शिवधर्मानुवर्णनं नन्दिकेशप्रोक्तम् Nandikeshaproktam Shivadharmanuvarnanam

आराधनं च भवति करोति भगवानापि ।सन्तुष्टो येन भगवान् सौभाग्यं स्थिरतामियात् ॥ १॥

ārādhanaṃ ca bhavati karoti bhagavānāpi |santuṣṭo yena bhagavān saubhāgyaṃ sthiratāmiyāt || 1||

इत्युक्त्वा सोऽपि सन्तुष्टो भोगारम्भसमावृतः ।शिवार्चनपरो नित्यं शिवनामरतोऽभवत् ॥ २॥

ityuktvā so'pi santuṣṭo bhogārambhasamāvṛtaḥ |śivārcanaparo nityaṃ śivanāmarato'bhavat || 2||

तेनाप्युन्नतमुत्कृष्टं कारितं रत्नमन्दिरम् ।तस्य नार्मदलिङ्गस्य सर्वाभरणभूषितम् ॥ ३॥

tenāpyunnatamutkṛṣṭaṃ kāritaṃ ratnamandiram |tasya nārmadaliṅgasya sarvābharaṇabhūṣitam || 3||

मणिमालासमाक्रान्तं रत्नप्राकारसंयुतम् ।स पञ्चामृतकुल्याभिः चक्रे लिङ्गाभिषेचनम् ॥ ४॥

maṇimālāsamākrāntaṃ ratnaprākārasaṃyutam |sa pañcāmṛtakulyābhiḥ cakre liṅgābhiṣecanam || 4||

दिव्यनीरप्रवाहैश्च शीतलैर्गन्धसंयुतैः ।कस्तूरीघनसारादिनानाद्रव्यसमन्वितैः ॥ ५॥

divyanīrapravāhaiśca śītalairgandhasaṃyutaiḥ |kastūrīghanasārādinānādravyasamanvitaiḥ || 5||

चन्दनं च घनीभूतं दिव्यगन्ध समन्वितम् ।दत्तमीशाय तेनैव रत्नैरभ्यर्चितः शिवः ॥ ६॥

candanaṃ ca ghanībhūtaṃ divyagandha samanvitam |dattamīśāya tenaiva ratnairabhyarcitaḥ śivaḥ || 6||

गोघृतेनैव दिव्येन दीपमालाः कृताः खलु ।ताभिः प्रभान्वितं जातं सर्व ब्रह्माण्डमण्डलम् ॥ ७॥

goghṛtenaiva divyena dīpamālāḥ kṛtāḥ khalu |tābhiḥ prabhānvitaṃ jātaṃ sarva brahmāṇḍamaṇḍalam || 7||

बिल्वमन्दारकुसुमैः कमलैरमलैरपि ।अन्यैश्च विविधैः पुष्पैः गन्धासारसमन्वितैः ॥ ८॥

bilvamandārakusumaiḥ kamalairamalairapi |anyaiśca vividhaiḥ puṣpaiḥ gandhāsārasamanvitaiḥ || 8||

सुवर्णपुष्पमालाभिः नानारत्नसमन्वितैः ।मुक्ताहारैरविरलैः नीलमालाभिरादरात् ॥ ९॥

suvarṇapuṣpamālābhiḥ nānāratnasamanvitaiḥ |muktāhārairaviralaiḥ nīlamālābhirādarāt || 9||

बिल्वपल्लवमालाभिरमलाभिर्विशेषतः ।अतुलाभिरमूल्याभिः पूजयामास शङ्करम् ॥ १०॥

bilvapallavamālābhiramalābhirviśeṣataḥ |atulābhiramūlyābhiḥ pūjayāmāsa śaṅkaram || 10||

नानाविधैर्धूपदीपैः धूपयित्वा सदाशिवम् ।नैवेद्यं कल्पयामास स चान्नैर्विविधैरपि ॥ ११॥

nānāvidhairdhūpadīpaiḥ dhūpayitvā sadāśivam |naivedyaṃ kalpayāmāsa sa cānnairvividhairapi || 11||

