uttarapIThikA Nateshvara Sahasranama Stotrasya Uttarapithika

श्रीगणेशाय नमः ।श्रीचिदम्बरनटेश्वरसहस्रनामस्तोत्रस्य उत्तरपीठिका ॥इति ते कथितं देवि नटराजस्य सुन्दरम् ।नाम्नां सहस्रमत्यन्तं गोप्यं नेदं प्रकाशयेत् ॥ १॥

śrīgaṇeśāya namaḥ |śrīcidambaranaṭeśvarasahasranāmastotrasya uttarapīṭhikā ||iti te kathitaṃ devi naṭarājasya sundaram |nāmnāṃ sahasramatyantaṃ gopyaṃ nedaṃ prakāśayet || 1||

सर्वसिद्धिकरं पुण्यं सर्वविद्याविवर्धनम् ।सम्पद्प्रदमिदं नृणां सर्वापद्घ्नमघापहम् ॥ २॥

sarvasiddhikaraṃ puṇyaṃ sarvavidyāvivardhanam |sampadpradamidaṃ nṛṇāṃ sarvāpadghnamaghāpaham || 2||

अभिचारप्रयोगादिमहाकृत्यनिवारणम् ।अपस्मारमहाव्याधिज्वरकुष्ठादिनाशनम् ॥ ३॥

abhicāraprayogādimahākṛtyanivāraṇam |apasmāramahāvyādhijvarakuṣṭhādināśanam || 3||

अत्युत्पादभयक्षोभक्षुद्रशान्तिदकारणम् ।कूश्माण्डरुद्रवेतालशाकिन्यादिभयापहम् ॥ ४॥

atyutpādabhayakṣobhakṣudraśāntidakāraṇam |kūśmāṇḍarudravetālaśākinyādibhayāpaham || 4||

स्मरणादेव जन्तूनां ब्रह्महत्यादिनाशनम् ।अस्मात्परतरं स्तोत्रं नास्ति लोकत्रयेऽम्बिके ॥ ५॥

smaraṇādeva jantūnāṃ brahmahatyādināśanam |asmātparataraṃ stotraṃ nāsti lokatraye'mbike || 5||

एतन्नामसहस्रस्य पठनात्सकृदेव हि ।महापातकयुक्तोऽपि शिवसायुज्यमाप्नुयात् ॥ ६॥

etannāmasahasrasya paṭhanātsakṛdeva hi |mahāpātakayukto'pi śivasāyujyamāpnuyāt || 6||

प्रयोगलक्षणं वक्ष्ये शृणु शैलसुतेऽधुना ।पज्चम्यामथवाऽष्टम्यां दशम्यां वा विशेषतः ॥ ७॥

prayogalakṣaṇaṃ vakṣye śṛṇu śailasute'dhunā |pajcamyāmathavā'ṣṭamyāṃ daśamyāṃ vā viśeṣataḥ || 7||

स्नात्वा शुभासने स्थित्वा ध्यायन् श्रीनटनायकम् ।प्रजपेत्द्वादशावृत्या सर्वान् कामान् लभेन्नर। ॥ ८॥

snātvā śubhāsane sthitvā dhyāyan śrīnaṭanāyakam |prajapetdvādaśāvṛtyā sarvān kāmān labhennara| || 8||

आर्द्रायां प्रातरारभ्य नटराजस्य सन्निधौ ।आसायं प्रजपेदेतत् एवं संवत्सरत्रयम् ॥ ९॥

ārdrāyāṃ prātarārabhya naṭarājasya sannidhau |āsāyaṃ prajapedetat evaṃ saṃvatsaratrayam || 9||

तस्य भक्तस्य देवेशो नटनं दर्शयेत्प्रभुः ।बिल्ववृक्षस्य निकटे त्रिवारं प्रजपेदिदम् ॥ १०॥

tasya bhaktasya deveśo naṭanaṃ darśayetprabhuḥ |bilvavṛkṣasya nikaṭe trivāraṃ prajapedidam || 10||

षड्भिर्मासैर्महैश्वर्यं लभते न चिरान्नरः ।अनेन स्तोत्रराजेन मन्त्रितं भस्मधारयेत् ॥ ११॥

ṣaḍbhirmāsairmahaiśvaryaṃ labhate na cirānnaraḥ |anena stotrarājena mantritaṃ bhasmadhārayet || 11||

भस्मावलोकनान्मृत्युर्वश्यो भवति तत्क्षणात् ।सलिलं प्राशयेद्धीमान् मन्त्रेणानेन मन्त्रितम् ॥ १२॥

bhasmāvalokanānmṛtyurvaśyo bhavati tatkṣaṇāt |salilaṃ prāśayeddhīmān mantreṇānena mantritam || 12||

