मृत्युञ्जयस्तोत्रम् ३ Shri Mrityunjayastotram 3

ॐ नमो मृत्युञ्जयाय ।नन्दिकेश्वर उवाचकैलासस्योत्तरे शृङ्गे शुद्धस्फटिकसन्निभे ।तमोगुणविहीने तु जरामृत्युविवर्जिते ॥ १॥

oṃ namo mṛtyuñjayāya |nandikeśvara uvācakailāsasyottare śṛṅge śuddhasphaṭikasannibhe |tamoguṇavihīne tu jarāmṛtyuvivarjite || 1||

सर्वार्थ सम्पदाधारे सर्वज्ञानकृतालये ।कृताञ्जली पुटो ब्रह्मा ध्यानासीनं सदाशिवम् ॥ २॥

sarvārtha sampadādhāre sarvajñānakṛtālaye |kṛtāñjalī puṭo brahmā dhyānāsīnaṃ sadāśivam || 2||

पप्रच्छ प्रणतो भूत्वा जानुभ्यामवनिङ्गतः ।सर्वार्थसम्पदाधार ब्रह्मा लोकपितामहः ॥ ३॥

papraccha praṇato bhūtvā jānubhyāmavaniṅgataḥ |sarvārthasampadādhāra brahmā lokapitāmahaḥ || 3||

ब्रह्मोवाचकेनोपायेन देवेश चिरायुर्लोमशोऽभवत् ।तन्मे ब्रूहि महेशान लोकानां हितकाम्यया ॥ ४॥

brahmovācakenopāyena deveśa cirāyurlomaśo'bhavat |tanme brūhi maheśāna lokānāṃ hitakāmyayā || 4||

श्रीसदाशिव उवाचशृणु ब्रह्मन् प्रवक्ष्यामि चिरायुर्मुनिसत्तमः ।सञ्जातः कर्मणा येन व्याधिमृत्युविवर्जितः ॥ ५॥

śrīsadāśiva uvācaśṛṇu brahman pravakṣyāmi cirāyurmunisattamaḥ |sañjātaḥ karmaṇā yena vyādhimṛtyuvivarjitaḥ || 5||

तस्मिन्नेकार्णवे घोरे सलिलौघपरिप्लुते ।कृतान्तभयनाशाय स्तुतो मृत्युञ्जयः शिवः ॥ ६॥

tasminnekārṇave ghore salilaughapariplute |kṛtāntabhayanāśāya stuto mṛtyuñjayaḥ śivaḥ || 6||

तस्य सङ्कीर्तनान्नित्यं मुनिर्मृत्युविवर्जितः ।तमेव कीर्तयन् ब्रह्मन् मृत्यु जेतुं न संशयः ॥ ७॥

tasya saṅkīrtanānnityaṃ munirmṛtyuvivarjitaḥ |tameva kīrtayan brahman mṛtyu jetuṃ na saṃśayaḥ || 7||

लोमश उवाचदेवाधिदेव देवेश सर्वप्राण भृतांवर ।प्राणिनामसि नाथस्त्वं मृत्युञ्जय नमोऽस्तु ते ॥ ८॥

lomaśa uvācadevādhideva deveśa sarvaprāṇa bhṛtāṃvara |prāṇināmasi nāthastvaṃ mṛtyuñjaya namo'stu te || 8||

देहिनां जीवभूतोऽसि जीवो जीवस्य कारणम् ।जगतां रक्षकस्त्वं वै मृत्युञ्जय नमोऽस्तु ते ॥ ९॥

dehināṃ jīvabhūto'si jīvo jīvasya kāraṇam |jagatāṃ rakṣakastvaṃ vai mṛtyuñjaya namo'stu te || 9||

हेमाद्रिशिखराकारे सुधावीचिमनोहर ।पुण्डरीकपरं ज्योतिर्मुत्युञ्जय नमोऽस्तु ते ॥ १०॥

hemādriśikharākāre sudhāvīcimanohara |puṇḍarīkaparaṃ jyotirmutyuñjaya namo'stu te || 10||

