षोडषरुद्रबीजामृतवन्दना Shodasha Rudra Bijamritavandana

(अभिनवगुप्तविरचितं ईश्वरप्रत्यभिज्ञाविवृतिविमर्शिन्यन्तर्गते)॥ ॐ अं अमृतेश्वरभैरवाय नमः ॥॥ अवर्गः । शम्भुशक्ती ॥अमृतमनन्तमनुत्तरमघोरषोडशकशक्तिचक्रगतम् ।औन्मनसपदनिरूढिप्रथमोपोद्घातकं वन्दे ॥ अ अमृतः ॥ १॥

(abhinavaguptaviracitaṃ īśvarapratyabhijñāvivṛtivimarśinyantargate)|| oṃ aṃ amṛteśvarabhairavāya namaḥ |||| avargaḥ | śambhuśaktī ||amṛtamanantamanuttaramaghoraṣoḍaśakaśakticakragatam |aunmanasapadanirūḍhiprathamopodghātakaṃ vande || a amṛtaḥ || 1||

आनन्दममृतपूर्णं सामनसे परपदे परं सत्यम् ।घटितानुत्तरदृढतमनिरूढिभाजं शिवं वन्दे ॥ आ अमृतपूर्णः ॥ २॥

ānandamamṛtapūrṇaṃ sāmanase parapade paraṃ satyam |ghaṭitānuttaradṛḍhatamanirūḍhibhājaṃ śivaṃ vande || ā amṛtapūrṇaḥ || 2||

इच्छाशक्तिसुनिर्भरममृताभमनन्तभुवनजननपटुम् ।वन्दे स्वशक्तिलहरीबहलितभैरवपरानन्दम् ॥ इ अमृताभः ॥ ३॥

icchāśaktisunirbharamamṛtābhamanantabhuvanajananapaṭum |vande svaśaktilaharībahalitabhairavaparānandam || i amṛtābhaḥ || 3||

ईश्वरमशेषतापप्रशमनममृतद्रवं सदा वन्दे ।अप्रतिघातिस्वेच्छाविकासविश्रान्तममृतकरमौलिम् ॥ ई अमृतद्रवः ॥ ४॥

īśvaramaśeṣatāpapraśamanamamṛtadravaṃ sadā vande |apratighātisvecchāvikāsaviśrāntamamṛtakaramaulim || ī amṛtadravaḥ || 4||

यदनुत्तरसम्बोधादानन्दविकस्वरेच्छया पूर्णम् ।ईश्वरमुन्मिषदमृतौघसुन्दरं तत्स्तुवे धाम ॥ उ अमृतौघः ॥ ५॥

yadanuttarasambodhādānandavikasvarecchayā pūrṇam |īśvaramunmiṣadamṛtaughasundaraṃ tatstuve dhāma || u amṛtaughaḥ || 5||

अहमानन्दघनेच्छाघटितेश्वरतोन्मिषत्समस्तोर्मिः ।इत्युल्लासतरङ्गितममृतोर्मिमहं चिदर्णवं वन्दे ॥ ऊ अमृतोर्मिः ॥ ६॥

ahamānandaghanecchāghaṭiteśvaratonmiṣatsamastormiḥ |ityullāsataraṅgitamamṛtormimahaṃ cidarṇavaṃ vande || ū amṛtormiḥ || 6||

स्वप्रसरप्रेङ्खितविलसदूर्मिसंक्षुभितचिद्रसापूरम् ।अमृतस्यन्दनसारं भैरवसंविन्महार्णवं वन्दे ॥ ऋ अमृतस्यन्दनः ॥ ७॥

svaprasarapreṅkhitavilasadūrmisaṃkṣubhitacidrasāpūram |amṛtasyandanasāraṃ bhairavasaṃvinmahārṇavaṃ vande || ṛ amṛtasyandanaḥ || 7||

पूर्वं यदनुत्तरममृतभूमिमासाद्य सप्तमीं कलनाम् ।विश्राम्यति तत्प्रणमाम्यमृताङ्गदं परानन्दि ॥ ॠ अमृताङ्गः ॥ ८॥

pūrvaṃ yadanuttaramamṛtabhūmimāsādya saptamīṃ kalanām |viśrāmyati tatpraṇamāmyamṛtāṅgadaṃ parānandi || ṝ amṛtāṅgaḥ || 8||