सर्वविद्यामयो भूत्वा व्याकरोत्यश्रुतादिकम् ।नाटकादिमहाग्रन्थं कुरुते नात्र संशयः ॥ १३॥

sarvavidyāmayo bhūtvā vyākarotyaśrutādikam |nāṭakādimahāgranthaṃ kurute nātra saṃśayaḥ || 13||

चतुर्थ्यन्तं समुच्चार्यनामैकैकं ततो जपेत् ।पञ्चाक्षरं तथा नाम्नां सहस्रं प्रजपेत्क्रमात् ॥ १४॥

caturthyantaṃ samuccāryanāmaikaikaṃ tato japet |pañcākṣaraṃ tathā nāmnāṃ sahasraṃ prajapetkramāt || 14||

एवं त्रिवारं मासानामष्टाविंशतिके गते ।निग्रहानुग्रहौ कर्तुं शक्तिरस्योपजायते ॥ १५॥

evaṃ trivāraṃ māsānāmaṣṭāviṃśatike gate |nigrahānugrahau kartuṃ śaktirasyopajāyate || 15||

नाम्नामादौ तथान्ते च पञ्चाक्षरमहामनुम् ।जप्त्वा मध्यस्थितं नाम निर्ममोन्तं सदा सकृत् ॥ १६॥

nāmnāmādau tathānte ca pañcākṣaramahāmanum |japtvā madhyasthitaṃ nāma nirmamontaṃ sadā sakṛt || 16||

चतुर्थ्यन्तं जपेद्विद्वान् त्रिवर्षं च त्रिवारकैः ।अणिमादिमहासिद्धिरचिरात्प्राप्नुयाद्ध्रुवम् ॥ १७॥

caturthyantaṃ japedvidvān trivarṣaṃ ca trivārakaiḥ |aṇimādimahāsiddhiracirātprāpnuyāddhruvam || 17||

सर्वेष्वपि च लोकेषु सिद्धस्सन्नाचरेन्नरः ।लक्ष्मीबीजद्वयक्षिप्तमाद्यन्ते नाम यश्शिवे ॥ १८॥

sarveṣvapi ca lokeṣu siddhassannācarennaraḥ |lakṣmībījadvayakṣiptamādyante nāma yaśśive || 18||

वाञ्छितां श्रियमाप्नोति सत्यमुक्तं वरानने ।हल्लेखामन्त्रसंयुक्तं पूर्ववत्संयुतं जपेत् ॥ १९॥

vāñchitāṃ śriyamāpnoti satyamuktaṃ varānane |hallekhāmantrasaṃyuktaṃ pūrvavatsaṃyutaṃ japet || 19||

योगसिद्धिर्भवेत्तस्य त्रिचतुः पञ्चवत्सरैः ।किमत्र बहुनोक्तेन या या सिद्धिरभीप्सिता ॥ २०॥

yogasiddhirbhavettasya tricatuḥ pañcavatsaraiḥ |kimatra bahunoktena yā yā siddhirabhīpsitā || 20||

तां तां सिद्धिं लभेन्मर्त्यः सत्यमेव मयोदितम् ।कण्ठदघ्नजले स्थित्वा त्रिवारं प्रजपेदिदम् ॥ २१॥

tāṃ tāṃ siddhiṃ labhenmartyaḥ satyameva mayoditam |kaṇṭhadaghnajale sthitvā trivāraṃ prajapedidam || 21||

रिपूनुच्वाटयेच्छीघ्रमेकेनैव दिनेन सः ।दक्षिणाभिमुखोभूत्वा धृत्वाऽऽर्द्रवसनं शुचिः ॥ २२॥

ripūnucvāṭayecchīghramekenaiva dinena saḥ |dakṣiṇābhimukhobhūtvā dhṛtvā''rdravasanaṃ śuciḥ || 22||

शत्रुनामसमुच्वार्य मारयेतिपदाङ्कितम् ।पठेदिदं स्तवं क्रोधात् सप्तकृत्वस्त्रिभिर्दिनैः ॥ २३॥

śatrunāmasamucvārya mārayetipadāṅkitam |paṭhedidaṃ stavaṃ krodhāt saptakṛtvastribhirdinaiḥ || 23||

स रिपुर्मृत्युगेहस्य ध्रुवमातिथ्यभाग्भवेत् ।हरिद्रया नटाधीशं कृत्वा प्राणान् प्रतिष्ठिपेत् ॥ २४॥

sa ripurmṛtyugehasya dhruvamātithyabhāgbhavet |haridrayā naṭādhīśaṃ kṛtvā prāṇān pratiṣṭhipet || 24||