ध्यानाधार महाज्ञान सर्वज्ञानैककारण ।परित्रातासि लोकानां मृत्युञ्जय नमोऽस्तु ते ॥ ११॥

dhyānādhāra mahājñāna sarvajñānaikakāraṇa |paritrātāsi lokānāṃ mṛtyuñjaya namo'stu te || 11||

निहता येन कालेन सदेवासुरमानुषाः ।गन्धर्वाप्सरसश्चैव सिद्धविद्याधरास्तथा ॥ १२॥

nihatā yena kālena sadevāsuramānuṣāḥ |gandharvāpsarasaścaiva siddhavidyādharāstathā || 12||

साध्याश्च वसवो रुद्रास्तथाश्विनिसुतावुभौ ।मरुतश्च दिशो नागाःस्थावरा जङ्गमास्तथा ॥ १३॥

sādhyāśca vasavo rudrāstathāśvinisutāvubhau |marutaśca diśo nāgāḥsthāvarā jaṅgamāstathā || 13||

जितः सोऽपि त्वया ध्यायन् मृत्युञ्जय नमोऽस्तु ते ॥ १४॥

jitaḥ so'pi tvayā dhyāyan mṛtyuñjaya namo'stu te || 14||

ये ध्यायन्ति परां मूर्तिं पूजयन्त्यमरादयः ।न ते मृत्युवशं यान्ति मृत्युञ्जय नमोऽस्तु ते ॥ १५॥

ye dhyāyanti parāṃ mūrtiṃ pūjayantyamarādayaḥ |na te mṛtyuvaśaṃ yānti mṛtyuñjaya namo'stu te || 15||

त्वमोङ्कारोऽसि वेदानां देवानां च सदाशिवः ।आधारशक्तिः शक्तीनां मृत्युञ्जय नमोऽस्तु ते ॥ १६॥

tvamoṅkāro'si vedānāṃ devānāṃ ca sadāśivaḥ |ādhāraśaktiḥ śaktīnāṃ mṛtyuñjaya namo'stu te || 16||

स्थावरे जङ्गमे वापि यावत्तिष्ठति देहगः ।जीवत्यपत्यलोकोऽयं मृत्युञ्जय नमोऽस्तु ते ॥ १७॥

sthāvare jaṅgame vāpi yāvattiṣṭhati dehagaḥ |jīvatyapatyaloko'yaṃ mṛtyuñjaya namo'stu te || 17||

सोमसूर्याग्निमध्यस्थव्योमव्यापिन् सदाशिव ।कालत्रयमहाकाल मृत्युञ्जय नमोऽस्तु ते ॥ १८॥

somasūryāgnimadhyasthavyomavyāpin sadāśiva |kālatrayamahākāla mṛtyuñjaya namo'stu te || 18||

प्रबुद्धे चाप्रबुद्धे च त्वमेव सृजसे जगत् ।सृष्टिरूपेण देवेश मृत्युञ्जय नमोऽस्तु ते ॥ १९॥

prabuddhe cāprabuddhe ca tvameva sṛjase jagat |sṛṣṭirūpeṇa deveśa mṛtyuñjaya namo'stu te || 19||

व्योम्नि त्वं व्योमरूपोऽसि तेजः सर्वत्र तेजसि ।ज्ञानिनां ज्ञानरूपोऽसि मृत्युञ्जय नमोऽस्तु ते ॥ २०॥

vyomni tvaṃ vyomarūpo'si tejaḥ sarvatra tejasi |jñānināṃ jñānarūpo'si mṛtyuñjaya namo'stu te || 20||

जगज्जीवो जगत्प्राणः स्रष्टा त्वं जगतः प्रभुः ।कारणं सर्वतीर्थानां मृत्युञ्जय नमोऽस्तु ते ॥ २१॥

jagajjīvo jagatprāṇaḥ sraṣṭā tvaṃ jagataḥ prabhuḥ |kāraṇaṃ sarvatīrthānāṃ mṛtyuñjaya namo'stu te || 21||

