिं तमानम्रजनेष्टदाननिबद्धदीक्षं प्रणमामि शम्भुम् ॥ २०॥

ghaṭodbhavādyā munayo yadaṅghrisamarcanāto mahatīṃ prapannāḥ |siddhiṃ tamānamrajaneṣṭadānanibaddhadīkṣaṃ praṇamāmi śambhum || 20||

नकारवाच्याय नमज्जनौघविद्याप्रदानप्रवणाय शीघ्रम् ।वटागमूलैकनिकेतनाय श्रीदक्षिणास्याय नमः शिवाय ॥ २१॥

nakāravācyāya namajjanaughavidyāpradānapravaṇāya śīghram |vaṭāgamūlaikaniketanāya śrīdakṣiṇāsyāya namaḥ śivāya || 21||

चयेन भासां वपुषश्चकोरबन्धुं जयन्तं जितपुष्पचापम् ।प्रालेयशैलेन्द्रसुतामनोऽब्जभानुं भजे कञ्चन देववर्यम् ॥ २२॥

cayena bhāsāṃ vapuṣaścakorabandhuṃ jayantaṃ jitapuṣpacāpam |prāleyaśailendrasutāmano'bjabhānuṃ bhaje kañcana devavaryam || 22||

छत्रं च वालव्यजने मनोज्ञे समुद्रकाञ्चीं पृथिवीं च लोकाः ।जवाद्भजन्तेऽप्यतिकिम्पचाना यदङ्घिनम्रास्तमुमेशमीडे ॥ २३॥

chatraṃ ca vālavyajane manojñe samudrakāñcīṃ pṛthivīṃ ca lokāḥ |javādbhajante'pyatikimpacānā yadaṅghinamrāstamumeśamīḍe || 23||

जन्मस्वनेकेषु विधाय धर्मान्स्ववर्णयोग्यान्मनुजोऽतिभक्त्या ।जिज्ञासते यत्पदमादरेण तं नौमि सच्चित्सुखरूपमीशम् ॥ २४॥

janmasvanekeṣu vidhāya dharmānsvavarṇayogyānmanujo'tibhaktyā |jijñāsate yatpadamādareṇa taṃ naumi saccitsukharūpamīśam || 24||

झरीं दधानं दिविषत्तटिन्या झटित्ययोग्यानपि भक्तिपूर्णान् ।पुनानमर्धेन्दुलसत्किरीटं युवानमीशं कलयामि चित्ते ॥ २५॥

jharīṃ dadhānaṃ diviṣattaṭinyā jhaṭityayogyānapi bhaktipūrṇān |punānamardhendulasatkirīṭaṃ yuvānamīśaṃ kalayāmi citte || 25||

नकाररूपाय रवीन्दुवह्निनेत्राय नानाविधरूपधर्त्रे ।लोकावनायातिमनोहराय शैलेन्द्रकन्यापतये नमोऽस्तु ॥ २६॥

nakārarūpāya ravīnduvahninetrāya nānāvidharūpadhartre |lokāvanāyātimanoharāya śailendrakanyāpataye namo'stu || 26||

टवर्णवाच्याय तडित्प्रभाय यमादियोगाङ्गविदर्चिताय ।शमादिसम्पत्सहिताप्यपादपद्माय गौरीपतये नमोऽस्तु ॥ २७॥

ṭavarṇavācyāya taḍitprabhāya yamādiyogāṅgavidarcitāya |śamādisampatsahitāpyapādapadmāya gaurīpataye namo'stu || 27||

ठपुक्त्रिवर्णप्रतिपादिताय हराय निःशेषविषाघहर्त्रे ।श्रीनीलकण्ठाय यमिप्रवीरध्येयाय कुर्मः प्रणतिं प्रमोदात् ॥ २८॥

ṭhapuktrivarṇapratipāditāya harāya niḥśeṣaviṣāghahartre |śrīnīlakaṇṭhāya yamipravīradhyeyāya kurmaḥ praṇatiṃ pramodāt || 28||

डामरप्रमुखदुःखसमूहध्वंसदक्षचरणस्मरणस्य ।शैलजाहृदयपङ्कजभानोः शङ्करस्य चरणौ प्रणतोऽस्मि ॥ २९॥

ḍāmarapramukhaduḥkhasamūhadhvaṃsadakṣacaraṇasmaraṇasya |śailajāhṛdayapaṅkajabhānoḥ śaṅkarasya caraṇau praṇato'smi || 29||

ढक्काख्यवाद्यश्रवणोत्युकाय प्रौढाय कन्दर्पशरप्रभेदे ।शिवाय चन्द्रार्धलसज्जटाय कुर्मः प्रमोदात्प्रणतेः सहस्रम् ॥ ३०॥

ḍhakkākhyavādyaśravaṇotyukāya prauḍhāya kandarpaśaraprabhede |śivāya candrārdhalasajjaṭāya kurmaḥ pramodātpraṇateḥ sahasram || 30||

णान्तदादिहरिदुत्सुखमूर्ते नाकनाथपरिसेवितपाद ।वासलोल वटवृक्षतले मां वाराणस्यामिव पाहि दयालो ॥ ३१॥

ṇāntadādiharidutsukhamūrte nākanāthaparisevitapāda |vāsalola vaṭavṛkṣatale māṃ vārāṇasyāmiva pāhi dayālo || 31||

तप्ताः संसृतिवह्निना भुवि नराः सम्प्राप्य सद्देशिकंतस्यास्याच्छ्रुतिशीर्षवाक्यनिचयं श्रुत्वार्थयुक्तं मुहुः ।युक्त्या श्रुत्यविरुद्धया तदनुसञ्चिन्त्यार्थमाद्योदितंध्यात्वाऽजस्रमवाप्नुवन्ति यमहं तं नौमि गौरीपतिम् ॥ ३२॥

taptāḥ saṃsṛtivahninā bhuvi narāḥ samprāpya saddeśikaṃtasyāsyācchrutiśīrṣavākyanicayaṃ śrutvārthayuktaṃ muhuḥ |yuktyā śrutyaviruddhayā tadanusañcintyārthamādyoditaṃdhyātvā'jasramavāpnuvanti yamahaṃ taṃ naumi gaurīpatim || 32||

थायैयेति समस्तदेववनिता नृत्यं यदग्रेऽन्वहंकुर्वन्त्यम्बुजसम्भवप्रभृतयः स्तुन्वन्ति वेदैश्च यम् ।इन्द्राणीशरमाधवादिमसुरा यस्यार्चनां कुर्वतेकल्पागप्रभवैः सुमैस्तमनिशं नौम्यादिजावल्लभम् ॥ ३३॥

thāyaiyeti samastadevavanitā nṛtyaṃ yadagre'nvahaṃkurvantyambujasambhavaprabhṛtayaḥ stunvanti vedaiśca yam |indrāṇīśaramādhavādimasurā yasyārcanāṃ kurvatekalpāgaprabhavaiḥ sumaistamaniśaṃ naumyādijāvallabham || 33||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितः श्रीशिवसुवर्णमालास्तवः सम्पूर्णः ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaḥ śrīśivasuvarṇamālāstavaḥ sampūrṇaḥ |