पीतपुष्पैः समभ्यर्च्य स्तोत्रमेतज्जपेन्नरः ।स्तम्भयेत्सकलान्लोकान् किमिहक्षुद्रमानुषान् ॥ २५॥

pītapuṣpaiḥ samabhyarcya stotrametajjapennaraḥ |stambhayetsakalānlokān kimihakṣudramānuṣān || 25||

आकर्षणाय सर्वेषामुत्तराभिमुखोजपेत् ।वाञ्छितायोषितस्सर्वास्तथा लोकान्तरस्थिताः ॥ २६॥

ākarṣaṇāya sarveṣāmuttarābhimukhojapet |vāñchitāyoṣitassarvāstathā lokāntarasthitāḥ || 26||

यक्षाश्च किन्नराश्चापि राजानोवशमाप्नुयुः ।कुम्भस्थितं जलंस्पृष्ट्वा त्रिवारं प्रजपेदिदम् ॥ २७॥

yakṣāśca kinnarāścāpi rājānovaśamāpnuyuḥ |kumbhasthitaṃ jalaṃspṛṣṭvā trivāraṃ prajapedidam || 27||

महाग्रहगणग्रस्तान् अभिषेकञ्चकारयेत् ।जलस्पर्शनमात्रेणमुच्यते च ग्रहादिभिः ॥ २८॥

mahāgrahagaṇagrastān abhiṣekañcakārayet |jalasparśanamātreṇamucyate ca grahādibhiḥ || 28||

किमत्र बहुनोक्तेन सिद्धयन्त्यखिलसिद्धयः ।साक्षान्नटेश्वरो देवो वश्यो भवति तत्क्षणात् ॥ २९॥

kimatra bahunoktena siddhayantyakhilasiddhayaḥ |sākṣānnaṭeśvaro devo vaśyo bhavati tatkṣaṇāt || 29||

अस्मात्परतरासिद्धिः कावास्तिकथयप्रिये ।निष्कामस्याचिरादेव ब्रह्मज्ञानमवाप्यते ॥ ३०॥

asmātparatarāsiddhiḥ kāvāstikathayapriye |niṣkāmasyācirādeva brahmajñānamavāpyate || 30||

तस्मात्सर्वप्रयत्नेन यतिभिर्ब्रह्मचारिभिः ।वनस्थैश्च गृहस्थैश्च सर्वैर्जप्यं प्रयत्नतः ॥ ३१॥

tasmātsarvaprayatnena yatibhirbrahmacāribhiḥ |vanasthaiśca gṛhasthaiśca sarvairjapyaṃ prayatnataḥ || 31||

नित्यकर्मवदेवेदं स्तोत्रं जप्यं सदादरात् ।ब्रह्मादयोऽपि यन्नाम पाठस्यैव प्रसादतः ॥ ३२॥

nityakarmavadevedaṃ stotraṃ japyaṃ sadādarāt |brahmādayo'pi yannāma pāṭhasyaiva prasādataḥ || 32||

सृष्टित्वित्यन्तकर्तारो जगतां चिरजीविनः ।यदिदं मुनयः सर्वे हयग्रीवादयः पुरा ॥ ३३॥

sṛṣṭitvityantakartāro jagatāṃ cirajīvinaḥ |yadidaṃ munayaḥ sarve hayagrīvādayaḥ purā || 33||

पठित्वा परमां सिद्धिं पुनरावृत्तिवर्जिताम् ।प्रापिरे तदिदं स्तोत्रं पठ त्वमपि शैलजे ॥ ३४॥

paṭhitvā paramāṃ siddhiṃ punarāvṛttivarjitām |prāpire tadidaṃ stotraṃ paṭha tvamapi śailaje || 34||

अस्मात्परतरं वेद्यं नास्ति सत्यं मयोदितम् ।॥ इत्युत्तर पीठिका ॥इत्याकाशभैरवकल्पे प्रत्यक्षसिद्धिप्रदे उमामहेश्वरसंवादेपञ्चविंशतिमूर्तिप्रकरणे तत्त्वातीत श्री चिदम्बरनटेश्वर सहस्रनामस्तोत्रमालामहामनोपदशोनाम एकोनषष्टितमोऽध्यायः ।॥ ॐ शिवमस्तु ॥

asmātparataraṃ vedyaṃ nāsti satyaṃ mayoditam ||| ityuttara pīṭhikā ||ityākāśabhairavakalpe pratyakṣasiddhiprade umāmaheśvarasaṃvādepañcaviṃśatimūrtiprakaraṇe tattvātīta śrī cidambaranaṭeśvara sahasranāmastotramālāmahāmanopadaśonāma ekonaṣaṣṭitamo'dhyāyaḥ ||| oṃ śivamastu ||