शिवधर्मानुवर्णनं नारदप्रोक्तम् Naradaproktam Shivadharmanuvarnanam

धर्मैर्पारैः विविधैः यत्फलं लभ्यते जनैः ।तदीशार्चनसम्प्राप्यं लीलयैव न संशयः ॥ १॥

dharmairpāraiḥ vividhaiḥ yatphalaṃ labhyate janaiḥ |tadīśārcanasamprāpyaṃ līlayaiva na saṃśayaḥ || 1||

न बहुद्रव्यविलयो न ह्यायासः शिवार्चने ।प्राप्यन्ते विपुलान्येव विमलानि फलान्यपि ॥ २॥

na bahudravyavilayo na hyāyāsaḥ śivārcane |prāpyante vipulānyeva vimalāni phalānyapi || 2||

बिल्वपल्लवमात्रस्य प्रदाने लिङ्गमस्तके ।यत्फलं प्राप्यते तत्तु न धर्मान्तरकोटिभिः ॥ ३॥

bilvapallavamātrasya pradāne liṅgamastake |yatphalaṃ prāpyate tattu na dharmāntarakoṭibhiḥ || 3||

लिङ्गसृष्टिः कृता पूर्व करुणासागरेण हि ।त्रिशूलपाणिना सेयमुत्कृष्टा सृष्टिद्भुता ॥ ४॥

liṅgasṛṣṭiḥ kṛtā pūrva karuṇāsāgareṇa hi |triśūlapāṇinā seyamutkṛṣṭā sṛṣṭidbhutā || 4||

पुरा कैलासशिखरे सुखासीनं महेश्वरम् ।हिरण्यबाहुमीशानं स्वर्णसुन्दरविग्रहम् ॥ ५॥

purā kailāsaśikhare sukhāsīnaṃ maheśvaram |hiraṇyabāhumīśānaṃ svarṇasundaravigraham || 5||

शरद्राकेश्वराकारदुकूलपरिवेष्टितम् ।उदारतारहाराणां विहारनिकरं परम् ॥ ६॥

śaradrākeśvarākāradukūlapariveṣṭitam |udāratārahārāṇāṃ vihāranikaraṃ param || 6||

जटाजूटतडित्कोटिनिकटेन्दुकलाधरम् ।रत्नाभरणशोभाभिः अभितः परिवेष्टितम् ॥ ७॥

jaṭājūṭataḍitkoṭinikaṭendukalādharam |ratnābharaṇaśobhābhiḥ abhitaḥ pariveṣṭitam || 7||

त्रिलोचनं नीलकण्ठं सोत्कण्ठं गिरिजानने ।अप्रमेयमनाद्यन्तं सच्चिदानन्दलक्षणम् ॥ ८॥

trilocanaṃ nīlakaṇṭhaṃ sotkaṇṭhaṃ girijānane |aprameyamanādyantaṃ saccidānandalakṣaṇam || 8||

परमानन्ददं शान्तं मङ्गलानां च मङ्गलम् ।पवित्राणां पवित्रं च दैवतानां च दैवतम् ॥ ९॥

paramānandadaṃ śāntaṃ maṅgalānāṃ ca maṅgalam |pavitrāṇāṃ pavitraṃ ca daivatānāṃ ca daivatam || 9||

अप्रधृष्यं भवं भीमं जरामरणवर्जितम् ।महामृत्युञ्जयं शर्वं महारुद्रं पिनाकिनम् ॥ १०॥

apradhṛṣyaṃ bhavaṃ bhīmaṃ jarāmaraṇavarjitam |mahāmṛtyuñjayaṃ śarvaṃ mahārudraṃ pinākinam || 10||

भक्तानन्दप्रदं भव्यं दिव्यं विषविभूषितम् ।स्मरणेनापि भक्तानां सर्वाभीष्टप्रदायकम् ॥ ११॥

bhaktānandapradaṃ bhavyaṃ divyaṃ viṣavibhūṣitam |smaraṇenāpi bhaktānāṃ sarvābhīṣṭapradāyakam || 11||

गौरीविहारनिरतं प्रसन्नवदनं प्रभुम् ।शम्भुं विलोक्य गिरिजा प्राह तद्वामभागगा ॥ १२॥

gaurīvihāranirataṃ prasannavadanaṃ prabhum |śambhuṃ vilokya girijā prāha tadvāmabhāgagā || 12||

॥ इति शिवरहस्यान्तर्गते नारदप्रोक्तं शिवधर्मानुवर्णनं सम्पूर्णम् ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ३४। २७३८ ॥

|| iti śivarahasyāntargate nāradaproktaṃ śivadharmānuvarṇanaṃ sampūrṇam |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 34| 2738 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः ३४। २७-३८ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 34| 27-38 ||