शिवममृतवपुषममृतकलाचतुष्टयतृतीयभागजुषम् ।प्रणमामि भासयन्तं क्रमरहितेऽपि क्रममनेकम् ॥ ऌ अमृतवपुः ॥ ९॥

śivamamṛtavapuṣamamṛtakalācatuṣṭayatṛtīyabhāgajuṣam |praṇamāmi bhāsayantaṃ kramarahite'pi kramamanekam || ḷ amṛtavapuḥ || 9||

सञ्जीवनतुर्यकलाकलितविबोधं समस्तभावानाम् ।दूषणविषशीर्णानाममृतोद्गारं शिवं वन्दे ॥ ॡ अमृतोद्गारः ॥ १०॥

sañjīvanaturyakalākalitavibodhaṃ samastabhāvānām |dūṣaṇaviṣaśīrṇānāmamṛtodgāraṃ śivaṃ vande || ḹ amṛtodgāraḥ || 10||

एकमनुत्तररूपात्प्रभृतित्रिकशक्तिपूरितानन्दम् ।अमृतास्यमस्य जगतः प्रमाणभूतं शिवं वन्दे ॥ ए अमृतास्यः ॥ ११॥

ekamanuttararūpātprabhṛtitrikaśaktipūritānandam |amṛtāsyamasya jagataḥ pramāṇabhūtaṃ śivaṃ vande || e amṛtāsyaḥ || 11||

ऐक्यपरमार्थकलया त्रिशक्तियुगघटितवैश्वरूप्यमहम् ।अमृततनुमतनुबोधप्रसरमहाकारणं स्मरामि हरम् ॥ ऐ अमृततनुः ॥ १२॥

aikyaparamārthakalayā triśaktiyugaghaṭitavaiśvarūpyamaham |amṛtatanumatanubodhaprasaramahākāraṇaṃ smarāmi haram || ai amṛtatanuḥ || 12||

ओतप्रोतं सकलं विद्ध्वा स्वरसेन शिवमयीकुरुते ।योऽनुत्तरधाम्न्युदयन्स्वयममृतनिषेचनं तमस्मि नतः ॥ ओ अमृतसेचनः/अमृतनिषेचनः ॥ १३॥

otaprotaṃ sakalaṃ viddhvā svarasena śivamayīkurute |yo'nuttaradhāmnyudayansvayamamṛtaniṣecanaṃ tamasmi nataḥ || o amṛtasecanaḥ/amṛtaniṣecanaḥ || 13||

औषधमाधिव्याधिषु पाशत्रयशातनं त्रिशूलकरम् ।वन्देऽहममृतमूर्तिं पूर्णत्रिकशक्तिपरमार्थम् ॥ औ ॥ १४ अमृतमूर्तिः ॥बैन्दवममृतरसमयं वेद्यं योऽनुत्तरे निजे धाम्नि ।पूर्णीभावयतितमाममृतेशं तं नमस्यामि ॥ अं ॥ १५ अमृतेशः ॥प्रसृतमनुत्तररूपादानन्दादिक्रमेण विश्वमदः ।सर्वामृतधरमन्तर्बहिश्च विसृजन्तमभिवन्दे ॥ अः ॥ १६ सर्वामृतधरः ॥॥ इति अभिनवगुप्तविरचितं ईश्वरप्रत्यभिज्ञाविवृतिविमर्शिन्यन्तर्गते षोडषरुद्रबीजामृतवन्दना सम्पूर्णा ॥

auṣadhamādhivyādhiṣu pāśatrayaśātanaṃ triśūlakaram |vande'hamamṛtamūrtiṃ pūrṇatrikaśaktiparamārtham || au || 14 amṛtamūrtiḥ ||baindavamamṛtarasamayaṃ vedyaṃ yo'nuttare nije dhāmni |pūrṇībhāvayatitamāmamṛteśaṃ taṃ namasyāmi || aṃ || 15 amṛteśaḥ ||prasṛtamanuttararūpādānandādikrameṇa viśvamadaḥ |sarvāmṛtadharamantarbahiśca visṛjantamabhivande || aḥ || 16 sarvāmṛtadharaḥ |||| iti abhinavaguptaviracitaṃ īśvarapratyabhijñāvivṛtivimarśinyantargate ṣoḍaṣarudrabījāmṛtavandanā sampūrṇā ||