नेता त्वमिन्द्रियाणां च सर्वज्ञानप्रबोधकः ।सांख्ययोगश्च हंसश्च मृत्युञ्जय नमोऽस्तु ते ॥ २२॥

netā tvamindriyāṇāṃ ca sarvajñānaprabodhakaḥ |sāṃkhyayogaśca haṃsaśca mṛtyuñjaya namo'stu te || 22||

रूपातीतः सरूपश्च पिण्डस्थपदमेव च ।चतुर्युगकलाधार मृत्युञ्जय नमोऽस्तु ते ॥ २३॥

rūpātītaḥ sarūpaśca piṇḍasthapadameva ca |caturyugakalādhāra mṛtyuñjaya namo'stu te || 23||

रेचके वह्निरूपोऽसि सोमरूपोऽसि पूरके ।कुम्भके शिवरूपोऽसि मृत्युञ्जय नमोऽस्तु ते ॥ २४॥

recake vahnirūpo'si somarūpo'si pūrake |kumbhake śivarūpo'si mṛtyuñjaya namo'stu te || 24||

क्षयङ्करोऽसि पापानां पुण्यानामपि वर्धनम् ।हेतुस्त्वं श्रेयसां नित्यं मृत्युञ्जय नमोऽस्तु ते ॥ २५॥

kṣayaṅkaro'si pāpānāṃ puṇyānāmapi vardhanam |hetustvaṃ śreyasāṃ nityaṃ mṛtyuñjaya namo'stu te || 25||

सर्वमायाकलातीत सर्वेन्द्रिय परावर ।सर्वेन्द्रियकलाधीश मृत्युञ्जय नमोऽस्तु ते ॥ २६॥

sarvamāyākalātīta sarvendriya parāvara |sarvendriyakalādhīśa mṛtyuñjaya namo'stu te || 26||

रूपं गन्धो रसः स्पर्शः शब्दः संस्कार एव च ।त्वत्तः प्रकाश एतेषां मृत्युञ्जय नमोऽस्तु ते ॥ २७॥

rūpaṃ gandho rasaḥ sparśaḥ śabdaḥ saṃskāra eva ca |tvattaḥ prakāśa eteṣāṃ mṛtyuñjaya namo'stu te || 27||

चतुर्विधानां सृष्टीनां हेतुस्त्वं कारणेश्वर ।भावाभावपरिच्छिन्न मृत्युञ्जय नमोऽस्तु ते ॥ २८॥

caturvidhānāṃ sṛṣṭīnāṃ hetustvaṃ kāraṇeśvara |bhāvābhāvaparicchinna mṛtyuñjaya namo'stu te || 28||

त्वमेको निष्कलो लोके सकलम्भुवनत्रये ।अतिसूक्ष्मातिरूपस्त्वं मृत्युञ्जय नमोऽस्तु ते ॥ २९॥

tvameko niṣkalo loke sakalambhuvanatraye |atisūkṣmātirūpastvaṃ mṛtyuñjaya namo'stu te || 29||

त्वं प्रबोधस्त्वमाधार त्वद्बीजं भुवनत्रयम् ।सत्वं रजस्तमस्त्वं हि मृत्युञ्जय नमोऽस्तु ते ॥ ३०॥

tvaṃ prabodhastvamādhāra tvadbījaṃ bhuvanatrayam |satvaṃ rajastamastvaṃ hi mṛtyuñjaya namo'stu te || 30||

त्वं सोमस्त्वं दिनेशश्च त्वमात्मा प्रकृतेः परः ।अष्टत्रिंशत्वकलानाथ मृत्युञ्जय नमोऽस्तु ते ॥ ३१॥

tvaṃ somastvaṃ dineśaśca tvamātmā prakṛteḥ paraḥ |aṣṭatriṃśatvakalānātha mṛtyuñjaya namo'stu te || 31||

