रुद्रद्वादशनामस्तोत्रम् Shri Rudradvadashanama Shtotram

प्रथमं तु महादेवं द्वितीयं तु महेश्वरम् ।तृतीयं शङ्करं प्रोक्तं चतुर्थं वृषभध्वजम् ॥ १॥

prathamaṃ tu mahādevaṃ dvitīyaṃ tu maheśvaram |tṛtīyaṃ śaṅkaraṃ proktaṃ caturthaṃ vṛṣabhadhvajam || 1||

पञ्चमं कृत्तिवासं च षष्ठं कामाङ्गनाशनम् ।सप्तमं देवदेवेशं श्रीकण्ठं चाष्टमं तथा ॥ २॥

pañcamaṃ kṛttivāsaṃ ca ṣaṣṭhaṃ kāmāṅganāśanam |saptamaṃ devadeveśaṃ śrīkaṇṭhaṃ cāṣṭamaṃ tathā || 2||

नवमं तु हरं देवं दशमं पार्वतीपतिम् ।रुद्रमेकादशं प्रोक्तं द्वादशं शिवमुच्यते ॥ ३॥

navamaṃ tu haraṃ devaṃ daśamaṃ pārvatīpatim |rudramekādaśaṃ proktaṃ dvādaśaṃ śivamucyate || 3||

एतद्वादशनामानि त्रिसन्ध्यं यः पठेन्नरः ।गोघ्नश्चैव कृतघ्नश्च भ्रूणहा गुरुतल्पगः ॥ ४॥

etadvādaśanāmāni trisandhyaṃ yaḥ paṭhennaraḥ |goghnaścaiva kṛtaghnaśca bhrūṇahā gurutalpagaḥ || 4||

स्त्रीबालघातकश्चैव सुरापो वृषलीपतिः ।सर्वं नाशयते पापं शिवलोकं स गच्छति ॥ ५॥ (मुच्यते सर्वपापेभ्यः शिवलोकं)

strībālaghātakaścaiva surāpo vṛṣalīpatiḥ |sarvaṃ nāśayate pāpaṃ śivalokaṃ sa gacchati || 5|| (mucyate sarvapāpebhyaḥ śivalokaṃ)

शुद्धस्फटिकसङ्काशं त्रिनेत्रं चन्द्रशेखरम् ।इन्दुमण्डलमध्यस्थं वन्दे देवं सदाशिवम् ॥ ६॥

śuddhasphaṭikasaṅkāśaṃ trinetraṃ candraśekharam |indumaṇḍalamadhyasthaṃ vande devaṃ sadāśivam || 6||

॥ इति श्रीरुद्रद्वादशनामस्तोत्रं समाप्तम् ॥

|| iti śrīrudradvādaśanāmastotraṃ samāptam ||