परमान्नप्रवाहैश्च शर्कराज्यसमन्वितैः ।वटकाद्यैर्भक्षसङ्घैः अपारैर्मधुरैरपि ॥ १२॥

paramānnapravāhaiśca śarkarājyasamanvitaiḥ |vaṭakādyairbhakṣasaṅghaiḥ apārairmadhurairapi || 12||

नारिकेलजलानां च प्रवाहैः शीतर्लैजलैः ।एलालवङ्गसंयुक्तैः ताम्बूलैरमलैरपि ॥ १३॥

nārikelajalānāṃ ca pravāhaiḥ śītarlaijalaiḥ |elālavaṅgasaṃyuktaiḥ tāmbūlairamalairapi || 13||

रत्नछत्रैश्चामरैश्च दुकूलैर्दर्पणैरपि ।प्रणामैरपि नाट्यैश्च तोषयामास शङ्करम् ॥ १४॥

ratnachatraiścāmaraiśca dukūlairdarpaṇairapi |praṇāmairapi nāṭyaiśca toṣayāmāsa śaṅkaram || 14||

दिव्यान्नैः शिवनैवेद्यैः तोषयामास कोटिशः ।शाम्भवाग्रेसरानेव ददौ तेभ्यो धनान्यपि ॥ १५॥

divyānnaiḥ śivanaivedyaiḥ toṣayāmāsa koṭiśaḥ |śāmbhavāgresarāneva dadau tebhyo dhanānyapi || 15||

गोसहस्राणि दत्तानि शैवेभ्यस्तेन सादरम् ।विविधान्यपि धान्यानि तेभ्यो दत्तानि तेन तु ॥ १६॥

gosahasrāṇi dattāni śaivebhyastena sādaram |vividhānyapi dhānyāni tebhyo dattāni tena tu || 16||

प्रत्यहं दृढया भक्त्या पूजामेवं विधाय सः ।आसायमुपवासेन निशि भुङ्क्ते शिवार्चकः ॥ १७॥

pratyahaṃ dṛḍhayā bhaktyā pūjāmevaṃ vidhāya saḥ |āsāyamupavāsena niśi bhuṅkte śivārcakaḥ || 17||

एवं संवसतस्तस्य द्रष्टुं सर्वं शिवोत्सवम् ।सनकाद्यैः सहानन्तर्मुनिभिरदो ययौ ॥ १८॥

evaṃ saṃvasatastasya draṣṭuṃ sarvaṃ śivotsavam |sanakādyaiḥ sahānantarmunibhirado yayau || 18||

स दूरेणैव तान् दृष्ट्वा भस्मोद्धूलितविग्रहान् ।रुद्राक्षमालाभरणान् हृष्टः सादरमास्तिकः ॥ १९॥

sa dūreṇaiva tān dṛṣṭvā bhasmoddhūlitavigrahān |rudrākṣamālābharaṇān hṛṣṭaḥ sādaramāstikaḥ || 19||

तानागतान् प्रयत्नेन नत्वा भक्तिपुरस्सरम् ।पूजां विधाय विहितां रत्नसिंहासनस्थितान् ॥ २०॥

tānāgatān prayatnena natvā bhaktipurassaram |pūjāṃ vidhāya vihitāṃ ratnasiṃhāsanasthitān || 20||

स्वयं च भस्मोद्धूल्य सर्वाङ्गान्यपि भक्तितः ।रुद्राक्षमालाभरणः पप्रच्छ शिववैभवम् ॥ २१॥

svayaṃ ca bhasmoddhūlya sarvāṅgānyapi bhaktitaḥ |rudrākṣamālābharaṇaḥ papraccha śivavaibhavam || 21||

महेश्वराराधनस्य प्रकारः कः परः श्रुतः ।किं तत्फलं चाधिकारी के वा तन्मे वदन्तु वा ॥ २२॥

maheśvarārādhanasya prakāraḥ kaḥ paraḥ śrutaḥ |kiṃ tatphalaṃ cādhikārī ke vā tanme vadantu vā || 22||

॥ इति शिवरहस्यान्तर्गते नन्दिकेशप्रोक्तं शिवधर्मानुवर्णनं सम्पूर्णम् ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ३४। ३२४ ॥

|| iti śivarahasyāntargate nandikeśaproktaṃ śivadharmānuvarṇanaṃ sampūrṇam |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 34| 324 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः ३४। ३-२४ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 34| 3-24 ||