सर्वेन्द्रियाणामाधारः सर्वभूतगुणाश्रयः ।सर्वज्ञानमयानन्त मृत्युञ्जय नमोऽस्तु ते ॥ ३२॥

sarvendriyāṇāmādhāraḥ sarvabhūtaguṇāśrayaḥ |sarvajñānamayānanta mṛtyuñjaya namo'stu te || 32||

त्वमात्मा सर्वभूतानां गुणानां त्वमधीश्वरः ।सर्वानन्दमयाधार मृत्युञ्जय नमोऽस्तु ते ॥ ३३॥

tvamātmā sarvabhūtānāṃ guṇānāṃ tvamadhīśvaraḥ |sarvānandamayādhāra mṛtyuñjaya namo'stu te || 33||

त्वं यज्ञः सर्वयज्ञानां त्वं बुद्धिर्बोघलक्षणा ।शब्दब्रह्मस्त्वमोङ्कारो मृत्युञ्जय नमोऽस्तु ते ॥ ३४॥

tvaṃ yajñaḥ sarvayajñānāṃ tvaṃ buddhirboghalakṣaṇā |śabdabrahmastvamoṅkāro mṛtyuñjaya namo'stu te || 34||

श्रीसदाशिव उवाचएवं सङ्कीर्तयेद्यस्तु शुचिस्तद्गतमानसः ।भक्त्या शृणोति यो ब्रह्मन् न स मृत्युवशो भवेत् ॥ ३५॥

śrīsadāśiva uvācaevaṃ saṅkīrtayedyastu śucistadgatamānasaḥ |bhaktyā śṛṇoti yo brahman na sa mṛtyuvaśo bhavet || 35||

न च मृत्युभयं तस्य प्राप्तकालं च लङ्घयेत् ।अपमृत्युभयं तस्य प्रणश्यति न संशयः ॥ ३६॥

na ca mṛtyubhayaṃ tasya prāptakālaṃ ca laṅghayet |apamṛtyubhayaṃ tasya praṇaśyati na saṃśayaḥ || 36||

व्याधयो नोपपद्यन्ते नोपसर्गभयं भवेत् ।प्रत्यासन्नान्तरे काले शतैकावर्तने कृते ॥ ३७॥

vyādhayo nopapadyante nopasargabhayaṃ bhavet |pratyāsannāntare kāle śataikāvartane kṛte || 37||

मृत्युर्न जायते तस्य रोगान् मुञ्चति निश्चितम् ।पञ्चम्यां वा दशम्यां वा पौर्णमास्यामथापि वा ॥ ३८॥

mṛtyurna jāyate tasya rogān muñcati niścitam |pañcamyāṃ vā daśamyāṃ vā paurṇamāsyāmathāpi vā || 38||

शतमावर्तयेद्यस्तु शतवर्षं स जीवति ।तेजस्वी बलसम्पन्नो लभते श्रियमुत्तमाम् ॥ ३९॥

śatamāvartayedyastu śatavarṣaṃ sa jīvati |tejasvī balasampanno labhate śriyamuttamām || 39||

त्रिविधं नाशयेत्पापं मनोवाक्कायसम्भवम् ।अभिचाराणि कर्माणि कर्माण्याथर्वणानि च ।क्षीयन्ते नात्र सन्देहो दुःस्वप्नश्च विनश्यति ॥ ४०॥

trividhaṃ nāśayetpāpaṃ manovākkāyasambhavam |abhicārāṇi karmāṇi karmāṇyātharvaṇāni ca |kṣīyante nātra sandeho duḥsvapnaśca vinaśyati || 40||

इदं रहस्यं परमं देवदेवस्य शूलिनः ।दुःस्वप्ननाशनं पुण्यं सर्वविघ्नविनाशनम् ॥ ४१॥

idaṃ rahasyaṃ paramaṃ devadevasya śūlinaḥ |duḥsvapnanāśanaṃ puṇyaṃ sarvavighnavināśanam || 41||

इति श्रीशिवब्रह्मसंवादे श्रीमृत्युञ्जयस्तोत्रं सम्पूर्णम् ।

iti śrīśivabrahmasaṃvāde śrīmṛtyuñjayastotraṃ sampūrṇam |